news

ఆంధ్రప్రదేశ్ రాజధాని అమరావతిలో, రైతులు చేస్తున్న ఆందోళనకు మద్దతుగా చంద్రబాబు, ఈ రోజు అమరావతిలో పర్యటించారు. ఈ సందర్భంగా చంద్రబాబు, రైతులకు సంఘీభావం తెలిపారు. ఈ సందర్భంగా, జగన్ మోహన్ రెడ్డి ఏర్పాటు చేసిన జీఎన్ రావు కమిటీ పై చంద్రబాబు సంచలన వ్యాఖ్యలు చేసారు. ఈ జీఎన్ రావు తన దగ్గర, ఇదే గుంటూరులో పని చేసారని చంద్రబాబు గుర్తు చేసారు. మనకు తెలియని విషయాలు, ఈ మేధావులకు తెలుస్తాయట అంటూ స్పందించారు. చంద్రబాబు మాట్లాడుతూ, "జిఎన్ రావు కమిటీకి ఉన్న విశ్వసనీయత ఏమిటి..? అసలు కమిటీ వెయ్యమని ఎవరు అడిగారు ? నివేదిక ఇవ్వకముందే ప్రశ్నాపత్రాన్ని జగన్మోహన్ రెడ్డి లీక్ చేశారు. లీక్ అయ్యాక పరీక్ష ఈ జీఎన్ రావు రాశారన్నమాట..అది జగన్ కమిటియే తప్ప జిఎన్ రావు కమిటి కాదు. జీఎన్ రావు కమిటి ఇక్కడికొచ్చిందా..? అందరితో మాట్లాడారా..? 30వేల ఎకరాలు మీరిచ్చారు, మీకేం కావాలి, నన్ను రిపోర్ట్ ఇవ్వమన్నారు అని అడిగారా...?" అంటూ చంద్రబాబు స్పందించారు.

‘‘ ఏనాడూ ఇళ్లలోనుంచి బైటకు రాని ఆడబిడ్డలు రోడ్డుమీదకు వచ్చారు. పనులన్నీ మానుకుని ఆందోళనలు చేసే పరిస్థితి కల్పించారు. ఇక్కడ కులాలు, మతాలు, ప్రాంతాలు లేవు. ముక్తకంఠంతో అందరూ అడిగేది న్యాయం చేయమని. సమాజహితం కోరి భూములు ఇచ్చారు. ఒకపక్క 6జిల్లాలు, ఇంకోవైపు 7జిల్లాలకు మధ్యలో రాజధాని పెట్టాం. చంద్రబాబుగా నేను భూములు అడగలేదు, ముఖ్యమంత్రి చంద్రబాబుగా అడిగితే ఇచ్చారు. ఇక్కడ రాజకీయాలు లేవు, రాజకీయ పార్టీలు ముఖ్యం కాదు. సమాజ హితమే ముఖ్యం. ఆ రోజు ముఖ్యమంత్రిగా నా పిలుపుతో ముందుకొచ్చి 33వేల ఎకరాల భూములిచ్చారు. అసైన్డ్ ల్యాండ్ రైతులకు కూడా న్యాయం చేశాం. ప్రజా రాజధానిని పూర్తిగా దెబ్బతీస్తున్నారు. అసెంబ్లీ, సెక్రటేరియట్ 4భవనాలతో అభివృద్ది సాధ్యం కాదు. సంపద సృష్టించడం అభివృద్ది అంటే.."

అమరావతిపై ఆదాయం రాదన్నారు. గంటలో రూ2వేల కోట్లు బాండ్లు ముంబై స్టాక్ మార్కెట్ లో వచ్చింది అంటే అది అమరావతిపై ఉన్న నమ్మకం. ఇక్కడి ఇన్ ఫ్రాస్ట్రక్చర్ అభివృద్దికి ఇక్కడి సంపదే చాలు. ఇది సంపద సృష్టించే బంగారు బాతు. ధైర్యం ఉంటే హైకోర్టు ద్వారా సిటింగ్ జడ్జితో న్యాయ విచారణ జరిపించండి. తప్పు చేసినవారిని శిక్షించండి. మేము కూడా పూర్తిగా సహకరిస్తాం. నా సవాల్ స్వీకరించండి..కానీ ఆ పేరు చెప్పి అమరావతిని చంపడం అన్యాయం. గొప్ప నగరంగా నిర్మించండి, 30వేల ఎకరాలు కావాలని అసెంబ్లీలో అన్నది ఇదే జగన్మోహన్ రెడ్డి కాదా..? ఎందుకు మాట మార్చారు, మడమ తిప్పారు..? రాజకీయాలు వద్దు ఇక్కడ..ఇక్కడి రైతులకు కావాల్సింది అమరావతి అభివృద్ది. రాయలసీమ, ఉత్తరాంధ్ర, అన్ని ప్రాంతాలకు సమన్యాయం జరగాలి. అమరావతి ప్రాంత రైతాంగానికి ఇచ్చిన మాట నిలబెట్టుకోవాలని ’’ చంద్రబాబు తన ప్రసంగంలో పేర్కొన్నారు.

రాజకీయంగా చంద్రబాబుని ఇబ్బంది పెట్టటానికి, జగన్ మోహన్ రెడ్డి తీసుకున్న, మూడు రాజధానుల విషయం పై, ఈ రోజు చంద్రబాబు స్పష్టమైన ప్రకటన చేసారు. ఈ రోజు చంద్రబాబు అమరావతి ప్రాంతంలో పర్యటించారు. అమరావతిలో రైతులు పడుతున్న ఇబ్బందులు, వారు పడుతున్న ఆవేదన చూసి చలించిన చంద్రబాబు, ఈ రోజు వారి దీక్షకు మద్దతు తెలిపారు. తుళ్లూరు మహాధర్నా లో చంద్రబాబు ,మాట్లాడుతూ, జై అమరావతి అంటూ నినాదాలు చేసి ప్రారంభించారు. "అమరావతి రైతుల్ని ఈ పరిస్థితుల్లో చూస్తాననుకోలేదు. సమాజ హితం కోసం ముందుకొచ్చిన త్యాగధనులు మీరు. రాష్ట్రం నిలదొక్కుకోవాలనే ఉద్దేశం తో మీరు భూముల ఇచ్చేందుకు నాడు ముందుకొచ్చారు. మీకందరికీ ఆమోదయోగ్యమైన ప్యాకేజి నాడు ప్రకటించా. ఇది ఓ మహానగరంగా అభివృద్ధి చెందుతుందని మీరంతా భూములిచ్చారు. రైతులకు న్యాయం కోసమే రైతు దినోత్సవం జరుపుకుంటున్నారు. రైతు దినోత్సవం రోజే రోడ్డు పై ఉండటం బాధ కలిగిస్తోంది"

"అమరావతి లో రైతులు ప్రథమ పౌరులుగా ఉంటారని ఆశించా. నాడు చంద్రబాబు గా హామీ ఇవ్వలేదు....ప్రభుత్వం నుంచి సీఎం గా హామీ ఇచ్చాను. ఎకరం భూమి ఇవ్వడానికి ముందుకు రాని పతిస్థితుల్లో....33 వేల ఎకరాలు ఇచ్చారు. ఒక్క ఇల్లు కట్టాలంటే మూడేళ్లు పడుతుంది. రైతులకు న్యాయం జరగాల్సిందే. అమరావతి పై జగన్ ఎందుకు మాట తప్పి మడం తిప్పారు. 30వేల ఎకరాలు కావాలని నాడు అని ఇప్పుడెందుకు 200ఎకరాలు చాలు అంటున్నారు. ఇన్సైడ్ ట్రేడింగ్ పేరుతో అమరావతి ని చంపేయటం అన్యాయం, దుర్మార్గం. ధైర్యం ఉంటే హైకోర్టు ద్వారా ఇన్సైడ్ ట్రేడింగ్ పై న్యాయ విచారణ జరిపించండి. మేమూ విచారణకు సహకరిస్తాం. తప్పు తేలితే ఎలాంటి శిక్షకైనా సిద్ధం. రాజకీయాలు ఎన్నికలప్పుడు చేసుకుందాం."

"నాకు ఇప్పుడు కావాల్సింది అమరావతే. జీఎన్ రావు ఎవరిని అడిగి నివేదిక రూపొందించారు. జీఎన్ రావ్ రిపోర్ట్ కి ఉన్న విశ్వసనీయత ఎంత. ముఖ్యమంత్రి పేపర్ లీక్ చేస్తే జీఎన్ రావు పరీక్ష రాసినట్లుంది. జీఎన్ నివేదిక జగన్ నివేదిక తప్ప మరొకటి కాదు. విశాఖ అభివృద్ధి కి తెలుగుదేశం వ్యతిరేకం కాదు. విశాఖ ను ఆర్ధిక రాజధాని గా ప్రకటించాం. ఐటీ హబ్ గా విశాఖ అభివృద్ధి కి శ్రీకారo చుట్టాం. పర్యాటక కేంద్రంగా విశాఖ పరిసర ప్రాంతాల అభివృద్ధి కి పూనుకున్నాం. సచివాలయం లేదా అసెంబ్లీ అక్కడ పెడితే అది అభివృద్ధి కాదు. అసెంబ్లీ ఓ దగ్గర, సచివాలయం మరో ప్రాంతంలో ప్రపంచంలో ఎక్కడా లేదు. నాపై కోపంతో ప్రజల్ని హింసించడం తగదు" అంటూ చంద్రబాబు అమరావతి రైతులకు ధైర్యం చెప్పారు.

ఆంధ్రప్రదేశ్ అసెంబ్లీ స్పీకర్, తమ్మినేని సీతారంకు, ఢిల్లీలోని ఏపి భవన్ లో అవమానం జరిగింది అంటూ, పత్రికల్లో కధనాలు వచ్చాయి. ఆ కధనాలు ప్రకారం, ఏపి భవన్ కు వచ్చిన తమ్మినేని సీతారం, రాష్ట్ర అతిధిగా వచ్చినా, ఆయన గౌరవ మర్యాదలకు, ప్రోటోకాల్ నిబంధనలు తుంగలోకి తొక్కారని, ఏపి భవన్ అధికారుల పై ఆయన మనస్తాపం చెందారు. డెహ్రాడూన్‌ పర్యటన తరువాత, తమ్మినేని సీతారం, సతీసమేతంగా, ఢిల్లీలోని ఏపి భవన్ కు చేరుకున్నారు. తమ్మినేని సీతారంకు, ఏపి భవన్ లోని స్వర్ణముఖి బ్లాకులోని 320 గెస్ట్‌ రూమ్‌ను కేటాయించారు. అయితే, ఈ సందర్భంలో, తమ్మినేని ఆదివారం సాయంత్రం, రాష్ట్రానికి తిరుగు ప్రయాణం అయ్యే హడావిడిలో ఉండగా, ఏపి భవన్ అధికారులు వచ్చి, ఆయనకు షాక్ ఇచ్చారు. ఏపి భవన్ ఉద్యోగి ఒకరు, వచ్చి, ఆయనకు ఒక కవర్ ఇచ్చారు, ఆ కవర్ ఇస్తూ, సార్‌, మీ భోజన, వసతి బిల్లు కట్టమన్నారు, ఈ పుస్తకం పై, మీ సంతకం చెయ్యండి అంటూ, ఆ ఉద్యోగి తమ్మినేనిని కోరారు.

అయితే ఈ పరిణామం పై, తమ్మినేని ఆశ్చర్యం వ్యక్తం చేసారు. ఒక స్పీకర్ గా ఉంటూ, ఆంధ్రప్రదేశ్ రాష్ట్ర అతిథి హోదాలో ఉన్న తనకు, ఇలా బిల్లు అడగటం ఏమిటి అంటూ, తమ్మినేని ఆశ్చర్యం వ్యక్తం చేసారు. అయితే దీనికి సమాధానం ఇస్తూ, ఆ ఉద్యోగి, సార్‌, మీకు కేటగిరీ-1 కింద విడిది ఇచ్చారు. అమరావతిలో ఉండే సాధారణ పరిపాలనా విభాగంనుంచి స్టేట్‌ గెస్ట్‌గా కాకుండా కేటగిరీ-1లో మీకు వసతి ఏర్పాట్లు చేయాలని ఆదేశాలిచ్చారు. దాని వల్ల, ఈ పొరపాటు జరిగిందని వారు తెలిపారు. అనుకోకుండా పొరపాటు జరిగిందని, ఈ ఇబ్బందికి చింతిస్తున్నామని, కాని బిల్ జేనేరేట్ అవ్వటంతో, బిల్ కట్టాల్సి ఉంటుంది అంటూ, ఆ ఉద్యోగి, తమ్మినేనికి విషయం చెప్పారు.

అయితే అంతా విన్న తమ్మినేని, అనవసరంగా ఇష్యూ ఎందుకు, ముందు బిల్లు ఎంత వచ్చిందో,అంతా కట్టేయండి, తరువాత జరిగిన సంగతి నేను చూసుకుంటూ అంటూ, తమ్మినేనని తన సిబ్బందిని ఆదేశించారు. అయితే, ఇదే సమయంలో, అక్కడ జరిగిన విషయం పై, తమ్మినేని సతీమణి వాణి కూడా తీవ్ర ఆవేదన వ్యక్తం చేసారు. డబ్బు గురించి, బిల్లు గురించి కాదని, ఎంతైనా ఇచ్చేస్తాం అని, కాని రాష్ట్ర అతిధి హోదాలో వచ్చిన తమకు, అదీ కాక ఒక స్పీకర్ కు ఇలా అవమానం చేస్తారా ? స్పీకర్‌ను కూడా ఈ అధికారులు గౌరవించలేదు అని అసహనం వ్యక్తంచేశారు. అయితే జరిగిన విషయం పై ఏపీ భవన్‌ రెసిడెంట్‌ కమిషనర్‌ భావనా సక్సేనా విచారం వ్యక్తం చేస్తూ, స్పీకర్ కు జరిగిణ అవమానానికి చింతిస్తున్నామన్నారు.