news

ప్రస్తుతం కూల్చివేతల టైం నడుస్తుంది. అది కూడా ప్రత్యర్ధుల పై మాత్రమే. చంద్రబాబు కట్టిన ప్రజా వేదిక కూల్చివేతతో మొదలయ్యి, నెక్స్ట్ టార్గెట్ ఏంటా అని ప్రజలు ఎదురు చూస్తున్నారు. ఇప్పటికే ఉండవల్లి కరకట్ట పై చంద్రబాబు ఉంటున్న ఇంటికి నోటీసులు ఇచ్చి వారంలో పడేస్తాం అని వార్నింగ్ ఇచ్చారు. ఇప్పుడు విశాఖపట్నం తెలుగుదేశం పార్టీ కార్యాలయానికి కూడా వార్నింగ్ ఇచ్చారు. విశాఖపట్నంలోని 19వ వార్డులో, 2 వేల గజల్లో తెలుగుదేశం పార్టీ కార్యాలయం ఉంది. ఇది అక్రమం అంటూ, జీవీఎంసీ అధికారులు నోటీస్ ఇచ్చారు. వారం రోజుల్లో లోపు ఆ భవనానికి సంబంధించిన, లింక్‌ డాక్యుమెంట్‌లు ఇవ్వకపోతే, భవనాన్ని కూల్చేస్తామని విశాఖ తెలుగుదేశం పార్టీ అర్బన్‌ అధ్యక్షులు ఎస్‌ఎ.రెహ్మాన్‌కు పంపిన నోటీస్ లో, జివిఎంసి టౌన్‌ ప్లానింగ్‌ అధికారులు పేర్కొన్నారు. అయితే ఈ కార్యాలయం అక్రమం అంటూ వైసీపీ ఫిర్యాదు చెయ్యటం, వెంటనే జీవీఎంసీ రంగంలోకి దిగటం జరిగిపోయాయి.

అయితే దీని పై తెలుగుదేశం పార్టీ వాదన మరోలాగా ఉంది. 2001లో నే ఇక్కడ తెలుగుదేశం పార్టీ కార్యాలయానికి స్థలం కేటాయించాలంటూ, అప్పటి రాష్ట్ర ప్రభుత్వానికి దరఖాస్తు చేసామని, టిడిపి అర్బన్‌ అధ్యక్షులు ఎస్‌ఎ రెహ్మాన్‌ తెలిపారు. 2002లో ఆనాటి కలెక్టర్‌ నర్సింగరావు, జెసిగా ఉన్న ఎమ్‌టి.కృష్ణబాబు, రెండు వేల చదరపు గజాల స్థలాన్ని కేటాయించారని గుర్తు చేసారు. అందుకు సంబంధించిన డాక్యుమెంట్‌ తమ వద్ద ఉన్నాయని అన్నారు. అప్పటి తహశీల్దార్‌ ఆ స్థలాన్ని తమకు అప్పగించారని చెప్పారు. అయితే ఇప్పుడు జివిఎంసి అధికారులు రాణి కమలాదేవి నుండి ఈ స్థలానికి సంబంధించిన లింక్‌ డాక్యుమెంట్‌ అడుగుతున్నారని, ఇలా ఎందుకు అడిగారో కమిషనర్‌ను కలిసిన తర్వాత, ఈ విషయం పై స్పందిస్తామని అన్నారు. అయితే ఈ స్థాలానికి సంబంధించి అన్ని డాక్యుమెంట్లు మా దగ్గర ఉన్నాయని, ఇక్కడ ఏది అక్రమమ కట్టడం లేదని, జగన్ ప్రభుత్వం కక్ష సాధింపులో భాగమే ఇదంతా అని ఆరోపిస్తున్నారు.

తెలుగుదేశం పార్టీ ఓటమి చెందిన తరువాత, రాష్ట్రంలో రాజకీయ పరిణామాలు మారిపోతున్నాయి. తెలుగుదేశం పార్టీని బలహీనపరిచి, ఆ స్థానం ఆక్రమించుకోవాలని బీజేపీ ప్రయత్నం చేస్తుంది. ఇందులో భాగంగా, ఇప్పటికే రాజ్యసభ అభ్యర్ధులను లాగేసుకున్నారు. దాదపుగా 75 మంది నేతల కోసం, బీజేపీ ప్రయత్నాలు చేస్తుంది. కొంత మంది ఇప్పటికే కాషాయం కండువా కప్పుకున్నారు కూడా. ఒక పక్క చంద్రబాబు, ఓటమి పై సీనియర్ నేతలతో భేటీ అయ్యి, సమీక్షలు చేస్తుంటే, ఇక్కడ కొంత మంది నేతలు మాత్రం, అటు ఇటుగా ఉంటున్నారు. ముఖ్యంగా తెలుగుదేశం పార్టీ కాపు సామాజిక వర్గానికి ఎమ్మెల్యేలు, మాజీ ఎమ్మెల్యేలు, ముఖ్యనేతలు మాటి మాటికీ భేటీ అవ్వటం, బీజేపీలోకి వెళ్తున్నాం అని మీడియాకు లీకలు ఇవ్వటం, మీడియా ముందుకు వచ్చి, అదేమీ లేదు అని చెప్పటం, జరుగుతూ వస్తుంది. ఈ నేపధ్యంలో, ఈ రోజు మరోసారి తెలుగుదేశం పార్టీ కాపు నేతలు అంతా, సమావేశం అవుతున్నారు. బొండా ఉమా ఇంట్లో, ఈ రోజు లంచ్ మీటింగ్ కు కాపు నేతలంతా వచ్చారు .

కాకినాడలో జరిగిన సమావేశం తర్వాత కాపునేతలు అంతా, ఇలా భేటీ అవ్వటం, రెండోసారి. ఇది ఇలా ఉంటే, కాపు నేతలు అందరినీ చంద్రబాబు ఈ రోజు సాయంత్రం రమ్మన్నారు. చంద్రబాబుతో ఏమి మాట్లాడాలి అనే విషయం పై బొండా ఉమా ఇంట్లో అందరూ భేటీ అయ్యారు. ఈ సందర్భంగా బొండా ఉమా, మీడియాతో కొన్ని ఆసక్తికర వ్యాఖ్యలు చేశారు. మేము పార్టీ మారుతున్నాం అనే వచ్చిన వార్తల్లో వాస్తవం లేదని అన్నారు. మేము భేటీ అవుతుంది, పార్టీ మారటానికి కాదని, అలా అనుకుంటే, ఇన్ని మీటింగ్ లు అవసరం లేదని, ఒకేసారి మారిపోయే వాళ్ళమని బొండా ఉమా అన్నారు. మేము పార్టీ నుంచి మాకు ఎదురవుతున్న ఇబ్బందులు, కొంత మంది నుంచి సరైన సహకారం అందక పోవటం వంటి అంశాల పై మాత్రమే చర్చించామని అన్నారు. పార్టీలోని కొంత మని వల్ల మాకు ఇబ్బందులు వచ్చాయని, అవన్నీ చంద్రబాబు దృష్టికి తీసుకువెళ్తామని అన్నారు. ఈ సమస్యలు అన్నిటి పై చంద్రబాబుతో చర్చిస్తామని, పార్టీ అధినేతగా ఆయన సరైన నిర్ణయం తీసుకుంటారని భావిస్తున్నాం అని, చంద్రబాబు స్పందనను బట్టి భవిష్యత్తు కార్యాచరణ ప్రకటిస్తామని చెప్పారు.

తెలుగుదేశం పార్టీ అధినేత, మాజీ ముఖ్యమంత్రి చంద్రబాబు నాయుడు, మొదటిసారి గుంటూరులోని తెలుగుదేశం పార్టీ రాష్ట్ర కార్యాలయానికి వచ్చారు. ఈ రోజు నుంచి వారంలో 5 రోజులు పాటు, చంద్రబాబు ఇక్కడే, కార్యకర్తలకు, నేతలకు అందుబాటులో ఉండనున్నారు. చంద్రబాబు మొదటి సారి కార్యాలయానికి వచ్చిన సందర్భంలో, పెద్ద ఎత్తున, నేతలు, కార్యకర్తలు స్వాగతం పలికారు. కార్యాలయం బయట ఉన్న ఎన్టీఆర్ విగ్రహానికి నివాళులు అర్పించి, చంద్రబాబు కార్యాలయంలోకి అడుగు పెట్టారు. ఈ సందర్భంగా, చంద్రబాబు కార్యకర్తలను ఉద్దేశించి మాట్లాడారు. ఈ రోజు నుంచి పార్టీ కార్యక్రమాలు ఇక్కడ నుంచే జరుగుతాయాని అన్నారు. మంగళగిరిలో కార్యాలయం సిద్ధం అయ్యే వరకు, ఇక్కడ నుంచే పని చేస్తామని చెప్పారు. 40 శాతం మంది మనకు ఓటు వేసారని, వారికి అండగా ఉండాల్సిన బాధ్యత మనదే అని చంద్రబాబు అన్నారు. ఎంతో మంచి పరిపాలన అందించామని, అందరికీ సంక్షేమ పధకాలు అందించామని, ఏ మూలకు వెళ్ళినా మన అభివృద్ధి కనిపిస్తుందని, అయినా ఎన్నికల్లో ఓడిపోయామని, గెలుపు ఓటములు సహజం అని, ప్రజల కోసం పని చెయ్యాలని చంద్రబాబు అన్నారు.

అయితే ఈ సందర్భంగా వైసీపీ చేస్తున్న దాడులు పై చంద్రబాబు తీవ్రంగా స్పందించారు. వైసీపీ వచ్చిన నెలలోనే మన కార్యకర్తల పై దాడులు జరిగాయని అన్నారు. ఇప్పటికే 6 గురుని చంపేశారని అన్నారు. ప్రతి కార్యకర్తకు అండగా ఉండాల్సిన బాధ్యత నాదని, అవసరం అయితే ఆ గ్రామాలకు వచ్చి అండగా ఉంటానని అన్నారు. కుప్పం పర్యటన తరువాత, చనిపోయిన కార్యకర్తల కుటుంబాలని చంద్రబాబు పరామర్శించనున్నారు. చనిపోయిన వారికి 5 లక్షలు ఆర్ధిక సాయం చెయ్యనున్నారు. చంద్రబాబు మాట్లాడుతూ, కార్యకర్తలే 37 ఏళ్ళుగా పార్టీని మోస్తున్నారని, పార్టీ వల్ల నష్టం వచ్చినా పార్టీతోనే ఉన్నారని అన్నారు. వారే మన పార్టీకి మూలస్తంభాలు, అలాంటి వారి పై దాడులు చేస్తే, చూస్తూ ఊరుకోను, మనం ఏ తప్పు చెయ్యలేదు, అరాచకం చెయ్యలేదు, మీకు అండగా నేను ఉంటా, మీ ఊరికి వచ్చి అండగా ఉంటా అని చంద్రబాబు కార్యకర్తలకు ధైర్యం చెప్పారు.