news

పసుపు- కుంకుమ డబ్బులు ఆపాలని వైకాపా నేతలు హైకోర్టులో పిటిషన్లు వేయడంపై ముఖ్యమంత్రి చంద్రబాబు ఆగ్రహం వ్యక్తం చేశారు. మహిళలకిచ్చే పసుపు-కుంకుమ ఎవరైనా అడ్డుకుంటారా అని మండిపడ్డారు. కేంద్రం ఇచ్చే డబ్బులు ఆగకూడదు గానీ రాష్ట్రం ఇచ్చే డబ్బులు ఎందుకు ఆపాలని ప్రశ్నించారు. అద్దె మైకులు, వలస పక్షులు వైకాపాకు మద్దతుగా ప్రచారం చేస్తున్నారని, ఎన్నికలు కాగానే అందరూ హైదరాబాద్ చెక్కేస్తారని అన్నారు. ఈ మేరకు పార్టీ నేతలు, కార్యకర్తలతో మంగళవారం ఆయన టెలికాన్ఫరెన్స్ నిర్వహించారు. కేసీఆర్‌ బెదిరింపుల వల్లే సినీనటులు జగన్ వద్దకు క్యూ కడుతున్నారని చంద్రబాబు అన్నారు. హైదరాబాద్‌లో ఆస్తులు కాపాడుకోవడం కోసమే వైకాపా కండువాలు కప్పుకుంటున్నారని దుయ్యబట్టారు. ఒక్కసారి అవకాశం ఇవ్వాలంటూ వైకాపా మొసళ్లు తెగ కన్నీరు కారుస్తున్నాయని, ఒక్కసారే కదా అని తినే తిండిలో విషం కలుపుకోం కదా!.. కొండపైకెక్కి లోయలో దూకం కదా! అని చంద్రబాబు వ్యాఖ్యానించారు.

తెలుగుదేశం పార్టీతోనే ఆంధ్రప్రదేశ్‌కు న్యాయం జరుగుతుందని చంద్రబాబు పునరుద్ఘాటించారు. పులివెందులలో తన పర్యటనకు అద్భుతమైన స్పందన వచ్చిందని పేర్కొన్నారు. జమ్మలమడుగు, చిత్తూరు, అన్నిచోట్లా తెదేపాపై సానుకూలత వ్యక్తమవుతోందని, ప్రజల నుంచి అసాధారణమైన స్పందన వస్తోందన్నారు. వాళ్లందరికీ తెలుగుదేశం శ్రేణులు నాయకత్వం అందించాలని సూచించారు. వైకాపాపై ప్రతి చోటా తీవ్ర వ్యతిరేకత ఉందని చంద్రబాబు చెప్పారు. రాష్ట్రానికి డబ్బులు ఇవ్వడానికి మోదీకి చేతులు రాలేదు గానీ.. ఏపీని, తెదేపాను నిందించడానికి పెద్ద నోరు వచ్చిందని విమర్శించారు. నరేంద్రమోదీ నిందలతో అందరిలో రోషం రావాలని, పట్టుదల పెరిగి పౌరుషంగా పనిచేయాలని పిలుపునిచ్చారు.

ఆంధ్రాకు ప్రత్యేక హోదా ఇస్తే తమకూ ఇవ్వాలన్న కేసీఆర్‌తో కలిసి ఏపీకి జగన్ హోదా తెస్తాడా? అని ప్రశ్నించారు. పోలవరంపై పదేపదే కేసులేసే కేసీఆర్‌కు జగన్ మద్దతు ప్రకటించడం ఏంటని ప్రశ్నించారు. సాగర్, శ్రీశైలం తమకే ఇవ్వాలన్న అలాంటి వ్యక్తితో కుమ్మక్కవ్వడమేంటని నిలదీశారు. కేసుల కోసం మోదీతో, ఆస్తుల కోసం కేసీఆర్‌తో జగన్ లాలూచీ పడ్డారని విమర్శించారు. దేశంలో అన్ని ముస్లిం సంఘాలు తెలుగుదేశానికి మద్దతు పలుకుతున్నాయని, మోదీపై ఆయన దత్తపుత్రుడు జగన్ పై వారిలో తీవ్ర వ్యతిరేకత ఉందన్నారు.

పులివెందులను సస్యశ్యామలం చేసే బాధ్యత నాది. రైతులు పండించే పంటలకు గిట్టుబాటు ధర కల్పించి అన్ని విధాలా ఆదుకుంటాం. గండికోటలో 20టీఎంసీల నీటిని నిల్వ చేసి సాగు, తాగునీటి సమస్య పరిష్కరిస్తాం అని ముఖ్యమంత్రి నారా చంద్రబాబునాయుడు హామీ ఇచ్చారు. పులివెందుల పట్టణంలోని శ్రీవేంకటేశ్వరస్వామి ఆలయం వద్ద సోమవారం జరిగిన ఎన్నికల బహిరంగ సభలో ఆయన మాట్లాడుతూ.. ‘‘పులివెందులకు వచ్చినప్పుడు మీరు చూపిన అభిమానం మరువలేనిది. ఈ ప్రభుత్వంలో మీరు ఆనందంగా ఉన్నారా లేదా. ఈ రోజు బాగా ఆలస్యమైంది. కానీ మీ ఆనందం, ఉత్సాహం చూస్తోంటే పులివెందుల్లోనే ఉండాలనిపిస్తోంది. చిత్తూరు జిల్లా పర్యటనకు వెళ్లాల్సి ఉండడంతో కష్టంగానే వెళ్తున్నా’’ అని చంద్రబాబు పేర్కొన్నారు. ‘‘పులివెందులలోని మీరందరూ ఆనందంగా ఉన్నారా తమ్ముళ్లూ... ఈరోజు పులివెందులలో ఒక చరిత్ర. పులివెందుల జనం చూపిన అభిమానం చరిత్రలో మరచిపోలేనిది. నేనడుగుతున్నా ఈ ప్రభుత్వం వలన లాభపడ్డారా, మీరేమంటారు తమ్ముళ్లూ.. ఆనందంగా ఉన్నామనే వారు చేతులెత్తండి’’ అనడంతో విచ్చేసిన ప్రజలందరు చేతులెత్తి హర్షధ్వానాలను వ్యక్తం చేశారు.

పులివెందులను సస్యశ్యామలం చేసి నెంబర్‌ 1 గా చేసే బాధ్యత తనదేనని చంద్రబాబు హామీ ఇచ్చారు. ‘‘ఒకప్పుడు పులివెందులకు నీళ్లు వచ్చేవి కావు. రూ.1200కోట్లు ఖర్చుపెట్టాం, నీళ్లు తీసుకొచ్చాం, నదుల అనుసంధానంతో శ్రీశైలం నీటిని గండికోటకు తీసుకొచ్చి పులివెందులకు పారించాం. నదుల అనుసంధానం ద్వారా రాళ్లసీమను రతనాల సీమగా మారుస్తాం. సింహాద్రిపురం, లింగాల మండలాల్లోని చీనీతోటలు, అరటి తోటలను అభివృద్ధి చేస్తాం. సంక్షేమ కార్యక్రమాలు అన్నివిధాల అమలు చేస్తాం. చంద్రన్న బీమాను రూ.5లక్షల నుంచి రూ.10లక్షలు, పెళ్లి కానుక రూ.లక్ష వరకు ఖర్చుపెడతాం. వైద్య ఖర్చులకు రూ.5లక్షల వరకు అందించి ప్రైవేట్‌గా ఉన్న మెడికల్‌ షాపుల్లో మందుల కొనుగోలుకు అవకాశం ఇస్తాం. సతీ్‌షరెడ్డి గడ్డం దీక్ష చేపట్టి నీళ్లు పులివెందులకు పారించారు.

సతీషరెడ్డిని గెలిపించుకుంటే గండికోటకు 20టీఎంసీల నీరు తీసుకొస్తాం. ఎంపీ అభ్యర్థి ఆదినారాయణరెడ్డిని గెలిపిస్తే పులివెందులలోని ప్రతి ఎకరాను పండించి ఆ పంటలకు ప్రపంచ వ్యాప్తంగా గిట్టుబాటు ధర కల్పిస్తాం. నీళ్లు ఉంటే రైతన్నలు బంగారు పండిస్తారు. ఈ గడ్డపై ఉన్న జగన్‌ మీకేం చేశారో ఓసారి ఆలోచించండి. జగన్‌ లాలూచీ రాజకీయాలు చేస్తున్నారు’’ అని చంద్రబాబు ఆరోపించారు. జగన్‌ సొంత గడ్డపై సోమవారం టీడీపీ నేతలు నిర్వహించిన ఎన్నికల సభ విజయవంతమైంది. సోమవారం మధ్యాహ్నం 3 గంటలకు సీఎం చంద్రబాబు విచ్చేస్తారని ప్రకటించినా ఆయన 5 గంటలకు హెలిప్యాడ్‌కు చేరుకున్నారు. అక్కడి నుంచి వాహనంలో రోడ్‌షో నిర్వహిస్తూ శ్రీవేంకటేశ్వరస్వామి ఆలయం వద్ద వాహనంపై నుంచే ప్రసంగించారు. 40 నిమిషాల పాటు సాగిన సీఎం ప్రసంగంలో స్థానిక అంశాలు ప్రస్తావించారు. స్థానిక ఎమ్మెల్యే జగన్‌పై విమర్శనాస్త్రాలు సంధించారు. ప్రజల నుంచి అనూహ్య స్పందన లభించడంతో సీఎం కూడా మీ ఆనందం ఉత్సాహం చూస్తుంటే పులివెందుల్లోనే ఉండాలనిపిస్తోందని చమత్కరించారు. ఎన్నికల సభకు భారీగా జనం తరలిరావడంతో టీడీపీ నేతల్లో ఉత్సాహం ఉరకలెత్తింది.

ఎమ్మిగనూరు నియోజకవర్గంలో వైసీపీ విభేదాలు ఈస్థాయిలో బట్టబయలయ్యాయి. ఎంపీ బుట్టా రేణుక, వైసీపీ అభ్యర్థి ఎర్రకోట చెన్నకేశవరెడ్డి వర్గాల మధ్య తగాదాలు రచ్చకెక్కాయి. ఎన్నికల వేళ వైసీపీ ప్రధాన ప్రచారకుల్లో ఒకరిగా జగన్‌ నియమించిన ఎంపీ బుట్టా రేణుక ను ప్రచారానికి రావద్దని చెన్నకేశవరెడ్డి హుకుం జారీ చేశారు. మూడు రోజుల క్రితం ఎమ్మిగనూరులో ఆమె ప్రచారానికి వస్తే అడ్డుకొని వెనక్కి పంపించేశారు. ఆయన తీరుపై కుర్ణి చేనేతలు భగ్గుమంటున్నారు. ఆదివారం రాత్రి మాచాని సోమప్ప మెమోరియల్‌ హాలులో చేనేతలు, బీసీ కులాల ఆత్మీయ సమావేశం జరిగింది. ఎంపీ అభ్యర్థి సంజీవ్‌కుమార్‌, ఎమ్మెల్యే అభ్యర్థి చెన్నకేశవరెడ్డి హాజరయ్యారు. చెన్నకేశవరెడ్డి మాట్లాడుతుండగా కుర్ణి చేనేతల్లో బుట్టా అభిమానులు, చేనేత కార్మికులు ప్లకార్డులతో నిరసన తెలిపారు. చెన్నకేశవరెడ్డి ప్రసంగాన్ని అడ్డుకున్నారు.

ఎంపీ బుట్టా రేణుక కర్నూలు లోక్‌సభ నియోజకవర్గాన్ని ఎంతో అభివృద్ధి చేశారు, చేనేతలు ఎక్కువగా ఉండే ఎమ్మిగనూరు పట్టణం ఆడపడుచు, చేనేత పితామహుడు దివంగత మాచాని సోమప్ప కుటుంబంతో ఆమెకు బంధుత్వం ఉంది, అలాంటి వ్యక్తిని ప్రచారానికి రావొద్దంటారా..? అగ్రకుల అహంకారంతోనే చేనేతలను అవమానిస్తున్నారని ఆరోపిస్తూ నినాదాలు చేశారు. అదే స్థాయిలో కేశవరెడ్డి కూడా ఎదురుదాడికి దిగారు. కేశవరెడ్డి మాట్లాడుతూ బుట్టా రేణుక నాగులదిన్నె గ్రామాన్ని దత్తత తీసుకున్నారు. కానీ ఆ గ్రామాన్ని అభివృద్ధి చేయలేదు. సరికదా గ్రామానికి వెళ్లినప్పుడు కాంగ్రెస్‌ నాయకుడు కోట్ల సూర్యప్రకాష్‌రెడ్డి శిష్యులను గర్రన కూర్చొబెట్టుకొని మాట్లాడి వచ్చేవారు అని ఆరోపించారు. దీంతో ఆందోళనకు దిగిన చేనేత కార్మికులు జయనాగేశ్వరరెడ్డి ఎన్నో సార్లు అడ్డుకున్నారని అన్నారు.

దానికి చెన్నకేశవరెడ్డి మాట్లాడుతూ జయనాగేశ్వరెడ్డితో ఏం సంబంధం ఉంది? ఎంపీగా ఆమె చేతిలో రూ.5 కోట్లు ఉంటాయి. ఆ ఊళ్లో జానెడు రోడ్డు కూడా వేయలేదని ఆరోపించారు. గత నాలుగేళ్లలో ఎమ్మిగనూరు నియోజకవర్గానికి ఎంపీగా ఒక్కపైసా కూడా ఖర్చు పెట్టలేదు. ఆమెన మనమెందుకు పిలిపించాలి? అన్నారు. దీంతో కుర్ని చేనేతలు మరింత ఆగ్రహించి 70 ఏళ్లలో ఎవరు ఎంత అభివృద్ధి చేశారో.. ఐదేళ్లలో ఎంపీ బుట్టా రేణుక ఎంత అభివృద్ధి చేశారో చర్చకు సిద్ధమేనా? అని సవాల్‌ విసిరారు. తమ సామాజిక వర్గానికి చెందిన 90 వేల ఓటర్లు మీకు అక్కర్లేదా? అని సూటిగా ప్రశ్నించారు. ఈ నేపథ్యంలో కేశవరెడ్డి వర్గీయులు ఎంపీ బుట్టా రేణుక టీడీపీలోకి వెళ్లిరాలేదా అంటూ ఎదురుదాడికి దిగారు. రెండు వర్గాల మధ్య వాగ్వాదం, కొద్దిపాటి తోపులాట చోటుచేసుకుంది. కుర్ణి కులస్థులు బుట్టా రేణుకకు అనుకూలంగా నినాదాలు చేశారు. ఈ సందర్భంలో ఎంపీ అభ్యర్థి డాక్టర్‌ సంజీవ్‌కుమార్‌ మైక్‌ తీసుకొని సమస్యను చర్చించుకొని పరిష్కరించుకుందామని విజ్ఞప్తి చేసినా కార్మికులు పట్టించుకోకుండా నిరసనకు దిగారు. ఈ వ్యవహారం వీడియో అంతా సోషల్‌ మీడియాలో వైరల్‌ అవుతోంది. ఎమ్మిగనూరులో వైసీపీ ఆత్మీయ సమావేశంలో అంతర్గత విభేదాలు రచ్చకెక్కడం, నియోజకవర్గంలో కీలకమైన చేనేతలు ఆగ్రహంతో ఆందోళన చేసి సమావేశం నుంచి బయటకు వెళ్లిపోవడం చర్చనీయాంశమైంది.