news

ఒంగోలు మాజీ ఎంపీ వై.వి. సుబ్బారెడ్డికి మంచి పదవితో సముచిత స్థానం లభించే అవకాశాలు కనిపిస్తున్నాయి. గత ఎన్నికల్లో ఆయనకు ఒంగోలు ఎంపీ సీటు ఇవ్వలేకపోయిన ముఖ్యమంత్రి జగన్‌ తొలి దశలోనే సగౌరవమైన పదవినిచ్చి రాష్ట్రస్థాయి పార్టీ వ్యవహారాల్లో వినియోగించుకోవాలని భావిస్తున్నట్లు తెలిసింది. వివిధ కారణాలతో టీటీడీ పాలక మండలిని రద్దు చేయాలని ప్రభుత్వం నిర్ణయం తీసుకున్న నేపథ్యంలో వైవీ సుబ్బారెడ్డి చైర్మన్‌ రేసులో ముందున్నారు. దివంగత వై.ఎస్‌. రాజశేఖరరెడ్డి సతీమణి విజయమ్మ, వైవీ సుబ్బారెడ్డి సతీమణి సొంత అక్కా చెల్లెళ్లు. వైవీ సోదరిని ఎమ్మెల్యే బాలినేని శ్రీనివాసరెడ్డి వివాహం చేసుకున్నారు. దీంతో వీరంతా దివంగత రాజశేఖర రెడ్డి కుటుంబానికి సమీప బంధువులుగా రాజకీయాల్లోనూ సన్నిహితులుగా కొనసాగారు.

అయితే రాజశేఖరరెడ్డి ఉన్నంతకాలం రాజకీయంగా బాలినేని శ్రీనివాసరెడ్డికి ప్రాధాన్యం ఇస్తూ, రాష్ట్ర స్థాయిలో పార్టీ, ఇతర కుటుంబపరమైన వ్యవహారాల్లో వైవీ సుబ్బారెడ్డికి తగు స్థానాన్ని కల్పించారు.రాజశేఖరరెడ్డి మృతి తర్వాత జగన్‌ వైసీపీ ఏర్పాటు చేయడంతో వైవీ సుబ్బారెడ్డి పాత్ర కూడా పెరిగింది.దీంతో గత ఎన్నికల్లో వైవీ సుబ్బారెడ్డికి ఒంగోలు లోక్‌సభ స్థానం నుంచి పోటీ చేసే అవకాశాన్ని జగన్‌ కల్పించారు. ఆయన గెలుపొందటమే కాక పార్లమెంటు సభ్యుడిగా చురుకైన పాత్ర పోషించారు.ఈ పర్యాయం ఎన్నికల్లో వివిధ కారణాలతో ఆయన్ని తప్పించి మాగుంట శ్రీనివాసులు రెడ్డికి ఒంగోలు లోక్‌సభ నుంచి పోటీ చేసే అవకాశం కల్పించారు. ఈ విషయంలో వైవీ కినుక వహించటం, కుటుంబ సభ్యులు మధన పడటం, అయినా వైవీ జిల్లాకు వచ్చి పనిచేయకపోయినా రాష్ట్రస్థాయిలో జగన్‌ కార్యాలయ వ్యవహారాలు చూస్తూ కీలకంగా ఉండటం తెలిసిందే.

మరో సమాచారం మేరకు బాలినేని శ్రీనివాసరెడ్డి, వైవీ సుబ్బారెడ్డి మధ్య పెరిగిన అగాధాన్ని దృష్టిలో ఉంచుకుని జిల్లా వ్యవహారాల్లో బాలినేనికి ప్రాధాన్యం ఇస్తూ, వైవీ సుబ్బారెడ్డిని రాష్ట్ర పార్టీ వ్యవహారాలకు పరిమితం చేయాలనే ఉద్దేశంతో కూడా జగన్‌ కొన్ని నిర్ణయాలు తీసుకున్నాడన్న ప్రచారం కూడా ఉంది. ఏదిఏమైనా మాగుంటను తీసుకోవటం ఆ పార్టీకి ఎంతో కొంత కలిసివచ్చింది. ఎన్నికల ప్రచార కార్యక్రమంలో భాగంగా జగన్‌ బాలినేని శ్రీనివాసరెడ్డికి మంత్రి పదవి ఇస్తానని ప్రకటించిన విషయం తెలిసిందే. తదనుగుణంగా బాలినేని మంత్రి కావటం ఖాయమని తేలిపోయింది. దీంతో వైవీ సుబ్బారెడ్డిని ఎలా సంతృప్తి పరచాలన్న అంశంతో ఆయనకు టిటిడి చైర్మెన్ పదవి ఇవ్వనున్నారు.

నటుడు, దర్శకుడు పోసాని కృష్ణమురళి ఆసుపత్రి పాలయ్యారు. కొంతకాలం నుంచి అనారోగ్యంతో బాధపడుతున్న ఆయన.. ప్రస్తుతం యశోదా ఆసుపత్రిలో చికిత్స పొందుతున్నారు. పోసాని ఆరోగ్యం గురించి తెలుసుకున్న వైసీపీ ప్రధాన కార్యదర్శి సజ్జల రామకృష్ణారెడ్డి ఆదివారం ఆసుపత్రికి వెళ్లి పరామర్శించారు. పోసాని ఆరోగ్య పరిస్థితి గురించి వైద్యులను అడిగి తెలుసుకున్నారు. పోసాని త్వరగా కోలుకోవాలని సజ్జల ఆకాంక్షించారు. పోసాని కృష్ణమురళి వైసీపీకి అనుకూలంగా మాట్లాడుతూ పలు సంధర్భాల్లో మీడియా సమావేశాలు నిర్వహించిన సంగతి తెలిసిందే. పోసాని టిడిపి నేతలపై ఎన్నికల సంధర్భంగా తీవ్రమైన వ్యాఖ్యలు చేశారు. జగన్ పై ప్రశంసలు కురిపించారు. అలా పోసాని వైసిపి నేతలకు చేరువయ్యారు.

రీవెరిఫికేషన్ ఫలితాల్లోనూ తెలంగాణ ఇంటర్మీడియట్ బోర్డు తనదైన శైలిలో అయోమయం సృష్టిస్తోంది. ఇంటర్‌లో ఫెయిలై ఆత్మహత్య చేసుకున్న అనామిక అనే విద్యార్థిని మార్కుల విషయంలో గందరగోళానికి తెరలేపింది. తెలుగులో ఫెయిలైనందుకు బాధతో ఆత్మహత్యకు పాల్పడిన అనామిక.. రీవెరిఫికేషన్‌లో ఉత్తీర్ణురాలైందని వెబ్సైట్‌లో వెల్లడించిన ఇంటర్ బోర్డు.. కొద్దిసేపటికే మాటమార్చి ఆమె ఫెయిలైందని పేర్కొంది. అనామికకు రీవెరిఫికేషన్‌లో 48 మార్కులు వచ్చినట్లు తప్పుగా పేర్కొన్నామని వివరణ ఇచ్చింది. వాస్తవానికి ఆమెకు తెలుగులో గతంలో 20 మార్కులు రాగా.. రీవెరిఫికేషన్‌లో ఒక్క మార్కు పెరిగి మొత్తం 21 మాత్రమే వచ్చాయని వెల్లడించింది. మూల్యాంకన కేంద్రంలో క్లరికల్ సిబ్బంది పొరపాటు వల్ల ఈ గందరగోళం తలెత్తిందని స్పష్టంచేసింది.

అనామిక మార్కుల వ్యవహారంలో తప్పు ఎలా జరిగిందో తెలుసుకునేందుకు కమిటీ నియమించినట్టు ఇంటర్ బోర్డు కార్యదర్శి అశోక్ తెలిపారు. అనామిక జవాబు పత్రాన్ని ఆయన మీడియాకు విడుదల చేశారు. ఫెయిలైన విద్యార్థులందరివీ సమాధాన పత్రాలనూ రీవెరిఫికేషన్‌ చేశామని.. వారెవరూ ఉత్తీర్ణులు కాలేదని గతంలో బోర్డు స్పష్టంచేసిన విషయం తెలిసిందే. అయితే, ఈరోజు అనామిక కుటుంబ సభ్యులు తాజాగా ఇంటర్‌బోర్డు అధికారిక వెబ్‌సైట్‌లో పరిశీలించగా.. ఆమెకు 28 మార్కులు పెరిగి మొత్తం 48 మార్కులతో పాసైనట్టుగా వెబ్‌సైట్‌లో కన్పించడంతో వారు దిగ్భ్రాంతికి గురయ్యారు. సీపీఐ నేతలతో కలిసి మీడియాకు వివరాలను వెల్లడించారు. ఈ విషయం మీడియాలో ప్రముఖంగా ప్రసారం కావడంతో ఇంటర్‌ బోర్డు మరోసారి వివరణ ఇచ్చింది.