news

రియల్‌టైం గవర్నెన్స్‌ పనితీరు అద్భుతం, ఆమోఘం, స్ఫూర్తిదాయకం అంటూ బ్రిటన్‌ మాజీ ప్రధాని టోనీ బ్లెయిర్‌ ప్రశంసల వర్షం కురిపించారు. సచివాలయంలో సోమవారం రాత్రి ఆర్టీజీఎస్‌ పనితీరును 45 నిమిషాల పాటు ఆద్యంతం ఆసక్తిగా గమనించిన ఆయన చివరగా చేతులు జోడించి ముఖ్యమంత్రి చంద్రబాబును ఉద్దేశించి అమేజింగ్‌.. అంటూ కితాబునిచ్చారు. ‘అత్యద్భుతం.. మీరో విప్లవం సృష్టించారు. ప్రపంచంలో మరెక్కడా ఇలాంటిది లేదు. ఆంధ్రప్రదేశ్‌ నుంచి ప్రపంచానికి డిజిటల్‌ పాఠాలు అందించాలి. ఆర్టీజీఎస్‌ కేంద్రం అమోఘం’ అని బ్రిటన్‌ మాజీ ప్రధాని టోనీ బ్లెయిర్‌ కితాబిచ్చారు. రాష్ట్ర ప్రగతికి మీరు చేస్తున్న కృషి ప్రశంసనీయమని సీఎం చంద్రబాబును ప్రశంసించారు. పాలనను ప్రజల చెంతకు తీసుకెళ్లేందుకు, ప్రజలకు రియల్‌టైమ్‌లో సేవలు అందించేందుకు...ఆర్టీజీ కేంద్రం ఎలా పనిచేస్తుందన్నదీ సీఎం ఆయనకు వివరించారు. రాష్ట్ర ప్రజలకు సమగ్రంగా సేవలందించే పద్ధతిని సాంకేతికత తోడుతో ఎలా అభివృద్ధి చేశామో తెలియజేశారు.

ఈ సందర్భంగా బ్లెయిర్‌ మాట్లాడుతూ.. రియల్‌టైమ్‌లో ప్రజలకు అందిస్తున్న సేవలు తనను ఆకట్టుకున్నాయన్నారు. ‘ప్రకృతి విపత్తులను ఏపీ సమర్థంగా ఎదుర్కొంటున్న తీరు ముచ్చట గొలిపింది. బిగ్‌ డాటాను ఉపయోగించుకుని పాలనలో విప్లవాత్మక మార్పులు తీసుకురావడం ఆనందంగా ఉంది. మీరు(సీఎం), నేను దాదాపు ఒకేసారి అధికారం చేపట్టాం. కానీ పదేళ్ల ప్రధాని పదవి తర్వాత నేను ఆగిపోయాను. మీరింకా కొనసాగుతున్నారు. ఇక్కడినుంచి ప్రపంచానికి పాఠాలు తీసుకెళ్లొచ్చు. ఆర్‌టీజీఎ్‌సలాంటిది ప్రపంచంలో ఎక్కడా లేదు’ అని తెలి పారు. ఈ టెక్నాలజీ అంతా ఎక్కడినుంచి తీసుకున్నారని బ్లెయిర్‌ ప్రశ్నించారు. ఇదివరకు దేనికదే అన్నట్లుగా టెక్నాలజీ ఉండేదని, అన్నిటినీ ఒక వేదికపైకి తెచ్చి సమగ్ర సాంకేతిక పద్ధతిని అభివృద్ధి చేశామని అధికారులు తెలిపారు.

ఆర్‌టీజీఎస్‌ పనితీరును సీఎం పవర్‌ పాయింట్‌ ప్రజెంటేషన్‌ ద్వారా బ్లెయిర్‌కు వివరించారు. ఏడాది క్రితం ప్రారంభించిన ఆర్‌టీజీఎస్‌ ఇప్పుడు రాష్ట్ర ప్రజల గుండె చప్పుడులా మారిందని, పరిష్కార వేదిక 1100 కాల్‌ సెంటర్‌ ద్వారా ప్రజల సమస్యలను స్వీకరించి వాటిని పరిష్కరిస్తున్నామని తెలిపారు. ఇప్పటి వరకు మొత్తం 1,74,60,944 ఫిర్యాదులను ప్రజల నుంచి స్వీకరించి వాటిని పరిష్కరించామని తెలిపారు. అమలు చేస్తున్న పథకాలతోపాటు, ప్రభుత్వ పనితీరుపైనా ప్రజల నుంచి అభిప్రాయాలు సేకరిస్తూ.. వారిలో 80 శాతం సంతృప్తి తీసుకురావడమే లక్ష్యంగా పని చేస్తున్నామని తెలిపారు. రాష్ట్రం మొత్తం 20 వేల నిఘా కెమెరాలు ఏర్పాటు చేసి శాంతి భద్రతల మొదలు, పారిశుఽధ్యం, పచ్చదనం వరకు రియల్‌టైమ్‌లో పర్యవేక్షిస్తున్నామన్నారు. ఈ సందర్భంగా బ్లెయిర్‌ను చంద్రబాబు శాలువా కప్పి సన్మానించారు. లేపాక్షి నంది, అరకు-ఆర్గానిక్‌ కాఫీ ప్యాకెట్లను బ్లెయిర్‌కు బహుమానంగా ఇచ్చారు. అనంతరం ఆయనకు విందు ఇచ్చారు. ఉన్నతాధికారులు కూడా పాల్గొన్నారు.

ఆంధ్రప్రదేశ్‌కు జీవన్మరణ సమస్యగా మారిన పోలవరం ప్రాజెక్టు నిర్మాణం విషయంలో కేంద్ర ప్రభుత్వం ఎన్ని కుట్రలు చేసి ఆపటానికి ప్రయత్నాలు చేస్తుందో ముఖ్యమంత్రి చంద్రబాబు చెప్పారు. పోలవరం పై కేంద్ర ప్రభుత్వం నిర్లక్ష్యంగా వ్యవహరిస్తోందని సీఎం చంద్రబాబు ఆగ్రహం వ్యక్తం చేశారు. కేంద్రానికి మనసు లేదని, పోలవరం శాస్వతంగా ఆగిపోయే కుట్ర జరుగుతుందని, అందుకే భారతదేశంలోనే అత్యున్నతమైన, ప్రతిష్ఠాత్మకమైన ఈ ప్రాజెక్టుకు డిజైన్లు, తుది అంచనాలను కేంద్రం ఆమోదించడం లేదని విమర్శించారు. సంవత్సరం క్రితం కాంట్రాక్టర్ ను మార్చటం దగ్గర నుంచి, డీపీఆర్ - 2 ఆమోదించకుండా కాలయాపన చేస్తున్న ప్రాతి విషయం చెప్పారు. పోలవరం డిజైన్ అనుమతులు ఎలా కాలయాపన చేస్తుంది వివరించారు. ఖర్చు రాష్ట్రం పెట్టుకుంటుంటే, కేంద్రం అవి ఇవ్వటానికి సంవత్సరాలు తీసుకుంటుందని, దీని వల్ల రాష్ట్రం పై వడ్డీ భారం పడుతుందని అన్నారు. గడ్కరీ పోలవరం వచ్చిన సందర్భంలో, ముందుగా 10 వేల కోట్లు ఇవ్వమంటే, ఇస్తామని చెప్పి వెళ్లిపోయారని, ఇప్పటి వరకు ఏమి ఇవ్వలేదని, మన పనులు ఆపకుండా, మన నిధులు ఖర్చు పెడుతున్నామని అన్నారు.

పోలవరం కాంక్రీట్‌ పనుల్లో ప్రపంచ రికార్డు సాధించిన నేపథ్యంలో సోమవారం పోలవరం ప్రాజెక్టు ప్రాంతంలో ఆయన పైలాన్‌ ఆవిష్కరించారు. జాతీయ మీడియా ప్రతినిధులతోనూ ప్రత్యేకంగా మాట్లాడారు. ఆ వివరాలు ఆయన మాటల్లోనే... ‘పోలవరం కాంక్రీట్‌ పనుల్లో ప్రపంచ రికార్డు సాధించడం చాలా సంతోషంగా ఉంది. 24 గంటల్లో నిర్విరామంగా 32,315.5 క్యూబిక్‌ మీటర్ల కాంక్రీట్‌ వేసి ప్రపంచానికి తెలుగువారి సత్తా చూపాం. మరెవరూ ఈ రికార్డును బ్రేక్‌ చేయలేరు. ప్రాజెక్టు సామర్థ్యం, సమయం దృష్టిలో ఉంచుకుని ఈ విషయం చెబుతున్నాను. ఇది ఒక్క రోజులోనే సాధించిన విజయం కాదు. ప్రతి సోమవారాన్ని పోలవారంగా మార్చేసి సమీక్షిస్తున్నా. సీడబ్ల్యూసీ, పీపీఏతోపాటు ప్రాజెక్టు నిర్మాణంలో సహకరించినవారందరికీ ధన్యవాదాలు. డయాఫ్రమ్‌వాల్‌ విషయంలో నిర్ణయం తీసుకోకుంటే ఈ రోజు ప్రాజెక్టు నిర్మాణం జరిగేది కాదు. కెల్లర్‌, ఎల్‌అండ్‌టీ, నవయుగ వంటి సంస్థలు వెనక్కు తగ్గితే ఈ దశకు వచ్చేది కాదు. నవయుగ ఒక యాగంలా ప్రతిరోజూ పని చేస్తోంది. ఈ ప్రాజెక్టు దేశానికే తలమానికం. 670 అవార్డులు వచ్చినా రాని తృప్తి పోలవరం ప్రాజెక్టుతో వచ్చింది. మార్చిలో 65,000 క్యూబిక్‌ మీటర్ల బెంచ్‌మార్కును సాధించాలి. రాష్ట్రానికి జీవన రేఖలాంటి ఈ ప్రాజెక్టుకు కేంద్రం నిధులు విడుదల చేయకపోవడంపై చాలా అసంతృప్తితో ఉన్నాం."

"ప్రాజెక్టు తుది అంచనాలో రూ.33,000 కోట్లు భూసేకరణ, సహాయ పునరావాసానికి, రూ11,000 కోట్లు ప్రధాన ప్రాజెక్టుకు, రూ.45,000 కోట్లను కుడి, ఎడమ పవర్‌ హౌస్‌లకు చెల్లించాలి. పెరిగిన భూమి ధరలు చెల్లించడం లేదు. రూ.58,000 కోట్ల అంచనా కేంద్రం వద్ద పెండింగ్‌లో ఉంది. ప్రాజెక్టు విషయంలో పీపీఏ, సీడబ్ల్యూసీ సహకరించాయి. కేంద్రానికే దయలేదు. జాతీయ ప్రాజెక్టుగా డీపీఆర్‌ను ఆమోదించండి. కాలయాపన చేస్తే జాతి క్షమించదు. మేం ఈ ప్రాజెక్టును ఆపేస్తే ఆదే ఈ ప్రాజెక్టుకు ముగింపు అవుతుంది. 2019 జూన్‌ నాటికి గ్రావిటీతో నీళ్లిస్తాం. భవిష్యత్తులో ఐదు నదులను అనుసంధానం చేస్తాం. ఎక్కడ కరువుంటే అక్కడకు నీరు పంపొచ్చు. 24 ప్రాజెక్టులు త్వరలోనే జాతికి అంకితమిస్తాం. 2019 జూన్‌లో వర్షాలు పడగానే పోలవరం నుంచి నీళ్లిస్తాం’ అని తెలిపారు.

జాయింట్ ఫాక్ట్ ఫైండింగ్ కమిటీ అంటూ జనసేన అధినేత పవన్ కళ్యాణ్ చేసిన హడావిడి అందరూ చూసాం.. అందులో కేంద్రం, మన రాష్ట్రానికి అన్యాయం చేసింది అని, 75 వేల కోట్లు రాష్ట్రానికి రావాలని తేల్చారు... అందులో లోక్‌సత్తా వ్యవస్థాపకుడు జయప్రకాశ్ నారాయణ కూడా ఒక భాగస్వామిగా ఉన్నారు... అయితే, ఒకే ఒక ప్రెస్ మీట్ పెట్టి, జాయింట్ ఫాక్ట్ ఫైండింగ్ కమిటీ రిపోర్ట్ వివరాలు చెప్పిన పవన్ కళ్యాణ్, తరువాత ఆ విషయం మర్చిపోయారు... అనూహ్యంగా, మోడీని ఒక్క మాట కూడా అనకుండా, కేంద్రం పై పోరాడుతున్న చంద్రబాబు పై రివర్స్ అయ్యారు... అంతే కాదు, మార్చ్ నెల నుంచి ఎన్నో మీటింగ్ లు పెట్టినా, జాయింట్ ఫాక్ట్ ఫైండింగ్ కమిటీ రిపోర్ట్ లోని అంశాలు కనీసం ప్రస్తావించ లేదు...

అసలు జాయింట్ ఫాక్ట్ ఫైండింగ్ కమిటీ రిపోర్ట్ అనేది, మర్చిపోయారు... తరువాత ఏమి చెయ్యాలి అనే కార్యాచరణ లేదు... దీంతో ఆ కమిటీలో జయప్రకాశ్ నారాయణ లాంటి పెద్దలు తీవ్ర మనస్తాపానికి గురయ్యారు... పవన్ కళ్యాణ్ రాజకీయ గేమ్ ఆడాడు అని, కేంద్రం ఆడించిన డ్రామా అని గుర్తించారు... దీంతో జయప్రకాశ్ నారాయణ స్వతంత్ర నిపుణుల బృందం ఏర్పాటు చేసారు... ఇందులో అందరు ఐఏఎస్ లు, ఐపీఎస్ లు, నిపుణులు మాత్రమే ఉన్నారు... జాయింట్ ఫాక్ట్ ఫైండింగ్ కమిటీలాగ, ఉండవల్లి, పవన్ కళ్యాణ్ లాంటి స్వార్ధ పరులని ఇందులో తీసుకోలేదు.. తాజాగా జేపీ, ఈ కమిటి రిపోర్ట్ బయట పెట్టారు. రాష్ట్ర విభజన చట్టంలోని హామీల అమలు అంతంత మాత్రంగానే జరిగిందని, ఇంకా చాలా నిధులు ఆంధ్రప్రదేశ్‌కు రావలసి ఉందని నిపుణుల కమిటీ వెల్లడించింది. హామీలు యథాతథంగా అమలు జరిగితే పోలవరం ప్రాజెక్టు నిధులు మినహా ఇంకా రాష్ర్టానికి రూ.75 వేల కోట్లు రావలసి ఉంటుందని స్పష్టంచేసింది.

విభజన చట్టంలో సంపూర్ణంగా అమలు కావాల్సిన అంశాలు, బిల్లు చర్చ సందర్భంగా రాజ్యసభలో ఇచ్చిన హామీల అమలుపై లోతైన అధ్యయనం చేసిన జయప్రకాష్‌ నారాయణ్‌ ఆధ్వర్యంలోని నిపుణుల కమిటీ పది ముఖ్యమైన అంశాలపై సమగ్ర నివేదిక విడుదల చేసింది. విభజనతో నష్టపోయిన రాష్ట్రాన్ని కేంద్రం ఉదారంగా ఆదుకోవాలని సూచించింది. కొన్ని హామీల అమలుకు కేంద్రం చూపుతున్న కారణాలు సహేతుకం కావని పేర్కొంది. విభజనకు ముందు తలసరి ఆదాయంలో దక్షిణాదిలో ఆంధ్రప్రదేశ్‌ అగ్రస్థానంలో ఉండగా... విభజన అనంతరం 13 జిల్లాల ఆంధ్రప్రదేశ్‌ అట్టడుగున నిలిచిందని తెలిపింది. కేంద్రం గ్రాంట్లు, ప్రత్యేక సాయం రూపంలో నిధులివ్వాలని సూచించింది. ప్రత్యేక హోదా బదులుగా ఇస్తామన్న ప్రత్యేక సాయం.. పేరుకే తప్ప అమల్లో ఏ రకంగా ఉపయోగం లేదని అభిప్రాయపడింది. ఎవరికీ ఇబ్బంది లేకుండా ఎలా అమలు చేయొచ్చో వివరించింది. రెవిన్యూ లోటుపై కేంద్రం వాదన ఎలా తప్పో కుండబద్దలు కొట్టినట్లు చెప్పింది. కేంద్రాన్ని ఎందగాట్టాటమే కాదు, ఎలా చెయ్యాలో కూడా చెప్పి, సంపూర్ణ నివేదిక ప్రజల ముందు ఉంచుంది.