news

ప్రస్తుతం దేశం అంతా, ట్రాఫిక్ చాలాన్ల గోల నడుస్తుంది. అధిక ఫైన్ ల రూపంలో, కేంద్ర ప్రభుత్వం తీసుకొచ్చిన నిబంధనల పై, ప్రజలు ఇబ్బంది పడుతున్నారు. ఒక విధంగా ఈ ఫైన్లు మంచిదే అయినా, ముందు మంచి రోడ్లు వేసి, తరువాత ఫైన్లు తీసుకోండి అనే వారు కూడా ఉన్నారు. నిన్న ఢిల్లీలో, ఒక టు వీలర్ కు, ఫైన్ల రూపంలో 47 వేలు రూపాయలు ఫైన్ వెయ్యటంతో, బండి రేటు కూడా అంత లేదు అంటూ, విరక్తి చెందిన ఆ వ్యక్తి, పోలీసుల ముందే బండి పై పెట్రోల్ పోసి నిప్పు అంటించారు. గత నాలుగు రోజులుగా ఇలాంటి సంఘటనలో ఎన్నో, ఈ దేశంలో జరుగుతున్నాయి. ప్రజల నుంచి వ్యతిరేకత ఉన్నా, కొంత మంది మాత్రం వీటిని సమర్ధిస్తున్నారు. అయితే ఈ కొత్త ఫైన్ల విధానం ఇంకా మన తెలుగు రాష్ట్రాలకు రాలేదు. త్వరలోనే మన రాష్ట్రాల్లో కూడా ఈ కొత్త ఫైన్ లు రానున్నాయి. అయితే ఈ తరుణంలో, మన రాష్ట్రంలో జరిగిన ఒక సంఘటన వెలుగులోకి వచ్చింది.

ఆటో నడిపే వ్యక్తి హెల్మెట్ పెట్టుకోలేదు అంటూ, వచ్చిన చలాన్ చూసి ఆ ఆటో డ్రైవర్ అవాకయ్యాడు. కొంచెం సేపు విషయం ఏంటో అర్ధం కాక, తల బాదుకున్నాడు. చివరకు విషయం ఉన్నతాధికారుల దృష్టికి తీసుకువెళ్ళాడు. ఎక్కడైనా చక్ర వాహనం నడిపే వ్యక్తి హెల్మెట్ లేకపోతే జరిమానా వేస్తారు కాని, ఆటో డ్రైవర్ హెల్మెట్ పెట్టుకోలేదు అని చెప్పి జరిమానా వెయ్యటం, మన రాష్ట్రంలో ఇప్పుడే వింటున్నాయి. ఆటో డ్రైవర్ కి హెల్మెట్ లేకపోవటంతో, జరిమానా విధించారు అని తెలియటంతో, అందరూ అవాక్కయ్యారు. ఈ ఘటన విజయవాడలో జరిగింది. విజయవాడ పోలీసులు నిర్వాకం బయట పడటంతో, ఈ విషయం వైరల్ అయ్యింది.

విజయవాడలోని మూడో పట్టణ ట్రాఫిక్‌ పోలీసులు ఒక ఆటోడ్రైవరుకు హెల్మెట్ లేదు అంటూ, ఈ-చలానా పంపించి అందర్నీ ఔరా అనిపించారు. ఏపీ16టిఎస్‌8597, నంబరు గల ఆటో పై ఐదు ఈ-చలానాలు ఉన్నాయి. ఆటో యజమాని ఈనెల 3న ఏపీ ఆన్‌లైన్‌లో ఆ అపరాధ రుసుమును కట్టటానికి అని వెళ్ళాడు. అయితే వాటిలో ఒక చలానా రూ.135 హెల్మెట్‌ ధరించని కారణంగా వేశామంటూ పేర్కొనడంతో అది చూసి ఆశ్చర్యపోయారు. ఆటో నడుపుకునే నాకు, ఆటో నెంబర్ పై, హెల్మెట్ లేకపోవటం ఏంటి అంటూ ఆశ్చర్య పోయాడు. ఈ క్రమంలో విజయవాడ మూడో పట్టణ ట్రాఫిక్‌ పోలీసుల నిర్వాకం బయటపడింది. అయితే ఈ విషయం పై స్పందించిన అధికారులు, అప్పుడప్పుడు ఇలా పొరపాట్లు జరుగుతూ ఉంటాయని, ఒకటి పెట్టబోయి, ఇంకోటి పెట్టి ఉంటారని, ఇలాంటివి మా ద్రుష్టికి రాగానే సరి చేస్తామని అన్నారు.

వైఎస్ వివేకానంద రెడ్డి హత్య కేసులో, నిందితుడు మొన్న ఆత్మహత్య చేసుకుని చనిపోయిన విషయం ఎంత సంచలనం అయ్యిందో అందరికీ తెలిసిందే. రెండు రోజుల్లోనే, ఆ వార్త కనుమరుగు అయిపోతుంది అనుకోండి అది వేరే విషయం. అయితే హైప్రొఫైల్ కేసుల్లో ఈ సీరియల్ మరణాలు కొత్త కాదు. గతంలో పరిటాల రవి హత్య కేసులో నిందితులు అందరూ చనిపోయారు. మొన్న వైఎస్ వివేక నిందితుండు ఆత్మహత్య చేసుకోగానే, అందరికీ పరిటాల రవి కేసు గుర్తుకు వచ్చింది. ఆత్మహత్య చేసుకున్న నిందితుడు రాసిన లేఖల్లో, చేతి రాత తేడా ఉందనే వార్తలు వచ్చాయి. అయితే, రెండు రోజుల్లో అందరూ ఆ వార్త మర్చిపోయారు. ఇప్పుడు ఇలాంటి వార్త మరొకటి సంచలనం సృష్టిస్తుంది. అయితే, ఈ వార్త మాత్రం ఇప్పుడు సంచలనం ఎందుకు అయ్యింది అంటే, ఇది జగన్ మోహన్ రెడ్డికి చెందిన కేసు కాబట్టి.

జగన్ మోహన్ రెడ్డి పాదయత్రలో ఉండగా, జగన్ పై కోడి కత్తితో కలిసి దాడి చేసిన సంగతి తెలిసిందే. అప్పట్లో ఇది పెద్ద సంచలనం అయ్యింది. ఇప్పుడు రాజమండ్రి సెంట్రల్ జైలు లో ఉన్న కోడి కత్తి శీను, సంచలన వ్యాఖ్యలు చేసాడు. తనను రాజమండ్రి సెంట్రల్ జైలులో చంపేందుకు పెద్ద కుట్ర పన్నారని ఆరోపించారు. రాజమండ్రి సెంట్రల్ జైలులో ఉన్న శ్రీను, తనపై జైలర్, జైలు వార్డెన్ దాడి చేశారనీ, చిత్ర హింసలకు గురిచేస్తున్నారని, తన కుటుంబ సభ్యులకు ఫోన్ చేసి చెప్పాడు. దీంతో ఆందోళన వ్యక్తం చేసిన కుటుంబ సభ్యులు, వెంటనే ఈ విషయాన్ని శ్రీనివాస్ కేసు వాదిస్తున్న లాయర్ అబ్దుల్ సలీం దృష్టికి తీసుకు వెళ్లారు. విషయం తెలుసుకున్న లాయర్ సలీం మాట్లాడుతూ, శ్రీనివాస ని జైలులోనే చంపే కుట్ర చేస్తున్నారని ఆరోపిస్తున్నారు.

శ్రీనివాస్ భద్రత పై కోర్ట్ లో పిటీషన్ వేస్తామని లాయర్ సలీం తెలిపారు. జైలులో శ్రీనివాస్ పై దాడి చేసారని, గాయాలయ్యాయని, ఈ దాడి, పై జైలు అధికారుల పై సెక్షన్ 307 కింద కేసులు పెడతామని అన్నారు. శ్రీనివాస్ కు రాజమండ్రి జైల్లో భద్రత లేదనీ, విశాఖ జైలుకు బదిలీ చేయాలని కోర్టును కోరతామని లాయర్ సలీమ్ తెలిపారు. ఇప్పటికే ఎన్నో మలుపులు తిరిగిన కేసు, రాజమండ్రి జైలులో ఉన్న శ్రీనివాస్ చేసిన ఈ ఆరోపణలతో మరింత కలకలం రేగింది. హై ప్రొఫైల్ కేసుల్లో జరుగుతున్న విషయాలు గమనిస్తున్న ప్రజలు, ఈ ఆరోపణల పై కూడా ఏదో జరగబోతుంది అనే ఆలోచనకు వచ్చారు. ఎవరి పైన అయినా దాడి చెయ్యటం, చంపటం నేరం. మొన్న కోడి కత్తి శీను, జగన్ ను గుచ్చటం అయినా, ఈ రోజు శీను ఆరోపిస్తున్నట్టు తన పై జరిగిన దాడి అయినా, ఏదైనా సరే తప్పే అవుతుంది.

తెలుగుదేశం పార్టీ నేతలు, మాజీ ఎమ్మెల్యేలను ఏదో ఒక విధంగా లోపల వెయ్యటానికి, వైసిపీ ప్రభుత్వం, అన్ని విధాలుగా ప్రయత్నం చేస్తుంది. తాజగా మాజీ ఎమ్మెల్యే చింతమనేని ప్రభాకర్ ను టార్గెట్ చేస్తూ, కధ నడుస్తుంది. మొన్నటి వరకు, కోడెల పై వరుస కేసులు పెట్టించి, ఎలా ఇబ్బంది పెట్టారో, ఇప్పుడు చింతమనేని పై అలా టార్గెట్ సెట్ చేసారు. అధికారంలో ఉండగా, చింతమనేని దూకుడుతో, కొంత చెడ్డ పేరు తెచ్చుకున్నారు. కాని అయన నియోజకవర్గ ప్రజలు మాత్రం, ఆయన దూకుడు ఎప్పుడూ ప్రజల కోసమే అని, ఆయన స్వార్ధానికి ఎప్పుడూ వాడుకోలేదని, ఆయనకు మద్దతు పలికేవారు. అయితే, ఇప్పుడు ఆయన ఓడిపోయారు, పార్టీ కూడా అధికారం కోల్పోయింది. మొన్నటి వరకు జిల్లా అంతటా ఆధిపత్యం చెలాయించిన చింతమనేని, నిప్పుడు వైసిపీ టార్గెట్ చేసింది. గత మూడు నెలలుగా చింతమనేని పై స్కెచ్ వెయ్యగా, ఇన్నాళ్ళకు ఆయన పై కేసు పెట్టె ఒక ఆధారం దొరికింది.

ఇసుక ఇబ్బందుల కోసం, ఆగష్టు 30న అన్ని కలెక్టరేట్‌ వద్ద ధర్నాకు తెలుగుదేశం పార్టీ పిలుపు ఇచ్చింది. ఇందులో భగంగా చింతమనేని కూడా ధర్నాకు సిద్ధం అయ్యారు. దీంతో పోలీసులు దుగ్గిరాలలోని చింతమనేని నివాసంలోనే ఆయన్ను హౌస్ అరెస్ట్ చేసారు. ఎట్టి పరిస్థితుల్లోనూ చింతమనేనిని బయటకు వెళ్ళనివ్వకుండా చూసారు. ఎప్పటికప్పుడు పై అధికారుల ఆదేశాలు అనుసరిస్తూ, చింతమనేనిని నిలువరించారు. అయితే, మరో రెండు రోజుల తరువాత, మళ్ళీ చింతమనేనిని టార్గెట్ చేసారు. పెదవేగి స్టేషన్‌లో చింతమనేని పై ఎస్సీ, ఎస్టీ కేసు పెట్టారు. దీంతో ఆయన, లక్ష్యంగా చేసుకుని పోలీసులు ఎక్కడికక్కడ వెతుకుతూ, ఏలూరు నగర కూడళ్ళలోను, కోర్టు వద్ద, దుగ్గిరాల సమీపంలోనూ పెద్దఎత్తున మొహరించారు.

అయితే చింతమనేని అదృశ్యం అవ్వటంతో, పోలీసులు ఖంగుతిన్నారు. తేరుకుని చింతమనేని ఎక్కడకు వెళ్ళిపోయారో తీవ్ర స్థాయిలో ఆరా తీశారు. ఎంత వెతికినా అయన ఆచూకీ మాత్రం తెలవలేదు. ఇదే క్రమంలో, రాజకీయ నేతల అండదండలతో, మరికొంత మంది వచ్చి చింతమనేని పై కేసులు పెట్టారు. దీంతో చింతమనేనిని ఎలా అయినా పట్టుకోవాలి అంటూ, పోలీసు వర్గాలపై ఒత్తిడి పెంచారు. ప్రభాకర్‌ ని అరెస్టు చేయడానికి పోలీసులుసరిగ్గా వ్యవహరించలేదని, ఏలూరు రూరల్‌ సీఐ మూర్తిపై డీఐజీ ఏఎస్‌ ఖాన్‌ గురువారం సస్పెన్షన్‌ వేటు విధించారు. రాజకీయ ఒత్తిళ్ళకు, సిఐ బలయ్యారు. అయితే జరుగుతున్న పరిణామాల పై, పోలీసు ఉన్నతాధికారులను కలిసేందుకు మాజీ మంత్రి పితాని సత్యనారాయణతో సహా పార్టీ జిల్లా అధ్యక్షురాలు సీతారామలక్ష్మి, మరికొందరి నేతలు ప్రయత్నించగా, పోలీసులు ఎవరూ వాళ్ళని కలవటానికి ఇష్ట పడలేదు. దీంతో, టిడిపి నేతలు పోలీసుల ఏకపక్ష వైఖరిని తప్పు బట్టారు.