news

టీడీపీ అధినేత చంద్రబాబు ఈ రోజు హైదరాబాద్ పర్యటనకు వెళ్లారు. రామోజీ ఫిల్మ్ సిటీలో జరిగే ఓ ప్రైవేట్ కార్యక్రమానికి చంద్రబాబు హాజరయ్యేందుకు వెళ్లారు. చంద్రబాబునాయుడు, నేరుగా రామోజీ ఫిల్మ్ సిటీకి చేరుకుని, ఈనాడు గ్రూప్ సంస్థల అధినేత రామోజీరావుతో ఏకాంతంగా సమావేశం అయ్యారు. ఫిల్మ్ సిటీలోనే జరిగే ఓ ప్రైవేటు కార్యక్రమంలో పాల్గొనేందుకు వచ్చిన ఆయన రామోజీరావును కలిశారు. వీరిద్దరి మధ్యా చర్చల సారాంశం బయటకు వెల్లడికానప్పటికీ, రాష్ట్రంలో తాజా రాజకీయ పరిస్థితులు, ఓట్ల లెక్కింపు తదితర అంశాలపై చర్చలు జరిగినట్టు సమాచారం. మధ్యాహ్నం తరువాత చంద్రబాబు తిరిగి అమరావతి బయలుదేరనున్నారు. ఇదే కార్యక్రమంలో తెలంగాణ సీఎం కేసీఆర్ కూడా పాల్గుంటారనే సమాచారం ఉన్నా, ఇప్పటికీ క్లారిటీ రాలేదు.

ఎన్నికల ఫలితాల వెల్లడి తేదీ సమీపిస్తున్న కొద్దీ దేశ రాజకీయాల్లో చిత్రవిచిత్ర పరిణామాలు చోటుచేసుకుంటున్నాయి. 2014 ఎన్నికల్లో వచ్చిన విధంగా బీజేపీకి స్వతహాగా, ఏ పార్టీ అవసరం లేకుండా కేంద్రంలో ప్రభుత్వాన్ని ఏర్పాటు చేసేటన్ని సీట్లు రావని కాంగ్రెస్, బీజేపీ మిత్ర పక్షాలు అంచనా వేస్తున్నాయి. ఎన్డీయే ఈసారి అధికారం చేజిక్కించుకోవాలంటే మిత్రపక్షాల మద్దతు తప్పనిసరి కావచ్చనే ప్రచారం జోరుగా సాగుతోంది. ఇదిలా ఉంటే.. కాంగ్రెస్ పార్టీ కూడా తమతో కలిసొచ్చే పార్టీల మద్దతు కూడగట్టే పనిలో బిజీగా ఉంది. ఏపీలో టీడీపీ కూడా యూపీఏ ఫ్రంట్‌కు మద్దతుగా నిలవాలని నిర్ణయించుకుంది.

ఇక టీఆర్‌ఎస్ అధినేత కేసీఆర్ థర్డ్ ఫ్రంట్‌తో కలిసొచ్చే పార్టీలను కలుపుకుపోయేందుకు ముమ్మర ప్రయత్నాలు చేస్తున్నారు. అయితే.. ఈ ప్రయత్నాల్లో ఉన్న కేసీఆర్‌కు స్టాలిన్ ఆదిలోనే షాకిచ్చారు. కేసీఆర్ తనతో కేవలం మర్యాదపూర్వకంగానే భేటీ అయ్యారని, థర్డ్ ఫ్రంట్ గురించి ఎలాంటి చర్చ జరగలేదని.. తమ మద్దతు యూపీఏకే ఉంటుందని స్టాలిన్ స్పష్టం చేశారు. దీంతో కేసీఆర్‌ ఫ్రంట్ ప్రయత్నాలకు స్టాలిన్ ఆదిలోనే షాకిచ్చినట్టయింది. స్టాలిన్ తన ప్రతినిధిని అమరావతికి పంపి.. కేసీఆర్‌తో జరిగిన భేటీ గురించి చంద్రబాబుకు వివరణ ఇవ్వడంతో ఈ ఎపిసోడ్‌కు తెరపడింది. ఇప్పుడు చంద్రబాబు రామోజీతో భేటీ కావటం, రాజకీయ వర్గాల్లో చర్చనీయంసం అయ్యింది.

తెలుగు రాష్ట్రాల్లో ఎన్నికల ఫలితాలకు సంబంధించిన సర్వేలంటే అందరి కంటే ముందు గుర్తొచ్చేది మాజీ ఎంపీ లగడపాటి రాజగోపాల్ అని ప్రత్యేకంగా చెప్పనక్కర్లేదు. గతంలో లగడపాటి సర్వేలకు విశేష ఆదరణ ఉండేది. బెట్టింగ్ రాయుళ్లు లగడపాటి సర్వేను ఆధారంగా చేసుకుని వందల కోట్లు బెట్టింగ్ పెట్టేవారు. ఎన్నికల ఫలితాల కాలజ్ఞానిగా లగడపాటిని చాలామంది విశ్వసించేవారు. అయితే.. తెలంగాణ అసెంబ్లీ ఎన్నికల ఫలితాల విషయంలో లగడపాటి అంచనాలు బొక్కబోర్లాపడటంతో ఆయన సర్వే పట్ల విశ్వసనీయత తగ్గింది. అయినప్పటికీ.. ఏపీ ఎన్నికల ఫలితాలపై లగడపాటి సర్వే ఏం చెప్పబోతోందన్న ఆసక్తి రాజకీయ వర్గాలతో పాటు, ఇటు సామాన్య జనంలోనూ నెలకొంది.

అయితే.. ఫలితాలు వెల్లడించే రోజు సమీపిస్తున్న కొద్దీ పోటీ చేసిన అభ్యర్థులతో పాటు ఓటేసిన ప్రజల్లో కూడా టెన్షన్ వాతావరణం కనిపిస్తోంది. మరో 9 రోజుల్లో ఏపీ ఎన్నికల ఫలితాలు వెలువడనున్న నేపథ్యంలో ఎన్‌ఆర్‌ఐలు కూడా ఫలితాలపై అత్యంత ఆసక్తి కనబరుస్తుండటం విశేషం. ఊర్లలో ఉన్న తమవారికి ఫోన్ చేసి ఎప్పటికప్పుడు పరిస్థితులను తెలుసుకుంటున్నారు. అయితే.. ప్రస్తుతం అమెరికా పర్యటనలో ఉన్న లగడపాటికి సరికొత్త అనుభవం ఎదురైందట. గతంలో పలుమార్లు అమెరికా వెళ్లినప్పటికీ ఇప్పుడు దక్కినంత ఘన స్వాగతం లగడపాటికి ఎన్నడూ దక్కలేదట. ఈ వింత అనుభవం చూసి, లగడపాటికి కూడా షాక్ అయ్యారు. లగడపాటికి ఆతిథ్యం ఇచ్చేందుకు తెలుగు ఎన్‌ఆర్ఐలు పోటీ పడుతున్నారట. అందుకు కారణమేంటో ప్రత్యేకంగా చెప్పనక్కర్లేదు. లగడపాటి సర్వేలో ఏపీ ఫలితం గురించి ఏం తేలిందనే విషయం తెలుసుకునేందుకు ఎన్‌ఆర్‌ఐలు తీవ్ర ఆసక్తి కనబరుస్తున్నారట.

లగడపాటిని కలిసిన తెలుగు ఎన్‌ఆర్ఐలు అడుగుతున్న తొలి ప్రశ్న.. ఏపీ ఎన్నికల ఫలితం ఎలా ఉండబోతుందనేనట. ఈ ప్రశ్నకు లగడపాటి సమాధానం చెప్పకపోయినప్పటికీ.. ఎన్‌ఆర్‌ఐలకు లీకులిస్తున్నారట. అభివృద్ధి, సంక్షేమంకు మద్దతుగానే ఏపీ ప్రజలు ఓటు వేశారని ఆయన సమాధానమిచ్చారట. కొన్ని చోట్ల టీడీపీ, మరికొన్ని చోట్ల వైసీపీ హవా సాగుతుందని చెప్పారట. జనసేనకు ఎవరూ ఊహించని విధంగా ఓట్లు పడతాయని లగడపాటి వ్యాఖ్యానించారట. ఎగ్జిట్‌పోల్స్ వెల్లడించే మే 19నే తన సర్వే ఫలితాలను కూడా వెల్లడిస్తానని లగడపాటి స్పష్టం చేసినట్లు తెలిసింది. ఎన్‌ఆర్‌ఐలు మూడు ప్రధాన వర్గాలుగా విడిపోయి మూడు ప్రధాన పార్టీలకు మద్దతుగా నిలిచారని, వారి పార్టీల ప్రభావం ఎలా ఉందనే విషయం తెలుసుకోవాలని ఆసక్తి కనబర్చారని లగడపాటి చెప్పారు.

ప్రముఖ సినీ దర్శకుడు రామ్‌గోపాల్‌వర్మ రూపొందించిన లక్ష్మీస్‌ ఎన్టీఆర్‌ సినిమా వివాదం కడప జిల్లా జాయింట్‌ కలెక్టర్‌ కోటేశ్వరరావుకు చుట్టుకుంది. ఆయనను ఎన్నికలకు సంబంధం లేని విధులకు బదిలీ చేయాలని కేంద్ర ఎన్నికల సంఘం ఆదేశించింది. ఎన్నికల వేళ దేశంలో పలువురు నేతల బయోగ్రఫీ చిత్రాలు రూపొందాయి. ఇందులో భాగంగా రాంగోపాల్‌ వర్మ లక్ష్మీస్‌ ఎన్టీఆర్‌ చిత్రాన్ని రూపొందించారు. వైసీపీకి లబ్ధి చేకూర్చేందుకు వర్మ చంద్రబాబుకు వ్యతిరేకంగా సినిమా రూపొందించారని టీడీపీ శ్రేణులు ఎన్నికల సంఘానికి ఫిర్యాదు చేశాయి. అలాగే మోదీ బయోగ్రఫీపై కాంగ్రెస్‌ పార్టీ కేంద్ర ఎన్నికల సంఘానికి ఫిర్యాదు చేసింది. ఎన్నికలు పూర్తయ్యేవరకు బయోగ్రఫీ చిత్రాలను విడుదల చేయకూడదని కేంద్ర ఎన్నికల సంఘం తెలిపింది. అయితే మే 1న లక్ష్మీస్‌ ఎన్టీఆర్‌ సినిమాను రాంగోపాల్‌వర్మ విడుదల చేశారు.

కడపలోని రహత్‌ థియేటర్‌, రైల్వేకోడూరులోని ఏఎస్‌ఆర్‌, పోరుమామిళ్లలోని వెంకటేశ్వర థియేటర్‌లలో లక్ష్మీస్‌ ఎన్టీఆర్‌ సినిమా విడుదలైంది. అక్కడ సినిమాను ప్రదర్శించారు. ఈ విషయం రాష్ట్ర ఎన్నికల అధికారి దృష్టికి వెళ్లింది. ఎన్నికల నియమావళి ప్రకారం లక్ష్మీ్‌స ఎన్టీఆర్‌ సినిమాను అడ్డుకోవడంలో జేసీ విఫలమయ్యారని ఆయనకు ఎన్నికలకు సంబంధంలేని పోస్టుకు బదిలీ చేయాలని రాష్ట్ర ఎన్నికల కమిషనర్‌ ద్వివేది కేంద్ర ఎన్నికల సంఘానికి నివేదించారు. ద్వివేది సిఫారసును కేంద్ర ఎన్నికల సంఘం ఆమోదించడంతో జాయింట్‌ కలెక్టర్‌ను ఎన్నికలకు సంబంధం లేని బాధ్యతను అప్పజెప్పనున్నారు. కేంద్ర ఎన్నికల సంఘం ఆదేశాల మేరకు ఈనెల 19వ తేదీ వరకు లక్ష్మీస్‌ ఎన్టీఆర్‌ సినిమా రాష్ట్రంలో విడుదల చేయకూడదని ఎన్నికల ప్రధాన అధికారి గోపాలకృష్ణ ద్వివేది వెల్లడించారు.