news

నవ్యాంధ్ర రాజధాని అమరావతిని పవిత్ర సంగమ ప్రదేశానికి అనుసంధానిస్తూ కృష్ణా నదిపై నిర్మించనున్న ఐకానిక్‌ బ్రిడ్జ్‌కు సీఎం చంద్రబాబు ఈ నెల 12న శంకుస్థాపన చేయనున్నట్లు విశ్వసనీయంగా తెలిసింది. పవిత్ర సంగమం దగ్గర శంకుస్థాపన ఫలకాన్ని ఆ రోజు ఉదయం 10 గంటలకు సీఎం ఆవిష్కరించనున్నారు. అమరావతి అభివృద్ధి సంస్థ (ఏడీసీ) ఆధ్వర్యంలో నిర్మితమయ్యే ఈ వంతెన అమరావతిలోని ఉద్ధండరాయునిపాలెం నుంచి సంగమ ప్రదేశం వరకూ 3.2 కిలోమీటర్ల పొడవు ఉంటుంది. ఈ వంతెన నిర్మాణ వ్యయం సుమారు రూ.1387 కోట్లు. కేబుల్‌పై అరకిలోమీటరు.. రాజధాని శోభను మరింత ఇనుమడింపజేయగల ఈ ఐకానిక్‌ బ్రిడ్జ్‌కు అనేక విశిష్ఠతలున్నాయి.

ప్రపంచవ్యాప్తంగా ప్రసిద్ధమై, ఈ ప్రాంతంలోనే పురుడుపోసుకున్న కూచిపూడి నృత్యంలోని అభివాదముద్రను తలపించేలా డిజైన్‌ రూపొందించడం విశేషం. దీంతోపాటు రాష్ట్రంలోనే తొలిసారిగా కేబుల్‌ ఆధారంగా నదిపై నిర్మితమవుతున్న వంతెనగా సైతం ఇది నిలవనుంది. నది మధ్యభాగంలో సుమారు 480 మీటర్ల పొడవునా ఈ వంతెన కేబుల్‌పై ఆధారపడి ఉంటుంది. ప్రసిద్ధ నిర్మాణ సంస్థ ఎల్ అండ్ టీ సమర్పించిన 6 రకాల ఆకృతులను దీని కోసం సమర్పించింది. నమస్కార ముద్ర, కూచిపూడి నృత్య భంగిమ ముద్ర, కూచిపూడి అరల ముద్ర, పుష్పాన్ని పోలిన ఆకృతిలో ప్రజావారధి(రెండంతస్థులు), అమరావతి స్థూపం, కొండపల్లి బొమ్మ.. ఇలా మొత్తం 6 రకాల ఆకృతులను పరిశీలించిన ముఖ్యమంత్రి, ప్రజాభిప్రాయం తరువాత, కూచిపూడి డిజైన్ ఫైనల్ చేసారు.

కృష్ణానదిపై ఇబ్రహీంపట్నం మండలంలోని పవిత్ర సంగమం నుంచి తుళ్లూరు మండలంలోని లింగాయపాలెం వరకు సుమారు ఐదు కిలోమీటర్ల మేర ఈ వంతెన నిర్మాణానికి అమరావతి డెవలప్‌మెంట్‌ కార్పొరేషన్‌ (ఏడీసీ) త్వరలో త్వరలోనే టెండర్లు పిలవనుంది. ఈ వంతెన కేవలం రాకపోకలకు మాత్రమే ఉపయోగపడేలా కాకుండా వినోద కేంద్రంగా కూడా ఉండేలా చూడాలని భావిస్తున్నారు. అందుకే రెండు అంతస్తుల్లో కింది నుంచి ట్రాఫిక్‌ వెళ్లేలా పైన పర్యాటకులు తిరిగేలా దీన్ని తీర్చిదిద్దను న్నారు. ఈ వంతెనకు సంబంధించి ఇప్పటికే ఎల్‌ అండ్‌ టీ ఆరు కాన్సెప్ట్‌ డిజైన్లను ప్రభుత్వానికి సమర్పించింది. దాదాపు ఆ సంస్థకే వంతెన నిర్మాణ బాధ్యతలను అప్పగించేందుకు ప్రభుత్వం సిద్ధంగా ఉన్నట్లు సమాచారం.

రాష్ట్రంలోని పార్ట్‌టైమ్‌ గ్రామ రెవెన్యూ అధికారుల(వీఆర్‌వో)కు ప్రభుత్వం సంక్రాంతి బొనాంజా ప్రకటించింది. వారి గౌరవ వేతనాన్ని నెలకు రూ.10వేల నుంచి రూ.15వేలకు పెంచింది. ముఖ్యమంత్రి చంద్రబాబు ఆదేశాలతో రెవెన్యూశాఖ మంగళవారం ఈ మేరకు ఉత్తర్వులు (జీవో నం.10) జారీ చేసింది. పెంచిన వేతనం వెంటనే అమల్లోకి వస్తుందని రెవెన్యూశాఖ ప్రత్యేక ప్రధాన కార్యదర్శి మన్మోహన్‌సింగ్‌ ఈ ఉత్తర్వుల్లో స్పష్టం చేశారు. ఈ దిశగా వెంటనే చర్యలు తీసుకోవాలని కలెక్టర్లను ఆదేశించారు. భారీగా వేతనాన్ని పెంచుతూ ప్రభుత్వం తీసుకున్న నిర్ణయం వల్ల తమకు ముందే సంక్రాంతి వచ్చిందని వీఆర్‌వోలు హర్షం వ్యక్తం చేస్తున్నారు.

ఈ వేతన పెరుగుదల కోసం వారు సుదీర్ఘకాలంగా నిరీక్షిస్తున్నారు. వారికి సర్వీసు రూల్స్‌, క్రమబద్ధీకరణే ఇక మిగిలాయి! వీటిని కూడా దశలవారీగా చేపట్టాలని రెవెన్యూశాఖ భావిస్తున్నట్లు తెలిసింది. ప్రస్తుతం రెవెన్యూశాఖలో రెగ్యులర్‌ వీఆర్‌వో, వీఆర్‌ఏలతోపాటు పార్ట్‌టైమ్‌ సిబ్బంది కూడా పనిచేస్తున్నారు. 2012, 2014 సంవత్సరాలలో ఏపీపీఎస్సీ ద్వారా భారీగా నియామకాలు చేపట్టారు. ఇందులో 4600 మంది వీఆర్‌ఏలే ఉన్నారు. నియామకాల నుంచి ఇప్పటి దాకా వారికి వేతన సవరణ జరగలేదు. దీనిపై వారు ప్రభుత్వానికి అనేక విన్నపాలు ఇచ్చారు.

ఏపీపీఎస్సీ ద్వారా నియమితులైన తమకు వేతనాలు పెంచడంతోపాటు సర్వీసు రూల్స్‌ను వర్తింపచేసి క్రమబద్ధీకరించాలని కోరుతున్నారు. ఇదే విషయమై రెవెన్యూ సర్వీసెస్‌ అసోసియేషన్‌ ద్వారా, ఆ తర్వాత వీఆర్‌వోల సంఘం తరఫున ప్రభుత్వానికి విజ్ఞప్తి చేశారు. ఈ నేపథ్యంలో ప్రభుత్వం సానుకూలంగా స్పందించి వేతనం పెంచింది. ఇదిలావుండగా, వీరి సర్వీసు రూల్స్‌, ఇతర అంశాలపై రెవెన్యూశాఖ కమిటీ ఇచ్చే నివేదిక ఆధారంగా చర్యలు తీసుకుంటారని తెలిసింది.

ప్రముఖ హాస్య నటుడు అలీ రాజకీయ రంగం ప్రవేశం ఇప్పటికే ఖాయమైంది. అయితే, అది ఏ పార్టీ నుంచి అనే విషయమై ఇంకా స్పష్టత రాలేదు. వైసీపీ అధినేత జగన్, జనసేనాని పవన్‌తోనూ ఆయన భేటీ కావడంతో ఆయన తొలుత వైసీపీ, తర్వాత జనసేనలో చేరుతారనే ప్రచారం జరిగింది. అయితే, వీటిని అలీ కొట్టిపారేశారు. తాజాగా మంగళవారం టీడీపీ నేత, ఏపీ మంత్రి గంటా శ్రీనివాసరావుతో అలీ భేటీ అయ్యారు. ఓ సినిమా షూటింగ్ కోసం విశాఖకు వెళ్లిన ఆయన గంటాను కలుసుకున్నారు. ఈ సందర్భంగా అలీ మీడియాతో మాట్లాడుతూ.. ఎన్నికల్లో పోటీకి తనకు అవకాశం ఇచ్చిన పార్టీకే జై కొడతానని పేర్కొన్నారు.

తనకు ఒక గురువు ఉన్నారని, జనవరి 16 వరకు రోజులు బాగాలేవని ఆయన చెప్పారని, ఆ తేదీ తరువాతే తాను ఏ పార్టీలో చేరేది ప్రకటిస్తానని అన్నారు. టీడీపీ అంటే తనకు అభిమానమని, సీఎం చంద్రబాబుతో సహా పలువురు మంత్రులతో తనకు పరిచయాలున్నాయని, తనను వారు ఓ సోదరుడిలా చూసుకుంటారని తెలిపారు. గతంలో తాను గంటాకు మద్దతుగా ఎన్నికల ప్రచారం చేసిన విషయాన్ని గుర్తుచేశారు. అలాగే, మంత్రి గంటాకు తాను చెప్పాల్సింది చెప్పానని, ఆయన తనను సిఫారసు చేస్తారని భావిస్తున్నానని పరోక్షంగా టీడీపీలో చేరుతాననే సంకేతాలిచ్చారు.

అంతేకాదు, తాను 20 ఏళ్ల నుంచి కార్యకర్తగానే ఉన్నానని, ఇక అభ్యర్థిగా ఉండాలన్నది తన అభిమతమని వ్యాఖ్యానించారు. అనంతరం మంత్రి గంటా మాట్లాడుతూ.. అలీ గురించి ముఖ్యమంత్రికి తెలుసని, ఆయన ఉద్దేశాలను చంద్రబాబు పరిగణనలోకి తీసుకుంటారని భావిస్తున్నానని వివరించారు. తాను కూడా ముఖ్యమంత్రికి చెప్పాల్సినవి చెబుతానన్నారు. గుంటూరు నుంచి పోటీ చేయడానికి అలీ ఆసక్తిగా ఉన్నారని తెలిపారు. అయితే ఆలీ ప్రతిపాదన పై చంద్రబాబు ఎలా స్పందిస్తారు ? అలీ చెప్పింది చేస్తారా ? గంటా రాయబరాం ఫలిస్తుందా ? ఇప్పటికే ఉన్న ఆశావాహులు ఎలా రియాక్ట్ అవుతారు ? ఇవన్నీ తెలియాలంటే, చంద్రబాబు రియాక్షన్ కోసం ఎదురు చూడటమే...