news

రాష్ట్ర విభజనతో ఏపీకి నష్టం జరిగిందని ముఖ్యమంత్రి చంద్రబాబు ఆవేదన వ్యక్తం చేశారు. ఐదేళ్లలో ఏపీకి మోదీ ఏం చేయలేదని విమర్శించారు. ఆదివారం ఆయన మీడియాతో మాట్లాడుతూ నిన్న బీహార్‌లో మోదీ చేసిన వ్యాఖ్యలకు కౌంటర్ ఇచ్చారు. అన్ని రకాలుగా ఏపీని మోదీ ఇబ్బంది పెట్టారని ఆరోపించారు. హామీలు అమలు చేయాలని అడిగినందుకు దాడులు చేశారని మండిపడ్డారు. మోదీ పెద్దన్న పాత్ర పోషించి ఉంటే ఇప్పుడు ఈ పరిస్థితి ఉండేది కాదని అన్నారు. ఏపీకి ప్రత్యేక హోదా పదేళ్ళు కావాలని ఆనాడు బీజేపీనే అడిగిందని ఈ సందర్భంగా చంద్రబాబు గుర్తు చేశారు. తెలుగురాష్ట్రాల ప్రజలు మాట్లాడుకోలేని పరిస్థితి తెచ్చింది మోదీనే అని ఆయన అన్నారు.

తెలంగాణకు రాజధాని ఉందని, 60 ఏళ్ళ కష్టార్జితాన్ని వదులుకుని వచ్చామని చంద్రబాబు అన్నారు. డబ్బు, కులం చూసి ఓటేస్తే.. రాజకీయ నేతలు ఎందుకు పనిచేయాలని అన్నారు. తెలంగాణ కంటే ఎక్కువ అభివృద్ధి చేశామని చెప్పారు. వైసీపీ మైండ్‌గేమ్‌ ఆడుతోందని, ఎన్నికల్లో సైలెంట్‌ ఓటు తమకే అనుకూలమని అన్నారు. తాను ప్రవేశపెట్టిన సంక్షేమ పథకాలు టీడీపీ విజయానికి కీలకం కానున్నాయని చంద్రబాబు విశ్వాసం వ్యక్తం చేశారు. ఏపీపైనే ఎందుకు బీజేపీ కక్షసాధిస్తోందని చంద్రబాబు ప్రశ్నించారు. ఏ సమస్యనూ మోదీ పరిష్కరించలేదని.. ప్రశ్నిస్తే ఎదురుదాడి చేస్తున్నారని ఆయన ఆరోపించారు. మోదీవి చౌకబారు ప్రసంగాలు, కించపరిచే వ్యాఖ్యలని విమర్శించారు. విభజన చట్టంపై ప్రధాని, హోంమంత్రి ఒక్క సమావేశం అయినా ఏర్పాటు చేశారా? అని ప్రశ్నించారు. ఆంధ్రప్రదేశ్ విషయంలో బీజేపీ శాశ్వతంగా దోషిగా మిగిలిపోతుందని అన్నారు. ఎదుటివారిపై దాడులు చేయడం తప్ప మోదీ సాధించిందేమీ లేదని చంద్రబాబు ఎద్దేవా చేశారు.

"నిన్న బీహార్‌లో మోదీ వ్యాఖ్యలకున్న సందర్భం ఏంటి..? ఎందుకీ వ్యాఖ్యలు చేశారు అసందర్భంగా..? ఆ రోజు ఆంధ్రాకు జరిగిన అన్యాయాన్ని ఎందుకు చక్కదిద్దలేక పోయారు..? 5 ఏళ్లలో ఏపి విభజనపై ఒక్క మీటింగ్ కూడా ఎందుకని పెట్టలేదు..? సమస్యలు పరిష్కరించకుండా విద్వేషాలు రెచ్చగొట్టి తెలుగు రాష్ట్రాల ప్రజలు మాట్లాడుకునే పరిస్థితులు తీసుకొచ్చింది మీరు కాదా..? ఇది ప్రధాని నరేంద్రమోదీ వైఫల్యాలు కావా..? అప్పుడు వాజ్ పేయి బాగా చేస్తే, ఇప్పుడు మీరేం చేశారని అడుగుతున్నా..? కాకినాడ పెట్రోల్ కాంప్లెక్స్ ఎందుకివ్వలేదు..? తెలంగాణకు 450 కోట్లు ఇచ్చి, ఆంధ్రప్రదేశ్‌కు ఇచ్చిన రూ.350కోట్లు ఎందుకు వెనక్కి తీసుకున్నారు? ముందు వీటికి సమాధానాలు చెప్పండి. ప్రత్యేక హోదా ఇవ్వండి, విభజన హామీలు నెరవేర్చండి ఆ తర్వాతే ఆంధ్రా గురించి మాట్లాడండి. అంతే గానీ రాజకీయ లబ్ధికోసం చౌకబారు వ్యాఖ్యలు చేస్తే ప్రజల్లో చులకన అయిపోతారు. వారే మీకు గుణపాఠం చెప్తారు." అని చంద్రబాబు వ్యాఖ్యానించారు.

ప్రధాని మోడీకి గుజరాత్ తప్ప మరేమీ కనబడదని ఏపీ సీఎం చంద్రబాబు విమర్శించారు. అమరావతి ప్రజావేదికలో విలేకరుల సమావేశంలో మాట్లాడిన ఆయన మోడీ ఎన్నికల ప్రచారంలో గతంలో ఇచ్చిన హామీలలో 98% అమలు చేశానని చెప్పుకోవడాన్ని ఎద్దేవా చేశారు. ఏపీకి ఇచ్చిన హామీల మాటేమిటని నిలదీశారు. విభజన హామీలు ఒక్కటి కూడా అమలు చేయకుండా బీహార్ లో ఏపీ గురించి మాట్లాడారని మోడీపై చంద్రబాబు విమర్శలు గుప్పించారు. ఆయన ఏ హక్కు ఉందని, ఏం ఒరగబెట్టారని ఏపీ గురించి మాట్లాడారని నిలదీశారు. ఆయన ఎన్నికల ప్రచారానికి ఏపీకి వచ్చినప్పుడు కూడా ఏపీ ప్రజలను కించపరిచేలా మాట్లాడారని చంద్రబాబు అన్నారు.

మోడీ ఎన్ని తప్పుడు సమాచారాలు చెప్పినా మీ ప్రయత్నాలన్నీ ఇక్కడ మీకు సమర్ధించే వైకాపాను గెలిపించడానికేనని చంద్రబాబు అన్నారు. ఇక్కడ మనం సమర్ధంగా ఉండటం వల్లనే వారి కుట్రలను ఎదుర్కొనగలిగామని చంద్రబాబు అన్నారు. ప్రధాని నరేంద్రమోడీవి చౌకబారు రాజకీయాలను చంద్రబాబు విమర్శించారు. ఈ ఐదేళ్ల పాలనలో ప్రధాని మోడీ ఏ ఒక్క అంశాన్నీ పూర్తి చేయలేదన్నారు. ఏపీకి ఇచ్చిన హామీలను విస్మరించి ఎదురుదాడికి దిగుతున్నారని విమర్శించారు. ఎన్నికల ప్రచారంలో మోడీ ఏపీని చులకన చేసి మాట్లాడారన్నారు. మోడీ మాటలకూ, చేతలకూ పొంతనే లేదని విమర్శించారు. ఆయనవన్నీ అవకాశ వాద రాజకీయాలని ఫైర్ అయ్యారు.

టీడీపీ వ్యవస్థాపకుడు ఎన్టీఆర్ కు చంద్రబాబు చేసిన అన్యాయానికి ఆయన ఆత్మ క్షోభిస్తుందని ప్రధాని మోదీ ఇటీవల చేసిన వ్యాఖ్యలపై చంద్రబాబు ఘాటుగా స్పందించారు. ఎన్టీఆర్ ఆత్మ క్షోభిస్తుందని గుంటూరులో మోదీ ఇటీవల వ్యాఖ్యలు చేశారని, మరి, అద్వాణీకి మీరు చేసింది ఏమిటి? అంటూ మోదీకి సూటి ప్రశ్న వేశారు. ప్రజాస్వామ్యంపై నెల్సన్ మండేలా చెప్పిన మాటలు మోదీకి సరిపోతాయని అన్నారు. ఏపీలో అభివృద్ధిని చూసి మోదీ ఓర్వలేకపోతున్నారని, పన్నులు కట్టించుకుంటున్నారే తప్ప న్యాయం చేయడం లేదని విమర్శించారు. మోదీకి ఏపీ గురించి మాట్లాడే అర్హత లేదని దుమ్మెత్తిపోశారు. ఏపీకి అన్యాయం చేసిన బీజేపీ, మోదీపై ఏపీ ప్రజలకు ఆవేదన, ఆక్రోశం, బాధ, కోపం ఉన్నాయని అన్నారు. ఏపీకి కాంగ్రెస్ పార్టీ అన్యాయం చేసిందని తెలుసుకుందని, అందుకే, ఇప్పుడు ప్రత్యేక హోదా ఇస్తామని చెబుతున్న విషయాన్ని ప్రస్తావించారు.

మాజీ ప్రధాని, తన తండ్రి రాజీవ్ గాంధీపై ప్రధాని మోదీ చేసిన విమర్శలకు కాంగ్రెస్ అధ్యక్షుడు రాహుల్ గాంధీ కౌంటర్ ఇచ్చారు. నిండు సభలో మోదీని ఆలింగనం చేసుకుని.. తమ కుటుంబంపై చేస్తున్న విమర్శలకు ప్రేమతోనే సమాధానమిస్తామని చెప్పిన రాహుల్.. మరోసారి అలాంటి అభిప్రాయాన్నే వ్యక్తం చేశారు. అయితే ఈసారి ట్విట్టర్ వేదికగా జవాబిచ్చారు. ఉత్తరప్రదేశ్‌లో జరిగిన బహిరంగ సభలో మోదీ మాట్లాడుతూ.. రాజీవ్ గాంధీ తన వాళ్లతో మిస్టర్ క్లీన్ అనిపించుకుంటున్నా... నెంబర్ వన్‌ అవినీతిపరుడిగానే చనిపోయారంటూ సంచలన వ్యాఖ్యలు చేశారు. దీనిపై కాంగ్రెస్ నేతలు తీవ్రస్థాయిలో మండిపడుతున్నారు.

తాజాగా రాహుల్ ట్వీట్ చేస్తూ.. ‘‘మోదీ గారూ.. యుద్ధం ముగిసింది. మీ కర్మ మీకోసం ఎదురుచూస్తోంది. మా నాన్నగారిపై మీరు పెట్టుకున్న అంతర్గత నమ్మకాలేవీ.. మిమ్మల్ని ఏమాత్రం రక్షించలేవు. నా ప్రేమ, హగ్ మీ కోసం’’ అంటూ ట్వీట్ చేశారు. రాజీవ్ గాంధీ ప్రధానమంత్రిగా ఉండగా బోఫోర్స్ కేసు వెలుగులోకి వచ్చింది. దేశవ్యాప్తంగా సంచలనం సృష్టించిన ఈ కేసులో ఆయన ఆరోపణలు ఎదుర్కొన్నారు. అయితే ఇది కోర్టులో ఉండగానే ఆయన ఎల్టీటీఈ ఆత్మాహుతి దాడిలో చనిపోయారు. మరణానంతరం ఆయనకు క్లీన్ చీట్ లభించింది. దీన్ని ఉద్దేశిస్తూనే ప్రధాని మోదీ ఘాటైన వ్యాఖ్యలు చేశారు.

ఇది రాహుల్ ట్వీట్... "Modi Ji, The battle is over. Your Karma awaits you. Projecting your inner beliefs about yourself onto my father won’t protect you. All my love and a huge hug. Rahul".. మోడీ వ్యాఖ్యల పై చాలా మంది కూడా స్పందించారు. వారిలో హీరో సిద్ధార్ద్ కూడా ఉన్నారు "The life of #RajivGandhi did not just end. It was violently ended. He was murdered the same way our soldiers in #Pulwama were. No #PrimeMinister has ever set the bar for decency so very low. Distressing. #Shame' అని స్పందించారు.