news

ఏపీలో రిపోలింగ్ వ్యవహారం దుమారం రేపుతోంది. చంద్రగిరి నియోజకవర్గంలోని ఐదు బూత్‌లలో రీపోలింగ్ నిర్వహించడంపై రాజకీయ మంటలు చెలరేగుతున్నాయి. వైసీపీ చెప్పినట్లుగా ఈసీ నడుచుకుంటోందని టీడీపీ నేతలు తీవ్ర విమర్శలు గుప్పిస్తున్నారు. రీపోలింగ్ వ్యవహారంపై ఏపీ సీఎం చంద్రబాబు ఢిల్లీలో కేంద్ర ఎన్నికల సంఘాన్ని కలిసిన ఫిర్యాదుచేశారు. ఈసీ నిర్ణయాలు రాజ్యాంగ విరుద్ధంగా ఉన్నాయని వెల్లడించారు. ఈ క్రమంలో ఏపీలో రీపోలింగ్‌పై రాష్ట్ర ఎన్నికల అధికారి గోపాలక్రిష్ణ ద్వివేది వివరణ ఇచ్చారు. ఏప్రిల్ 11న జరిగిన ఎన్నికల్లో చంద్రగిరిలోని ఆ 2 పోలింగ్ బూత్‌లలో అక్రమాలు జరిగాయని ద్వివేది తెలిపారు. తమ దగ్గర ఆధారాలు ఉన్నాయని, వీడియో సాక్ష్యం ఉండటంతోనే రీపోలింగ్‌కు ఆదేశించామని స్పష్టంచేశారు.

ఆ వీడియో చూస్తే ప్రజాస్వామ్యం ఇలా ఉంటుందా అనిపిస్తోందని చెప్పుకొచ్చారు. రెండోసారి రీపోలింగ్ జరపకూడదని ఎక్కడా లేదన్న ద్వివేది.. ఘటన ఆలస్యంగా తమ దృష్టికి రావడం వల్లే ఆదివారం రీపోలింగ్‌ నిర్వహిస్తున్నట్లు చెప్పారు. పోలింగ్ రోజున విధుల్లో నిర్లక్ష్యం వహించిన అధికారులపై చర్యలు తీసుకుంటామని స్పష్టంచేశారు. తుది విడత ఎన్నికల్లో భాగంగా చంద్రగిరిలో మే 19న పోలింగ్ నిర్వహించనున్నారు. కొత్త కండ్రిగ (బూత్ నెం.316), వెంకట్రామపురం (బూత్ నెం.313), కమ్మపల్లి (బూత్ నెం.318), కమ్మపల్లి (బూత్ నెం.321), పులివర్తిపల్లి (బూత్ నెం.104)లో పోలింగ్ జరగనుంది. ఉదయం 7 గంటల నుంచి సాయంత్రం 6 గంటలకు వరకు పోలింగ్ నిర్వహిస్తారు.

రాష్ట్రంలో ఎన్నికల ఓట్ల లెక్కింపు ప్రక్రియ పరిశీలనకు 200 మంది కేంద్ర పరిశీలకులు వస్తారని ద్వివేది తెలిపారు. ప్రతి అసెంబ్లీ, పార్లమెంట్‌ నియోజకవర్గానికి ఒక పరిశీలకుడి చొప్పున నియమించినట్టు వెల్లడించారు. దేశంలో అత్యంత సున్నితమైన ఎన్నికల రాష్ట్రం ఏపీ అని, ఒడిశాలో ప్రతి రెండు నియోజకవర్గాలకు ఒక పరిశీలకుడు ఉంటారని ద్వివేది వివరించారు. దేశంలో ప్రతి పార్లమెంట్‌ స్థానానికి ఒక పరిశీలకుడుని కేంద్ర ఎన్నికల సంఘం నియమించిందన్నారు. చంద్రగిరిలో రీపోలింగ్‌ నేపథ్యంలో ఒక్కో పోలింగ్‌ కేంద్రానికి 250 మంది పోలీసులతో భద్రత ఏర్పాటు చేస్తామని ద్వివేది వెల్లడించారు.

చిత్తూరు జిల్లాలోనే అది అత్యంత సున్నితమైన నియోజకవర్గం.. రాష్ట్రంలో రీపోలింగ్‌ పూర్తయినా 5 బూత్‌లలో మళ్లీ పోలింగ్‌ నిర్వహించాలని కేంద్ర ఎన్నికల సంఘం నిర్దేశించిన ప్రాంతం... అదే చంద్రగిరి నియోజకవర్గం. ఇక్కడ వైకాపా అభ్యర్థి చెవిరెడ్డి భాస్కరరెడ్డి తన అనుచరుల కోసం ఓ యాత్ర చేపట్టారు. తన నియోజకవర్గ కేంద్రం చంద్రగిరి నుంచి షిర్డీకి ప్రత్యేక రైలును బుక్‌ చేయించారు. అందులో మందు, విందులాంటి సకల సౌకర్యాలూ కల్పించారు. దీంతో ఆ రైలులో ఆయన అనుచరులు చేసిన హంగామా, విచ్చలవిడిగా మద్యం సేవించి, పేకాట ఆడుతూ చేసిన హడావుడి అంతా ఇంతా కాదు. 23 బోగీలతో ఉన్న ప్రత్యేక రైలు గురువారం ఉదయం 10.30కు తిరుపతి, రేణిగుంట మీదుగా షిర్డీకి బయలుదేరింది.

చెవిరెడ్డి ఆ రైలులో సకల సౌకర్యాలు కల్పించారు. దిగగానే వసతికి అన్నీ ఏర్పాట్లు చేశారు. మద్యం, ఇతర సదుపాయాలన్నీ రైలులోనే అందేలా చర్యలు తీసుకున్నారు. దీనికోసం ఓ ప్రత్యేక బోగీ ఏర్పాటు చేశారు. రైలు ఎక్కిన దగ్గర్నుంచి, మళ్లీ తిరిగి వచ్చే వరకు ఖర్చులన్నీ చెవిరెడ్డివే. చంద్రగిరి రైల్వేస్టేషన్లో రైలు ఎక్కిన వారికి గురువారం ఉదయం స్టేషన్‌ బయటే అల్పాహారం, నీరు ఏర్పాట్లు చేశారు. అక్కడి నుంచి బయలుదేరిన రైలు రేణిగుంటలో సుమారు అరగంటసేపు ఆగింది. వైకాపా నాయకులు, కార్యకర్తలు పరుగున స్టేషన్‌ బయటకు వెళ్లి మద్యం తెచ్చుకున్నారు. ఒకేసారి పదుల సంఖ్యలో కార్యకర్తలు స్టేషన్‌ బయటకు, లోపలికి పరుగులు పెట్టడంతో చుట్టుపక్కలవారు ఆందోళన చెందారు.

కొందరు రైలులో, మరికొందరు ప్లాట్‌ఫాంపైనే విచ్చలవిడిగా తాగడంతో ఇతర ప్రయాణికులు నివ్వెరపోయారు. జీఆర్పీ పోలీసులు సైతం వారిని కనీసం వారించే ప్రయత్నం చేయలేదు. పేకాట కూడా జోరుగా సాగింది. ప్రతి బోగీలోనూ ఇందుకోసం ప్రత్యేక ఏర్పాట్లు సాగాయి. బెట్టింగులు కూడా భారీ ఎత్తున సాగాయి. అందరితో పాటు చెవిరెడ్డి భాస్కరరెడ్డి సైతం షిర్డీకి వెళ్లాల్సి ఉంది. చివరి నిమిషంలో విరమించుకున్నారు. తిరుపతి అర్బన్‌, రూరల్‌, చంద్రగిరి, పాకాల, రామచంద్రాపురం, చిన్నగొట్టిగల్లు, యర్రావారిపాలెం మండలాల్లో సర్పంచిలు, ఎంపీటీసీ, జడ్పీటీసీలు, బూత్‌ కన్వీనర్‌, మండల కన్వీనర్లు యాత్రలో పాల్గొన్నారు.

చిత్తూరు జిల్లా చంద్రగిరి అసెంబ్లీ నియోజకవర్గంలో ఐదు పోలింగ్ కేంద్రాల పరిధిలో రీపోలింగ్ కు ఈసీ ప్రకటన చేయడం తెలిసిందే. ఈ ఐదు ప్రాంతాలు టీడీపీకి గట్టి పట్టున్న ప్రాంతాలు కావడంతో అక్కడ వైసీపీ నేతల ప్రవేశానికి స్థానికులు అభ్యంతరం వ్యక్తం చేస్తున్నారు. వైసీపీ ఎమ్మెల్యే చెవిరెడ్డి భాస్కరరెడ్డి రీపోలింగ్ జరిగే వెంకటరామాపురం గ్రామానికి వెళ్లి ప్రచారం చేసేందుకు ప్రయత్నించడంతో అక్కడ తీవ్ర ఉద్రిక్త పరిస్థితులు నెలకొన్నాయి. ఇంటింటికీ తిరిగి ప్రచారం చేసేందుకు ప్రయత్నించిన చెవిరెడ్డిని ఎక్కడికక్కడ అడ్డుకున్నారు. ఊళ్లోకి అడుగుపెట్టేందుకు వీల్లేదని గ్రామస్థులు తెగేసి చెప్పడంతో చెవిరెడ్డి ఎంతో అవమానంగా ఫీలవడమే కాదు, తీవ్ర ఆగ్రహంతో రగిలిపోయారు.

తిరుపతికి వస్తారుగా, అక్కడ చూసుకుంటా మీ సంగతి అంటూ తీవ్ర స్వరంతో హెచ్చరించారు. ఓ దశలో మహిళలు సైతం చెవిరెడ్డి ప్రచారానికి అడ్డుతగిలారు. పోలీసులు భారీ సంఖ్యలో మోహరించడంతో చెవిరెడ్డిపై భౌతికదాడులు జరగలేదు. గతరాత్రి, ఈ ఉదయం ఎన్ఆర్ కమ్మపల్లెలోనూ చెవిరెడ్డికి ఇదే తరహా చేదు అనుభవాలు ఎదురయ్యాయి. ప్రశాంతంగా పోలింగ్ జరిగిన తమ గ్రామాల్లో రీపోలింగ్ ఎందుకు నిర్వహిస్తున్నారంటూ సదరు గ్రామాల ప్రజలు నిలదీస్తున్నారు. చెవిరెడ్డి ఫిర్యాదు మేరకే ఈసీ రీపోలింగ్ కు ప్రకటన చేసిందన్న వార్తల నేపథ్యంలో వారు ఆయనపై కారాలుమిరియాలు నూరుతున్నారు.

ఇక, రామచంద్ర పురం మండలం ఎన్ ఆర్ కమ్మపల్లిలో ఉద్రిక్తత పరిస్తితి తలెత్తింది. గ్రామంలోకి వెళ్ళిన వైసీపీ అభ్యర్థి చెవిరెడ్డి భాస్కర్ రెడ్డి కుమారుడు మోహిత్ రెడ్డిని గ్రామస్తులు అడ్డుకున్నారు. తమ గ్రామంలోకి రానీయబోమంటూ.. చీపుర్లు, చాటలు పట్టుకుని చెవిరెడ్డి కుమారునిపై గ్రామ మహిళలు దాడికి ప్రయత్నించారు. దీంతో కమ్మపల్లి గ్రామంలోకి వెళ్లకుండా అక్కడే బైఠాయించారు భాస్కర్ రెడ్డి కుమారుడు మోహిత్ రెడ్డి. వైసీపీ నాయకులతో కలసి రోడ్డుపైనే బైఠాయించారు. గ్రామంలో ఉద్రిక్త పరిస్థితి గురించి తెలుసుకున్న వెంటనే టీడీపీ ఎమ్మెల్యే అభ్యర్థి పులివర్తి నాని వెంటనే కమ్మపల్లికి చేరుకున్నారు. అసలే, రెండు పార్టీల మధ్య పచ్చగడ్డి వేస్తే భగ్గుమంటున్న తరుణంలో ఇలాంటి ఘటన జరగడంతో పోలీసులు కూడా అలర్ట్ అయ్యారు. ఎస్పీ అన్బురాజన్ అక్కడకు చేరుకుని పరిస్థితి చక్కదిద్దారు.