news

మంత్రి నారా లోకేష్ కు వరల్డ్ ఎకనామిక్ ఫోరం ప్రత్యేక ఆహ్వానం పంపిచింది. చైనా లో సెప్టెంబర్ 18 నుండి 20 వరకూ జరిగే వరల్డ్ ఎకనామిక్ ఫోరం న్యూ ఛాంపియన్స్ వార్షిక సమావేశాలకు హాజరు కావాలి అని మంత్రి లోకేష్ కి ఆహ్వానం వచ్చింది.  దేశంలో ఇద్దరు మంత్రులకు మాత్రమే ఆహ్వానం పంపిన వరల్డ్ ఎకనామిక్ ఫోరం. వరల్డ్ ఎకనామిక్ ఫోరం న్యూ ఛాంపియన్స్ వార్షిక సమావేశాల్లో మన దేశం తరపున మంత్రి నారా లోకేష్ కి మాత్రమే మాట్లాడే అవకాశం.

3 రోజుల పాటు 11 ముఖ్య సమావేశాల్లో పాల్గొని ఆంధ్రప్రదేశ్ లో పెట్టుబడులు పెట్టేందుకు ఉన్న అనువైన పరిస్థితుల గురించి వివరించనున్నారు. వరల్డ్ ఎకనామిక్ ఫోరం బోర్డ్ మెంబెర్స్ తో మంత్రి నారా లోకేష్ ప్రత్యేకంగా భేటీ కాబోతున్నారు. సెప్టెంబర్ 17 నుండి 22 వ తారీఖు వరకూ మంత్రి నారా లోకేష్ చైనా లో పర్యటించనున్నారు. వరల్డ్ ఎకనామిక్ ఫోరం సమావేశంలో పాల్గొనడంతో పాటు, పలు ఎలక్ట్రానిక్ కంపెనీల ప్రతినిధులను కలవనున్నారు. పలు ఎలక్ట్రానిక్స్ తయారీ కంపెనీలతో ఒప్పందం..పలు కీలక ప్రకటనలు ఉండబోతున్నాయి.

ముఖ్యమంత్రి చంద్రబాబు నాయుడు పోలవరం పర్యటనలో అపశృతి చోటుచేసుకుంది. చంద్రబాబు తన కుటుంబసభ్యులతో, ప్రజాప్రతినిధులతో కలిసి పోలవరంలో పర్యటించారు. ఈ సందర్భంగా పోలవరం గ్యాలరీని ప్రారంభించారు. ఈ పర్యటనలో మంత్రి ప్రత్తిపాటి పుల్లారావు కాన్వాయ్‌లోని కారు బోల్తా కొట్టింది. వర్షం కారణంగా కారు టైర్లు జారడంతో కారు పల్టీ కొట్టింది. ఈ ఘటనలో కారు కొండవైపుకు పడటంతో ప్రమాదం తప్పింది. ఈ ప్రమాదంలో పలువురు టీడీపీ నేతలకు స్పల్ప గాయాలయ్యాయి.

మంత్రి పుల్లారావు ఘటనాస్థిలి పరిశీలించారు. సమాచారం అందుకున్న సీఎం చంద్రబాబు ప్రమాదం గురించి పుల్లారావును అడిగితెలుసుకున్నారు. ప్రమాదంపై విచారణ చేపట్టాలని సీఎం ఆదేశించారు. అంతకుముందు ఆంధ్రప్రదేశ్ రాష్ట్ర ప్రజా ప్రతినిధుల పోలవరం పర్యటనలో అపశృతి చోటు చేసుకున్న విషయం తెలిసిందే. దెందులూరు సమీపంలో ఓ బస్సు మట్టిలో దిగబడిపోయింది. దీంతో ఎమ్మెల్యేలు, ఎమ్మెల్సీలు వేరే వాహనాల్లో పోలవరానికి బయలుదేరి వెళ్లారు.

పోలవరం గ్యాలరీ వాక్‌ను ముఖ్యమంత్రి చంద్రబాబు ప్రారంభించారు. బుధవారం ఉదయం 10.05 గంటలకు గ్యాలరీ వాక్‌కు ముహూర్తం నిర్ణయించారు. 20 నిమిషాలు ముందుగా, 9.45 గంటలకల్లా మంత్రులు, ఎమ్మెల్యేలు పోలవరం ప్రాంతానికి చేరుకోవాలని సీఎంవో మంగళవారం ఆహ్వానాలు పంపింది. దీంతో మంత్రులు, ఎమ్మెల్యేలు, ఎమ్మెల్సీలు, ఎంపీలు 8 బస్సుల్లో పోలవరం యాత్రకు బయల్దేరారు.

రాజధానిపై భాజపా, వైకాపా అనవసర రాద్ధాంతం చేస్తున్నాయని ముఖ్యమంత్రి చంద్రబాబు నాయుడు మండిపడ్డారు. అసెంబ్లీ, సచివాలయంలో నీరు లీకవుతోందంటూ దుష్ప్రచారం చేస్తున్నారని దుయ్యబట్టారు. నాణ్యతలో తేడా ఎక్కడుందో చూపాలని సవాలు విసిరారు. రాజధానిపై భాజపా ఎందుకంత విషం కక్కుతోందని ప్రశ్నించారు. ఎవరెన్ని కుట్రలు పన్నినా అమరావతిని ప్రపంచంలోని ఐదు అత్యుత్తమ నగరాల్లో ఒకటిగా తీర్చిదిద్దుతామని స్పష్టం చేశారు. ‘రాజధాని నగర నిర్మాణం, ప్రధాన మౌలిక సదుపాయాల అభివృద్ధి’పై మంగళవారం శాసనసభలో జరిగిన లఘు చర్చలో ఆయన మాట్లాడారు.

‘రాజధాని ఆకృతులను తీసుకెళ్లి చూపించినా ప్రధాని మోదీ ఆసక్తి కనబరచలేదు. మోదీ 12 ఏళ్లు ముఖ్యమంత్రిగా ఉన్నా అహ్మదాబాద్‌ అలాగే ఉంది. నేనుతొమ్మిదేళ్లు ముఖ్యమంత్రిగా పనిచేసి హైదరాబాద్‌, సికింద్రాబాద్‌ సరసన సైబరాబాద్‌ను తయారుచేశా.. సిటీ కోర్టు భవనం డిసెంబరు నాటికి పూర్తవుతుంది. ఆ సమయానికి హైకోర్టు ఇక్కడకు వచ్చేలా ఏర్పాట్లు చేయాలని ఇటీవలే లేఖ రాశా. అయినా కోర్టు విషయంలో రాజకీయం చేస్తారా? అదే హైకోర్టులో పెడతాం అని సుప్రీంకోర్టులో కౌంటరు దాఖలు చేస్తారా? దీన్నేమనాలి?

అమరావతి మ్యాపులు ఇంకా సింగపూర్‌లోనే ఉన్నాయని భాజపా అధ్యక్షుడు అమిత్‌షా అంటున్నారు.. ఇక్కడేమో భవనాలు అంతస్తులకు అంతస్తులే పైకి లేస్తున్నాయి. తలెత్తి చూడాల్సి వస్తోంది. రాజధాని నిర్మాణంవల్ల కేంద్ర ప్రభుత్వానికే ఆదాయం వస్తుంది. మేం పన్నులు కట్టాలి.. మీరు పెత్తనం చేస్తారా? అప్పటి బ్రిటిష్‌ ప్రభుత్వానికి, ఇప్పటి కేంద్రానికి తేడా ఏమైనా ఉందా? రెండు రాష్ట్రాల మధ్య ద్వేషాలు సృష్టించాలని మోదీ ప్రయత్నిస్తున్నారు. ప్రతిపక్ష నేత జగన్‌ అమరావతిపై ఎన్ని రకాలుగా దుష్ప్రచారం చేయాలో అన్ని రకాలుగా చేస్తున్నారు. కొండవీటివాగు, పాలవాగు వరదతో మునిగిపోతుందని అసత్య ప్రచారం చేస్తున్నారు. సీలింగ్‌ పైపులను వాళ్లే తొలగించి నీరు లోపలకు వచ్చిందన్నారు. పంటలకు నిప్పు పెట్టి తెదేపా చేసిందని చెబుతున్నారు.’ అని ముఖ్యమంత్రి పేర్కొన్నారు.