news

ఎన్నికలు దగ్గర పడే కొద్దీ, వైసీపీ అరాచాకం సృష్టిస్తుంది. రాష్ట్ర వ్యాప్తంగా దాడులకు తెగబడ్డారు. సత్తెనపల్లి శాసనసభ నియోజకవర్గం జనసేన అభ్యర్థి యర్రం వెంకటేశ్వరరెడ్డి ఎన్నికల ప్రచారాన్ని సత్తెనపల్లి మండలం పాకాలపాడులో వైకాపా కార్యకర్తలు ఆదివారం అడ్డుకున్నారు. రెంటపాళ్లలో ప్రచారం ముగించుకుని పాకాలపాడు చేరుకున్న జనసేన ప్రచార రథం ఒక సామాజిక వర్గం అధికంగా ఉండే వీధిలోకి ప్రవేశించింది. ఈ క్రమంలో అభ్యర్థి యర్రం వెంకటేశ్వరరెడ్డిని దూషిస్తూ వైకాపా శ్రేణులు ఆయన వాహనం ముందుకొచ్చి నిరసన తెలిపారు. వైకాపాలోకి రాకుండా జనసేనలోకి ఎందుకు వెళ్లావంటూ నిలదీశారు. మా వీధిలోకి రావడానికి వీల్లేదంటూ రహదారిపై గీతగీసి నిరసన తెలిపారు. జగన్‌ అనుకూల నినాదాలు చేశారు. దీంతో సీఎం పవన్‌ అంటూ జనసైనికులు నినాదాలు చేయడంతో రెండు పార్టీల కార్యకర్తల నడుమ వాగ్వాదం, తోపులాట చోటుచేసుకుంది.

ప్రజాస్వామ్యంలో ఎవరికైనా ఎన్నికల ప్రచారం చేసుకునే స్వేచ్ఛ ఉందని, మీరు అడ్డుపడితే సహించబోమని వెంకటేశ్వరరెడ్డి హెచ్చరించారు. రెచ్చిపోయిన వైకాపా శ్రేణులు జన సైనికులపై, ఫొటోగ్రాఫర్‌ కోటేశ్వరరావుపై దౌర్జన్యానికి దిగారు. జనసేన కార్యకర్త చల్లా హేమంత్‌ శ్రీనివాస్‌కు, అభ్యర్థి గన్‌మెన్‌ సుభానికి స్వల్ప గాయాలయ్యాయి. పోలీసులు అక్కడికి చేరుకుని ఇరు పార్టీల కార్యకర్తలను సముదాయించి పంపారు. క్షతగాత్రుడు శ్రీనివాస్‌ను ప్రభుత్వ వైద్యశాలకు తరలించారు. బాధితుడి ఫిర్యాదు మేరకు వైకాపా కార్యకర్తలు నలుగురిపై కేసు నమోదు చేసినట్లు పోలీసులు తెలిపారు. పాకాలపాడు వైకాపా కార్యకర్తలపై చట్టపరమైన చర్యలు తీసుకోవాలని, అభ్యర్థికి రక్షణ కల్పించాలని డిమాండ్‌ చేస్తూ జనసైనికులు పట్టణంలో రాస్తారోకో చేశారు.

మరో పక్క, కర్నూలు జిల్లా నందవరం మండలం కనకవీడు గ్రామంలో ప్రచారానికి రాలేదని వైకాపా కార్యకర్తలు తెదేపా కార్యకర్త, అతడి తల్లిపై దాడి చేశారు. బాధితుడు తెలిపిన వివరాల ప్రకారం.. గొర్రెల కాపరి అయిన రంగస్వామిని రెండు రోజుల కిందట వైకాపా నాయకులు తమ పార్టీ తరఫున ప్రచారం చేసేందుకు రమ్మని పిలిచారు. అతడు వెళ్లకపోవడంతో వారు రంగస్వామిపై ద్వేషం పెంచుకున్నారు. గ్రామానికి చెందిన కొందరు వైకాపా కార్యకర్తలు ఆదివారం రాత్రి రంగస్వామి ఇంటికి వెళ్లి కర్రలతో దాడి చేసి తీవ్రంగా గాయపరిచారు. అడ్డువచ్చిన అతడి తల్లి కిష్టమ్మపైనా దాడి చేశారు. గాయపడిన ఇద్దరినీ స్థానికులు ఎమ్మిగనూరు ప్రభుత్వ ఆస్పత్రికి తరలించారు. నందవరం ఎస్సై మల్లికార్జున కేసు నమోదు చేసుకొని దర్యాప్తు చేపట్టారు. ఇక గుంటూరులోనూ ఇదే పరిస్థితి. జిల్లాలోని వైసీపీ కార్యకర్తలు రెచ్చిపోయారు. పిడుగురాళ్ల మండలం పందిటివారిపాలెంలో టీడీపీ కార్యకర్త పిచ్చయ్య యాదవ్‌పై వైసీపీ కార్యకర్తలు దాడి చేశారు. దాడిలో టీడీపీ కార్యకర్త పిచ్చయ్య యాదవ్ తీవ్రంగా గాయపడ్డాడు. పార్టీ మారాలని ఆయనపై వైసీపీ నేతలు ఒత్తిడి చేస్తున్నట్లు సమాచారం. మాట వినకపోవడంతోనే పిచ్చయ్యపై దాడికి పాల్పడినట్లు తెలిసింది.

ఆంధ్రప్రదేశ్ రైతులకు ప్రభుత్వం మరో శుభవార్త చెప్పింది. రైతు రుణమాఫీ పథకం కింద నాలుగో విడత నిధులను విడుదల చేసింది. 4వ విడత రుణమాఫీ కోసం రూ.3,900 కోట్లు విడుదల చేసింది. 30 లక్షల మంది రైతుల ఖాతాల్లో రూ.39 వేల చొప్పున జమ కానుంది. దీనికి సంబంధించి వివరాలను రాష్ట్ర ప్రణాళికా సంఘం ఉపాధ్యక్షుడు కుటుంబరావు మీడియా ఎదుట వెల్లడించారు. రైతులు రుణ అర్హత పత్రంతో బ్యాంకుకు వెళ్లాలని సూచించారు. ఏడాదికి 10శాతం వడ్డీతో సహా రైతు రుణమాఫీ పూర్తిగా చెల్లిస్తామని ప్రకటించారు. ఎన్నికల ఫలితాల కంటే ముందే.. వడ్డీతో సహా తుది విడత బకాయిలు చెల్లిస్తామని కుటుంబరావు తెలిపారు. మొత్తం 58.32 లక్షల మంది రైతుల్లో 23.76 లక్షల మందికి తొలి విడతలో రుణమాఫీ చేస్తామని తెలిపారు. ఖరీఫ్ లోగా అన్నదాత సుఖీభవ క్లియర్ చేస్తామన్నారు. పసుపు-కుంకుమ 3 విడత చెక్కు సొమ్మును బ్యాంకుల్లో జమ చేసినట్లు కుటుంబరావు చెప్పారు.

దీంతో 2014 మార్చికి ముందు వ్యవసాయ రుణాల బకాయిల మొత్తాన్ని ప్రభుత్వం మాఫీ చేసినట్లు అవుతుంది. ఏపీ విభజన వల్ల రాష్ట్రం ఆర్థిక లోటులో ఉన్నా, గత ఎన్నికల సమయంలో టీడీపీ మ్యానిఫెస్టోలో రైతులకు రుణ మాఫీ చేస్తానని చంద్రబాబు వాగ్దానం చేశారు. ఆయన ముఖ్యమంత్రిగా అధికారం చేపట్టాక ఒక్కో రైతుకు రూ.లక్షలన్నర వరకు ఉపశమనం కల్పిస్తానని ప్రకటించారు. రాష్ట్రవ్యాప్తంగా దాదాపు 58.29 లక్షల మంది రైతులకు రూ.24,500 కోట్లు రుణ మాఫీ చేయాలని నిర్ణయించారు. దీనిలో భాగంగా రైతుసాధికార సంస్థను ఏర్పాటు చేసి, 2014-15లో తొలి విడతగా రూ.50 వేల లోపు రుణాలను ఏక మొత్తంగా మాఫీ చేశారు. ముందుగా నిర్ణయించిన ప్రకారం రుణమాఫీ నిబంధనలు వర్తించని ఉద్యాన రైతులకూ మేలు చేయాలని భావించిన సీఎం చంద్రబాబు ఆదేశాలతో 2,22,679 ఉద్యాన రైతుల ఖాతాలకు రూ.384.47 కోట్లను ప్రభుత్వం జమ చేసింది.

రుణమాఫీపై రైతులకు భరోసా కల్పించేందుకు రుణ ఉపశమన పత్రాలను జారీ చేసింది. రుణమాఫీ నిధులు విడుదల చేసినప్పుడు రైతులు ఈ ఉపశమన పత్రాలను సంబంధిత బ్యాంకుల్లో అప్‌లోడ్‌ చేయించుకుని, మాఫీ సొమ్మును ఖాతాల్లో జమ అయ్యేలా ప్రభుత్వం చర్యలు తీసుకుంది. దీనిలో భాగంగా 2016లో 2వ విడత, 2017లో 3 విడత రుణమాఫీ చేశారు. పైగా 10% వడ్డీతో కలిపి రుణమాఫీ అమలు చేశారు. అయితే ప్రభుత్వ మార్గదర్శకాల ప్రకారం గత మూడేళ్లలో దాదాపు లక్ష మంది రైతులు రుణ మాఫీ వర్తించలేదని రైతుసాధికార సంస్థకు అర్జీలు పెట్టుకోవడంతో ప్రభుత్వం సానుకూలంగా స్పందించి, అర్హత కలిగిన రైతులకు మాఫీ సొమ్ము జమ చేసింది. జిల్లాల్లో గ్రీవెన్స్‌లు నిర్వహించి మరీ అర్జీలు స్వీకరించి పరిష్కరించారు.

ప్రధాని మోదీ, కేంద్ర ఎన్నికల సంఘంపై పశ్చిమ బెంగాల్‌ ముఖ్యమంత్రి మమతా బెనర్జీ విరుచుకుపడ్డారు. ఆదివారం జల్పాయిగుడి, ఫలకతాల్లో జరిగిన బహిరంగ సభల్లో ప్రసంగిస్తూ అధికార యంత్రాంగాన్ని ఉపయోగించి ప్రతిపక్షాలను భయపెట్టాలని మోదీ ప్రయత్నిస్తున్నారని దుయ్యబట్టారు. భాజపా సూచనల మేరకే ఎన్నికల సంఘం (ఈసీ) నడుచుకుంటోందని ఆరోపించారు. ఆంధ్రప్రదేశ్‌ ప్రభుత్వ ప్రధాన కార్యదర్శిని ఎందుకు బదిలీ చేశారని ఎన్నికల సంఘాన్ని ప్రశ్నించారు. ‘‘కేంద్ర ప్రభుత్వం ఎందుకు రాష్ట్ర వ్యవహారాల్లో తలదూర్చుతోంది? ఆంధ్రప్రదేశ్‌ ప్రభుత్వ ప్రధాన కార్యదర్శిని ఎందుకు తొలగించారు? చివరి క్షణం మార్పులపై అంత ఇష్టం ఉంటే సొంత కేబినెట్‌ కార్యదర్శినో, కేంద్ర హోం కార్యదర్శినో ఎందుకు తీసేయలేదు.

నేను ఎందరో ప్రధానులతో కలిసి పని చేశాను. మోదీలాంటి కక్షసాధింపు ప్రధానిని చూడలేదు’’ అని నిప్పులు చెరిగారు. ఎన్నికల సంఘం శుక్రవారం ఆంధ్రప్రదేశ్‌ ప్రభుత్వ ప్రధాన కార్యదర్శి అయిన అనిల్‌ చంద్ర పునేఠాను తొలగించి, ఎల్‌.వి.సుబ్రహ్మణ్యంను నియమించడాన్ని ఎన్నికల సభల్లో ప్రస్తావించారు. రాజకీయ ప్రయోజనాల కోసం ఆదాయపు పన్ను విభాగం, సీబీఐలను కేంద్ర ప్రభుత్వం దుర్వినియోగం చేస్తోందని మమత విమర్శించారు. ‘‘మధ్యప్రదేశ్‌ ముఖ్యమంత్రి కమల్‌నాథ్‌ కుటుంబ సభ్యుల ఇళ్లపై దాడి చేశారు. కర్ణాటక ముఖ్యమంత్రి ఇళ్లను సోదా చేశారు. ఆంధ్రప్రదేశ్‌ ముఖ్యమంత్రినీ వదలలేదు’’ అని విమర్శించారు. తనను ఎంతగా భయపెట్టాలని ప్రయత్నిస్తే అంత గట్టిగా గర్జిస్తానని మమత హెచ్చరించారు.

‘‘దీదీ ఎవరికీ, దేనికీ భయపడే వ్యక్తి కాదు’’ అని అన్నారు. భాజపా సూచనల మేరకే పశ్చిమ బెంగాల్‌లోనూ నలుగురు ఐపీఎస్‌ అధికారులను తొలగించడంపై మండిపడ్డారు. ఇందుకు తీవ్ర నిరసన తెలుపుతూ ఎన్నికల సంఘానికి లేఖ రాశారు. ఏకపక్షంగా, దురుద్దేశాలతో కూడిన ఈ నిర్ణయాన్ని పునఃసమీక్షించాలని డిమాండ్‌ చేశారు. అధికారులను బదిలీ చేయడంపై తానేమీ కలవరం చెందడం లేదని అన్నారు. ఓటమి భయం ఉన్నవారే ఇలాంటి పనులకు పాల్పడతారని విమర్శించారు. ఎంతమంది అధికారులను బదిలీ చేస్తే తమ విజయావకాశాలు అంత పెరుగుతాయని చెప్పారు. వారణాసిలో గంగను పరిశుభ్రం చేయలేని వ్యక్తి ఇక్కడకి వచ్చి మాట్లాడుతున్నారని మోదీని ఉద్దేశించి విమర్శించారు. సీపీఎం హయాంలో శారదా కుంభకోణం జరిగితే తమపై విమర్శలు చేస్తున్నారని అన్నారు. అందులో సంబంధం ఉన్న ఎంపీ ముకుల్‌ రాయ్‌ను మోదీ వేదికలపై పక్కన కూర్చోబెట్టుకుంటున్నారని ఆరోపించారు. మోదీని ‘నకిలీ చౌకీదార్‌’ అని విమర్శించారు. ఈ చౌకీదార్‌ అబద్ధాలకోరే కాదు, దొంగ కూడా అని ఆరోపించారు.