news

తెలుగుదేశం అధ్యక్ష్యుడు, మాజీ ముఖ్యమంత్రి చంద్రబాబు నాయుడు, ఈ రోజు అనంతపురం జిల్లాలో పర్యటిస్తున్నారు. ఈ రోజు నుంచి మూడు రోజుల పాటు చంద్రబాబు అనంతపురం జిల్లా పర్యటనలో ఉండనున్నారు. తెలుగుదేశం పార్టీ పై, జిల్లాలోని వివిధ నియోజకవర్గాల పై సమీక్ష చెయ్యనున్నారు. ఈ సందర్భంగా, మొదటి రోజు, చంద్రబాబు ప్రసంగానికి ముందు, మాజీ ఎంపీ జేసీ దివాకర్ రెడ్డి, మాట్లాడారు. జీసీ మాట్లాడుతూ, కుండ బద్దులు కొట్టేలా వ్యాఖ్యలు చేసారు. చంద్రబాబు గారు, మీరు మా జిల్లాకు వచ్చినందుకు సంతోషం, అంటూనే, పార్టీలో ఉండే సమస్యలు, చంద్రబాబు వైఖరి పై కుండబద్దలు కొట్టారు. ఇది నా అభిప్రాయం కాదని, ఇది కార్యకర్తల అభిప్రాయం కూడా అని చెప్పారు. చంద్రబాబు గారు, మీకు జగన్ ఏమైనా, కొడుకా, తమ్ముడా, బంధువా, అతని గురించి కొన్నాళ్ళు వదిలేయండి, ఎన్ని చేస్తాడో చెయ్యనివ్వండి, ప్రతి రోజు మీరు ఏదో ఒక విధంగా ప్రజల ముందుకు వస్తున్నారు, అసలు కొన్నాళ్ళు మీరు ఎక్కడా కనిపించికండి, మీరు ఎక్కాడా మాట్లాడకండి, హాయిగా పార్టీ పనులు చూసుకోండి అని చెప్పారు.

ఇక అలాగే చంద్రబాబు వైఖరి పై చెప్తూ, మా వాడు, రాజశేఖర్ రెడ్డి కాదు, తాత రాజా రెడ్డి పోలిక అని మీకు రెండేళ్ళ క్రితమే చెప్పను. ఇప్పుడు జరుగుతుంది చూస్తున్నారు కదా. మమ్మల్ని ఆడుకుంటున్నాడు. అక్రమ కేసులు పెట్టి వేధిస్తున్నారు. కానిస్టేబుల్ గాడు కూడా మమ్మల్ని బెదిరుస్తున్నారు. ఇక్కడ ఉన్న పోలీసులు అందరికీ చెప్తున్నా, మీరు మాలాగా 5 ఏళ్ళకే వెళ్ళిపోరు, మళ్ళీ మేము వస్తాం, మీరు శ్రీకాకుళంలో ఉన్నా మీ సంగతి చూస్తాం. జాగ్రత్తా అని వార్నింగ్ ఇస్తూ, ఇదే సందర్భంలో చంద్రబాబు గారికి కూడా ఒక సూచన అంటూ జేసీ చెప్పుకొచ్చారు. అయ్యా, మీరు గాంధీలాగా ఉంటే కుదరదు, మీకు చేతులు ఎత్తి నమస్కరిస్తున్నా, మీ శాంతి మంత్రం పక్కన పెట్టండి. మాలాంటి వారిని కూడా శాంతి శాంతి అంటూ కట్టడి చెయ్యకండి, మీకు దండం పెడుతున్నా అంటూ జేసీ చెప్పుకోచ్చారు.

అంతే కాదు మా వాడిలో ఒక మంచి గుణం ఉంది. 15 నిమిషాల్లో అంతా పూర్తీ చేస్తాడు. మీరేమో, ఆ సమీక్ష ఈ సమీక్ష అంటూ గంటలు గంటలు మాట్లాడుతూనే ఉంటారు. ఇది కూడా పక్కన పెట్టండి. ఇది మా సూచన. ఇప్పుడు ఈ జిల్లలో ఉన్న ఎమ్మెల్యేలను చూస్తుంటే భయం వేస్తుంది. గతంలో మన పార్టీ వారి పైనే నేను విమర్శలు చేశాను కాని, వీళ్ళతో పోల్చుకుంటే మన వాళ్ళు వందల రెట్లు నయం, మన వారికి నేను హాట్స్ అఫ్ చెప్పాలి అంటూ, జేసీ చెప్పారు. చివరగా ఒక మాట, మీరు మాత్రం ఆ శాంతి మంత్రం పక్కన పెట్టి, గట్టిగా ఉండాల్సిన సమయం వచ్చింది అంటూ జేసీ చెప్పి ముగించారు. జేసీ మాటలకు, కార్యకర్తలు కూడా గట్టిగా చప్పట్లు, ఈలలు కొడుతూ, ఆయన మాటలకు మద్దతు పలికారు.

ఈ రోజు అసెంబ్లీలో అమరావతి పై చర్చ సందర్భంగా, బుగ్గన చేసిన విమర్శలకు, తమకు సమాధానం చెప్పే అవకాసం ఇవ్వాలి అంటూ, తెలుగుదేశం పార్టీ ఎమ్మేల్యేలు ఆందోళన చేసారు. అయితే, మైక్ ఇవ్వకపోగా, తెలుగుదేశం పార్టీకి చెందిన తొమ్మిది మంది ఎమ్మెల్యేలను శాసనసభ నుంచి సస్పెండ్ చేసారు. దీంతో వారితో పాటుగా, చంద్రబాబు కూడా వాక్ అవుట్ చేసారు. ఈ సందర్భంగా అమరావతి పై జగన్ చూపిస్తున్న వైఖరికి నిరసనగా, ప్రజా వేదిక కూల్చిన స్థలంలో, చంద్రబాబు ప్రెస్ మీట్ పెట్టారు. ఆరు నెలలు అయినా, ఇంకా ప్రజా వేదిక కూల్చిన వ్యర్ధాలు అలాగే ఉన్నాయి. దాని ముందే చంద్రబాబు ప్రెస్ మీట్ పెడుతూ, ఇది జగన్ మోహన్ రెడ్డి నైజం అంటూ, అవి చూపించారు. నేను అడిగితె ఈ బిల్డింగ్ నాకు ఇవ్వలేదు, ప్రజలకు ఉపయోగించలేదు, నేను కట్టానని కూల్చేసారు అంటూ, చంద్రబాబు అన్నారు. ఇదే సందర్భంలో అమరావతి పై అసెంబ్లీలో జరిగిన చర్చ, తమను అసెంబ్లీ నుంచి సస్పెండ్ చేసే అంశాల పై చంద్రబాబు మీడియాతో మాట్లాడారు.

ఇదే సందర్భంలో, జగన్ మోహన్ రెడ్డి అసెంబ్లీలో, మూడు రాజధానాలు విషయం గురించి ప్రకటన చేసారు. ఇదే సమయంలో ప్రెస్ మీట్ లో ఉన్న చంద్రబాబుకు, మూడు రాజధానుల విషయాన్ని అచ్చెన్నాయుడు చంద్రబాబుకు వివరించారు. ఇప్పుడే అసెంబ్లీలో చెప్పారట, ఎగ్జిక్యూటివ్, జ్యుడిషయల్, లెజిస్లేటివ్ అంటూ మూడు రాజధానులు చేస్తారాట. ఎగ్జిక్యూటివ్ రాజధానిగా విశాఖపట్నం, రాయలసీమకు జ్యుడిషియల్ క్యాపిటల్, అమరావతి లెజిస్లేటివ్ రాజధాని అంట అంటూ చంద్రబాబుకు ప్రెస్ ముందే చెప్పారు. దీని పై చంద్రబాబు స్పందిస్తూ, ఇలా ఉంది మన రాష్ట్రం. పిచ్చోడి చేతిలో రాయలాగ, తుగ్లక్ నిర్ణయాలు తీసుకుంటున్నారు అంటూ, జగన్ పై విమర్శలు గుప్పించారు.

ఎక్కడైనా అభివృద్ధి వికేంద్రీకరణ జరగాలి కానీ, పరిపాలన వికేంద్రీకరణ జరిగితే అనేక ఇబ్బందులు ప్రజలు ఎదుర్కుంటారని అన్నారు. హైకోర్ట్ ఒక చోట, అసెంబ్లీ ఒక చోట, సెక్రటేరియట్ ఒక చోట పెడితే, ప్రజలు ఎన్ని ఇబ్బందులు పడతారో, కనీసం ఆలోచించారా అని ప్రశ్నించారు. విశాఖపట్నంలో 70 వేల కోట్ల డేటా సెంటర్ వస్తే దాన్ని క్యాన్సిల్ చేశారని, ఉద్యోగాలు, పెట్టుబడులు వస్తే ప్రజలు జీవితాలు బాగుపడతాయి కాని, ఇలాంటి తుగ్లక్ చర్యలతో, ఇబ్బందులు పడతారని అన్నారు. ఇన్ని రాజధానులు ఏర్పాటు చేసి రేపు ముఖ్యమంత్రి ఏ రాజధానిలో కూర్చుంటాడని ప్రశ్నించారు. సీఎం అమరావతిలో ఉంటారా.. విశాఖలో ఉంటారా.. ఇడుపులపాయలో ఉంటారా? అని ప్రశ్నించారు. తరువాత అచ్చెన్నాయుడు మీడియాతో మాట్లాడుతూ, టిడిపి విధానం చెప్పారు. అమరావతి రాజధానిగా ఉండాలని, కర్నూలులో హైకోర్టు బెంచ్‌ పెట్టాలని, అభివృద్ధి వికేంద్రీకరణ అన్ని ప్రాంతాలకు జరగాలనేదే తమ విధానం అని అన్నారు.

ఆంధ్రప్రదేశ్ రాజధాని అమరావతి విషయంలో, నిన్న అసెంబ్లీలో జగన్ మోహన్ రెడ్డి చేసిన ప్రకటనతో, అమరావతి ప్రాంతంలోని రైతులు షాక్ తిన్నారు. అమరావతి కేవలం లెజిస్లేటివ్ కాపిటల్ అని, జగన్ ప్రకటించటంతో, రైతులు అవాక్కయ్యారు. ఆరు నెలల నుంచి జగన్ మోహన్ రెడ్డి, మంచి నిర్ణయం ప్రకటిస్తారని ఎదురు చూస్తూ, తమ కొంప ముంచే నిర్ణయం తీసుకున్నారని రైతులు ఆందోళన బాట పట్టారు. గతంలో చంద్రబాబు ఇచ్చిన పిలుపు మేరకు, ఒక్క చిన్న ఆందోళన కూడా లేకుండా 33 వేల ఎకరాలు ఇచ్చిన రైతులు, ఈ రోజు మాత్రం జగన్ ప్రకటనతో ఆందోళన బాట పట్టాల్సిన పరిస్థితి వచ్చింది. చంద్రబాబు విజన్ నచ్చి ఆయన పై నమ్మకంతో, 33 వేలు ఎకరాలు ఇచ్చామని, ఆరు నెలల నుంచి మంత్రులు ఇష్టం వచ్చినట్టు ప్రకటనలు చేస్తున్నా, తమకు జగన మోహన్ రెడ్డి అపాయింట్మెంట్ ఇవ్వకపోయినా, ఆయన తమ పట్ల సానుకూల నిర్ణయం ప్రకటిస్తారని అనుకున్నామని, ఇప్పుడు మమ్మల్ని ముంచేసారని రాజధాని రైతులు వాపోయారు.

రాజధాని గ్రామాలు అయిన వెలగపూడి, రాయపూడి, కిష్టాయపాలెం, మందడంలో రైతులు ఆందోళనకు దిగారు. రోడ్ల పై బైఠాయించి జగన మోహన్ రెడ్డికి, ప్రభుత్వానికి వ్యతిరేకంగా నినాదాలు చేస్తున్నారు. ఇక వెంకటాయపాలెం గ్రామంలో, రైతులు రిలే నిరాహారదీక్ష చేపట్టారు. ఇక జగన్‌ ప్రకటనకు నిరసనగా తుళ్లూరులోని రైతులు, పురుగుల మందు డబ్బాలు పట్టుకుని రోడ్డు పై బైఠాయించి ఆందోళనకు దిగారు. మూడు రాజధానులు నిర్ణయం వెనక్కు తీసుకోవాలని, తమ గోడు వినాలని, లేకపోతే అందరం ఈ పురుగులు మందు తాగి చచ్చిపోతామని అన్నారు. రైతుల ఆందోళన గంట గంటకు తీవ్రం అవుతున్న నేపథ్యంలో, ఎలాంటి అవాంఛనీయ ఘటనలు చోటుచేసుకోకుండా భారీగా పోలీసులను మోహరించారు.

ఎక్కడికక్కడ ట్రాఫిక్ కు అంతరాయం కలగటంతో, పోలీసులు క్లియర్ చేస్తున్నారు. అయితే రైతులు మాత్రం, తమను అన్యాయం చేసారని, ప్రాంతాల మధ్య చిచ్చు పెట్టి రాజకీయం చేస్తున్నారని అన్నారు. అసలు దక్షిణాఫ్రికాను ఆదర్శంగా ఎలా తీసుకుంటారని, అది ఒక దేశం అని, మనది ఒక చిన్న రాష్ట్రం అని, దానికి దీనికి పోలిక ఎలా పెడతారని అంటున్నారు. ఇప్పటికే కట్టిన పెద్ద పెద్ద భవనాలను ఏమి చేస్తారని ప్రశ్నిస్తున్నారు. తాము ఇచ్చిన భూములు ఇప్పటికే ఫ్లాట్ లు చేసి ఇచ్చారని, తమ భూములు తమకు ఇచ్చేసి, మీకు ఇష్టం వచ్చినట్టు చేసుకోండి అంటూ కొంత మంది రైతులు ఆందోళన బాట పట్టారు. భూములు ఇచ్చే సమయంలో కూడా ఆందోళన లేకుండా ఇచ్చామని, ఇప్పుడు తమను రోడ్డు ఎక్కించారని, రైతులు ఆందోళన వ్యక్తం చేసారు.