news

ఎన్నికల నిర్వహణ ఏర్పాట్లలో ఈసీ వైఫల్యంతో ఓటర్లు నానా ఇబ్బందులు పడ్డారు. అయినా తమ హక్కును వినియోగించుకునేందుకు సహనంతో లైన్లలో వేచి ఉన్నారు. దీంతో రాష్ట్రవ్యాప్తంగా గురువారం పదుల సంఖ్యలోని కేంద్రాల్లో అర్ధరాత్రి వరకూ ఓటింగ్‌ కొనసాగింది. వాస్తవానికి ఏజెన్సీ ప్రాంతం మినహా రాష్ట్రంలో పోలింగ్‌ సమయం ఉదయం 7 గంటల నుంచి సాయంత్రం 6 గంటల వరకే. ఆ సమయంలోపు వచ్చి లైనులో నిల్చున్న వారు ఓటు హక్కు వినియోగించుకోవచ్చు. అయితే, పలు కేంద్రాల్లో ఎన్నికల యంత్రాలు మొరాయించడంతోపాటు పోలింగ్‌ ప్రక్రియ ఆలస్యమైంది. అధికారులు వీటిని సరి చేసినా కొన్నిచోట్ల మళ్లీ ఇబ్బంది పెట్టడంతో పోలింగ్‌ను ఆపేసి కొత్త యంత్రాలను అమర్చాల్సి వచ్చింది. మరోవైపు ఎండ వేడి కూడా ఎక్కువగా ఉండడంతో కొందరు ఓటర్లు తిరిగి వెళ్లిపోయారు. వీరంతా ఓటు వేసేందుకు సాయంత్రానికి తిరిగి పోలింగ్‌ కేంద్రాలకు వచ్చారు.

ఆరు గంటల్లోపు వచ్చిన వారందరికీ ఓటేసే అవకాశం కల్పిస్తామని రాష్ట్ర ఎన్నికల ప్రధానాధికారి ద్వివేది ప్రకటించడంతో అర్ధరాత్రి వరకూ కొన్ని చోట్ల పోలింగ్‌ కొనసాగింది. దీంతో సాయంత్రం 6 తర్వాత 6,000కు పైగా కేంద్రాల్లో పోలింగ్‌ కొనసాగింది. రాత్రి 10 గంటల సమయంలో 256 కేంద్రాల్లో ఓటర్లు ఉన్నట్లు అధికారులు గుర్తించారు. రాత్రి 10:30 గంటల వరకూ 139 కేంద్రాలు, 11 గంటల వరకూ 70 కేంద్రాలు, 11:30 గంటల తర్వాత 49 కేంద్రాల్లో పోలింగ్‌ కొనసాగింది. అర్ధరాత్రి 12 గంటలు దాటాక కూడా 23 కేంద్రాల్లో కొనసాగుతోంది. రాష్ట్రంలో అందరి దృష్టినీ ఆకర్షించిన గుంటూరుజిల్లా మంగళగిరి నియోజకవర్గంలోని తాడేపల్లి క్రిస్టియన్‌పేట మండల పరిషత్‌ ప్రాథమిక పాఠశాలలోని 34వ పోలింగ్‌ బూత్‌లో రాత్రి 11 గంటలకు ముగిసింది. అయితే ఇక్కడే ఉన్న 37వ పోలింగ్‌ బూత్‌లో మాత్రం ఓటర్లు అప్పటికీ క్యూలో ఉండడంతో అందరూ ఓటేయడానికి అర్ధరాత్రి 12 గంటలకుపైగా సమయం పట్టొచ్చని రిటర్నింగ్‌ అధికారి తెలిపారు.

గుంటూరుజిల్లా తెనాలి పట్టణంలోని నందులపేటలో 117 పోలింగ్‌ బూత్‌లో ఈవీఎంలు మొరాయించడంతో... వాటిని సరిచేసి అర్ధరాత్రి వరకూ పోలింగ్‌ కొనసాగించారు. తూర్పు గోదావరి జిల్లా కపిలేశ్వరపురం మండలం వల్లూరులోని 168వ నంబరు పోలింగ్‌ పోలింగ్‌ బూత్‌లో అర్ధరాత్రి 11.30 గంటలు దాటినా పోలింగ్‌ కొనసాగుతూనే ఉంది. నెల్లూరుతోపాటు కృష్ణాజిల్లాలోని గుడివాడ, మైలవరం నియోజకవర్గాల్లోనూ రాత్రి 11 గంటలు దాటినా పోలింగ్‌ కొనసాగింది. ఇక విజయనగరం జిల్లాలో రాత్రి 9గంటలు దాటిన తర్వాత కూడా పూసపాటిరేగ మండలంలోని తిప్పలవలస, కొత్తకొప్పెర్ల, వెంపడాం పంచాయతీ తాళ్లపేట గ్రామాల్లో పోలింగ్‌ నిర్వహించారు. తిప్పలవలసలో 125 నంబరు పోలింగ్‌ బూత్‌లో చాలాసార్లు ఈవీఎంలు మార్చాల్సివచ్చింది. మధ్యాహ్నం ఒంటిగంటకు సుమారు 20 ఓట్లు మాత్రమే పోలయ్యాయి. తర్వాత 300 ఓట్లు పోలయ్యాక మళ్లీ పరికరాలు మొరాయించడంతో అధికారులు వాటిని సరి చేసి పోలింగ్‌కు అనుమతిచ్చారు. దీంతో, ఇక్కడ అర్ధరాత్రి వరకూ పోలింగ్‌ కొనసాగింది. శ్రీకాకుళంలోనూ ఇదే పరిస్థితి నెలకొంది. ఇచ్ఛాపురం నియోజకవర్గంలో బూరగాం, రత్తకన్న, తేలుకుంచి గ్రామాల్లో రాత్రి 10 గంటల వరకూ పోలింగ్‌ కొనసాగింది.

ఏపీలో పోలింగ్‌ కేంద్రాల వద్ద ఇంకా ఓటర్లు బారులు తీరారు. చాలా ప్రాంతాల్లో ఓటర్లు భారీగా క్యూలో ఉన్నారు. ఆరేడు గంటలుగా క్యూలైన్లలో ఓటర్లు వేచివున్నారు. ఓటు వేశాకే తిరిగి వెళ్తామని ఓటర్లు చెబుతున్నారు. చాలా చోట్ల రాత్రి అయినా పోలింగ్ జరుగుతుంది. ఉదయం ఈవీయంలు మొరాయించటంతో, వెనుతిరిగిన వారు, మళ్ళీ వచ్చి లైన్ లో నుంచుని ఓటు వేస్తున్నారు. 6 గంటల లోపే లైన్ లో ఉండటంతో, వారందరినీ ఓటు వేసేలా ఏర్పాటు చేసారు. లైటింగ్ లేని చోట్ల లైట్లు పెట్టారు. ఓటు వెయ్యకుండా వెనుతిరిగిన వారు, వచ్చి ఓటు వెయ్యాలని చంద్రబాబు పిలుపు ఇవ్వటంతో, చాలా మంది మళ్ళీ వచ్చి ఓటు వేస్తున్నారు. అయితే, ఇలా వెళ్ళిపోయిన వారు, మళ్ళీ వచ్చి ఓటు వెయ్యటం ఎప్పుడూ చూడలేదని విశ్లేషకులు అంటున్నారు.

మరో పక్క, ఆంధ్రప్రదేశ్‌లో పోలింగ్‌ ప్రశాంతంగా, సజావుగా జరిగిందని రాష్ట్ర ఎన్నికల ప్రధాన అధికారి గోపాలకృష్ణ ద్వివేది తెలిపారు. మొత్తం 381 ఈవీఎంలలో సమస్యలు తలెత్తాయని, వాటన్నింటికీ మరమ్మతులు చేయించినట్టు చెప్పారు. అమరావతిలో మీడియాతో మాట్లాడారు. ఒకరికి ఓటు వేస్తే మరొకరికి వెళ్లింది అనేవన్నీ వదంతులేనని స్పష్టంచేశారు. ఈ విషయంపై ఏ ఒక్కరి నుంచి కూడా అభ్యంతరాలు రాలేదన్నారు. సాయంత్రం 6 గంటల వరకు పోలింగ్‌ కేంద్రానికి చేరుకున్న వారికి ఓటు వేసే అవకాశం కలిపించమని స్పష్టంచేశారు. గడువులోపు వచ్చిన వారికి ఎంత రాత్రి అయినా ఓటు వేసే అవకాశం ఇస్తామన్నారు. మాక్ పోలింగ్లో అధికారుల నిర్లక్ష్యానికి సంబంధించి 6 ఘటనలు మా దృష్టికి వచ్చాయి. రిపోలింగ్ అంశంలో పోలింగ్ కేంద్రాల్లో ఉన్న రిటర్నింగ్ అధికారులు, అబ్జర్వర్ల ద్వారా సమాచారం తీసుకొని నిర్ణయం తీసుకుంటాం. పూతాలపట్టు నియోజకవర్గంలో మూడు గంటలకే పోలింగ్ నిలిచిపోయింది.

క్యూలో ఉన్నవారు ఓటింగ్ ఎంత సమయం పట్టిన ఓటు వేసుకొనే అవకాశం కల్పించాం. మావోయిస్టు ప్రభావిత ప్రాంతాల్లో ఎటువంటి ఘటనలు జరగలేదు. ఎన్నికల బందోబస్తుకు కేంద్ర బృందాలు ఎందుకు రాలేదనే విషయంపై నేను ఏమి చెప్పలేను. హింసాత్మక ఘటనలు ఎందుకు జరిగాయనే విషయంపై విచారణ చేపట్టాం. రీపోలింగ్ కు సంబంధించి పోలింగ్ కేంద్రాల్లో ఉన్న సెక్యూరిటీ కెమెరాలు అక్కడ ఉన్న సిబ్బంది ద్వారా నిర్ణయం తీసుకుంటాం. ఎలక్షన్ కమిషన్ తప్పు చేసిందని ఆరోపణలు చేయడం సరైన పద్దతి కాదు. పోలింగ్ కు సంబంధించి సిబ్బంది తప్పులు ఉంటే కలక్టర్లతో మాట్లాడి నిర్ణయం తీసుకుంటాం. ఎన్నికల నిర్వహణకు సంబంధించి రాజకీయ పార్టీల నేతలు చేసే కామెంట్స్ పై నేను ఏమి మాట్లాడను. రాష్ట్రంలో ఎన్నికల నిర్వహణపై ఎన్నికల కమిషన్ పూర్తిగా సంతృప్తిగా ఉంది. ఫార్మ్ 17A ద్వారా రిపోలింగ్ పై నిర్ణయం తీసుకుంటాం అని ఆయన అన్నారు.

ఒక పక్క ఎన్నికలు జరిగిన సరళి, ప్రజలు పడిన ఇబ్బందులతో ఆంధ్రప్రదేశ్ రాష్ట్రం మొత్తం మారుమోగితే, జగన్ మాత్రం తీరిగ్గా లోటస్ పాండ్ నుంచి ప్రెస్ మీట్ లో మాట్లాడారు. కేసీఆర్, చంద్రబాబుకు ఇచ్చే రిటర్న్ గిఫ్ట్‌తో తనకు సంబంధం లేదని జగన్ అన్నారు. అది కేసీఆర్, చంద్రబాబులకు సంబంధించిన అంశమన్నారు. హైదరాబాద్‌లో తన నివాసంలో మీడియాతో మాట్లాడిన ఆయన.. ఏపీ సీఎం చంద్రబాబు ప్రజల్ని తప్పుదోవ పట్టిస్తున్నారని ఆరోపించారు. ఓటింగ్ శాతం తగ్గించేందుకు కుయుక్తులు పన్నారన్నారు. ప్రజలు పెద్ద సంఖ్యలో ఓటింగ్‌లో పాల్గొని.. ఓటు వేసిన ప్రతి ఒక్కరికి కృతజ్ఞతలన్నారు. ఓటమి తప్పదని చంద్రబాబు నిర్ధారణకు వచ్చారని .. ఓటింగ్‌ శాతం తగ్గిచేందుకు చంద్రబాబు కుట్రలు చేశారన్నారు.

80శాతం మంది ప్రజలు పోలింగ్‌లో పాల్గొన్నారని తెలిపారు. ఓటమి భయంతోనే టీడీపీ నేతలు బురదజల్లుతున్నారని విమర్శించారు. ఎన్నికల కమిషన్ అద్భుతంగా పని చేసిందని కొనియాడారు. మంగళగిరిలో లోకేశ్ నిబంధనలు ఉల్లంఘించారని ఆరోపించారు. ఓడిపోతున్నాడని తెలుసుకాబట్టే ఈసీని బెదిరిస్తున్నారన్నారు. అనేక రకాలుగా ఓటర్లను భయబ్రాంతులకు గురిచేశారన్నారన్నారు. ఓటర్లు తాము ఏ పార్టీకి ఓటు వేశామో వీవీప్యాట్స్ ద్వారా చూసుకుని సంతృప్తి చెందితే, ఇంకా, నెగెటివ్ కామెంట్స్ ఎవరు చేస్తారని అన్నారు. ఓడిపోతున్నాం కనుక బురదజల్లాలని అనుకునేవాళ్లే నెగెటివ్ కామెంట్స్ చేస్తారంటూ టీడీపీని ఉద్దేశించి వ్యాఖ్యానించారు.

ఈవీఎంలపై సీఎం చంద్రబాబు వ్యాఖ్యలు చేయడం బాధాకరమని వ్యాఖ్యానించారు. ఎన్ని సీట్లు వస్తాయని భావిస్తున్నారన్న మీడియా ప్రతినిధుల ప్రశ్నకు జగన్‌ స్పందిస్తూ.. ప్రజల దయ, దేవుడి ఆశీస్సులతో వైకాపా అఖండ విజయం సాధించబోతోందని విశ్వాసం వ్యక్తంచేశారు. అయితే జగన్ వ్యాఖ్యల పై, ఆంధ్రప్రదేశ్ ప్రజలు విస్మయం వ్యక్తం చేస్తున్నారు. రాత్రి తొమ్మిది దాటినా, ఇంకా పోలింగ్ జరుగుతుందని, ఈ పరిస్థితికి కారణం అయిన ఎలక్షన్ కమిషన్ వైఖరిని ఏ మాత్రం ప్రశ్నించకుండా, ప్రజలు పడిన ఇబ్బందులు పట్టించుకోకుండా, ఎలక్షన్ కమిషన్ అద్బుతంగా పని చేస్తుందని లోటస్ పాండ్ నుంచి చెప్పటంతో, ఏపి ప్రజలు అవాక్కయ్యారు.