news

ఆంధ్రప్రదేశ్ లో, రాజధానుల రగడ కాక రేపుతుంది. జగన్ మోహన్ రెడ్డి అసెంబ్లీలో, మూడు రాజధాణుల ప్రకటన చేసినప్పటి నుంచి, అమరావతిలో 33 వేల ఎకరాలు భూములు ఇచ్చిన రైతులు, ఇప్పుడు రోడ్డున పడ్డారు. రాష్ట్ర విభజన సమయంలో, రాష్ట్రానికి రాజధాని లేదని తమను రాజధాని కోసం భూములు అడిగితే, రాష్ట్ర భవిష్యత్తుతో పాటుగా, తమ భవిష్యత్తు కూడా బాగుంటుందని, భూములు ఇచ్చామని, ఇప్పుడు ఇలా చెయ్యటం అన్యాయమని వారు వాపోతున్నారు. సీఆర్డీఏ పరిధిలో ఉన్న ప్రజల అభిప్రాయం కూడా ఇలాగె ఉంది. గత మూడు రోజులుగా ఆందోళనలు ప్రాంతంగా కొనసాగుతున్నాయి. ఈ పరిస్థితి రోజు రోజుకీ ఎక్కువ అవ్వటమే కాని, సద్దుమణిగేలా కనిపించట్లేదు. ప్రజలు రోజు రోజుకీ ఆందోళనలు ఎక్కువ చేసే అవకాసం కనిపిస్తుంది. ఈ నేపధ్యంలో, ఇప్పుడు కృష్ణా, గుంటూరు జిల్లాల ఎమ్మేల్యేల పై తీవ్ర ఒత్తిడి పెరుగుతుంది. జగన్ మోహన్ రెడ్డి నిర్ణయాన్ని వ్యతిరేకించలేక, ఇటు ప్రజలకు సమాధానం చెప్పలేక ఇబ్బంది పడుతున్నారు.

చివరకు అమరావతి ప్రాంతం ఉన్న తాడికొండలో కూడా, తెలుగుదేశాన్ని కాదని, వైసీపీని అక్కడ ప్రజలు గెలిపించారు. ఇప్పుడు వైసీపీ తమకు అన్యాయం చేస్తుంది అంటూ రోడ్డు ఎక్కారు. అయితే రోజు రోజుకీ ప్రజల ఆందోళన తీవ్ర తరం అవుతూ ఉండటంతో, ఈ ఎమ్మెల్యేలలో ఒత్తిడి పెరుగుతుంది. తెలుగుదేశం పార్టీ నేతలు దేవినేని ఉమా లాంటి వారు, బయటకు వచ్చి రోడ్డు మీద కూర్చుని వారికి సంఘీభావంగా నిరసన తెలుపుతుంటే, వైసీపీ ఎమ్మల్యేలు మాత్రం నోరు ఎత్తటం లేదు. ముఖ్యంగా తాడికొండ, మంగళగిరి నియోజకవర్గాల ఎమ్మెల్యేలు ఉండవల్లి శ్రీదేవి, ఆళ్ల రామకృష్ణారెడ్డి అసలు అడ్డ్రెస్ లేకుండా, కనిపించక పోగా, అసలు మీడియా ముందుకు కూడా రాకపోవటంతో, వారు బయటకు వచ్చి తమకు మద్దతు ఇవ్వాలని ప్రజలు కోరుతున్నారు.

టిడిపిని కాదని మిమ్మల్ని ఇక్కడ గెలిపించామని, ఇప్పుడు ప్రభుత్వం అన్యాయం చేస్తుంటే, తమకు మద్దతుగా ఎందుకు బయటకు రావటం లేదని అంటున్నారు. ఇక గుంటూరు జిల్లాకు చెందిన అంబటి రాంబాబు జగన్ నిర్ణయాన్ని సమర్ధించగా, నరసరావుపేట ఎమ్మెల్యే గోపిరెడ్డి శ్రీనివాసరెడ్డి మాత్రం, జగన్ నిర్ణయం తప్పని తేల్చి చెప్పారు. అసెంబ్లీ, సెక్రటేరియట్ ఒకే చోట ఉండాలని, అమరావతిలోనే కొనసాగాలని అన్నారు. అయితే అమరావతి ప్రాంత ఎమ్మేల్యేలు అయిన తాడికొండ, మంగళగిరి నియోజకవర్గాల ఎమ్మెల్యేలు ఉండవల్లి శ్రీదేవి, ఆళ్ల రామకృష్ణారెడ్డి మాత్రం అడ్డ్రెస్ లేరు. వీరి వైఖరి ఎలా ఉంటుంది ? పార్టీ లైన్ కాదని, తమకు ఓటు వేసిన ప్రజల తరుపున నిలబడే సాహసం చెయ్యగలరా ? వేచి చూడాలి.

వైసీపీ పార్టీలో, అందరూ జగన్ మోహన్ రెడ్డి నిర్ణయాన్నే ఏకీభావిస్తారని, ఎవరూ ఎదురు చెప్పే పరిస్థితి ఉండదు అంటూ, ప్రచారం చేసుకుంటూ ఉంటారు. అధికారంలో ఉండటం, బలంగా 151 మంది ఉండటంతో, జగన్ నిర్ణయాలకు ఎదురు చెప్పే సాహసం ఎవరూ చెయ్యరు. రఘురామకృష్ణం రాజు లాంటి వాళ్ళు, ఎదురు తిరిగినా, ఇలాంటివి కనిపించకుండా జాగ్రత్త పడతారు. అయితే, ఇప్పుడు మూడు రాజధానులు విషయంతో, ప్రాంతాల మధ్య చిచ్చు పెడుతూ, ప్రజలను బిజీగా ఉంచుదాం అనుకుంటే, ఇప్పుడు సొంత పార్టీ నేతలు కూడా ఆ చిచ్చులో చిక్కుకున్నారు. ముఖ్యంగా ప్రజలు తిరగబడటంతో, పార్టీ కంటే, జగన్ కంటే, ప్రజల అభిప్రాయలను గౌరవించాల్సిన పరిస్థితి. అసెంబ్లీ వేదికగా, జగన్ మోహన్ రెడ్డి మూడు రాజధానుల ప్రకటన చేసిన విషయం తెలిసిందే. అమరావతిలో కేవలం అసెంబ్లీ మాత్రమే ఉంటుంది అని చెప్పారు. అయితే ఈ ప్రకటన పై అమరావతి ప్రాంత రైతుల్లో తీవ్ర వ్యతిరేకత వ్యక్త్యం అయ్యింది.

అలాగే ఈ ప్రాంతంలో ఉండే లాయర్లు కూడా ఎదురు తిరిగారు. ఇది అమరావతి రైతుల నుంచి, కోస్తా, గోదావరి జిల్లాలకు కూడా పాకుతుంది. ఇక్కడ ప్రజలు కూడా, మేము రాజధాని ఉంది అని, మాకు ఒక్క పెద్ద ప్రాజెక్ట్ రాకపోయినా, ఊరుకున్నాము, కియా లాంటివి అనంతపురంలో వస్తే సంతోషించాము, ఇప్పుడు మమ్మల్ని అన్యాయం చేస్తున్నారు అనే భావనకు వచ్చారు. అయితే ప్రజల అభిప్రాయాలకు లొంగక తప్పని పరిస్థితి వైసీపీ ఎమ్మెల్యేలది. దీంతో, జగన్ మూడు రాజధానుల ప్రకటనను తప్పుబట్టారు, నరసరావుపేట ఎమ్మెల్యే గోపిరెడ్డి శ్రీనివాసరెడ్డి. అసలు మూడు రాజధానులు అనేది సమంజసం కాదని, అమరావతిలోనే రాజధాని ఉంచాలని, ఇది తన సొంత అభిప్రాయమని అన్నారు.

అసెంబ్లీ, సెక్రటేరియట్ ఒకే చోట ఉండాలని, అసెంబ్లీ అమరావతిలో, సెక్రటేరియట్ విశాఖలో ఎలా ఉంచుతారు అంటూ ప్రశ్నించారు. అసెంబ్లీ, సెక్రటేరియట్ రెండూ కూడా ఒక్కచోటే ఉండాలని, ఇది నా అభిప్రాయం మాత్రమే అని చెప్పుకొచ్చారు. త్వరలోనే జగన్ మొహన్ రెడ్డిని కలిసి, తన అభిప్రాయాన్ని ఆయనకు తెలియజేస్తానని వెల్లడించారు. ఇదే సమయంలో విశాఖను ఆర్థిక రాజధానిగా అభివృద్ధి చేయాలన్నారు. ఇప్పటికే హైదరాబాద్ నుంచి కట్టుబట్టలతో వచ్చి నష్టపోయామని, మరోసారి ప్రజలు నష్టపోవడం భావ్యం కాదని అవేదన వ్యక్తం చేసారు. ఇంకా నిపుణుల కమిటీ నివేదిక రాలేదని, అది వచ్చేదాకా, ప్రజలు అపోహలు పడవొద్దని సూచించారు. మొత్తానికి అధికార పార్టీలోనే భిన్నాభిప్రాయాలు రావటం, ఇప్పుడు సంచలనంగా మారింది.

రాష్ట్రంలో మూడు రాజధానుల వ్యవహారం, రాజుకుంటుంది. ఇప్పటికే జగన్ మాటలతో, అమరావతి రైతులు రోడ్డున పడితే, ఇప్పుడు మంత్రి పెద్దిరెడ్డి రామచంద్రారెడ్డి చేసిన సంచలన వ్యాఖ్యలు, రైతులకు మరింత ఇబ్బందికరంగా మారాయి. ఒక పక్క రైతులు రోడ్డు ఎక్కి ఆందోళన చేస్తుంటే, వారితో చర్చించాల్సింది పోయి, వారిని మరింత రెచ్చగొట్టే వ్యాఖ్యలు చేస్తున్నారు పెద్దిరెడ్డి. మేము మూడు కాకపోతే 33 రాజధానులు పెట్టుకుంటామని అన్నారు. ఏ కేంద్రం పర్మిషన్ మాకు అవసరం లేదని అన్నారు. అలాగే అమరావతిలో రైతుల భూములను వెనక్కి ఇచ్చేస్తాం అంటూ పిడుగు లాంటి వార్త చెప్పారు. రాజధాని భూములు వెనక్కి ఇస్తామని, గతంలోనే జగన్ చెప్పారని, దానికి అనుగుణంగా, వెనక్కు ఇచ్చేస్తాం అంటూ సంచలన వ్యాఖ్యలు చేసారు. ఇప్పుడు అమరావతిలో ఆందోళన చేసేది అంతా, తెలుగుదేశం కార్యకర్తలు మాత్రమే అని అన్నారు. టిడిపి వారే రోడ్డు మీదకు వచ్చి ఆందోళన చేస్తున్నారని పెద్దిరెడ్డి అన్నారు.

విశాఖపట్నంలో ఇప్పటికే భూముల రేట్లు పెరిగాయని, అక్కడ మాకు భూములు ఉన్నాయని చెప్పటం సరైంది కాదని అన్నారు. చంద్రబాబే సచివాలయం తాత్కాలికం అన్నారని, అన్నారు. మేము మూడు కాకపొతే, 33 రాజధానులు పెట్టుకుంటామని అన్నారు. మూడు రాజధానుల గురించి కేంద్రానికి ఏం సంబంధం, వారి అనుమతి మాకు ఏమి అవసరం లేదని పెద్దిరెడ్డి స్పష్టం చేశారు. విజయవాడ అటు పల్లె కాదు, పట్టణం కాదు అంటూ, విజయవాడని కూడా కించపరుస్తూ మాట్లాడారు. మొత్తానికి, ప్రాంతాల మధ్య చిచ్చు పెట్టటంలో, ఎవరి పాత్ర వాళ్ళు నిర్వహిస్తున్నట్టు కనిపిస్తుంది. ఒక పక్క రైతులు ఆందోళన చేస్తుంటే, వారితో మాట్లాడాల్సింది పోయి, వారు టిడిపి కార్యకర్తలు అని చెప్పటం గమనార్హం.

అయితే ఈ రోజు పెద్దిరెడ్డి చేసిన వ్యాఖ్యల పై, రాజధాని రైతులు భగ్గుమన్నారు. ఇప్పటికే జగన్ ప్రకటనతో చచ్చిపోయి ఉన్నామని, ఇప్పుడు మంత్రులు గుచ్చి గుచ్చి చంపుతున్నారని అన్నారు. సమస్యని పరిష్కరించాల్సింది పోయి, భూములు వెనక్కు ఇచ్చేస్తామని చెప్పటం ఏంటి అంటూ ప్రశ్నిస్తున్నారు. మేము రైతులం అని, అన్ని కులాల వారు ఉన్నారని, మమ్మల్ని టిడిపి కార్యక్రర్తలు ముద్ర వేసి, సమస్యను రాజకీయం చెయ్యవద్దు అంటూ, వేడుకుంటున్నారు. అమరావతిలో ఈ రోజు ఏ పార్టీ జెండా లేదని, ఇక్కడ ఉన్నది జగన్ నిర్ణయానికి వ్యతిరేకంగా ఉన్న, నల్ల జెండాలు మాత్రమే అని రైతులు వాపోతున్నారు. దయ చేసి, మమ్మల్ని రోజు రోజుకి గుచ్చి గుచ్చి చంపవద్దు అంటూ, వేడుకున్నారు.