news

గడచిన ఐదేళ్లలో ప్రధాని నరేంద్రమోదీ ఒక్కసారి కూడా ప్రెస్‌ మీట్‌లో పాల్గొనలేదు. ఈ విషయంపై రాహుల్‌ పదేపదే ఆయనపై దాడి చేశారు కూడా! ఎందుకు మీడియాకు మొహం చాటేస్తున్నారని విపక్ష నేతలు కూడా ఆయనను నిలదీసినా మోదీ పట్టించుకోలేదు. ఎన్నికల ప్రచార సమయంలో మాత్రం తన షరతుల మేరకు కొన్ని ప్రధాన మీడియా సంస్థలకు ప్రత్యేక ఇంటర్వ్యూలు ఇచ్చారు. శుక్రవారం సాయంత్రం ఆయన ప్రెస్‌మీట్‌ పాల్గొంటారని ఎవ్వరూ ఊహించలేదు. నిజానికిది అమిత్‌షా ఎప్పుడూ నిర్వహించే మీడియా సమావేశంగా మీడియా ప్రతినిధులకు సమాచారం ఇచ్చారు.

తీరా మొదలయ్యే సమయానికి అకస్మాత్తుగా మోదీ కూడా వచ్చి కూర్చున్నారు. ఆయన ఈ ప్రెస్‌మీట్‌లో పాల్గొన్నారు తప్పితే విలేఖరుల నుంచి ఎలాంటి ప్రశ్నలకూ ఆస్కారమివ్వలేదు. ప్రతీ ప్రశ్ననూ అమిత్‌ షాకే మళ్లించారు. ‘బీజేపీ క్రమశిక్షణ గల పార్టీ. మా పార్టీ అధ్యక్షుడే ప్రధానం. ఆయనే బదులిస్తారు. నేను క్రమశిక్షణ గల సైనికుడిని’’ అని దాటవేశారు. ప్రారంభంలో మాత్రం తాను చెప్పదల్చుకున్నది చెప్పేశారు. తొలిసారి మీడియా ముందుకు వచ్చిన మోదీ.. ప్రెస్ కాన్ఫరెన్స్‌లో వ్యవహరించిన తీరుపై రాహుల్ సెటైర్స్ వేశారు. ప్రశ్నలన్నింటినీ మోదీ అమిత్ షాకు ఫార్వర్డ్ చేశారు. ఈసారి ప్రెస్ కాన్ఫరెన్స్‌లో రాహుల్ మీకు అవకాశమివ్వాలంటూ రాహుల్ సెటైర్. ప్రచార పర్వానికి తెరపడే ఆఖరి గంటలో మోదీ ప్రెస్ కాన్ఫరెన్స్ నిర్వహించారు.

ఐదేళ్ల కాలంలో ఇదే మోదీకి తొలి మీడియా సమావేశం. దీంతో తాను ఎదుర్కోబోయే ప్రశ్నలకు ఎలాంటి సమాధానాలు చెబుతారోనని అంతా ఉత్కంఠగా ఎదురు చూశారు. అయితే మోదీ అంత రిస్క్ తీసుకోలేదు. విలేఖరులు ప్రశ్నలడిగిన ప్రతిసారి మోదీ అమిత్ షా వైపు చూడటం ఆశ్చర్యపరిచింది. మోదీ ప్రెస్ కాన్ఫరెన్స్ చాలా బాగా జరిగిందంటూ రాహుల్ సెటైర్స్ వేశారు. ఈసారి ప్రెస్ కాన్ఫరెన్స్ పెడితే మీకు మాట్లాడే అవకాశన్ని అమిత్ షా ఇవ్వాలని కోరుకుంటున్నానని రాహుల్ ఎద్దేవా చేశారు.

ఈనెల 23వ తేదీన ప్రజా తీర్పు బయటకు వచ్చిన తర్వాతే బీజేపీయేతర కూటమికి ఎవరు ప్రధాని అనే దానిపై కీలక నిర్ణయం ఉంటుందని కాంగ్రెస్ అధ్యక్షుడు రాహుల్ గాంధీ తెలిపారు. లోక్‌సభ ఎన్నికల్లో చివరిది, ఏడవది అయిన ఎన్నికల ప్రచారం ముగియడానికి కొద్దిసేపు ముందు మీడియా సమావేశం ఏర్పాటు చేసిన రాహుల్...ఈ ఎన్నికలో కాంగ్రెస్ న్యాయపోరాటం సాగించిందని, న్యాయమే చివరకు గెలుస్తుందని అన్నారు. ప్రధాని ఎవరనేది ప్రజలే నిర్ణయిస్తారని చెప్పారు. దేశంలోని రాజ్యాంగ వ్యవస్థల పరిరక్షణకు ఈ ఎన్నికల్లో తాము సమర్ధవంతంగా పోరాడమని, బీజేపీ-ఆర్ఎస్ఎస్ సిద్ధాంతాలపై పోరాటంలో 'ఏ గ్రేడ్' స్థాయిలో పోరాడమని చెప్పారు.

నరేంద్ర మోదీని నిలువరిస్తూ, తమకు మద్దతుగా నిలిచిన లక్షలాది ప్రజలను చూసి ఒక భారతీయుడిగా తాను గర్విస్తున్నానని అన్నారు. కాంగ్రెస్ ఆశిస్తున్న సీట్లు, ఇతర విపక్ష పార్టీలతో పొత్తుపై అడిగినప్పుడు తీర్పు రాకముందే ప్రజా నిర్ణయంపై మాట్లాడటం వారిని అగౌరవపరిచినట్టేనని సమాధానమిచ్చారు. 23న ఫలితాలు వెలువడిన తర్వాత కేంద్రంలో బీజేపీయేతర ప్రభుత్వంలో ప్రధాని అభ్యర్థిత్వంపై నిర్ణయం ఉంటుందని చెప్పారు. ప్రజాతీర్పు రాకముందే తాను మాట్లాడటం బాగుందని, ప్రజలేమి నిర్ణయించుకున్నారనే దానిపై ఆధారపడి తాము నిర్ణయం తీసుకుంటామని పేర్కొన్నారు.

ఇతర విపక్ష పార్టీల నుంచి ప్రధాని పదవిని ఆశిస్తున్న వారున్నారనే విషయంపై స్పందిస్తూ, 'మాయావతి లేదా ఇతర నాయకుల గురించి నేను కామెంట్ చేయదలచుకోవాలి. సైద్ధాంతిక పరంగా చూసినప్పటికీ అన్నీ విస్తృత ప్రాతిపదికపై కలుస్తాయి. చంద్రబాబునాయుడు బీజేపీకి మద్దతిస్తారని నేను అనుకోవడం లేదు. అలాగే మమతా, మాయావతి, ములాయం సింగ్‌లు కూడా బీజేపీ వైపు వెళ్తారనుకోవటం లేదు' అని రాహుల్ నిశ్చితాభిప్రాయం వ్యక్తం చేశారు. తాజా ఎన్నికల్లో ఈసీ పారదర్శకంగా వ్యవహరిస్తోందని, మోదీ షెడ్యూల్‌ ప్రకారమే ఉత్తర్వులు ఇస్తోందని రాహుల్‌ దుయ్యబట్టారు. మోదీ, షా సిద్ధాంతాలు గాంధీ సిద్ధాంతాలకు పూర్తి వ్యతిరేకమన్నారు. ప్రజల దృష్టి మరల్చడానికి మోదీ మరోసారి ప్రయత్నిస్తున్నారని, అయితే అది జరగదని ఎద్దేవాచేశారు.

చిత్తూరు జిల్లా చంద్రగిరి నియోజకవర్గంలో రీపోలింగ్‌ జరగనున్న 5పోలింగ్‌ కేంద్రాల్లో రామచంద్రాపురం మండలం వెంకట్రామాపురం కూడా ఒకటి. టీడీపీ సీనియర్‌ నేత, మాజీ మంత్రి దివంగత గాలి ముద్దుకృష్ణమ స్వగ్రామం.. టీడీపీకి పెట్టనికోట. శుక్రవారం అక్కడకు ప్రచారానికి వెళ్లిన వైసీపీ అభ్యర్థి, సిట్టింగ్‌ ఎమ్మెల్యే చెవిరెడ్డి భాస్కరరెడ్డికి చేదు అనుభవం ఎదురైంది. ఊరిలోకి రావద్దంటూ గ్రామస్థులు అడ్డుకున్నారు. దీంతో తాను గాజులు తొడుక్కుని లేనని.. తిరుపతిలో అడుగుపెడితే మీ కథ చూస్తానంటూ ఆయన వారిని బెదిరించారు. శుక్రవారం చోటుచేసుకున్న ఈ ఘటనకు సంబంధించిన వివరాలిలా ఉన్నాయి. ఎన్‌ఆర్‌ కమ్మపల్లెలో ప్రచారానికి వెళ్లిన చెవిరెడ్డి తనయుడు మోహిత్‌రెడ్డిని గ్రామస్థులు అడ్డుకోవడంతో చెవిరెడ్డి పెద్దఎత్తున అనుచరవర్గంతో అక్కడకు చేరుకున్నారు. 

టీడీపీ అభ్యర్థి పులివర్తి నాని కూడా గ్రామస్థులకు మద్దతుగా రావడంతో ఇరువర్గాలూ ఎదురెదురుగా మోహరించాయి. డీఐజీ క్రాంతిరాణా టాటా, చిత్తూరు ఎస్పీ విక్రాంత్‌ పాటిల్‌ బలగాలతో చేరుకుని లాఠీచార్జి జరిపి ఇరువర్గాలనూ చెదరగొట్టారు. శుక్రవారం ఉదయం వెంకట్రామాపురానికి చెవిరెడ్డి వాహనాల కాన్వాయ్‌తో మందీ మార్బలాన్ని వెంటబెట్టుకుని మళ్లీ వచ్చారు. గ్రామస్థులు అడ్డుకున్నారు. తప్పుడు ఫిర్యాదులు చేసి రీపోలింగ్‌ పెట్టించారని మండిపడ్డారు. చెవిరెడ్డి స్వగ్రామమైన తుమ్మలగుంటలో రీపోలింగ్‌ ఎందుకు పెట్టించుకోలేదని నిలదీశారు. గ్రామంలోకి రావద్దంటూ మహిళలు సహా అంతా ఆయన ముఖంమీదే చెప్పడంతో చెవిరెడ్డి రెచ్చిపోయారు.

‘మీరు అ డ్డుకుంటే నేనేం గాజు లు తొడుక్కుని లేను... రండి ఎవరు అడ్డుకుంటారో.. నన్ను ఇక్కడ అడ్డుకుంటే తిరుపతిలో అడుగుపెట్టలేరు’ అని హె చ్చరించారు. బలగాల రక్షణలో ఆయన గ్రామంలోకి వెళ్లారు. అయితే గ్రామస్థులు ‘దొంగ వస్తున్నాడు.. తలుపులేసుకోండి’ అని గట్టిగా అరుస్తూ ప్రతి ఇంట్లోని వారినీ అప్రమత్తం చేయడంతో చెవిరెడ్డి ఆగ్రహం వ్యక్తంచేశారు. ‘తిరుపతిలో అడుగుపెట్టండి మీ కథ చెప్తా.. ఎలా తిరిగి వెళతారో చూస్తా’ అంటూ హెచ్చరించారు. బలగాలు సైతం ఆయనకే రక్షణ కల్పిస్తూ గ్రామస్థులను నెట్టేశాయి. ‘మేం స్వచ్ఛందంగా ఓట్లు వేశాం. మమ్మల్ని ఎవరూ ఇబ్బంది పెట్టింది లేదు. 1983లో ఎన్టీఆర్‌ పార్టీ పెట్టినాకనే మాకు రాజకీయమంటే ఏంటో తెలిసింది. పెద్దాయన ముద్దుకృష్ణమది మా ఊరే. ఈసారి ఇంకా కసిగా ఓట్లు వేస్తాం.’ అని అక్కడి గ్రామస్థులు అంటున్నారు.