news

టాలీవుడ్‌లో కలకలం రేపిన డ్రగ్స్‌ కేసు మరోసారి తెరపైకి వచ్చింది. రెండేళ్ల క్రితం హైదరాబాద్‌లో ఈ కేసు సంచలనం సృష్టించిన విషయం తెలిసిందే. సినీనటులతో పాటు పాఠశాల విద్యార్థులు కూడా డ్రగ్స్‌ బారిన పడుతున్నారని ఎక్సైజ్‌ అధికారుల దర్యాప్తులో తేలడంతో నగరవాసులు ఒక్కసారిగా ఉలిక్కిపడ్డారు. దీనిపై అప్పట్లో ఎక్సైజ్‌ శాఖ సిట్‌ అధికారులు లోతైన దర్యాప్తు చేపట్టారు. పలువురు సినీ ప్రముఖులను విచారించారు. కానీ, ఆ తర్వాత ఈ కేసు మరుగున పడింది. దీంతో ఫోరం ఫర్‌ గుడ్‌ గవర్నెన్స్‌ వ్యవస్థాపకులు పద్మనాభరెడ్డి సమాచార హక్కు చట్టం ద్వారా ఈ కేసు వివరాలను సేకరించారు. ఆయనకు అందిన సమాచారం ప్రకారం..

డ్రగ్స్‌ కేసులో ఇప్పటి వరకు నాలుగు ఛార్జిషీట్ల దాఖలు చేసినట్లు ఎక్సైజ్‌ అధికారులు వెల్లడించారు. మొత్తం 12 కేసులు నమోదు చేశామని, సినీనటులు, దర్శకులు సహా 62 మందిని విచారించినట్లు తెలిపారు. పలువురు సినీ హీరోలు, హీరోయిన్స్, దర్శకులు, నటులతో పాటు పలువురు ప్రముఖుల నుండి గోర్లు, వెంట్రుకల నమూనాలను సేకరించిన సిట్ అధికారులు వారి పేర్లను మాత్రం ఛార్జిషీట్‌లో చేర్చలేదని అధికారులు వెల్లడించిన సమాచారం ద్వారా తెలుస్తోంది. 12 కేసులను నమోదు చేసిన సిట్‌ అధికారులు సెలబ్రిటీలకు మాత్రం క్లీన్‌ చిట్‌ ఇచ్చినట్లు వెల్లడైంది. అధికారులు దాఖలు చేసిన నాలుగు ఛార్జిషీట్లలో ఒకటి దక్షిణాఫ్రికా పౌరుడు రఫెల్‌ అలెక్స్‌ విక్టర్‌పై ఉంది. ముంబయి నుంచి హైదరాబాద్‌కు కొకైన్‌ తరలిస్తున్నాడని అలెక్స్‌ విక్టర్‌ను ఆగస్టు 2017లో అరెస్టు చేశారు.

మొత్తానికి చూస్తే.. ఈ డ్రగ్స్ కేసు వ్యవహారాన్ని సిట్ తూతూ మంత్రంగానే చార్జిషీట్ల వేసిందని విమర్శలు వెల్లువెత్తుతున్నాయి. టాలీవుడ్ డ్రగ్స్ వ్యవహారంలో మొత్తం 12 కేసులను నమోదు చేసింది. అయితే దాఖలైన చార్జిషీట్లలో సినీ సెలబ్రెటీలకు క్లీన్ చిట్ ఇచ్చింది. సిట్ అధికారులు చార్జిషీట్లు దాఖలు చేసిన నాల్గింటిలో ఒకటి సౌత్ ఆఫ్రికా పౌరుడు రఫెల్ అలెక్స్ విక్టర్‌పై ఉంది. ముంబై నుంచి హైదరాబాద్‌కు కొకైన్‌ను తరలించి విక్రయిస్తున్నాడని 2017 ఆగస్టులో అరెస్ట్ చేశారు. క్లీన్‌చిట్ ఇచ్చిన వారిలో ప్రముఖులు వీరే.. డైరెక్టర్ పూరీ జగన్నాథ్, శ్యామ్ కే. నాయుడు, నటుడు సుబ్బరాజు, హీరో తరుణ్, హీరో నవదీప్, నవపాద ధర్మారావ్(చిన్నా), నటి ఛార్మీ కౌర్, నటి ముమైత్ ఖాన్, హీరో రవితేజ, శ్రీనివాస్ (రవితేజ కారు డ్రైవర్), యంగ్ హీరో తనీష్, హీరో నందుతో పాటు పలువురు ప్రముఖులకు సిట్ క్లీన్ చిట్ ఇచ్చింది.

సీరియస్‌గా జరుగుతున్న మంత్రివర్గ సమావేశంలో ఒక్కసారిగా నవ్వులు పూసాయి. మంత్రి ఆదినారాయణ రెడ్డి చేసిన సరదా వ్యాఖ్యలకు అంతా ఒక్కసారిగా నవ్వేశారు. సమావేశం జరుగుతుండగా మధ్యలో కల్పించుకొని మాట్లాడిన ఆదినారాయణ రెడ్డి.. తితలీ, ఫణి తుపాన్ల గురించి ముందే చెప్పిన ఆర్టీజీఎస్ బాబు.. ఎన్నికల్లో ఓట్ల సునామీ గురించి ముందే చెప్పరా? అని సీఎంను ఉద్దేశించి అన్నారు. దీంతో కేబినెట్ సమావేశంలో మంత్రులంతా ఒక్కసారిగా నవ్వారు. మంత్రి వ్యాఖ్యకు స్పందించిన సీఎం చంద్రబాబు అంతే చమత్కారంగా బదులిచ్చారు. ఓట్ల సునామీ గురించి మీ చెవిలో చెబుతారులే అని సమాధానం ఇచ్చారు.

ముఖ్యమంత్రి చంద్రబాబు అధ్యక్షతన సుమారు రెండు గంటల పాటు కొనసాగిన ఈ భేటీలో కేంద్రం అనుమతించిన నాలుగు అంశాలపైనే ప్రధానంగా చర్చించారు. ఫొని తీవ్ర తుపానుతో ఉత్తరాంధ్రలో వాటిల్లిన నష్టం, రాష్ట్రంలో నీటి ఎద్దడి, కరవు పరిస్థితులు, ఉపాధి హామీ పనులకు సంబంధించిన అంశాలతో పాటు రాష్ట్రంలో నెలకొన్న అనేక అంశాలపై చర్చించారు. ఈ భేటీకి ముగ్గురు మంత్రులు మినహా మంత్రులంతా హాజరై పలు సూచనలు చేసినట్టు సమాచారం. తమ శాఖలకు సంబంధించిన అంశాలను ఇందులో ప్రస్తావించారు. రాష్ట్ర ప్రభుత్వ ప్రధాన కార్యదర్శి ఎల్వీ సుబ్రమణ్యం ఈ భేటీలో పాల్గొన్నారు. విపత్తు నిర్వహణ శాఖ, వ్యవసాయ శాఖ, పంచాయతీ రాజ్‌ శాఖ కార్యదర్శులు సైతం ఈ భేటీలో పాల్గొని తమ శాఖలకు సంబంధించిన అంశాలను ప్రస్తావించారు.

ఫొని తుపాను కారణంగా ప్రాథమిక అంచనాల ప్రకారం రూ.58 కోట్ల మేర నష్టం వాటిల్లిందని, తదుపరి అంచనాలపై సర్వే జరుగుతోందని సీఎం దృష్టికి తీసుకెళ్లారు. ముఖ్యంగా శ్రీకాకుళం, విజయనగరం, విశాఖ జిల్లాల్లో చాలా చోట్ల విద్యుత్‌ స్తంభాలు నేలకొరగడంతోపాటు పలు పంటలకు కూడా నష్టం వాటిల్లినట్టు అధికారులు సీఎం దృష్టికి తీసుకెళ్లినట్టు సమాచారం. తాగునీటి ఎద్దడిపై చర్చ సందర్భంగా రాయలసీమ జిల్లాల్లో ఈ ప్రభావం ఎక్కువగా ఉందని, ట్యాంకర్ల ద్వారా తాగునీటిని అందిస్తున్నామని, సాగునీరు అందక చాలా పంటలు ఎండిపోయాని విపత్తు, ఉద్యానవన, వ్యవసాయ శాఖ కార్యదర్శులు వివరించారు. ఉపాధి హామీ పథకం అమలులో ఉత్తమ రాష్ట్రంగా ఏపీ నిలిచింది. ఐదు విభాగాల్లో తొలిస్థానం, ఆరు విభాగాల్లో రెండో స్థానంలో నిలిచింది. ఈ నేపథ్యంలో సీఎం చంద్రబాబు ఉపాధిహామీ, పంచాయతీ రాజ్‌ శాఖ అధికారులను అభినందించారు.

ఏపీ ప్రభుత్వ మాజీ ప్రధాన కార్యదర్శి అనిల్‌ చంద్ర పునేఠాకు పోస్టింగ్‌ ఇస్తూ ఉత్తర్వులు జారీ అయ్యాయి. ఎన్నికలకు ముందు అనిల్‌చంద్ర పునేఠా స్థానంలో ఎల్వీ సుబ్రమణ్యంను ఏపీ సీఎస్‌గా నియమిస్తూ కేంద్ర ఎన్నికల సంఘం ఆదేశాలు జారీ చేసింది. పునేఠాను ఎన్నికల విధులతో సంబంధం లేని శాఖలో నియమించాలని ఈసీఐ సూచించింది. అప్పట్నుంచి ఆయన వెయిటింగ్‌లోనే ఉన్నారు. ఈ నెల 31న ఆయన పదవీ విరమణ చేయాల్సి ఉన్న నేపథ్యంలో ఏపీ మినరల్‌ డెవలప్‌మెంట్‌ కార్పొరేషన్‌ ఛైర్మన్‌గా పునేఠాకు పోస్టింగ్‌ ఇస్తూ తాజాగా ఈసీ నిర్ణయం తీసుకోవడంతో సీఎస్‌ ఎల్వీ సుబ్రమణ్యం ఆదేశాలు జారీ చేశారు. అయితే చీఫ్ సెక్రటరీ లాంటి ఉన్నత పదవి చేసిన పునేఠాకు, ఒక కార్పొరేషన్ స్థాయి పోస్టింగ్ ఇవ్వటం చూసి, ఈసీ తీరుని తప్పుబడుతున్నారు.

మార్చి నుండి రాష్ట్రంలో ఎన్నికల కోడ్‌ అమలులోకి వచ్చిన అనంతరం వరుసగా చోటుచేసుకున్న పరిణామాలతో, రాష్ట్రంలో అధికారులు టార్గెట్ అయ్యారు. కేంద్ర ఎన్నికల సంఘం కోడ్‌ను ఉల్లంఘించారని ఇద్దరు ఎస్పీలతోపాటు, ప్రభుత్వ నిఘావర్గాల అధిపతి ఏబీ వెంకటేశ్వరరావు, ప్రభుత్వ ప్రధాన కార్యదర్శిగా ఉన్న అనిల్‌చంద్ర పునేఠలపై వేటు వేసిన విషయం తెలిసిందే. ఆ వెంటనే కొత్త సీఎస్‌గా రాష్ట్ర క్రీడలు, యువజన సర్వీసులశాఖ ప్రత్యేక ప్రధాన కార్యదర్శి ఎల్వీ సుబ్రహ్మణ్యంను కొత్త సీఎస్‌గా నియమిస్తూ కేంద్ర ఎన్నికల సంఘం ఆదేశాలు జారీ చేసింది. దీంతో ఆయన ఏప్రిల్‌ 6వ తేదీన పదవీ బాధ్యతలు చేపట్టారు.

సీఎస్‌ బాధ్యతల నుండి తొలగించిన అనిల్‌చంద్ర పునేఠను ఎన్నికలకు సంబంధం లేని విధులు అప్పగించాలని కేంద్ర ఎన్నికల సంఘం తన ఆదేశాలలో స్పష్టంగా పేర్కొన్నప్పటికీ ఇంతవరకూ ఆయనకు ఎలాంటి పోస్టింగ్‌ ఇవ్వకపోవడంతో రాష్ట్ర ఐఏఎస్‌ అధికారుల్లో చర్చనీయాంశమైంది. ఎన్నికల కోడ్‌ అమలులో ఉన్న సమయంలో తన సర్వీసును, తన హోదాను కూడా లెక్కచేయకుండా ఐఏఎస్‌ అధికారిగా తన మూడుదశాబ్ధాల అనుభవాన్ని కూడా పరిగణలోకి తీసుకోకుండా ఆయన్ను పక్కన పెట్టిన తీవ్ర దుమారాన్ని లేపాయి. ఈనెల 31 పదవీ విరమణ చేసే సమయంలో ఇటువంటి అవమానకరమైన పరిస్థితిని ఎదుర్కొనడం చాలా ఇబ్బందిగా మారటంతో, ఆయనకు ఇప్పుడు ప్రాముఖ్యత లేని కార్పొరేషన్ చైర్మెన్ పదవి ఈసీ కట్టబెట్టింది.