news

కౌంటింగ్ స‌మ‌యం ద‌గ్గ‌ర ప‌డుతున్న వేళ ఎన్నిక‌ల సంఘం కీల‌క నిర్ణ‌యాల‌ను ప్ర‌క‌టించింది. లెక్కింపు కేంద్రాల్లోని కౌంటింగ్ ఏజెంట్లకు ఫారం 17సీ ఇవ్వడంతో పాటు, వారికి వేళకు తగిన ఆహారం అందించాలంటూ టీడీపీ అధినేత చంద్రబాబునాయుడు చేసిన సూచనల పట్ల రాష్ట్ర ఎన్నికల సంఘం ప్రధాన అధికారి గోపాలకృష్ణ ద్వివేది స్పందించారు. కౌంటింగ్ ఏజెంట్లకు ఫారం 17సీ తప్పకుండా అందిస్తామని చెప్పారు. లెక్కింపు కేంద్రం లోపల ఎన్ని టేబుళ్లు ఉంటే అంతమంది కౌంటింగ్ ఏజెంట్లను అనుమతిస్తామని తెలిపారు. కౌంటింగ్ ఏజెంట్లకు ఎప్పటికప్పుడు ఆహారం అందిస్తామని, ఎలాంటి అసౌకర్యం కలగకుండా జాగ్రత్తలు తీసుకుంటామని ద్వివేది స్పష్టం చేశారు.

దేశ వ్యాప్తంగా సార్వ‌త్రిక ఎన్నిక‌ల ప్ర‌క్రియ ముగిసే వ‌ర‌కూ ఎన్నిక‌ల కోడ్ అమ‌ల్లో ఉంటుంద‌ని ఏపీ ఎన్నిక‌ల ప్ర‌ధానాధికారి ద్వివేదీ స్ప‌ష్టం చేసారు. త‌ప్ప‌ద‌నుకుంటే కౌంటింగ్ త‌రువాత కూడా రీపోలింగ్ నిర్వ‌హించే అవ‌కాశం ఉంటుంద‌న్నారు. మ‌రి కొద్ది గంట‌ల్లో దేశ వ్యాప్తంగా ఎన్నిక‌ల ఓట్ల లెక్కింపు ప్రారంభం కానుంది. ఈ ప‌రిస్థితుల్లో ఎన్నిక‌ల సంఘం కొన్ని కీల‌క నిర్ణ‌యాలు తీసుకుంది. ప్ర‌స్తుతం కొన్ని ప్రాంతాల్లో రాజ‌కీయంగా ఉద్రిక్త ప‌రిస్థితులు నెల‌కొన్న ప‌రిస్థితుల్లో ఈ నెల 27వ తేదీ అర్ద‌రాత్రి వ‌ర‌కూ ఎన్నిక‌ల కోడ్ అమ‌ల్లో ఉంటుంద‌ని రాష్ట్ర ఎన్నిక‌ల ప్ర‌ధానాధికారి స్ప‌ష్టం చేసారు. ఇదే స‌మ‌యంలో త‌ప్ప‌నిస‌రి ప‌రిస్థితుల్లో వీవీప్యాట్‌ లెక్కలో తేడా వచ్చినా, మిగతా లెక్కింపులో పార్టీల మధ్య ఓట్ల వ్యత్యాసం అతి తక్కువగా ఉంటే రీపోలింగ్‌కు ఆదేశించే అవకాశాలు ఉన్నాయని వెల్లడించారు. ఫలితం ఎటూ తేలకపోతే ఈసీకి విచక్షణాధికారం ఉంటుందని ఆయన పేర్కొన్నారు. ఫలితాల వెల్లడిలో ఆర్వోలదే తుది నిర్ణయమని రాష్ట్ర ఎన్నిక‌ల ప్ర‌ధానాధికారి స్ప‌ష్టం చేసారు.

ఏపీలో టీడీపీ..వైసీపీ మ‌ధ్య కౌంటింగ్ స‌మ‌యంలో ఉద్రిక్త ప‌రిస్థితులు త‌లెత్తే అవ‌కాశం ఉంద‌ని అంచనా వేస్తున్నారు. ఇప్ప‌టికే రెండు పార్టీలు త‌మ కౌంటింగ్ ఏజెంట్ల‌కు శిక్ష‌ణ పూర్తి చేసారు. అయితే, ఓట్లు త‌క్కువ వ‌చ్చినా..ఓడిపోయే ప‌రిస్థితి క‌నిపించినా వెంట‌నే రీ పోలింగ్‌కు డిమాండ్ చేయాల‌ని టీడీపీ త‌మ ఏజెంట్ల‌కు స్ప‌ష్టం చేసింది. వైసీపీ ముఖ్య నేత‌లు సైతం కేంద్ర ఎన్నిక‌ల సంఘాన్ని క‌లిసి కౌంటింగ్ స‌మ‌యానికి ఏపీకీ కేంద్ర బ‌ల‌గాల‌ను త‌ర‌లించాల‌ని విజ్ఞ‌ప్తి చేసారు. టీడీపీ రాజ్య‌స‌భ స‌భ్యుడు క‌న‌క‌మేడ‌ల ర‌వీంద్ర‌కుమార్ ఎన్నిక‌ల సంఘానికి వైసీపీ మీద ఫిర్యాదు చేసార‌దు. కౌంటింగ్ స‌మ‌యంలో వైసీపీ అల్ల‌ర్ల‌కు పాల్ప‌డే అవ‌కాశం ఉంద‌ని..చ‌ర్య‌లు తీసుకోవాల‌ని కోరారు. ఇక‌, కేంద్ర ఎన్నిక‌ల సంఘం ఆదేశాల మేర‌కు ఏపీకి ప‌ది కంపెనీల కేంద్ర బ‌ల‌గాలు వ‌స్తున్న‌ట్లు స‌మాచారం.

నెలన్నరపాటు సాగిన ఎన్నికల ప్రక్రియ ఎట్టకేలకు పూర్తయింది. ఫలితాలు రావాల్సి ఉంది. ఈ క్రమంలో నిన్న మొన్నటి వరకు స్థిరంగా ఉన్న ఫ్యూయల్ ధరలు పెరిగే అవకాశం ఉందా? గత రెండు నెలల్లో ఎదుర్కొన్న నష్టాలను పూడ్చుకునేందుకు ఆయిల్ కంపెనీలు పెట్రోల్, డీజిల్ ధరలను పెంచనున్నాయా? అంటే అవుననే సమాధానం వినిపిస్తోంది. ఎన్నికల నేపథ్యంలో పెట్రోల్, డీజల్ ధరలు పెరిగితే తమపై ప్రభావం చూపుతుందన్న కారణంతో కేంద్ర ప్రభుత్వం కంపెనీలను కట్టడి చేసింది. పోలింగ్ కొనసాగే ఏప్రిల్, మే నెలల్లో ఫ్యూయల్ ధరలను పెంచవద్దని, స్టేబుల్​గా ఉంచాలని ఇండియన్ ఆయిల్, భారత్ పెట్రోలియం, హిందుస్థాన్ పెట్రోలియం వంటి ఆయిల్ మార్కెటింగ్ సంస్థలను ఆదేశించింది.

దీంతో అంతర్జాతీయంగా క్రూడ్ ఆయిల్ ధరలు పెరుగుతున్నా, దేశంలో మాత్రం పెట్రోల్, డీజిల్ రేట్లు పెరగలేదు. ఈ క్రమంలో తాజాగా ధరలు పెంచేందుకు అనుమతి ఇవ్వాలని ప్రభుత్వాన్ని ఈ సంస్థలు కోరే అవకాశం ఉంది. కొన్ని నెలలుగా వచ్చిన నష్టాలను పూడ్చుకోవడానికి, అనుకున్న దాని కంటే ఎక్కువగానే ధరలు పెంచే అవకాశం ఉన్నట్లు తెలుస్తోంది. గతేడాది మే నెలలో కర్నాటక అసెంబ్లీ ఎన్నికల తర్వాత ఫ్యూయల్ రేట్లు పెంచడమే ఇందుకు ఉదాహరణ. పోలింగ్ సమయంలో ఓ వారంపాటు ధరలు పెరగకుండా ఆపిన ప్రభుత్వం, తర్వాత మాత్రం భారీగా పెంచుకుంటూపోయింది.

లోక్​సభ ఎన్నికలు పూర్తయిన తర్వాతి రోజే పెట్రోల్, డీజిల్ ధరలు స్వల్పంగా పెరిగాయి. సోమవారం దేశవ్యాప్తంగా పెట్రోల్ 8 నుంచి 10 పైసలు, డీజిల్ 15 నుంచి 16 పైసలు పెరిగాయి. ఇండియన్ ఆయిల్ కార్పొరేషన్ డేటా ప్రకారం ఢిల్లీలో ప్రస్తుతం లీటర్ పెట్రోల్ రూ.71.12, డీజిల్ 66.11గా ఉంది. అంతర్జాతీయ మార్కెట్‌‌లో క్రూడ్ ఆయిల్ ధరలు పెరిగినందువల్లే ఇక్కడ ఫ్యూయల్ ధరలు పెరిగాయి. క్రూడ్ ఆయిల్ పరిమిత సరఫరాకు ఆయిల్ ఉత్పత్తి దేశాలు ఒప్పుకున్నాయని సౌదీ అరేబియా ఎనర్జీ మంత్రి ఖలీద్ అల్ ఫలీ ప్రకటించిన తర్వాత క్రూడ్ ఆయల్ ధరలు 1 శాతం వరకు పెరిగాయి.

ప్రధానమంత్రి నరేంద్ర మోడీకి ఎన్నికల సంఘం లొంగిపోయిందని కాంగ్రెస్‌ అధ్యక్షుడు రాహుల్‌ గాంధీ తీవ్ర విమర్శలు చేసిన విషయం తెలిసిందే. ఆ మరుసటి రోజే మాజీ రాష్ట్రపతి ప్రణబ్ ముఖర్జీ.. ఈసీ పనితీరు భేష్‌ అంటూ ప్రశంసించారు. దీంతో ఈరోజు ప్రణబ్‌ ముఖర్జీ ఓ ప్రకటన రిలీజ్ చేశారు. ఎలక్ట్రానిక్ ఓటింగ్‌ యంత్రాల (ఈవీఎం)పై వస్తున్న ఆరోపణలపై తాను ఆందోళన చెందుతున్నట్లు వెల్లడించారు. ఈవీఎంల ద్వారా ప్రజలు ఇచ్చిన తీర్పు చాలా పవిత్రమైందని.. ఎటువంటి అనుమానాలు లేకుండా చేయాల్సి ఉందని ఆయన స్పష్టం చేశారు. ఈవీంలపై వస్తున్న ఆరోపణలు తనను ఆందోళనకు గురి చేస్తున్నాయంటూ మంగళవారం ఒక ప్రకటన విడుదల చేశారు. ఈవీఎంల ద్వారా ప్రజలు ఇచ్చిన తీర్పు చాలా పవిత్రమైందన్న ఆయన ఎటువంటి అనుమానాలకు తావు లేకుండా చేయాల్సిన బాధ్యత ఈసీపై ఉందన్నారు.

అదేవిధంగా 'ఓటర్ల తీర్పును ట్యాంపరింగ్‌ చేస్తున్నారంటూ వస్తున్న ఆరోపణలపై నాకు ఆందోళన కలిగింది. ఈసీఐ అధీనంలో ఉన్న ఈవీఎంల రక్షణ, భద్రత మొత్తం ఎన్నికల సంఘానిదే. ప్రజాస్వామ్య మూలాలను సవాలు చేసేలా ఊహాగానాలు రావడం సరికాదు. ప్రజల తీర్పు చాలా ఉన్నతమైనది. వారికి సంబంధించిన అన్ని అనుమానాలకు తీర్చాలి. మన వ్యవస్థలపై దృఢమైన విశ్వాసం ఉన్న వ్యక్తిగా నా అభిప్రాయాన్ని చెప్తున్నాను. మన వ్యవస్థల సమగ్రత బాధ్యత ఎన్నికల సంఘంపై ఆధారపడి ఉంది. ఎటువంటి ఊహాగానాలు లేకుండా చేయాల్సి ఉంది' అంటూ ప్రణబ్‌ ముఖర్జీ పేర్కొన్నారు.

కాగా, ఈనెల 19న లోక్‌సభ ఎన్నికలు ముగిసేంత వరకూ ఎన్నికల కమిషన్ తన స్వయంప్రతిపత్తికి తిలోదకాలిచ్చి కేంద్ర ప్రభుత్వానికి అనుకూలంగా వ్యవహరించిందంటూ విపక్షాలు ఈసీని తప్పుపట్టాయి. ప్రధాని మోదీకి, బీజేపీ అధ్యక్షుడు అమిత్‌షాకు ఇచ్చిన వరుస క్లీన్ చీట్లపైనా ఈసీపై విమర్శలు ఎక్కుపెట్టాయి. మోదీ, అమిత్‌షాలకు క్లీన్ చిట్ ఇవ్వడంపై తన అసమ్మతిని రికార్డు చేయనందునే కమిషన్ మీటింగ్‌లను తాను బహిష్కరించినట్టు ఎన్నికల కమిషనర్లలో ఒకరైన అశోక్ లవాసా అభిప్రాయపడటాన్ని కూడా విపక్షాలు తవ వాదనకు బలం చేకూర్చినట్టు క్లెయిమ్ చేసుకున్నాయి.