news

రాష్ట్రంలో మూడు రాజధానుల పై, జగన్ మోహన్ రెడ్డి చేసిన వ్యాఖ్యలతో, రాజధాని రైతులు ఆందోళన వ్యక్తం చేస్తున్న సంగతి తెలిసిందే. గత నాలుగు రోజుల నుంచి అమరావతి రైతులు ఆందోళన బాట పట్టారు. అయితే వీరికి వివిధ వర్గాల నుంచి మద్దతు లభిస్తుంది. ఇప్పటికే తెలుగుదేశం పార్టీకి చెందిన వివిధ నాయకులు, వీరికి మద్దతు పలుకుతున్నారు. అలాగే రేపటి నుంచి కృష్ణా జిల్లా వ్యాప్తంగా వీరికి మద్దతుగా వివిధ వర్గాలు, ఆందోళన కార్యక్రమాలు ప్లాన్ చేస్తుంది. అయితే వీరికి, ఇప్పుడు హిందూ దేవాలయ ప్రతిష్టాన్ పీఠాధిపతి కమలానంద భారతి స్వామి కూడా మద్దతు పలికారు. ఆయాన ఈ రోజు అమరావతి ప్రాంతంలో పర్యటించారు. మందడంలో ఆందోళన చేస్తున్న రైతులు చేస్తున్న దీక్షలో కూర్చుని సంఘీభావం‌ ప్రకటించారు. గతంలో అమరావతి పై అందరూ చర్చించి, అసెంబ్లీలో కూడా ఏకాభిప్రాయం వచ్చిన తరువాతే అందరూ ఒప్పుకున్నారని, తరువాతే ఇక్కడ శంకుస్థాపన చేసారని అన్నారు. ఈ తరుణంలో అమరావతి పై చర్చలు, కమిటీలు అవసరమే లేదని కమలానంద భారతి అన్నారు.

అమరావతిని రాజధానిగా ప్రకటించిన రోజు అందరూ ఒప్పుకుని, ఇప్పుడు మార్చుతాం అని చెప్పటం కరెక్ట్ కాదని అన్నారు. ముద్ద ముద్దకూ బిస్మిల్లా చేయరని, అలాగే రాజధానికి అనే దానికి ఒక్కసారే శంకుస్థాపన చేస్తారని ఆయన వ్యాఖ్యానించారు. అమరావతి కోసం చేస్తున్న ఉద్యమాన్ని కొనసాగించాలని, ఈ పోరాటానికి తమ మద్దతు ఉంటుందని, కమలానంద అన్నారు. మీ భద్రత, భవిష్యత్‌, జీవితం అంతా అమరావతితోనే ముడిపడి ఉందని, దాని కోసం మీరు పోరాడి సాధించుకోవాలని అన్నారు. అమరావతి రాజధాని అనేది, 29 గ్రామాల ప్రజల రాజధాని కాదని, 5 కోట్ల మంది ఆంధ్రుల రాజధాని అని, రాజధాని అభివృద్ధి చెందితే, ఈ అభివృద్ధిలో అందరూ భాగస్వాములేనని కమలానంద భారతి తెలిపారు.

అమరావతి ఏర్పాటు అనేది దైవ నిర్ణయమని, ఈ ప్రాంతానికి దేవతల ఆశీస్సులున్నాయన్నారు. అమరావతి అనే దైవ నిర్ణయాన్ని ఎవ్వరూ ఆపలేరన్నారు. వచ్చే 5-10 ఏళ్లలో అమరావతి నిర్మాణం పూర్తవుతుందని జోస్యం చెప్పారు. ఈ సంవత్సరం వర్షాలు బాగా పడటంతో మబ్బులు ఎక్కువగా కమ్ముకున్నాయని, మబ్బులు విడిపోయాక మామూలు వాతావరణం వస్తుందని అన్నారు. డిసెంబర్ నెలలో అమరావతికి కొద్దిగా ఇబ్బందులు వస్తాయని, అయితే సంక్రాంతి తరువాత, అమరావతి పై ఏర్పడ్డ వివాదాలు అన్నీ తొలగి పోతాయని ఆయన అన్నారు. 29 గ్రామాల్లోని ప్రతి గ్రామంలో ఉన్న అమ్మవార్లకు పూజలు జరపాలని పిలుపునిచ్చారు. అధైర్యపడి, తొందరపాటు నిర్ణయాలు తీసుకోవద్దని ఆయన రాజధాని రైతులకు చెప్పారు.

తమ భూములు తీసుకుని, ఇప్పుడు ఇక్కడ అసెంబ్లీ తప్ప ఏమి ఉండదు అంటూ, జగన్ ప్రభుత్వం చేసిన ప్రకటన పై రాజధాని రైతులు, గత అయుదు రోజులుగా ఆందోళన చేస్తున్న సంగతి తెలిసిందే. అయితే ఇప్పుడు ఆందోళనలో పాల్గున్న కొంత మంది రైతులకు షాక్ ఇచ్చారు పోలీసులు. రైతులు చేస్తున్న ఆందోళన నేపధ్యంలో, పోలీసులు ఇప్పటి వరకు రైతుల పై, ఆరు కేసులు నమోదు చేసారు. అమరావతి ప్రాంతంలో, 144 సెక్షన్ తో పాటుగా, సెక్షన్ 30 పోలీస్ ఆక్ట్ అమలులో ఉందని, అయినా రైతులు వినకుండా, ఎక్కడికక్కడ గుమికూడి ఆందోళన చెయ్యటంతో, వారి పై, కేసులు నమోదు చేసామని పోలీసులు చెప్తున్నారు. మల్కాపురం జంక్షన్‌లో చేసిన, ధర్నాలో ఎక్కువ మంది రైతులు గుమికూడి, ఇలా చెయ్యవద్దు అని చెప్పినా వినకుండా, ఆందోళన చేసారని, పోలీసులతో వాగ్వాదానికి దిగారని రూరల్‌ ఎస్పీ విజయరావు తెలిపారు. అలాగే పోలీసులు ఏర్పాటు చేసిన, బారికేడ్‌లు పడేసిన ఘటనలో కూడా కొంత మంది పై కేసులు నమోదు అయ్యాయి.

బ్యారికేడ్లు పడేసిన ఘటనలో, సీసీ ఫుటేజీలు, వీడియోలు, బాడీవోన్‌ కెమెరాల ఫూటేజ్ ద్వారా, గుర్తించి కేసులు పెట్టామని రూరల్‌ ఎస్పీ తెలిపారు. అలాగే సెక్రటేరియట్‌ వైపు దూసుకెళ్ళి, సెక్రటేరియట్ ఎంట్రన్స్ లో పోలీసు అధికారులు, సిబ్బంది విధులకు ఆటంకం కలిగించిన వారి పై రెండు కేసులు నమోదు చేసినట్లు తెలిపారు. ఇక నిన్న అమరావతి ప్రాంతంలో, కొన్ని పంచాయతీ కార్యాలయాలకు నలుపురంగు వేసిన వ్యక్తుల పై మూడు కేసులు నమోదు చేసామని పోలీసులు చెప్పారు. తుళ్ళూరులో ఉన్న నీటి పైపులైన్‌ వద్ద సిబ్బందిని భయపెట్టిన వారి పై కేసు పెట్టామని పోలీసులు తెలిపారు. అయితే, రైతులు మాత్రం, వీటికి తగ్గేది లేదని అంటున్నారు. ఒక పక్క తమ ప్రాణ సమానమైన భూములే పోతుంటే, ఈ కేసులు ఒక లెక్కా అని వాపోతున్నారు.

అయితే నిన్న ఆందోళన చేసి, పంచాయతీ భవనాలకు రంగులు వేసిన వారిలో, వైసీపీ కార్యకర్తలే ఉన్నారు. ఆందోళనలో భాగంగా వెలగపూడి పంచాయతీ, తుళ్లూరు, రాయపూడి, మల్కాపురం పంచాయతీలకు వైసీపీ రంగులను చెరిపి వేస్తూ నల్ల రంగులను పులిమారు. వైసీపీ కార్యకర్తలే తీవ్ర మనస్థాపానికి గురై ఈ చర్యలకు పాల్పడ్డారు. తమ జీవితాలు నాశనం చెసిన ఈ రంగు ఎందుకు అంటూ, నల్ల రంగు పులిమారు. అయితే ఇప్పడు ఆందోళనలు రోజు రోజుకీ ఎక్కవ కావటంతో, పోలీసులు కేసులు పెట్టి ఒత్తిడి పెంచి, ఉద్యమాన్ని అణిచివేసే ప్రయత్నం చేస్తున్నారని, రైతులు వాపోతున్నారు. తమ జీవితాలే తారు మారు అయిపోయాయని, ఎన్ని కేసులు పెట్టుకుంటే, ఇప్పుడు మాకు ఏమి అవుతుంది అంటూ, ఆవేదన వ్యక్తం చేస్తున్నారు.

అమరావతి పై ఆంధ్రప్రదేశ్ స్పీకర్ తమ్మినేని సీతారాం సంచలన వ్యాఖ్యలు చేసారు. అమరావతికి ఎప్పుడు వెళ్ళినా తనకు ఎక్కడా రాజధాని కనిపించలేదని అన్నారు. అమరావతికి వెళ్తుంటే, ఏదో రాజస్థాన్ ఏడారికి వెళ్లినట్లు ఉంటుందని స్పీకర్ అన్నారు. ఇది అందరిలో ఉండే అభిప్రాయమే అని, కొంతమంది బయటకు చెప్పలేకపోతున్నారని, తాను మాత్రం తన అభిప్రాయాన్ని బయటకు చెప్పానన్నారు. రాజధాని నాది అని రాష్ట్ర ప్రజలంతా భావించే వాతవరణం ఉండాలని, అమరావతిలో అది తనకు కనిపించలేదన్నారు స్పీకర్. మూడు రాజధానుల నిర్ణయాన్ని ప్రజలు స్వాగతిస్తున్నారని అన్నారు. అయితే స్పీకర్ స్థానంలో ఉన్న ఒక వ్యక్తీ, ఒక రాజధాని పై, ఒక ప్రాంతం పై, ఇలా వ్యాఖ్యలు చెయ్యటం పై ఆశ్చర్యం వ్యక్తం అవుతుంది. ఇంత పెద్ద స్థానంలో ఉన్న వ్యక్తి కూడా ఇలా ఒక ప్రాంతాన్ని కించ పరుస్తూ, అదే ప్రాంతంలో నాలుగు రోజులు నుంచి ఆందోళన చేస్తున్న రైతులు గురించి మాత్రం, ఏమి మాట్లాడక పోవటం గమహర్హం.

స్పీకర్ ఇలా మాట్లాడటం మొదటి సారి కాదు. వివిధ సందర్భాల్లో వివాదస్పద వ్యాఖ్యలు చేసారు. టిడిపి వాళ్ళను కౌన్ కిస్కా గొట్టం గాళ్ళు అని ఒకసారి, అలాగే అగ్రిగోల్ద్ విషయం మాట్లాడుతూ, చంద్రబాబుని గుడ్డలు ఊడదీస్తాం అని, చంద్రబాబు అనుభవం మడిచి ఎక్కడో పెట్టుకోవాలని, అలాగే సోనియా గాంధీ విషయంలో, మాట్లాడుతూ, టిడిపి రాజకీయ XXXX చేసింది అంటూ, మాట్లాడారు. అయితే అసెంబ్లీ సమావేశాల్లో కూడా తెలుగుదేశం పార్టీ, స్పీకర్ వైఖరి పై తప్పు బడుతూనే ఉంది. ఇప్పుడు స్పీకర్ అమరావతిలోకి వెళ్తుంటే, రాజస్థాన్ ఏడారికి వెళ్లినట్లు ఉంది అంటూ, అమరావతి ప్రాంతాన్ని కించ పరుస్తూ, స్పీకర్ చేసిన వ్యాఖ్యలు, అమరావతి కోసం ఆందోళన చేస్తున్న రైతులను రెచ్చగొట్టేలా ఉన్నాయి.

అమరావతి పై వైసీపీది మొదటి నుంచి ఇదే ధోరణి. అమరావతి శంకుస్థానకు రాను అని జగన్ చెప్పిన దగ్గర నుంచి, అమరావతిని కించ పరుస్తూనే ఉన్నారు. అమరావతిని భ్రమరావతి అంటూ సంబోధించటం, అలాగే అమరావతిని స్మశానం అంటూ అధికారంలోకి వచ్చిన తరువాత మంత్రులే అనటం, ఇంకో మంత్రి అమరావతిలో పందులు, కుక్కలు తిరుగుతాయి అని చెప్పటం, ఇలా అమరావతి పై వైసీపీ వైఖరి ఎప్పుడు ఒకేలా ఉంది. ఇప్పుడు ఏకంగా అమరావతిలో అసెంబ్లీ తప్ప ఏమి ఉండవు అంటూ, జగన్ చేసిన ప్రకటనతో, ఇక అమరావతి గురించి మర్చి పోయే పరిస్థితి ఏర్పడింది. అయితే భూములు ఇచ్చిన రైతులు మాత్రం, తమకు చెప్పిన విధంగా రాజధాని కట్టాలి అంటూ, ఆందోళన చేస్తున్నారు.