news

టీఆర్ఎస్- వైసీపీ రహస్య స్నేహానికి సంబంధించి మరో దుమారం చెలరేగింది. వైసీపీ నేతలు ఎన్నికల ప్రచారం కోసం టీఆర్ఎస్ వాహనాలు వాడుతున్నారని నెల్లూరులో ప్రచారం జోరందుకుంది. తెలంగాణ శాసనసభ ఎన్నికల్లో టీఆర్‌ఎస్ వినియోగించిన ప్రచార రథాలు ఏపీలో దర్శనమిస్తున్నాయి. ఆ వాహనాలు వైసీపీ ప్రచార రథాలుగా మారుతున్నాయి. ప్రచారం కోసం వైసీపీ సిద్ధం చేసుకున్న జిప్సీలో సీటింగ్ కవర్లు టీఆర్ఎస్ సింబల్ తో ఉన్నాయి. గులాబీ సీట్లు..కారు సింబల్ ఉన్న ఈ వాహనం..నగరంలోని నిప్పో సెంటర్‌లో కనిపించటంతో స్థానికంగా ఆసక్తికరం అంశంగా మారింది. తెలంగాణలో ఎన్నికల ప్రచారానికి టీఆర్ఎస్ ఉపయోగించుకున్న వాహనాలనే..రీ స్టికరింగ్ చేసి వైసీపీ వాడుకుంటోందని తెలుగు తమ్ముళ్లు అరోపిస్తున్నారు.

వైసీపీ, టీఆర్ఎస్ మధ్య రహస్య అవగాహన ఉంది అంటూ టీడీపీ చాన్నాళ్లుగా వాదిస్తోంది. ఏపీపై కుట్ర చేసేందుకు ఆ రెండు పార్టీలు ఒక్కటి అయ్యాయని ఏపీ సీఎంతో సహా టీడీపీ నేతలంతా ఆరోపిస్తున్నారు. గతంలో చిత్తూరు జిల్లా మదనపల్లె నియోజకవర్గంలో టీఆర్ఎస్ గోడ గడియారాలను రీ స్టిక్కరింగ్ చేసి వైసీపీ పంచినట్లు సోషల్ మీడియాలో రచ్చ రాజుకుంది. ఇక ఇప్పుడు వైసీపీ పెయింటింగ్ ఉన్న ప్రచార వాహనంలో టీఆర్ఎస్ సింబల్ ఉండటంతో మరోసారి దుమారం మొదలైంది. నెల్లూరు జిల్లా వేదాయపాలెం పుట్టవీధిలోని ఓ మెకానిక్ షెడ్డులో టీఆర్‌ఎస్ వాహనాలకు వైసీపీ కలర్ వేస్తున్నారు. అక్కడికి బయటి వ్యక్తులు రాకుండా జాగ్రత్త పడుతున్నారు. అక్కడ ఉన్నవారిని ప్రశ్నించగా తాము టీఆర్‌ఎస్ వాహనాలు కొనుగొలు చేశామని, వాటిని వైసీపీ పార్టీకి చెందిన నాయకులకు అమ్ముతున్నామని చెబుతున్నారు. వైసీపీ అధినేత జగన్‌కు సీఎం కేసీఆర్ సహకరిస్తున్నారన్న ప్రచారానికి ఈ వాహనాలు బలాన్ని చేకూర్చుతున్నాయి.

కేసీఆర్ ఏపీ కోట్లు పంపిస్తారని ఏపీ సీఎం చంద్రబాబు ఆరోపించిన విషయం తెలిసిందే. ఇప్పటికే రూ. వెయ్యి కోట్లు వచ్చాయని చెబుతున్నారని, కేసీఆర్ సంపాదించిన డబ్బులో ఇక్కడ పెట్టుబడి పెడుతున్నారని విమర్శించారు. ఎందుకు పెట్టుబడి పడుతున్నారంటే ఆయనకు సామంత రాజ్యం కావాలని, దానికి ఒక పథకం ప్రకారం మనిషిని పెట్టుకున్నారని.. ఆ మనిషే జగన్మోహన్ రెడ్డని చంద్రబాబు అన్నారు. అతనిని ఎంపోర్ చేస్తూ డబ్బులు పంపిస్తున్నారని, ఇప్పటికే రూ. వెయ్యి కోట్లు పంపించారని.. ఇంకా ఎంత పంపిస్తారో తెలియదని అన్నారు. అదే కేసీఆర్ తనకిచ్చిన రిటర్న్ గిఫ్ట్ అని చంద్రబాబు పేర్కొన్నారు. ఇది ఆంధ్రప్రదేశ్ రాష్ట్ర ఐదు కోట్ల ప్రజల ఆత్మగౌరవానికి సంబంధించిన విషయమని అన్నారు.

ఎన్నికలు దగ్గర పడుతూ ఉండటం, మరో పక్క జగన కు సరైన మైలేజి రాకపోవటం, కొన్ని చోట్ల అభ్యర్దులు లేక, మరీ తక్కువ స్థాయి నాయకులు ఉండటంతో, వైసీపీలో టెన్షన్ మొదలైంది. అందుకే నేరుగా పీకే రానంగాలోకి దిగారు. ‘‘చూడండి... ఇది సర్వే! రాష్ట్రంలో మాదే గెలుపు. మీ నియోజకవర్గంలోనూ మేమే గెలుస్తామని తేలింది. మీరుకూడా ఇటువైపు వచ్చేయండి! మా కోసం కాదు... మీ మేలు కోరి చెబుతున్నాం’’ టీడీపీకి చెందిన ఒక బలమైన అభ్యర్థులకు వైసీపీ నుంచి అందిన సందేశాలివి! ఈ ఎన్నికల్లో ఎలాగైనా విజయం సాధించాలని లక్ష్యంగా పెట్టుకున్న వైసీపీ... అధికారపక్షంలో ఉన్న నేతలను సంప్రదించేందుకు ప్రత్యేక కార్యాచరణను సిద్ధం చేసినట్లు తెలుస్తోంది. అసలు ఘట్టానికి ముందే టీడీపీ నేతల స్థైర్యాన్ని దెబ్బకొట్టడం, వారిని త మ వైపునకు తిప్పుకోవడం, కుదరకపోతే తప్పుడు ప్రచారం చేసి వారిని ఆత్మరక్షణలో పడేయడం! ఇదీ వైసీపీ వ్యూహం! దీని అమలు బాధ్యతను రాజ్యసభ సభ్యుడు విజయసాయిరెడ్డికి అప్పగించారు. మరీ అవసరమైతే పార్టీ రాజకీయ సలహాదారు ప్రశాంత్‌ కిశోర్‌(పీకే) ప్రత్యక్షంగా రంగంలోకి దిగుతారు.

ఈ వ్యూహం ప్రకారం.. పీకే నిర్వహించిన సర్వేలలో భారీ మెజారిటీతో గెలిచే అవకాశమున్న టీడీపీ నేతలపై గురిపెట్టారు. తాము నిర్వహించిన సర్వే ప్రకారం ఎన్నికల్లో గెలుపు వైసీపీదే అంటూ ఒక నివేదికను వారి ముందు పెడతారు. ‘మీ నియోజకవర్గంలోనూ వైసీపీయే గెలుస్తుంది’ అంటూ మానసికంగా ఒత్తిడి పెంచుతారు. ఆ తర్వాత... మా పార్టీలోకి వస్తే సీటు ఇస్తామని అభయమిస్తారు. అం తా సవ్యంగా ఉందనుకున్న తర్వాత విజయసాయి రంగ ప్రవేశం చేస్తారు. పశ్చిమ గోదావరి జిల్లాకు చెందిన మంత్రి పితాని సత్యనారాయణకు ఈ అనుభవం ఎదురైంది. ఆయ న ఈ వ్యూహాలకు తలొగ్గలేదు. దీంతో.. వైపీపీ తన అనుకూల మీడియా ద్వారా పితాని పార్టీ మారుతున్నారని ఊదరగొట్టింది. దీంతో పితానిపై సొంత పార్టీ నేతల్లో అనుమానం తలెత్తుతుందని, ఆయన్ను దూరంగా పెడితే చేసేదే మీ లేక ఆయన టీడీపీని వీడి వైసీపీ గూటికొస్తారని భావించారు.

ఇవేమీ కుదరకపోవడంతో పీకే నేరుగా రంగంలోకి దిగారు. ‘నేను వచ్చి కలుస్తాను. టైమ్‌ చెప్పండి’ అని పితానిని కోరారు. ఇందుకు పితాని విముఖత వ్యక్తం చేశారు. అయినప్పటికీ... పితాని వైసీపీలో చేరుతున్నారనే ప్రచారం సాగుతూనే ఉంది. చావోరేవో కావడం వల్లే... జగన్‌ సొంత పార్టీ పెట్టి ఇప్పటికి తొమ్మిదేళ్లయింది. గత ఎన్నికల్లో విజయంపై గంపెడాశలు పెట్టుకున్నప్పటికీ... ఫలితం లభించలేదు. ఈసారి ఎన్నికల్లో ఇదే అనుభవం ఎదురైతే పార్టీని బతికించుకోవడం కష్టమనే భయం ఆయనను వెంటాడుతోందని రాజకీయ వర్గాలు చెబుతున్నాయి. ఈ నేపథ్యంలో గెలుపుకోసం అన్ని రకాల వ్యూహాలను అమలు చేస్తున్నట్లు చెబుతున్నారు.

ఫారం-7 దుర్వినియోగంలో అడ్డంగా దొరికిపోయిన జగన్.. ఇప్పుడు తన ఓటే తొలగించే ప్రయత్నం జరిగిందంటూ నాటకాలాడుతున్నారని ముఖ్యమంత్రి చంద్రబాబు దుయ్యబట్టారు. ఇంకా ఎన్నో విచిత్ర వేషాలు జగన్ చూపిస్తారని, వాటిని భరిస్తూ తిప్పికొట్టేందుకు సిద్ధంగా ఉండాలని ఆయన పార్టీ నేతలకు పిలుపునిచ్చారు. వాస్తవ పరిస్థితులపై తీసుకుంటున్న ప్రజాభిప్రాయంలో తెలుగుదేశానికి బ్రహ్మాండమైన ఫలితాలు రాబోతున్నాయని వెల్లడించారు. 18వ తేదీ నుంచి లబ్ధిదారులే వచ్చి తోచిన విధంగా తెలుగుదేశానికి ప్రచారం చేసే పరిస్థితి ఉందని తెలిపారు. ఈ మేరకు పార్టీ నేతలతో చంద్రబాబు బుధవారం టెలికాన్ఫరెన్స్‌లో నిర్వహించారు.

తెలంగాణ నుంచి అక్రమ మార్గంలో వచ్చే ధన ప్రవాహాన్ని పసుపు సైనికులు అడ్డుకోవాలని పిలుపునిచ్చారు. హెలికాఫ్టర్ గుర్తును చూసి కూడా ఫ్యాన్ గుర్తేమో అని భయపడే పరిస్థితుల్లో జగన్ ఉన్నారని ఎద్దేవా చేశారు. మోదీ, జగన్, కేసీఆర్ అనుబంధం మరోమారు ఈడీ మాజీ డైరెక్టర్ సీబీఐకి రాసిన లేఖ ద్వారా బట్టబయలైందని చంద్రబాబు అన్నారు. ఈ కుట్రను ప్రజల్లోకి బలంగా తీసుకెళ్లాలని సూచించారు. ఈడీ లేఖపై వైకాపాను నిలదీయాలని దిశానిర్దేశం చేశారు. రాష్ట్ర హక్కును తాకట్టు పెట్టే కుట్రను ఎండగట్టి తీరాలని, ఆత్మాభిమానాన్ని దెబ్బతీసే చర్యలను ఎట్టిపరిస్థితుల్లోనూ ఉపేక్షించబోమని తేల్చిచెప్పారు.

అభ్యర్థుల ఖరారు తర్వాత కూడా అభిప్రాయాలు తీసుకుంటున్నాని, క్షేత్రస్థాయిలో నాణ్యమైన ప్రజాభిప్రాయ సేకరణ జరుగుతోందని వెల్లడించారు. అవతల పార్టీ మాదిరి డబ్బులకు కక్కుర్తి పడి అభ్యర్థుల్ని మార్చే పద్ధతి తెలుగుదేశానిది కాదని స్పష్టం చేశారు. ప్రజాభిప్రాయం, కార్యకర్తల అభీష్టం సరిగా లేకుంటే అభ్యర్థుల్ని మార్చడానికి వెనుకాడనని హెచ్చరించారు. 16వ తేదీన తిరుపతి నుంచి ఎన్నికల శంఖం పూరించి అదే రోజు శ్రీకాకుళంలో పర్యటించనున్నట్లు చెప్పారు. మరుసటి రోజున విజయనగరం, విశాఖ, ఉభయగోదావరి జిల్లాల్లో పర్యటిస్తానన్నారు. తర్వాతి దశలో కృష్ణ, గుంటూరు, ప్రకాశం, నెల్లూరు జిల్లాల్లో తిరగనున్నట్లు వెల్లడించారు. చివరిదశలో కర్నూలు, కడప, అనంతపురంలో తన పర్యటన ఉంటుందని చంద్రబాబు వెల్లడించారు.