news

ఆంధ్రప్రదేశ్ ప్రభుత్వానికి వరుస ఎదురు దెబ్బలు తగులుతున్నాయి. ఒక సీనియర్ అధికారి పై, ఇంతలా కక్ష ఎందుకు అంటూ, క్యాట్ ప్రశ్నించింది. అంతే కాదు, ప్రభుత్వ చర్యల పై ఆగ్రహం వ్యక్తం చేసింది. వివరాల్లోకి వెళ్తే, ఐఆర్ఎస్ అధికారి, కృష్ణకిషోర్‌ ను ప్రభుత్వం సస్పెండ్ చేసిన వ్యవహారంలో, ఆంధ్రప్రదేశ్ ప్రభుత్వ తీరు పై క్యాట్ ఆగ్రహం వ్యక్తం చేసింది. ఇప్పటి వరకు కృష్ణకిషోర్‌ని ఎందుకు రిలీవ్‌ చేయలేదో చెప్పాలని, ఏపి ప్రభుత్వాన్ని క్యాట్ ప్రశ్నించింది. ఒక పక్క కేంద్రం ఆదేశాలు ఉన్నా, అవి ఎందుకు పట్టించుకోలేదొ సమాధానం చెప్పాలని క్యాట్‌ ప్రశ్నించింది. ఈ వ్యవహరం పై వెంటనే తమకు వివరణ ఇవ్వాలంటూ ఏపీ ప్రభుత్వాన్ని క్యాట్‌ ఆదేశించింది. 15 రోజుల క్రితం ఏపీఈడీబీ సీఈవోగా పని చేసిన కృష్ణకిషోర్‌‌ అవినీతి చేసారు అంటూ, ఏపి ప్రభుత్వం సస్పెన్షన్‌ చేసింది. ఆయన్ను సస్పెండ్ చేసి, ఎంక్వయిరీ చెయ్యాలి అంటూ, చీఫ్ సెక్రటరీ ఆదేశాలు ఇచ్చారు. ఆయన నిధుల దుర్వినియోగం చేసారు అంటూ, సీఐడీ కేసు నమోదు చేసారు.

అయితే, ప్రభుత్వం చేస్తున్న కక్ష పూరిత వ్యవహారం పై, కృష్ణ కిషోర్ క్యాట్ ను ఆశ్రయించారు. దీంతో, క్యాట్ ప్రభుత్వం పై సీరియస్ అయ్యింది. ఆయన సస్పెన్షన్ పై స్టే ఇచ్చింది. కేంద్ర ఆదేశాలు ఉన్నా, అవి ఎందుకు అమలు చెయ్యలేదు, అంటూ క్యాట్ సీరియస్ అయ్యింది. కృష్ణకిషోర్‌ని రిలీవ్‌ చెయ్యకుండా, ఏమి చేస్తున్నారు అంటూ ప్రభుత్వాన్ని క్యాట్ ప్రశ్నించింది. "ఏపీ ప్రభుత్వం పిచ్చిగా ప్రవర్తించింది. కృష్ణ కిషోర్‌ సస్పెన్షన్‌లో నిబంధనలు పాటించలేదు. కృష్ణ కిషోర్‌ సస్పెన్షన్‌ అసమంజసం. రాష్ట్ర ప్రభుత్వం తన శక్తియుక్తులను అభివృద్ధికి వినియోగించాలి. కృష్ణ కిషోర్‌కి పెండింగ్‌లో ఉన్న జీతం వెంటనే చెల్లించాలి" అని ప్రభుత్వానికి క్యాట్‌ ఆదేశాలు జారీ చేసింది.

అలాగే కృష్ణ కిషోర్‌కి పెండింగ్‌లో ఉన్న జీతం కూడా, ప్రభుత్వం వెంటనే చెల్లించాలని క్యాట్ తన ఆదేశాల్లో పేర్కొంది. ఒక సీనియర్ అధికారి విషయంలో ప్రభుత్వం ఇంతగా వ్యవహరించాల్సిన అవసరం ఏమిటని ప్రశ్నించింది. అలాగే కృష్ణ కిషోర్ సస్పెన్షన్ పై ప్రభుత్వం ఇచ్చిన ఉత్తర్వులను, వచ్చే నెల 31వరకు స్టే ఇస్తూ, ఉత్తర్వులు పొడిగించింది. చంద్రబాబు హయంలో, కృష్ణ కిషోర్ డిప్యుటేషన్ పై వచ్చారు. ఏపీఈడీబీకి సీఈఓగా పని చేస్తూ, అనేక కంపెనీలతో పెట్టుబడుల పై అవగాహనా కార్యక్రమాలు చేసే వారు. అసలు ఈ శాఖకు బడ్జెట్ కూడా ఉండదు. అయితే, ఆయన గతంలో ఐటి డిపార్టుమెంటులో పని చేసే సమయంలో, జగన్ అక్రమ ఆస్తుల కేసు విషయంలో, జగతిలో వచ్చిన అక్రమ పెట్టుబడులు బయటకు తీసిన వ్యక్తిగా పేరు ఉంది. ఇప్పుడు జగన్ రాగానే, ఆయన పై అభియోగాలు మోపి, సస్పెండ్ చేసారు.

ఆంధ్రప్రదేశ్ రాష్ట్రంలో జరుగుతున్న పరిణామాల పై కేంద్రం ఒక కన్ను వేసి ఉంచుంది. రాష్ట్రంలో మూడు రాజధానులు అంటూ జగన్ చేసిన ప్రకటన పై, అమరావతికి భూములు ఇచ్చిన రైతులు ఆందోళన చెందుతున్న సంగతి తెలిసిందే. ఇప్పటికే ఏడు రోజులుగా ఉద్యమాలు చేస్తున్నారు. ఇక విశాఖపట్నం ప్రజలు అయితే, ఇప్పటి వరకు ప్రశాంతంగా ఉన్నాం, మాది ఇప్పటికే ఒక పెద్ద సిటీ, ఇప్పుడు వచ్చి, దీన్ని నాశనం చేస్తారు అంటూ భయపడుతున్నారు. ముఖ్యంగా అమరావతి ప్రాంత రైతులు, గత ఏడు రోజులుగా చేస్తున్న ఆందోళన, ఢిల్లీని కూడా తాకింది. ముఖ్యంగా రైతులు, మహిళలు, పిల్లలు కూడా ఏడు రోజులుగా ఉద్యమంలో పాల్గునటంతో, ప్రధాన మంత్రి కార్యాలయం కూడా సమాచారం తెప్పించుకుంటుంది. అసలు క్షేత్ర స్థాయిలో ఏమి జరుగుతుంది ? నిజంగానే అక్కడ రైతులకు సమస్య ఉందా ? వారు స్వచ్చందంగా ఆందోళన చేస్తున్నారా ? వారి ఆందోళన, వారి ఇబ్బందులు ఏమిటి ? అనే విషయాల పై, ప్రధాని కార్యాలయం ఆరా తీస్తుంది.

ఇప్పటికే చాలా రాష్ట్రాల్లో పౌర హక్కు బిల్లు పై చేస్తున్న ఆందోళనలతో కేంద్రం ఇబ్బంది పడుతుంది. ఏ సమస్య లేని ఏపిలో కూడా, ప్రభుత్వం కావాలని చేసిన ప్రకటన పై, అక్కడ కూడా ఆందోళన మొదలు అవ్వటం, కేంద్రాన్ని చికాకు పెడుతుంది. దీంతో ఏపిలో పరిస్థితి పై కూడా ఎప్పటికప్పుడు సమాచారం తెప్పించుకుంటున్నారు. అసలు రాష్ట్రం మూడు రాజధానుల ప్రకటన ఎందుకు చేసింది ? అప్పులతో నెట్టుకు వస్తున్న రాష్ట్రానికి మూడు రాజధానులు కట్టే వెసులు బాటు లేదు కదా ? దీనిలో ఉన్న రాజకీయం ఏమిటి ? ఉద్యోగులు దీనికి ఒప్పుకుంటున్నారా ? మిగతా జిల్లాల వారి అభిప్రాయం ఎలా ఉంది ? మొత్తం వ్యవహారాల పై కేంద్రం వాస్తవ పరిస్థితితో రిపోర్ట్ లు తెప్పించుకుంటుంది.

అయితే ఇది ఇలా ఉంటే, ఈ పరిణామంతో రాష్ట్రం కూడా అలెర్ట్ అయ్యింది. కేంద్ర ఐబి రంగంలో దిగటంతో, వారు పిఎంఓకి ఎలాంటి నివేదికలు ఇస్తున్నారు ? కేంద్రం, రాష్ట్రం తీసుకున్న మూడు రాజధానుల పై ఏమని అనుకుంటుంది, తదితర అంశాల పై ఆరా తీస్తుంది. ఇందు కోసం, రాష్ట్రప్రభుత్వంలో కీలక హోదాలో ఉన్న అధికారి ఢిల్లీలో మకాం వేశారు. అయితే ఈ అధికారి, ప్రధాని మోదీ, హోం మంత్రి అమిత్‌షాకు అత్యంత సన్నిహితంగా ఉండే ఓ శాఖ కార్యదర్శిని కలిసి, ఏమి జరుగుతుందో తెలుసుకోవాలని అనుకోవటంతో, ఆయనకు నిరాస ఎదురైంది. ఆయనకు అపాయింట్‌మెంట్‌ లభించలేదని తెలిసింది. అయితే, ఢిల్లీ పైనే ఏపి ప్రభుత్వం నిఘా పెట్టటం, వారు ఏమని అనుకుంటున్నారో తెలుసుకోవటం, ఈ పరిణామం మరింత చర్చనీయాంశంగా మారింది.

రాజధాని రైతాంగం న్యాయపోరాటానికి సిద్ధమవుతోంది. రాజధానిపై జగన్ మోహన్ రెడ్డి శాసనసభలో ప్రకటన చేసిన నేపథ్యంలో గందరగోళ పరిస్థితులు తలెత్తాయి. రాష్ట్రప్ర భుత్వ వైఖరిని సవాల్ చేస్తూ హైకోర్టులో వందల సంఖ్యలో రిట్ పిటిషన్ను ప్రజా ప్రయోజన వ్యాజ్యాలు దాఖలు చేయాలని యోచిస్తున్నారు. రాజధాని పరిధికి చెందిన ప్రముఖ హైకోర్టు న్యాయవాది కారుమంచి ఇంద్రనీల్ బాబు కార్యాలయంలో దాదాపు 20మంది న్యాయవాదులు సమావేశమై ఈ మేరకు నిర్ణయం తీసుకున్నారు. రాజధాని నిర్మాణానికి భూ సమీకరణలో భాగంగా భూములు ఇచ్చిన రైతులు వేర్వేరు కారణాలతో విడివిడిగా హైకోర్టులో రిట్ దాఖలు చేసేందుకు సన్నాహాలు చేస్తున్నారు. రైతులంతా వేర్వేరు కారణాలతో రిట్లు దాఖలు చేస్తే న్యాయమూర్తి దృష్టికి ప్రతీ అంశాన్ని క్షుణ్ణంగా తీసుకెళ్ళే వీలు కలుగుతుందనేది వారి అభిప్రాయం. ఈ రిట్లతో పాటు ప్రతి గ్రామం నుంచి ఒక రైతు ప్రజా ప్రయోజన వ్యాజ్యం దాఖలు చేసే యోచనలో ఉన్నట్లు సమాచారం.

హైకోర్టులో న్యాయ సహాయం చేసేందుకు ఇప్పటికే 20మంది న్యాయవాదులు సంసిద్ధత వ్యక్తం చేశారని, వారంతా ఆ దిశగా రైతులకు అవగాహన కల్పిస్తున్నట్లు చర్చ జరుగుతుంది. రాష్ట్ర ప్రభుత్వం ఏర్పాటు చేసిన జీఎన్ రావు కమిటీ నివేదికపై 'రిట్' లలో ప్రస్తావించాలని న్యాయవాదులు సూచిస్తున్నారు. రాజధాని విషయంలో ముఖ్యమంత్రి కేవలం తన అభిప్రాయంగానే చెప్పినందున దానిపై హైకోర్టులో రిట్ వేస్తే తిరస్కరణకు గురయ్యే ప్రమాదముందని, అందువల్ల ప్రభుత్వం స్పష్టమైన ప్రకటన చేసే వరకు వేచి చూసి అనంతరం దానిపై నిర్ణయం తీసుకోవాలని న్యాయవాదులు భావిస్తున్నారు. ఈ నెల 27న రాష్ట్ర మంత్రివర్గ సమావేశంలో రాజధాని విషయమై ఒక స్పష్టత వచ్చే అవకాశముంది.

జీఎన్ రావు కమిటీతో పాటు బోస్టన్ సంస్థ అధ్యయన నివేదికపై మంత్రివర్గ సమావేశంలో చర్చింగలరని భావిస్తున్నారు. అయితే కమిటీ ఏర్పాటు చేస్తూ ఇచ్చిన జీవోలో రాజధానిలో అభివృద్ధి అంశాన్ని చేర్చినందున దానిపై న్యాయస్థానాన్ని ఆశ్రయించవచ్చని న్యాయవాదులు సూచిస్తున్నారు. ప్రస్తుతం ఇందుకు సంబంధించి రైతులు హైకోర్టు న్యాయవాదులను సంప్రదిస్తున్నట్లు సమాచారం. మరో పక్క, ఇప్పటికే ఒక కేసు హైకోర్ట్ లో నడుస్తుంది. దానికి సంబంధించి, ఇప్పటికే హైకోర్ట్, రాష్ట్ర ప్రభుత్వానికి నోటీసులు జారీ చేసి, కౌంటర్ అఫిడవిట్ ధాఖలు చెయ్యమని కోరింది. రైతులు అన్ని విధాలుగా, వారికి తోచిన విధంగా రాష్ట్ర ప్రభుత్వం పై ఒత్తిడి పెంచుతున్నారు. మరి రాష్ట్ర ప్రభుత్వం దిగి వస్తుందో రాదో మరి.