news

ఆంధ్రప్రదేశ్ రాష్ట్రంలో ప్రజాస్వామ్యం నడి బజారులో అపహాస్యం అవుతున్న విషయం తెలిసిందే. ప్రజాస్వామ్యానికి వెన్నుముక లాంటి ఎన్నికలను కూడా, తమ సొంత పంచాయతీ లాగా చేసి పడేసారు. నామినేషన్ వేయటమే గగనంగా మార్చారు. ధైర్యం చేసి నామినేషన్ వేసినా, అధికార బలంతో, ఆ నామినేషన్ తిరస్కరించేస్తున్నారు. తాజాగా జరుగుతున్న 12 పురపాలక సంఘాల ఎన్నికల విషయంలో కూడా అధికార వైఎస్ఆర్ కాంగ్రెస్ పార్టీ చేస్తున్న అరాచకాలు అన్నీ ఇన్నీ కావు. నామినేషన్ వేసిన టిడిపి వాళ్ళకు చుక్కలు చూపిస్తున్నారు. చిన్న చిన్న కారణాలు చూపించి నామినేషన్లు తిరస్కరిస్తుంటే, కొన్ని చోట్ల ఫోర్జరీ సంతకాలతో తిరస్కరిస్తున్నారు. దీనికి ప్రధానంగా వీరి ధైర్యం ఏమిటి అంటే, ఒక్కసారి ఎన్నికల ప్రక్రియ మొదలు అయితే మాత్రం, అందులో కోర్టులు జోక్యం చేసుకోవు. ఎలాంటి ఇబ్బందులు పడినా, రాష్ట్ర ఎన్నికల కమిషన్ వద్దే తేల్చుకోవాల్సి ఉంటుంది. ఈ నిబంధన ఆసరాగా తీసుకుని అధికార పార్టీ చెలరేగి పోతుంది. తాజాగా, నెల్లూరు, రాజంపేటలో ఇలాగే టిడిపి నేతల నామినేషన్లను చిన్న చిన్న కారణాలు చూపించి తిరస్కరించారు. అయితే దీని పైన తెలుగుదేశం పార్టీ అభ్యర్ధులు, హైకోర్టులో పిటీషన్ దాఖలు చేసి, తమకు న్యాయం చేయాలని కోరారు.

ఈ పిటీషన్ పై నిన్న హైకోర్టులో విచారణ జరిగింది. సరైన కారణాలు లేకుండా, చిన్న చిన్న అంశాలు సాకుగా చూపిస్తూ నామినేషన్లను తిరస్కరించటం పై, రిటర్నింగ్‌ అధికారులు మీద హైకోర్టు తీవ్ర ఆగ్రహం వ్యక్తం చేసింది. చిన్న చిన్న కారణాలతో నామినేషన్ ను తిరస్కరించటం ఏమిటి అంటూ హైకోర్టు ఆగ్రహం వ్యక్తం చేసింది. చివరకు నామినేషన్ ఎప్పుడు తిరస్కరించారో కూడా, వాటి పైన డేట్ వేయలేదని హైకోర్టు ఆగ్రహం వ్యక్తం చేసింది. రిటర్నింగ్‌ అధికారులు తాము ప్రభుత్వ ఉద్యోగులము అనే విషయం మర్చిపోయారా అంటూ, హైకోర్టు ఆగ్రహం వ్యక్తం చేసింది. రిటర్నింగ్‌ అధికారులు పై హైకోర్టు ఘాటు వ్యాఖ్యలు చేసింది. రిటర్నింగ్‌ అధికారులను కూడా ప్రతివాదులుగా చేర్చితే వారికి నోటీసులు ఇచ్చి వివరణ కోరతాం అని కోర్టు చెప్పింది. అయితే నామినేషన్లు పరిగణలోకి తీసుకునే విషయంలో తాము ఏదీ చేయలేం అని, ఇప్పటికీ ఎన్నికల ప్రక్రియ మొదలైంది కాబట్టి, రాష్ట్ర ఎన్నికల కమిషన్ దగ్గరే ఈ విషయం తేల్చుకోవాలని, లేదంటే ఎన్నికల పిటీషన్ దాఖలు చేయాలని కోర్ట్ ఆదేశించింది.

చిత్తూరు జిల్లా కుప్పంలో, నగర పంచాయతీ ఎన్నికలు జరుగుతున్న సందర్భంగా, తెలుగుదేశం పార్టీ నేతలు మునిసిపల్ కార్యాలయాలు ముట్టడించారు అని వాళ్ళ అందరి పైనా కేసులు నమోదు చేసారు. మాజీ మంత్రులు అమర్నాద్ రెడ్డి, పులవర్తి నాని, పాలకొల్లు ఎమ్మెల్యే నిమ్మల రామానాయుడు, మరి కొంత మంది నేతలు, మొత్తం 19 మంది నేతల పై కేసులు నమోదు చేసారు. ఈ కేసులు ఉండగా, కుప్పం పురపాలక సంఘంలో, ప్రచారం చేసేందుకు వీలు లేదని చెప్పి, గత రాత్రి టిడిపి నేతలు అందరినీ కూడా పోలీసులు అదుపులోకి తీసుకున్నారు. అమర్నాద్ రెడ్డి, పులవర్తి నాని చిత్తూరులో వారి స్వగృహాలలో దింపేసారు. అలాగే ఎమ్మెల్యే నిమ్మల రామానాయుడుని కూడా చిత్తూరులో వదిలేసారు. అయితే అమర్నాద్ రెడ్డి అక్కడ నుంచి తప్పించుకుని మళ్ళీ కుప్పం చేరుకున్నారు. అయితే టిడిపి నేతలు కుప్పం వస్తే మళ్ళీ వారిని అరెస్ట్ చేస్తారని, తెలుగుదేశం పార్టీ నేతలకు ముందస్తు సమాచారం ఉండటంతో, ఈ రోజు హైకోర్టులో తమను అరెస్ట్ చేయకుండా, బెయిల్ ఇవ్వాలని పిటీషన్ మూవ్ చేసారు. ఈ పిటీషన్, లంచ్ మోషన్ పిటీషన్ గా మూవ్ చేయగా, ఈ రోజు మధ్యానం తరువాత లంచ్ మోషన్ పిటీషన్ పై వాదనలు విన్నారు.

ఈ వాదనలు విన్న అనంతరం, హైకోర్టు కొద్ది సేపటి క్రితం ఆదేశాలు ఇస్తూ, వీరిని అరెస్ట్ చేయవద్దు అంటూ ఆదేశాలు ఇచ్చింది. పోలీసులు తప్పనిసరిగా చట్టపరమైన ప్రక్రియ పాటించి తీరాల్సిందే అనే ఆదేశాలు జారీ చేసింది, హైకోర్టు. ఏ చర్య అయినా ప్రక్రియ ప్రకారమే జరగాలని స్పష్టం చేసింది. మరో పక్క కుప్పం 14వ వార్డు అభ్యర్ధి, తాను ఎక్కడో 300 కిమీ దూరంలో ఉన్నానని, తన నామినేషన్ ఫోర్జరీ సంతకాలతో ఉపసంహరించుకున్నారని చెప్పటంతో, టిడిపి నేతలు మునిసిపల్ కమీషనర్ కార్యాలయంలో నిరసన తెలిపారు. ఇక దొరికిందే చాన్స్ అనుకున్న అక్కడ వైసీపీ పెద్దల ఆదేశాలతో, టిడిపి నేతల పై కేసులు పెట్టారు. దీంతో నిన్న రాత్రి టిడిపి నేతలను కుప్పంలో ఉండటానికి వీలు లేదని చెప్పారు. టిడిపి నేతలు కుప్పం ఎన్నికల ప్రచారంలో పాల్గునకుండా ఉండేందుకు ఈ చర్యలకు పాల్పడుతున్నారు అంటూ, టిడిపి ఆరోపించింది. కుప్పం వస్తే పోలీసులు అరెస్ట్ చేస్తారనే సమాచారం ఉండటంతో, హైకోర్ట్ నుంచి అనుమతి తెచ్చుకున్నారు.

జగన్ మోహన్ రెడ్డి వ్యవహార శైలి అందరికీ తెలిసిందే. తన మాటే వినాలని, ఆప్షన్ లేదని, ఎవరైనా హక్కులు అంటూ మాట్లాడితే, వారికి ఎలా షాక్ ఇవ్వాలో అలా ఇస్తారు. మాస్కు అడిగిన డాక్టర్ సుధాకర్ దగ్గర నుంచి నిన్న ఉద్యోగ సంఘాలకు జరిగిన పరాభవం దాకా, ఇలాంటి సంఘటనలు అనేకం ఉన్నాయి. నిన్న ఉద్యోగ సంఘాల నేతలకు జగన్ మార్క్ షాక్ తగిలింది. ఉద్యోగులకు రావాల్సిన పీఆర్సీ నివేదిక ఇస్తాం రమ్మని ఉద్యోగ సంఘాలను పిలిచి అవమానించారు అంటూ, ఉద్యోగ సంఘాల నేతలు ఆగ్రహం వ్యక్తం చేస్తున్నారు. పోయిన సారి జరిగిన మీటింగ్ లో, వారం రోజుల్లో నివేదిక ఇస్తాం అన్నారని, ఎన్ని రోజులు అయినా నివేదిక బయట పెట్టకపోవటంతో, గట్టిగా అడిగితే, బుధవారం రమ్మన్నారని, అందుకే సచివాలయానికి వచ్చామని ఉద్యోగ సంఘాల నేతలు తెలిపారు. అయితే ప్రభుత్వం వైపు నుంచి ఎలాంటి చలనం లేదు. చీఫ్ సెక్రటరీ ఇప్పుడే వస్తానని, సియం వద్దకు వెళ్ళారని, ఆయన తమకు పీఆర్సి నివేదిక ఇచ్చే వరకు ఇక్కడ నుంచి వెళ్ళేది లేదని ఉద్యోగ సంఘాల నేతలు సచివాలయం ఆవరణలోనే కూర్చుని నిరసన తెలిపారు. ఒక గంట అయ్యింది, రెండు గంటలు అయ్యాయి, చివరకు రాత్రి 9 అయ్యింది. అయినా ఎవరూ ఉద్యోగ సంఘాల నేతలను పిలవలేదు.

చీఫ్ సెక్రటరీ అంత సేపు సియం క్యాంప్ ఆఫీస్ లో ఉండే అవకాసం లేదు. ఉన్నతాధికారులకు ఫోనులు చేసారు. అటు వైపు నుంచి ఎలాంటి స్పందన లేదు. ఆరు గంటలు గడిచి పోయాయి. ఇక తమను ఎవరూ పట్టించు కోవటం లేదు అనే విషయం ఉద్యోగ సంఘాల నేతలకు అర్ధం అయ్యింది. చివరకు ఆరు గంటలు వేచి చూసిన ఉద్యోగ సంఘాల నాయకులు, చేసేది ఏమి లేక, అక్కడ ఉన్న సిబ్బంది , పోలీసుల కూడా వెళ్ళిపోవాలని కోరటంతో, రాత్రి 9 తరువాత వెనుదిరిగారు. ఈ రోజు తమ కార్యాచరణ ప్రకటిస్తామని, ప్రభుత్వం పై ఆగ్రహం వ్యక్తం చేసారు. ఈ ప్రభుత్వం రావాలని, కుడి చేత్తో, ఎడమ చేత్తో ఓట్లు వేశామని అన్నారు. తమను ప్రభుత్వం చిన్న చూపు చూస్తుందని, ఈ రోజు అన్ని సంఘాలతో కలిసి భవిష్యత్తు కార్యాచరణ ప్రకతిస్తామాని, అవసరం అయితే విధులు కూడా బహిష్కరిస్తామని అగ్రహ వ్యక్తం చేసారు. మొత్తానికి రెండు చేతులతో ఓట్లు వేసి జగన్ ను గెలిపించాం అని చెప్తున్న ఉద్యోగ సంఘాల నేతలకు, జగన్ మార్క్ షాక్ నిన్న గట్టిగానే తగిలింది.