news

రాష్ట్రంలో పనిచేస్తున్న సివిల్ సర్వీసు అధికారులు పాలన గాలికొదిలి రాజకీయాల బాట పడుతున్నారు. గతంలో పదవీ విరమణ చేసినవాళ్లు, స్వచ్ఛంద పదవీ విరమణ చేసిన వాళ్లు ఏదో ఒక పార్టీలో చేరి పోటీ చేసిన సందర్భాలున్నాయి. వైసీపీ అధికారంలోకి వచ్చాక ట్రెండ్ మారింది. ప్రభుత్వంలో కీలకపెద్దలు చెప్పినట్టల్లా నిర్ణయాలు తీసుకుంటూ వారికి ఇష్టులుగా మారారు. ఇప్పుడు వచ్చే ఎన్నికల్లో వైసీపీ అభ్యర్థులుగా రంగంలోకి దిగేందుకు ఉవ్విళ్లూరుతున్నారు. ఇటీవల పదవీ విరమణ చేసిన ఓ ఐఏఎస్ మొదటి నుంచీ వైఎస్ కుటుంబంతో సత్సంబంధాలు కొనసాగిస్తున్నారు. ఈయన ప్రకాశం జిల్లాలోని ఓ అసెంబ్లీ నియోజకవర్గం నుంచి పోటీ  చేసేందుకు వైసీపీ టికెట్ ప్రయత్నిస్తున్నారట. పోలీసుశాఖలో కీలకపదవిలో వున్న ఐపీఎస్ కూడా వివిధ అవగాహన కార్యక్రమాలు నిర్వహిస్తూ వైసీపీ టికెట్ రేసులో వున్నారట. సీఎంవోలో వుంటూ సీఎం జిల్లా, సామాజికవర్గానికి చెందిన అధికారి కడప జిల్లా నుంచి పోటీ చేసేందుకు ఉవ్విళ్లూరుతున్నారు. డిప్యుటేషన్ పై వచ్చిన అధికారులు కూడా వచ్చే ఎన్నికల్లో వైసీపీ టికెట్ కోసం ఇప్పటి నుంచే పోటీ పడుతున్నారు. రాజకీయాలలో ప్రవేశించేందుకు ఇంతగా ఆసక్తి చూపించడానికి గల కారణాలు...వైసీపీ ప్రభుత్వం వచ్చే ఎన్నికల్లో ఓడిపోతే ఇప్పటి అక్రమాలలో భాగమైన తాము కేసుల్లో ఇరుక్కుంటే రాజకీయ పదవులు రక్షణగా వుంటాయనే ఆలోచన ప్రధానమని విశ్లేషకులు అంచనా వేస్తున్నారు.

తెలంగాణ రాష్ట్రంలో స్తబ్దుగా ఉన్న తెలుగుదేశం పార్టీలో నూతనోత్తేజం నెలకొంది. టిడిపి అధ్యక్షుడు బక్కని నర్సింహులు స్థానంలో కాసాని జ్కానేశ్వర్ ని నియమించడంతో ఒక్కసారిగా రాష్ట్రవ్యాప్తంగా తెలుగుదేశం పార్టీలో చలనం మొదలైంది. ఇప్పటివరకూ కార్యక్రమాలు నిర్వహిస్తున్న అవి ఫోకస్ కాలేదు. దీంతోపాటు ఇప్పటివరకూ పార్టీ నుంచి బయటకు వెళ్లేవారే కానీ, వచ్చేవారు పెద్దగా లేరు. ఇటీవలకాలంలో లీడర్ల నుంచి కేడర్ వరకూ భారీగా టిడిపిలో చేరేందుకు క్యూకడుతున్నారు. టిడిపి నుంచి వెళ్లి ఇతర పార్టీలలో ఇబ్బందులు పడుతున్న బడానేతలు కూడా టిడిపి వైపు చూస్తున్నారని సమాచారం. తెలంగాణలో అధికారంలోకి వస్తాం అనే పెద్ద మాటలు నేతలు చెబుతున్నంత లేకపోయినా గెలుపు ఓటములు శాసించే స్థాయి చాలా నియోజకవర్గాలలో ఉంది.

ఇదే సమయంలో ముందస్తు ఎన్నికల కోలాహలం నెలకొంది. రాజకీయ పార్టీలు అటు నుంచి ఇటు..ఇటు నుంచి అటు జంపింగ్లు మొదలయ్యాయి. టిడిపిలో చేరికలు జోరందుకున్నాయి. హైదరాబాద్ జంట నగరాలు, రంగారెడ్డి జిల్లాల నుంచి 500 మంది నాయకులు టిడిపిలో చేరారు. బీఆర్ఎస్, కాంగ్రెస్ పార్టీలకు రాజీనామా చేసి తెలంగాణ టిడిపి అధ్యక్షుడు కాసాని జ్ఞానేశ్వర్ ఆధ్వర్యంలో వివిధ నియోజకవర్గ నాయకులు టిడిపిలో చేరారు. తెలంగాణా తెలుగుదేశం స్పీడ్ అందుకోవటం వెనుక వ్యూహం ఎవరికీ అంతుబట్టటం లేదు. తెలంగాణాలో టిడిపితో పొత్తు పెట్టుకునే విషయం పై బీజేపీ ఆలోచిస్తున్న సమయంలో, టిడిపి తన బలాన్ని చూపిస్తుంది. తెలంగాణాలో మారే సమీకరణల ప్రభావం ఆంధ్రప్రదేశ్ పై పడితే, తెర వెనుక వైసీపీతో స్నేహం చేస్తున్న ఏపి బీజేపీ నేతలకు ఇబ్బందే మరి.

ఆంధ్రప్రదేశ్ రాష్ట్ర పరువు మరోసారి జాతీయ స్థాయిలో పోయింది. కేరళ రాష్ట్రానికి చెందిన సిపిఐ పార్టీ ఎంపీ బినోయ్ విశ్వం, జగన్ మోహన్ రెడ్డి సొంత జిల్లా కడపకు వచ్చి అక్కడ పరిస్థితి చూసి షాక్ తిని, వెంటనే జగన్ కు లేఖ రాసారు. ఆ లేఖ జాతీయ స్థాయిలో వైరల్ అవ్వటంతో, రాష్ట్ర పరువు పోయింది. కేరళ ఎంపీ విశ్వం, ఏపి సిపిఐ నిర్వహిస్తున్న కడప స్టీల్ ప్లాంట్ నిరసన కార్యక్రమంలో పాల్గునటానికి వచ్చారు. జగన్ మోహన్ రెడ్డి ఇచ్చిన వాగ్దానం ప్రకారం, స్టీల్ ప్లాంట్ నిర్మాణం చేయాలని పాదయాత్రలో పాల్గున్నారు. అయితే తుఫాన్ ప్రభావం కడప పై ఎక్కువగా ఉండటంతో, కార్యక్రమం వాయిదా పడింది. అయితే సిపిఐ నేతలతో కలిసి, తుఫాన్ ప్రభావిత ప్రాంతాల్లో పర్యటించి, అక్కడ పరిస్థితి చూసి షాక్ తిన్నారు. తుఫాన్ వస్తుందని కనీస సన్నద్ధత రాష్ట్ర ప్రభుత్వానికి లేదని జగన్ కు లేఖ రాసారు. అంతే కాదు, కడప కలెక్టర్ ని కలవటానికి అనేక సార్లు ప్రయత్నం చేసామని, కలెక్టర్ కనీసం అందుబాటులోకి రాలేదని అన్నారు.

సరే అని మేమే కలెక్టర్ క్యాంప్ ఆఫీస్ కు వెళ్తే అక్కడ ఎవరూ లేరని, ఆ పక్కనే మరో బిల్డింగ్ లో కేవలం ముగ్గురు మాత్రమే విపత్తు నిర్వహణ కేంద్రంలో ఉండటం చూసి షాక్ తిన్నామని అన్నారు. అయితే అక్కడ వారిని అడగ్గా, రెండో శనివారం కావటంతో, ఎవరూ రాలేదని చెప్పారని, దానికి తాను తుఫాన్ కి రెండో శనివారం అని తెలియక వచ్చందని సమాధానం చెప్పినట్టు చెప్పారు. మీ సొంత జిల్లాలో ఇలాంటి పరిస్థితి చూసి షాక్ తిన్నానని, ఇప్పటికైనా సరైన చర్యలు తీసుకోవాలి అంటూ , కేరళ ఎంపీ జగన్ కు ఘాటు లేఖ రాసారు. అయితే కేరళ ఎంపీ రాసిన ఈ లేఖ జాతీయ స్థాయిలో ట్రెండ్ అయ్యింది. అన్ని జాతీయ మీడియా ఛానెల్స్ ఈ విషయాన్ని ప్రస్తావించాయి. దీంతో మరోసారి ఆంధ్రప్రదేశ్ రాష్ట్ర పరువు జాతీయ స్థాయిలో పోయింది. ఇప్పటికైనా జగన్ మోహన్ రెడ్డి గారు, సరైన చర్యలు తీసుకుని, రాష్ట్ర పరువు, ముఖ్యంగా కడప జిల్లా ప్రజలు ఎదుర్కుంటున్న ఇబ్బందులు గురించి, ఫోకస్ పెడతారని ఆశిద్దాం...