news

ఏపీలో మరో 5 కేంద్రాల్లో రీపోలింగ్‌కు కేంద్ర ఎన్నికల సంఘం ఆదేశించింది. ఈ నెల 19న(ఆదివారం) చిత్తూరు జిల్లాలోని చంద్రగిరి నియోజకవర్గం పరిధిలోని 5 పోలింగ్‌ కేంద్రాల్లో అసెంబ్లీ, చిత్తూరు పార్లమెంటు నియోజకవర్గానికి సంబంధించి రీపోలింగ్‌ చేపట్టాలని రాష్ట్ర ఎన్నికల సంఘానికి ఆదేశాలు జారీ చేసింది. ఈ మేరకు సీఈవో గోపాలకృష్ణ ద్వివేది బుధవారం ఒక ప్రకటనలో తెలిపారు. అయితే, చంద్రగిరిలో రీపోలింగ్‌పై సీఎం చంద్రబాబు అసంతృప్తి వ్యక్తం చేశారు. టీడీపీ అడిగిన బూత్‌లను పరిగణనలోకి తీసుకోకపోవడంపై ఆయన అసహనం వ్యక్తం చేశారు. వైసీపీ అడిగిన 7 బూత్‌లలో 5 బూత్‌లకు ఎన్నికలు జరపడం సరికాదన్నారు. టీడీపీ అడిగిన స్థానాల్లోనూ రీపోలింగ్‌ జరపాలని తెలిపారు. ఈసీ పక్షపాత ధోరణి మరోసారి రుజువైందన్నారు. రీపోలింగ్‌పై గురువారం ఎన్నికల కమిషన్‌కు లేఖ రాస్తామని చంద్రబాబు చెప్పారు.

రాష్ట్ర వ్యాప్తంగా సార్వత్రిక ఎన్నికల సందర్భంగా 49 కేంద్రాల్లో అక్రమాలు జరిగితే ఎన్నికల సంఘం పక్షపాత వైఖరితో ఇష్టారాజ్యంగా వ్యవహరించటం సమంజసంకాదని ఏపీ టీడీపీ అధ్యక్షుడు, మంత్రి కిమిడి కళావెంకట్రావ్ నిరసన వ్యక్తం చేశారు. బుధవారం సచివాలయంలోని ఎన్నికల సంఘం కార్యాలయంలో రాష్ట్ర అదనపు ఎన్నికల ప్రధానాధికారి సుజాతశర్మను కలిసి ఈ 49 కేంద్రాల్లోనూ రీపోలింగ్ నిర్వహించాలని డిమాండ్ చేశారు. చంద్రగిరి నియోజకవర్గం పరిధిలో ఐదు కేంద్రాల్లో రీపోలింగ్‌కు ఈసీ ఆదేశించిందంటూ, నియోజకవర్గంలోని 166,310 పోలింగ్ కేంద్రాల్లో అవకతవకలు జరిగాయని టీడీపీ చేసిన ఫిర్యాదుపై ఎందుకు స్పందించలేదని ప్రశ్నించారు. పోలింగ్ రోజునే టీడీపీ అభ్యర్థి నానీ.. ఈసీకి పరిస్థితిని వివరించారని గుర్తుచేశారు.

పోలింగ్ ముగిసిన 24 రోజుల తరువాత వైసీపీ అభ్యర్థి కొన్ని బూత్‌లపై ఫిర్యాదు చేస్తే సీఈఒ విచారణకు ఆదేశించటం మంచి సాంప్రదాయం కాదన్నారు. రాష్ట్రంలో ఈనెల 6వ తేదీన ఒకవిడత రీపోలింగ్ నిర్వహించారని ఇప్పుడు కొత్తగా విచారణ జరిపి మరోసారి రీపోలింగ్‌కు అనుమతి ఎలా ఇస్తారని ప్రశ్నించారు. ఎన్నికల సంఘం అధికారులు పారదర్శకంగా వ్యవహరించటం లేదని ఆక్షేపించారు. ఎన్నికల సంఘం ఏకపక్షంగా వ్యవహరించటం ప్రజాస్వామ్య మనుగడకే ప్రమాదమన్నారు. చంద్రగిరిలో రీపోలింగ్‌కు నిర్ణయించటంతో ఎన్నికల అధికారుల పనితీరును శంకించాల్సి వస్తోందన్నారు. అక్రమాలు జరిగిన అన్ని కేంద్రాల్లో విచారణ జరిపి రీపోలింగ్ జరపాలని విజ్ఞప్తి చేశారు. దీనిపై సుజాత శర్మ స్పందిస్తూ రాష్ట్ర ఎన్నికల ప్రధాన అధికారి గోపాలకృష్ణ ద్వివేది ప్రస్తుతం సెలవులో ఉన్నారని ఆయన విధులకు హాజరైన అనంతరం పరిస్థితిని వివరిస్తామన్నారు. టీడీపీ డిమాండ్ చేస్తున్న కేంద్రాల్లో కూడా రీపోలింగ్ జరపాలని కళా వెంకట్రావ్ సుజాతశర్మకు వినతిపత్రం సమర్పించారు.

కేసీఆర్‌, స్టాలిన్‌ మధ్య ఏపీ అసెంబ్లీ ఎన్నికల ప్రస్తావన కూడా వచ్చింది. ‘‘ఏపీలో మీరు అనుకొంటున్నట్లు చంద్రబాబు గెలవడం లేదు. జగన్‌ గెలుస్తున్నారు. ఆయనకు ఎంపీ సీట్లు 18 నుంచి 21 వరకూ వస్తాయి’’ అని కేసీఆర్‌ చెప్పారు. ‘అది మీ అభిప్రాయం కావచ్చు’ అని స్టాలిన్‌ వ్యాఖ్యానించారు. ఈ విషయాలన్నీ మంగళవారం చంద్రబాబుకు దొరై మురుగన్‌ వివరించారు. తమిళనాడులో రాజకీయ పరిస్థితిని, ఇటీవల జరిగిన ఎన్నికల సరళిని చంద్రబాబు ఆయనను అడిగి తెలుసుకొన్నారు. దేశవ్యాప్తంగా వివిధ రాష్ట్రాల్లో ఫలితాల సరళి ఎలా ఉందో తన అంచనాలను ఆయనకు వివరించారు. వివిధ పార్టీల అధినేతల ఆలోచనలు ఎలా ఉన్నాయో కూడా చంద్రబాబు ఆయనకు చెప్పినట్లు సమాచారం.

‘‘23వ తేదీ ఫలితాల వెల్లడి తర్వాత అందరం అప్రమత్తంగా ఉండాలి. ఎంపీలకు ఎర వేయడానికి... పార్టీల్లో చీలికలు తేవడానికి కూడా ప్రయత్నాలు జరుగుతాయి. అన్నీ చూసుకోండి. బీజేపీ వచ్చే అవకాశం లేదని తెలిస్తే మెజారిటీ పార్టీలు మన వైపు తిరుగుతాయి. రకరకాల ప్రతిపాదనల పేరుతో వాటిని చీల్చడానికి ప్రయత్నాలు జరుగుతాయి. కొత్త కొత్త ఫ్రంట్లను తెరపైకి తెస్తారు. తాను నేరుగా అధికారంలోకి రాకపోయినా తన ప్రభావం ఉండే ప్రభుత్వం ఏర్పడాలని అయినా బీజేపీ ప్రయత్నిస్తుంది. ఇవన్నీ చూసుకోవాలి. మనం టచ్‌లో ఉందాం’’ అని ఆయనతో చంద్రబాబు చెప్పారు. ఈ భేటీ తర్వాత దొరై మురుగన్‌ తన సతీమణితో కలిసి విజయవాడలో కనకదుర్గ దేవాలయాన్ని సందర్శించి అనంతరం చెన్నై వెళ్లిపోయారు.

ఏదేమైనా జాతీయ రాజకీయాల్లో తెలుగు రాష్ట్రాల ముఖ్యమంత్రుల గురించి ఆసక్తికర చర్చ జరుగుతోంది. జాతీయ స్థాయిలో చంద్రబాబు గతంలో చేసిన ప్రయత్నాలు సఫలం అయిన సందర్భాలున్నాయి. కేసీఆర్ తొలిసారిగా జాతీయ రాజకీయాల్లో కీలక పాత్ర పోషించాలని ఉవ్విళ్లూరుతున్నారు. 16కు 16 స్థానాలు గెలుచుకుంటే కేంద్రంలో తాము చెప్పిన వ్యక్తే ప్రధాని అవుతారనే ప్రచారాన్ని టీఆర్‌ఎస్ జోరుగా చేస్తోంది. బీజేపీ వ్యతిరేక కూటమి అధికారంలోకి రావడం ఖాయమని చంద్రబాబు విశ్వసిస్తున్నారు. ఆ కూటమిలో తమ పార్టీ కీలక పాత్ర పోషించే అవకాశం ఉందని చంద్రబాబు భావిస్తున్నారు. ఇక కేంద్రంలో తిరిగి అధికారంలోకి రావడానికి ఎన్డీయే గడ్డు పరిస్థితులు ఎదుర్కోవాల్సి వస్తే వైసీపీ అధినేత జగన్ బీజేపీకి మద్దతుగా నిలిచే అవకాశం ఉందనే ప్రచారం జరుగుతోంది. వైసీపీతో పాటు తమిళనాడులో అన్నాడీఎంకే కూడా బీజేపీకి మద్దతుగా నిలిచే అవకాశాలు లేకపోలేదు.

ఆంధ్రప్రదేశ్‌లోని ఐదు పోలింగ్‌ కేంద్రాల్లో రీపోలింగ్‌కు కేంద్ర ఎన్నికల సంఘం ఆదేశాలు జారీచేసింది. చిత్తూరు జిల్లా చంద్రగిరి నియోజకవర్గం పరిధిలోని ఐదు పోలింగ్‌ కేంద్రాల్లో రీపోలింగ్‌ నిర్వహించాలని నిర్ణయించింది. రాష్ట్ర ఎన్నికల సంఘం రాసిన లేఖపై స్పందించిన ఈసీఐ ఈ నెల 19న ఉదయం 7గంటల నుంచి సాయంత్రం 6గంటల వరకు ఆయా బూత్‌ల పరిధిలో అసెంబ్లీ, లోక్‌సభ ఎన్నికల పోలింగ్‌ జరపాలని ఆదేశాలు జారీ చేసింది. ఈ నెల 10, 11 తేదీల్లో చంద్రగిరి నియోజవకర్గంలోని కొన్ని పోలింగ్‌ కేంద్రాల్లో రీపోలింగ్‌ జరపాలని రాష్ట్ర ఎన్నికల సంఘం నుంచి కేంద్ర ఎన్నికల సంఘానికి విజ్ఞాపనలు అందాయి. జిల్లాలోని ఎన్నికల అధికారులతో మాట్లాడిన రాష్ట్ర ఎన్నికల సంఘం రీపోలింగ్‌కు అనుమతివ్వాలని ఈసీఐకి నివేదించింది.

దీన్ని పరిగణనలోకి తీసుకున్న కేంద్ర ఎన్నికల సంఘం చంద్రగిరి నియోజకవర్గం పరిధిలోని ఎన్‌.ఆర్‌ కమ్మపల్లె, కమ్మపల్లె, పులివర్తిపల్లె, కొత్తకండ్రిగ, వెంకట్రామపురంలో రీపోలింగ్‌కు అనుమతులు జారీచేసింది. రీపోలింగ్‌ను సజావుగా నిర్వహించేలా ఏర్పాట్లు చేయాలని ఆదేశించింది. చంద్రగిరి సిట్టింగ్‌ ఎమ్మెల్యే, వైకాపా నేత చెవిరెడ్డి భాస్కర్‌ రెడ్డి రాష్ట్ర ఎన్నికల సంఘాన్ని ఇటీవల కలిసి.. తన నియోజకవర్గంలో ఒక వర్గానికి సంబంధించిన వారి ఓట్లు వేయనీయకుండా చేశారంటూ ఫిర్యాదు చేశారు. దీంతో పాటు మరికొన్ని ఫిర్యాదులు రావడంతో అక్కడి పరిస్థితులపై నివేదిక తెప్పించుకున్న రాష్ట్ర ఎన్నికల ప్రధాన అధికారి ద్వివేది ఈసీఐకి లేఖ రాశారు. దీన్ని పరిశీలించిన ఈసీఐ ఐదు పోలింగ్‌ కేంద్రాల్లో రీపోలింగ్‌కు అనుమతిచ్చింది.

కొత్త కండ్రిగ (బూత్ నెం.316), వెంకట్రామపురం (బూత్ నెం.313), కమ్మపల్లి (బూత్ నెం.318), కమ్మపల్లి (బూత్ నెం.321), పులివర్తిపల్లి (బూత్ నెం.104)లో పోలింగ్ జరగనుంది. ఉదయం 7 గంటల నుంచి సాయంత్రం 6 గంటలకు వరకు పోలింగ్ నిర్వహిస్తారు. రీపోలింగ్‌కు అన్ని ఏర్పాట్లు చేయాలని ఎన్నికల అధికారులకు ఆదేశాలు జారీచేసింది ఈసీ. ఇప్పటికే ఈనెల 6న రాష్ట్రంలో ఐదు స్థానాల్లో రీపోలింగ్ నిర్వహించారు. అయితే చంద్రగిరి స్థానంలో రీపోలింగ్ నిర్వహించాలంటూ ఈసీకి టీడీపీ, వైసీపీ పరస్పర ఫిర్యాదులు చేశారు. ఇవాళ కూడా టీడీపీ రాష్ట్ర అధ్యక్షుడు కళా వెంకట్రావు.. అడిషనల్ సీఈవోను కలిసి రీపోలింగ్ జరిపించాలంటూ డిమాండ్ చేశారు. ఈ నేపథ్యంలో మరోసారి రాష్ట్రంలో రీపోలింగ్ నిర్వహించాలని ఈసీ నిర్ణయం తీసుకుంది. ఈ నెల 19న ఉదయం 7గంటలకు పోలింగ్ ప్రారంభం కానుంది.