news

ఎన్నికలకు సమయం దగ్గర పడుతున్న తరుణంలో.. కడప జిల్లాలో ప్రలోభాల పర్వానికి తెరలేచింది. సెంటిమెంటు పనిచేయకపోవడంతో పాటు కంచుకోటకు బీటలు వారుతున్నాయన్న సంకేతాలతో నేతల కొనుగోళ్లకు ఒక ప్రధాన పార్టీ రంగంలోకి దిగింది. ఓటర్లను ప్రభావితం చేయగల నేతలను ఎంపిక చేసి ‘రేటు’ నిర్ణయిస్తోంది. అడ్వాన్సు ఎరచూపి.. ఆ పార్టీ కండువాలు వేసేస్తోంది. ఇలా పది రోజుల్లోనే దాదాపు రూ.200 కోట్లు ఆ పార్టీ ఖర్చు పెట్టినట్లు ప్రచారం జోరుగా జరుగుతోంది. పార్టీ మారిన నేత ఒకరు తన నియోజకవర్గంలో ఇప్పటికే రూ.70 కోట్లు ఖర్చు పెట్టినట్లు ఆ నియోజకవర్గ నేతల్లో చర్చ మొదలైంది. గత ఎన్నికల్లో కడప జిల్లాలో గట్టి పట్టుసాధించిన ఆ పార్టీకి ఇప్పుడు ఆందోళన మొదలైంది. అధికార టీడీపీ బలం పుంజుకుని గట్టి పోటీ ఇస్తుండటంతో నేతల్లో భయం మొదలైంది.

దీంతో టీడీపీలో ఉన్న నేతలకు వల వేసి ఆకర్షించే కార్యక్రమాలు పదిరోజులుగా మొదలయ్యాయి. గ్రామ, మండల, వార్డు స్థాయుల్లో ఉన్న నేతలు ఏ మేరకు ఓటర్లను ప్రభావితం చేస్తారో నిర్ధారించుకుని.. వారి స్థాయిని బట్టి రూ.50 వేల నుంచి రూ.కోటి వరకు ధర నిర్ణయిస్తున్నారు. ముందుగా అడ్వాన్సు కింద కొంత చెల్లించి పార్టీలో చేరినట్లు కండువాలు వేస్తున్నారు. రాజంపేట నియోజకవర్గంలో ఓ పార్టీ అభ్యర్థి రూ.150 కోట్లు ఈ ఎన్నికల్లో ఖర్చు చేసేందుకు ముందుకు రావడంతో టికెట్‌ ఇచ్చినట్లు ప్రచారం జరిగింది. ఇప్పుడు ఆ అభ్యర్థి గతంలో తనతో పాటు ఉన్న పనిచేసిన నేతలతో చర్చలు జరిపి.. ఏ మేరకు ఓటర్లను ప్రభావితం చేస్తారో లెక్కించి రూ.50 వేల నుంచి రూ.లక్ష, 2 లక్షలు, 10 లక్షలు, కోటి వరకు కూడా పంపిణీ చేసినట్లు ఆ నియోజకవర్గంలో చర్చ సాగుతోంది. ఇలా ఇప్పటికే రూ.70 కోట్లకు పైగా ఖర్చు పెట్టినట్లు ప్రచారం జరుగుతోంది.

జమ్మలమడుగు నియోజకవర్గంలో టీడీపీ నేతలు సయోధ్యతో నడుస్తుండగా.. మరో ప్రధాన పార్టీ అభ్యర్థి ఈ నియోజకవర్గంలో ఎలాగైనా గెలవాలని గ్రామ, మండల స్థాయిల్లో ఉన్న నేతలతో బేరాలకు దిగారని సమాచారం. ‘మీరు వస్తే ఇదిగో నగదు..’ అంటూ ఆశ చూపుతున్నారని తెలుస్తోంది. రాయచోటిలో సైతం పదిహేను రోజుల నుంచి ఈ ఆకర్ష పథకం మొదలై లక్షల తో నేతలను కొనుగోలు చేస్తున్నారు. బద్వేలు, మైదుకూరు, కమలాపురం, రైల్వేకోడూరు నియోజకవర్గాల్లో ఇదే తరహా ప్రలోభాలు, ఆకర్షణలు కొనసాగుతున్నాయి. పులివెందులలో ఓటర్లకు చి వరిలో నోటు అందించేందుకు సన్నాహాలు చేస్తున్నారు. 2రోజులుగా కడప, ప్రొద్దుటూరులలో ఇదే పంథాతో ఆ పార్టీ నేతలు వ్యవహరిస్తున్నారు.

రెండేళ్ల కిందట విజయవాడలో వైసీపీ ప్లీనరీ జరిగింది. అప్పుడో బహిరంగ సభ నిర్వహించారు. మళ్లీ నంద్యాల ఉప ఎన్నికలప్పుడు ఓ బహిరంగసభ నిర్వహించారు. అంతే ఆ తర్వాత పాదయాత్ర ప్రారంభమైంది. రోడ్డు సైడ్ మీటింగ్‌లతోనే సరిపుచ్చారు. పాదయాత్ర ముగింపు సమయంలోనూ సాదాసీదాగా సభను ముగించారు. ఎన్నికల ప్రచారంలో తాము ముందున్నామని చెప్పుకోవడానికి రాజకీయ పార్టీలు... ఏదైనా అత్యంత ఘనంగా చేయడానికి ప్రయత్నిస్తుంటాయి. ముందుగా భారీగా సభలు నిర్వహిస్తారు. టీడీపీ అధినేత చంద్రబాబు ధర్మపోరాట దీక్షల పేరుతో నెలకో సభ నిర్వహిస్తూ పార్టీని ఎన్నికలకు సిద్ధం చేశారు. ఇప్పడు కూడా ప్రతిరోజు రోడ్‌షోలతో పాటు బహిరంగసభలు కూడా ఉండే విధంగా ప్రణాలికలు రచిస్తున్నారు. జాతీయ నేతల అందుబాటును బట్టి భారీ బహిరంగసభలు నిర్వహిస్తున్నారు. దీంతో ప్రచారంలో టీడీపీ ముందుందనే అభిప్రాయం ఏర్పడుతోంది.

ఎన్నికల ప్రకటన వచ్చిన తర్వాత వైసీపీ తరుపున భారీ ప్రచార కార్యక్రమాలు పెట్టుకోలేదు. జగన్ హెలీకాప్టర్‌లో జిల్లాలకు వెళ్తున్నారు. రోజుకు మూడు నుంచి నాలుగు నియోజకవర్గాల్లో ప్రసంగిస్తున్నారు. కానీ అన్నీ రోడ్ సైడ్ మీటింగ్‌లే. నియోజకవర్గ కేంద్రాల్లో యాబై, అరవై అడుగుల రోడ్లలో సభలు పెడుతున్నారు. ఆ దారి నిండా కనిపించే జనంతోనే ప్రభంజనం అని సంతృప్తి పడుతున్నారు. కానీ తన పార్టీ రేంజ్ తెలిపేలా జిల్లా స్థాయి లేదా రాష్ట్ర స్థాయిలో ఓ బహిరంగ సభ పెట్టి బలపదర్శన చేయాలన్న ఆలోచన చేయడం లేదు. పాదయాత్ర ముగిసిన తర్వాత శంఖారావం పేరుతో బూత్ స్థాయి కార్యకర్తలతో సమావేశాలు పెట్టారు. ఇవి మూడు జిల్లాలకు అన్నట్లుగా పెట్టారు కానీ.. ఆయా నియోజకవర్గాల్లో మాత్రమే జనసేమీకరణ చేశారు. ఫలితంగా సభలు తేలిపోయిందన్న భావన వైసీపీలో ఏర్పడింది.

కాకినాడ సభలో ఆరువేల కుర్చీలను తెచ్చారు. నాలున్నర వేల కుర్చీలకు సరిపడా మాత్రమే జనం కనిపించారు. దీంతో 30 శాతానికి పైగా కుర్చీలు ఖాళీగా కనిపించాయి. ఇతర మీడియాకు కవర్ చేసుకునే అవకాశం ఇవ్వనప్పటికీ ఆ గ్రౌండ్ పక్కనే ఉన్న అపార్ట్‌మెంట్‌లో ఉన్న వాళ్లు వీడియో తీసి నెట్‌లో పెట్టడంతో విషయం బయటపడిపోయింది. జనం రాకపోతే ప్రజల్లో ఉన్న మూడ్ తెలిసిపోతుందనే ఉద్దేశంతోనే జగన్ బహిరంగ సభల జోలికి వెళ్లడం లేదనే అభిప్రాయం ఇతర నేతల్లో ఉంది. జనసమీకరణ కోసం బాగా ఖర్చు పెట్టాల్సి ఉంటుందని, పైగా ఎండల్లో అది చాలా కష్టమని వైసీపీ శ్రేణులు కూడా తమ బాధ్యుల వద్ద వ్యక్తం చేస్తున్నట్లు సమాచారం. బహిరంగ సభ పెడితే రెండు మూడు రోజుల పాటు దానిపై దృష్టి కేంద్రీకరించాలని, భారీగా ఖర్చుకూడా పెట్టకోవాల్సి వస్తుందని, దీనివల్ల సమస్యలు వస్తాయని మరికొంతమంది లైట్‌గా తీసుకుంటున్నారు. దీంతో రోడ్ సైడ్ మీటింగ్‌లకే జగన్ ప్రాధాన్యత ఇస్తున్నారు. అదే సమయంలో జగన్.. ప్రచారాన్ని అంత సీరియస్‌గా చేయడం లేదన్న అభిప్రాయం వైసీపీ శ్రేణుల్లో ఉంది. ఆయన మూడు నాలుగు రోజులకోసారి ప్రచారానికి విరామం ఇస్తున్నారు. రోజుకు నాలుగు చోట్ల ప్రసంగించిన తర్వాత మంగళవారం ఆయన లోటస్ పాండ్‌లో విశ్రాంతి తీసుకున్నారు. గత వారంలో కూడా ఓరోజు విరామిచ్చారు. జగన్ తీరుపై వైసీపీలో ఇతర పార్టీల్లో విస్తృతంగా చర్చ జరుగుతోంది. ఆశలు వదులుకున్నారు కాబట్టే ప్రచారాన్ని తేలిగ్గా తీసుకున్నారని మరికొందరు విశ్లేషిస్తున్నారు. మరికొందరు మాత్రం ఎలక్షనీరింగ్ వ్యూహాల కోసం లోటస్ పాండ్‌లో చర్చల్లో మునిగితేలుతున్నారని అంటున్నారు. ప్రశాంత్ కిషోర్ టీంతో తాజా పరిస్థితులను సమీక్షించి ఏయే నియోజకవర్గాల్లోని ఎలక్షనీరింగ్‌పై చర్చిస్తున్నారని వైసీపీ వర్గాలు అంటున్నాయి.

రాష్ట్ర నిఘా విభాగం డీజీ ఏ.బి.వెంకటేశ్వరరావును బదిలీ చేయాలంటూ తామిచ్చిన ఆదేశాలను వెంటనే ఎందుకు అమలుపర్చలేదని రాష్ట్ర ప్రభుత్వ ప్రధాన కార్యదర్శిని కేంద్ర ఎన్నికల సంఘం ప్రశ్నించింది. దీనిపై వివరణ కోసం సీఎస్‌ పునేఠాను ఢిల్లీకి పిలిపించింది. ముగ్గురు అధికారులను బదిలీ చేయాలని తాము ఆదేశాలిస్తే ఇద్దరిని మాత్రమే ఎందుకు చేశారని ప్రశ్నించినట్లు సమాచారం. దీనిపై సీఎస్‌ వివరణ ఇస్తూ ‘‘నిఘా విభాగం డీజీ ఎ.బి. వెంకటేశ్వరరావు, కడప, శ్రీకాకుళం ఎస్పీలను మార్చాలని ఆదేశాలిచ్చారు. అందులో కడప, శ్రీకాకుళం జిల్లాల ఎస్పీలను వెంటనే బదిలీ చేశాం. అయితే నిఘా విభాగం చీఫ్‌ ఈసీ పరిధిలో ఉన్నారో, లేదోనని అనుమానం వచ్చింది. ఏపీ హైకోర్టు ఆ సందేహం తీర్చగానే తక్షణం ఆయన్ను కూడా బదిలీ చేశాం’’ అని పేర్కొన్నారు. ఈసీ ఆదేశాలను అమలు చేశామని సీఎస్‌ చెప్పినట్లు తెలిసింది.

అయితే ప్రభుత్వ వర్గాలు మాత్రం, ఈ చర్య పై మండి పడుతున్నాయి. కొద్దిరోజుల క్రితం.. ఇంటెలిజెన్స్‌ డైరెక్టర్‌ జనరల్‌, శ్రీకాకుళం ఎస్పీ, కడప ఎస్పీలపై ‘ఫిర్యాదులు’ కాదు.. ఒకే ఒక్క ఫిర్యాదు అందింది! అదీ.. ప్రతిపక్షానికి చెందిన నేత ఫిర్యాదు. ఆ ఒక్క ఫిర్యాదు ఆధారంగానే.. అది అందిన 24 గంటల్లోపే.. వారిని బదిలీ చేయాలంటూ ఈసీ ఆదేశాలు జారీ చేసింది!! ..బీజేపీ పాలిత ఝార్ఖండ్‌కొకనీతి, బీజేపీని ఢీకొన్న ప్రభుత్వం ఉన్న ఏపీకి ఇంకో నీతి. ‘ఇదేనా ఈసీ రీతి’ అని ప్రజలు ఆగ్రహం వ్యక్తం చేస్తున్నారు!! ‘బీజేపీ పాలిత రాష్ట్రాల్లో అధికారులు తప్పు చేసినట్లు తేలినా పట్టించుకోరు. పక్కా ఆధారాలతో దొరికిపోయినా దొరబాబుల్లా తిరుగుతారు. ఇక్కడ మాత్రం వెంటనే చర్యలా?’ అని మండిపడుతున్నారు.

వైసీపీ నేత విజయసాయిరెడ్డి ఈ నెల 25న ఈసీకి ఇచ్చిన ఫిర్యాదులో ఏపీ ఇంటెలిజెన్స్‌ చీఫ్‌తోపాటు పలువురు ఐపీఎస్‌ అధికారులపై తీవ్ర ఆరోపణలు చేశారు. అయితే, ఎన్నికల పరిధిలోకి వచ్చే అధికారుల జాబితాలో ఇంటెలిజెన్స్‌ చీఫ్‌ లేరు. అయినా.. 25న ఫిర్యాదు వస్తే 26 అర్ధరాత్రి ఇంటెలిజెన్స్‌ చీఫ్‌తోపాటు ఇద్దరు ఎస్పీలను బదిలీ చేయాలంటూ ఈసీ ఆదేశించింది. అసలు తనకొచ్చిన ఫిర్యాదుపై విచారణ ఎక్కడ జరిపింది. అందులో తప్పు చేసినట్లు తేలిందా? అనే ప్రశ్నలకు సమాధానం లేదు. ఫిర్యాదు అందిన వెంటనే అధికారులపై చర్యలకు దిగింది. దీంతో, ఈసీ వ్యవహారశైలిపై తీవ్ర విమర్శలు వెల్లువెత్తుతున్నాయి. ఝార్ఖండ్‌లో ఆరోపణలు నిజమని రుజువై దాదాపు 21 నెలలవుతున్నా ఈసీ ఆదేశాలు అమలుకాలేదక్కడ. కానీ, ఏపీలో మాత్రం ఎన్నికల షెడ్యూల్‌ రాకముందే ప్రభుత్వం కొత్తగా నియమించిన కలెక్టర్‌ను విధుల్లో చేరనీయకుండానే బదిలీ చేయాల్సిందిగా ఆదేశించడం మొదట్లోనే చర్చనీయాంశమైంది. ఇప్పుడు నోటిఫికేషన్‌ వచ్చాక, రాజకీయ పార్టీ ఆరోపణలను పరిగణనలోకి తీసుకొని విచారణ చేయకుండానే అధికారుల బదిలీలకు అర్ధరాత్రి ఆదేశాలివ్వడంతో ‘ఈసీ కూడానా?’ అన్న చర్చ మొదలైంది.