news

జనసేనకు దక్కేవి నాలుగైదు సీట్లు మాత్రమే అంటూ ఎగ్జిట్‌ పోల్స్‌ వెల్లడించడంతో పవన్‌ అభిమానుల్లో అలజడి రేపింది. భీమవరంలో అంతా సవ్యంగా సాగితే పవన్‌దే గెలుపు అనుకుంటున్నా అనుమాన పొరలు కమ్ముకున్నాయి. ఫలితాలు పార్టీకి ఉత్తేజకరంగా ఉంటాయా..? నీరసపడేలా చేస్తాయా..? అంటూ జనసేనను ఉక్కిరిబిక్కిరి చేస్తున్న ప్రశ్నలు ఎన్నో వినిపిస్తున్నాయి. జనసేన అధినేత పవన్‌కళ్యాణ్‌ భీమవరం నుంచి పోటీ చేయాలని ఆకస్మిక నిర్ణయంపై అందరిలోనూ భిన్నాభిప్రాయాలు వ్యక్తమయ్యాయి. స్వగ్రామం మొగల్తూరు వున్న నరసాపురం, పొరుగునే వున్న పాలకొల్లు నియోజక వర్గాలను కాకుండా భీమవరంలో ఎందుకు పోటీ చేయాలనుకున్నారు ? అంటూ అనేక ప్రశ్నలు వ్యక్త మయ్యాయి. ఒక పార్టీ అధినేతగా పవన్‌ మిగతా స్థానాల్లో పర్యటించి, ప్రచారం చేసి చివరగా భీమ వరంలోను సుడిగాలి ప్రచారం చేశారు.

ఆఖరుకు ఇక్కడ ఒక సామాజిక వర్గం వారు ఇష్టపడే అల్లూరి సీతారామరాజు వంద అడుగుల విగ్రహాన్ని ఏర్పాటు చేస్తానంటూ భరోసా ఇచ్చి ఆ వర్గాన్ని ఆకట్టుకునే ప్రయత్నం చేశారు. సొంత సామాజికవర్గం యా వత్తు తన వెంటే నిలుస్తుందని భావించారు. తగ్గట్టు గానే ఆయా సామాజిక వర్గాల పెద్దలతో మనసు పంచుకున్నారు. పార్టీ లక్ష్యాలను ఏకరవు పెట్టారు. తాను రెండుచోట్ల పోటీ చేస్తున్నా.. భీమవరానికి ప్రత్యేకత ఉందని, ఈ గడ్డ తన సొంత గడ్డ అంటూ స్ఫూర్తిని నింపారు. స్వచ్ఛందంగా అభిమానులు ప్రచారం చేశారు. ఏజెంట్లుగా వ్యవహరించి పోలింగ్‌ బాధ్యతలు భుజానికి ఎత్తుకున్నారు. పోలింగ్‌ ముగిసిన తరువాత గెలుపుపై ధీమా ప్రదర్శించారు. ఎగ్జిట్‌పోల్స్‌ అనంతరం పార్టీ మీదవున్న ప్రజాభిమానం తాము ఆశించినట్టుగా ఓటు రూ పంలో మారలేదా ? అనే అనుమానాన్ని వ్యక్తం చేస్తున్నారు.

2009 పీఆర్పీ పోటీకి దిగినప్పుడు ఇంతకంటే రాజకీయాలు ఇంకో కోణంలో వెళ్లాయని, అప్పుడూ ముక్కోణపు పోటీ మాదిరిగానే ఈసారి ఉన్న.. పరిస్థితులు తమకు ఎందుకు అనుకూలంగా మారలేదనే స్వరాన్ని వినిపిస్తున్నారు. భీమవరంలో పవన్‌కల్యాణ్‌ గట్టెక్కుతారా ? లేదా ? అనే దానిపై ఇప్పుడు మరోమారు హాట్‌ టాపిక్‌ అయ్యింది. పాలకొల్లులో చిరంజీవికి ఎదురైన అనుభవమే రిపీట్‌ కాబోతుందా ? అనేది మరికొందరి అనుమానం. ఇప్పటికీ గెలుపు మీద కాస్తంత ధీమాతోవున్న అభి మానులు ఎగ్జిట్‌పోల్స్‌ ఫలితాలను తేలిగ్గా తీసు కుంటున్నారు.

కేంద్ర ఎన్నికల సంఘం ఉన్నతాధికారులతో 21విపక్ష పార్టీల నేతల భేటీ ముగిసింది. ఫలితాల తర్వాత అనుసరించాల్సిన వ్యూహంపై కాన్‌స్టిట్యూషన్‌ క్లబ్‌లో చర్చించిన ఎన్డీయేతర పార్టీల నేతల బృందం ఆ తర్వాత ఎన్నికల సంఘం ప్రధాన కమిషనర్‌ను కలిసింది. ఈ నెల 23న ఓట్ల లెక్కింపు సందర్భంగా వీవీప్యాట్ స్లిప్పులు, ఈవీఎంల లెక్కింపులో తేడావస్తే నియోజకవర్గంలోని మొత్తం స్లిప్పులు లెక్కించాలని డిమాండ్‌ చేసినట్టు సమాచారం. సుమారు గంటకు పైగా జరిగిన ఈ భేటీ సందర్భంగా 8 పేజీల మెమోరాండాన్ని నేతలు సీఈసీకి అందజేశారు. ఈ మెమోరాండంలో పలు అంశాలను కీలకంగా పొందుపరిచారు. ఏప్రిల్‌ 8న సుప్రీంకోర్టు ఒక్కో అసెంబ్లీ నియోజకవర్గం పరిధిలో 5వీవీప్యాట్లు లెక్కించాలని ఇప్పటికే ఆదేశించిందని నేతలు గుర్తుచేశారు.

చివరి రౌండ్‌ ఈవీఎంల లెక్కింపు పూర్తికాకుండానే వీవీప్యాట్లు లెక్కించాలని డిమాండ్‌ చేశారు. లెక్కింపు ముగిసే వరకు ఈవీఎంలు, వీవీప్యాట్లు కౌంటింగ్‌ కేంద్రంలోనే ఉంచాలని కోరినట్టు తెలుస్తోంది. వీవీప్యాట్ల లెక్కింపు విషయంలో సరైన మార్గదర్శకాలను రిటర్నింగ్‌ అధికారులు, కౌంటింగ్‌ అధికారులకు ఇవ్వకపోవడాన్ని విపక్ష నేతలు సీరియస్‌గా ప్రస్తావించినట్టు సమాచారం. ఈవీఎంలను ట్యాంపర్‌ చేసే అవకాశాలు ఉన్నాయని నిపుణులు చెబుతున్నారని, వీవీప్యాట్లు లెక్కించేందుకు కేంద్ర ఎన్నికల సంఘం వెనకడుగు వేయడానికి కారణాలేంటని నిలదీసినట్టు సమాచారం. వీవీప్యాట్ల కౌంటింగ్‌లో ఎందుకు ఇప్పటివరకు నియమనిబంధనల్ని రూపొందించలేదని ప్రశ్నించాయి.

ఒక్కో అసెంబ్లీ నియోజకవర్గం పరిధిలో ఐదు వీవీప్యాట్ల లెక్కింపు విషయంలో ఈసీ ఎందుకు వెనకాడుతోందని నిలదీసినట్టు సమాచారం. కేంద్ర ఎన్నికల సంఘం ఏడు దశల్లో జరిగిన ఎన్నికల నిర్వహణలో విఫలమైందని, విపక్షాలు లేవనెత్తిన ఏ ముఖ్యమైన అంశాన్నైనా ఎందుకు పట్టించుకోలేదని తీవ్రంగా ప్రశ్నిస్తూ నేతలు నిరసన వ్యక్తంచేసినట్టు తెలుస్తోంది. కేంద్ర ఎన్నికల సంఘం తీరును ఎండగడుతూ తమ వాదనను విన్పించిన విపక్షాల నేతలు ఎలాంటి కార్యాచరణను ప్రకటిస్తారో చూడాలి.

ఎగ్జిట్‌ పోల్‌ సర్వేల ఫలితాలతో రాజకీయ వర్గాల్లో టెన్షన్‌ అమాంతం పెరిగిపోతోంది. దీంతో వాస్తవ ఫలితాలపై సామాన్య జనంలో కూడా ఉత్కంఠ పెరిగిపోతోంది. దేశవ్యాప్తంగా పలు సంస్థలు సర్వేల ఫలితాలు ప్రకటించడం, అవన్నీ పరస్పర విరుద్ధంగా వుండడంతో అందరిలో అయోమయం నెలకొంది. ఏది నమ్మాలో, ఏది నమ్మకూడదో అర్థంకాని పరిస్థితిలో పడ్డారు. అయితే జిల్లాలో మాత్రం మిగిలిన సంస్థల ప్రకటనల గురించి జనం పట్టించుకోవడం లేదు. మాజీ ఎంపీ లగడపాటి రాజగోపాల్‌ ఈ రాష్ట్రానికి చెందిన వారు కావడం, చాలా ఎన్నికల్లో ఎగ్జిట్‌ పోల్‌ సర్వేలు నిర్వహించిన నేపథ్యం వుండడంతో ఆయన ప్రకటన మాత్రం జిల్లా ప్రజలపై గణనీయమైన ప్రభావం చూపుతోంది. లగడపాటి సర్వే ఫలితాలతో ఆదివారం సాయంత్రం దాకా జోరుమీదున్న వైసీపీ వర్గాలను నీరసం ఆవహించింది. ఆ పార్టీ నేతలను అభద్రతా భావానికి లోను చేసింది. అదే సమయంలో టీడీపీ శ్రేణుల్లో జోష్‌ను పెంచింది. ప్రతిసారీ ఎన్నికల సందర్భాల్లో ఎగ్జిట్‌ పోల్‌ సర్వే ఫలితాల పట్ల జనం ఆసక్తి ప్రదర్శిస్తుంటారు. అయితే ఈ ఎన్నికల్లో టీడీపీ, వైసీపీ నడుమ హోరాహోరీ పోటీ జరిగింది. మధ్యలో జనసేన కూడా టీడీపీ, వైసీపీ గెలుపోటములను ప్రభావితం చేసే స్థాయిలో పోటీ ఇచ్చింది. రాష్ట్ర రాజకీయాల్లో నాయకత్వం విషయంలో కొత్త తరాన్ని తీసుకొస్తున్న ఎన్నికలు కావడంతో జనంలో ఫలితాల పట్ల విపరీతమైన ఆసక్తి, ఉత్కంఠ నెలకొంది.

గత నెల 11న పోలింగ్‌ ముగియడంతో అప్పటి నుంచీ జిల్లాలో ప్రధాన పార్టీల నేతలు, కార్యకర్తలు గెలుపు తమదంటే తమదని ధీమా వ్యక్తం చేస్తూ వస్తున్నారు. చివరి విడత పోలింగ్‌ ఆదివారం కావడంతో ఆదివారం సాయంత్రం వరకూ ఎగ్జిట్‌ పోల్‌ సర్వే ఫలితాల వెల్లడిపై నిషేధం వున్న సంగతి తెలిసిందే. దీంతో ఎగ్జిట్‌ పోల్‌ సర్వేలు నిర్వహించిన సంస్థలు ఆదివారం సాయంత్రం 6 గంటల తర్వాత ఫలితాలను ప్రకటించాయి. దేశవ్యాప్తంగా పలు మీడియా, ప్రైవేటు సంస్థలు వెల్లడించిన ఎగ్జిట్‌ పోల్‌ సర్వే ఫలితాలు పరస్పర భిన్నంగా వుండడంతో రాజకీయవర్గాలతో పాటు సామాన్య జనం కూడా అయోమయంలో పడ్డారు. సర్వే ఫలితాలు వెల్లడించిన సంస్థల్లో కొన్ని మాత్రమే పేరుప్రతిష్టలు కలిగినవి. మిగిలినవి ప్రాముఖ్యత, విశ్వసనీయత లేనివన్నది జనం భావన. అయితే ప్రతిష్టాత్మక సంస్థలు బయటపెట్టిన సర్వే ఫలితాలు కూడా ఏకరీతిలో లేకపోవడమే అయోమయానికి దారితీస్తోంది.

జాతీయస్థాయి ప్రాముఖ్యత కలిగిన సర్వే సంస్థలు వెల్లడించిన ఫలితాలను నిజానికి విద్యాధికులు మాత్రమే పరిగణనలోకి తీసుకుంటున్నారు. అదే లగడపాటి రాజగోపాల్‌ వెల్లడించిన ఆర్‌జీ ఫ్లాష్‌ టీమ్‌ సర్వే ఫలితాలు మాత్రం జిల్లావ్యాప్తంగా రాజకీయ వర్గాలను, సామాన్య జనాన్ని గణనీయంగా ప్రభావితం చేశాయి. ఎందుకంటే లగడపాటి ఈ రాష్ట్రానికి చెందిన రాజకీయ నేత. జనానికి బాగా తెలిసిన వ్యక్తి. ఆయన చాలా కాలంగా ఎన్నికలప్పుడు ఎగ్జిట్‌ పోల్‌ సర్వేలు నిర్వహించడం, ఆ ఫలితాలు చాలా వరకూ వాస్తవానికి చేరువగా వుండడం కూడా జిల్లా ప్రజలకు తెలుసు. ఇటీవలి తెలంగాణ ఎన్నికల విషయంలో ఆయన అంచనా కొంతమేరకు తప్పినప్పటికీ ఆదివారం తిరుపతిలో ఆయన తాజా సర్వే ఫలితాలు వెల్లడించే సందర్భంలో తన సర్వే విశ్వసనీయత, నిబద్ధతల గురించి చేసిన వ్యాఖ్యలు జనంపై ప్రభావం చూపుతున్నాయి. ఈ కారణంగా ఆదివారం రాత్రి లగడపాటి వెల్లడించిన ఫలితాలు జిల్లాలో రెండు ప్రధాన పార్టీల శిబిరాలను షేక్‌ చేసింది. అప్పటి దాకా వైసీపీ శ్రేణులు గానీ, నేతలు గానీ ఎన్నికల్లో గెలిచేది తమ పార్టీయేనని, అధికారం కూడా తమదేనని బలంగా నమ్ముతూ వచ్చాయి. వారిలో అలాంటి భావన ఏర్పడేలా పార్టీ నేతలు కూడా బిల్డప్‌ ఇస్తూ వచ్చారు. దీంతో టీడీపీ శ్రేణుల్లో ఓ విధమైన అభద్రతా భావం నెలకొంది. నేతలు పైకి ధైర్యంగానే వున్నా కార్యకర్తల్లోనే హుషారు తగ్గింది. అలాంటిది లగడపాటి ప్రకటనతో వైసీపీ శ్రేణులు పూర్తిగా డీలా పడ్డాయి.