news

వివేకా హత్య కేసు దర్యాప్తు దాదాపుగా చివరి దశకు చేరింది. సాక్ష్యాలు తారుమారు చేసిన వాళ్లను మొదట అరెస్ట్‌ చేశారు. ఇక.. హత్యఎవరు చేశారన్న విషయంలోనూ పోలీసులకు ఓ క్లారిటీ వచ్చినట్లు తెలుస్తోంది. కానీ.. సరిగ్గా ఈ సమయంలోనే జిల్లా ఎస్పీపై వేటు వేయించారు. ఈ నేపథ్యంలో అరెస్ట్‌లను ఆపేందుకు, దర్యాప్తును పక్కదారి పట్టించేందుకే ఇలా చేశారన్న వాదనలు వినిపిస్తున్నాయి. ఇటు పోలీసులపై ఒత్తిళ్లు తెస్తూనే.. అటు ఈసీ నుంచి కూడా నివేదిక బయటకు రాకుండా ప్రయత్నాలు చేస్తున్నారన్న సందేహాలు కలుగుతున్నాయి. వాస్తవానికి కడప జిల్లా ఎస్పీగా రాహుల్‌దేవ్‌ శర్మ 40 రోజుల క్రితమే బాధ్యతలు చేపట్టారు. అయినా.. వైసీపీ ఫిర్యాదు చేయగానే.. ఈసీ ఆయనను బదిలీ చేసింది. మరోవైపు.. ఈ కేసులో ఇప్పటికే దాదాపు 60 మందిని పోలీసులు విచారించారు. తమకు అనుమానం ఉన్న అన్నికోణాల్లోనూ వివరాలు సేకరించారు. కానీ.. ఇప్పుడు నెలకొన్న తాజా పరిణామాల నేపథ్యంలో కేసు దర్యాప్తు మరింత ఆలస్యం చేసే యత్నాలు తెరవెనుక సాగుతున్నాయని చెబుతున్నారు.

ఓవైపు.. వివేకానందరెడ్డి కూతురిని ఉసిగొల్పి ఆమె ద్వారా సెంటిమెంట్‌ రగిలించే ప్రయత్నం చేశారన్న ప్రచారం సాగుతోంది. అలాగే.. జగన్‌ సోదరి షర్మిలతోనూ మీడియా ముందు విమర్శలు చేయించారన్న ఆరోపణలు వినిపిస్తున్నాయి. ఇలా ఎప్పటికప్పుడు సెంటిమెంట్‌తో ఎటాక్‌ చేసే ప్రయత్నం శరవేగంగా సాగిస్తున్నారన్న అభిప్రాయం అందరిలోనూ కలుగుతోంది. అంతేకాదు.. ఎవరు ఈ అంశాన్ని లేవనెత్తినా వాళ్లమీద విమర్శలకు వెనకాడ్డం లేదని రాజకీయ వర్గాల్లో చర్చ జరుగుతోంది. మరోవైపు.. వైసీపీ నేత విజయసాయిరెడ్డి కూడా ఢిల్లీ కేంద్రంగా తనదైన ప్రయత్నాలు చేశారు. ఎలక్షన్‌ కమిషన్‌కు ఫిర్యాదు చేయడం ద్వారా ఆగమేఘాల మీద కడప జిల్లా ఎస్పీ రాహుల్‌దేవ్‌ శర్మను బదిలీ చేయించారు. అయితే.. ప్రధానంగా మూడు ప్రశ్నలకు సమాధానం దొరికితే ఈ కేసు మిస్టరీ వీడే అవకాశాలు స్పష్టంగా కనిపిస్తున్నాయి.

వివేకానందరెడ్డి ఆ స్థాయిలో రక్తపు మడుగులో విగతజీవిగా పడి ఉంటే.. పదునైన ఆయుధంతో గాయపరిచిన ఆనవాళ్లుంటే గుండెపోటు అని ఎందుకు చెప్పాల్సి వచ్చింది? పోలీసులు హత్య అని ప్రకటించగానే.. మాట మార్చి ప్రభుత్వమే హత్య చేయించిందని ఎందుకు ఎటాక్‌ చేశారు? ఇప్పుడేమో దర్యాప్తు నివేదిక బయట పెట్టొద్దని ఎందుకు అడ్డుపడుతున్నారు. అన్న సందేహాలు రాజకీయ విశ్లేషకుల నుంచి, తటస్థుల నుంచి వినిపిస్తున్నాయి. నివేదిక వస్తే నిజాలు తెలుస్తాయన్న భయం వాళ్లలో కలుగుతోందన్న వ్యాఖ్యానాలూ వస్తున్నాయి. అయితే మొత్తానికి మూడు ప్రశ్నలకు సమాధానం ఎప్పుడు దొరకబోతుందన్నది మిస్టరీగా మారింది. ఎన్నికలలోపే దర్యాప్తు నివేదిక బయటకు వచ్చే అవకాశం ఉందా ? లేదంటే జగన్‌ అండ్‌కో పెనుగులాడో, మానసికంగా దాడి చేసో ఈ నివేదిక రాకుండా అడ్డుపడతారా? అన్నది ప్రశ్నార్థకంగా మారింది. ఈ మూడు ప్రశ్నలకు బదులిచ్చేవాళ్లెవరు? నివేదిక బయటకు రాకుండా అడ్డుకునే జగన్‌ ప్రయత్నం సఫలమవుతుందా? ఎన్నికల ముందే పోలీసులు మిస్టరీని తేల్చేస్తారా ? అసలు నిందితులు ఎవరై ఉండొచ్చు?. త్వరలోనే ఈ సందేహాలన్నింటికీ సొల్యూషన్‌ దొరికే అవకాశం ఉంది.

ఎంపీగా ఉండి ఏం పనిచేశారని ప్రశ్నించిన ఓ ఓటరు వెనుక పరుగు తీశారు నెల్లూరు జిల్లా గూడూరు వైసీపీ అభ్యర్థి వర ప్రసాద్. నియోజకవర్గంలో రూ. 1.20 లక్షలతో అభివృద్ధి పనులు చేశానని, పెద్ద పెట్టున కేకలు వేశారు. వారు వినకుండా వెళ్లిపోతున్నప్పటికీ వెంటపడి మరీ కేకలు వేశారు. రోడ్డపై కాసేపు హల్‌చల్ చేశారు. ఇప్పడు ఈ వీడియో సోషల్ మీడియాలో హల్‌చల్ చేస్తోంది. మార్నింగ్ వాక్‌కు వచ్చిన వరప్రసాద్ రోడ్డుమీద వెళ్తున్న వారిని తనకు ఓటు వేయాలని అభ్యర్థించారు. మీకు ఎందుకు ఓటు వేయాలని పాదచారి ఆయన్ను ప్రశ్నించారు. గూడూరు అభివృద్ధి చేసిన వారికే ఓట్లు వేస్తామని పాదచారి చెప్పడంతో వరప్రసాద్ ఖంగుతిన్నారు.

పాదచారి ప్రశ్నకు బదులుగా.. తాను రూ. 1.20 కోట్లతో నియోజకవర్గాన్ని అభివృద్ధి చేశానని చెప్పారు. ఇలాంటి ఎంపీని మీరు ఎక్కడైనా చూశారా అని ఓటరును వరప్రసాద్ ప్రశ్నించారు. రూ. 40 లక్షలతో గూడూరు పట్టణాన్ని అభివృద్ధి చేశానని ఆయన చెప్పారు. తన సమాధానం వినడానికి ధైర్యం లేదని శివాలెత్తిపోయారు. వరప్రసాద్ మండిపడడంతో పాదచారి అక్కడి నుంచి వెళ్లిపోతుండగా... వరప్రసాద్ అతడి వెంటబడి మరీ వెళ్లి సమాధామిచ్చారు. అయితే వర ప్రసాద్ చేసిన హంగామాతో అక్కడ ఉన్న వారందరూ అవాక్కయ్యారు. ఆ వీడియో సోషల్ మీడియాలో వైరల్ అవ్వటంతో, ఆయన ఎందుకు ఇలా విపరీత ప్రవర్తనతో ప్రవర్తించారో అని చూసిన వారు అనుకుంటున్నారు.

కేంద్ర ఎన్నికల సంఘం చేసే ప్రతి బదిలీకి కారణాలు చెప్పలేమని రాష్ట్ర ఎన్నికల ప్రధానాధికారి గోపాలకృష్ణ ద్వివేది స్పష్టం చేశారు. రాష్ట్ర ప్రభుత్వం కూడా ప్రతి బదిలీకి కారణాలేమీ చెప్పదన్నారు. అధికారులపై ఆరోపణలు ఉన్నా లేకపోయినా బదిలీలు చేసుకోవచ్చని చెప్పారు.గురువారం ద్వివేది మీడియాతో మాట్లాడారు. రాష్ట్ర ప్రభుత్వం కూడా 3 నెలలకే అధికారులను బదిలీ చేసిన సంఘటనలున్నాయని.. ఈసీ చేసిన ఎస్పీల బదిలీకి కారణాలు అవసరం లేదని చెప్పారు. సాధారణ రోజుల్లో జరిగే బదిలీలకు ప్రభుత్వాలు ప్రత్యేకించి ఎలాంటి కారణాలు చెప్పవు కదా? అని వ్యాఖ్యానించారు. ఎస్పీలను ఈసీ కేవలం బదిలీ మాత్రమే చేసిందని, అది శిక్ష కాదని స్పష్టం చేశారు.

ఎస్పీలు రాహుల్‌దేవ్‌ శర్మ, వెంకటరత్నంను బదిలీ చేసింది ఈసీ అయితే తనకు లేఖ రాసి ఏం ప్రయోజనమని ద్వివేది ప్రశ్నించారు. రాష్ట్రంలోని పోలీసు అధికారులను బదిలీ చేస్తూ ఈసీ తనకు ఉత్తర్వులు పంపిందని.. వాటిని తాను సీఎస్‌కు పంపానని చెప్పారు. ఎస్పీలిద్దరూ రాసిన లేఖలు తనకు అందలేదని.. అందితే వాటిని సీఈసీకి పంపుతానని తెలిపారు. రాష్ట్రంలోని పోలీసులపై వైసీపీ ఆరోపణలను ఈసీ పరిగణనలోకి తీసుకుంటే విచారణ జరిగి ఉండేదని, బదిలీలకు అదొక్కటే కారణమై ఉండదని వ్యాఖ్యానించారు. రాష్ట్రంలోని ఎస్పీలు, అదనపు డీజీలను బదిలీ చేసేటప్పుడు తనతో ఎలాంటి సంప్రదింపులు జరపలేదని, కచ్చితంగా జరపాల్సిన నిబంధన కూడా ఏదీ లేదని వెల్లడించారు.

సిట్‌కు సహకరిస్తున్నాం.. డేటా చోరీ, ఫాం-7పై వేసిన సిట్‌ బృందాలకు సహకరిస్తున్నామని, అధికారులు అడిగిన ప్రశ్నలన్నింటికీ వివరణలు ఇస్తున్నామని చెప్పారు. వైసీపీ, ప్రజాశాంతి పార్టీ గుర్తులు ఒకేలా ఉన్నా యని, ప్రజాశాంతి పార్టీ గుర్తు మార్చాలంటూ వచ్చిన ఫిర్యాదులపై ద్వివేది స్పందించారు. ఏ పార్టీకైనా ఇప్పుడు గుర్తులు మార్చ డం వీలుకాదని స్పష్టం చేశారు. ప్రజాశాంతి పార్టీ అధ్యక్షుడు కేఏ పాల్‌కు భద్రత పెంచమని పోలీసులకు సూచించామన్నారు. జగన్‌, విజయ్‌సాయిరెడ్డిల బెయిల్‌ రద్దు అంశం తమ పరిధిలో లేదన్నారు. ఎన్నికలు ప్రశాంతంగా నిర్వహించేందుకు రాష్ట్రవ్యాప్తంగా వేలాది మందిపై బైండోవర్‌ కేసులు పెట్టామన్నారు