news

కర్నూలు జిల్లా ఓర్వకల్లు విమానాశ్రయంలో ట్రయల్ రన్ విజయవంతమైంది. హైదరాబాద్ బేగంపేట విమానాశ్రయం నుంచి పయనమైన విమానం ఓర్వకల్లు గ్రీన్ ఫీల్డ్ ఎయిర్‌పోర్టులో విజయవంతంగా ల్యాండ్ అయింది. జనవరి 7 నుంచి ఈ విమానాశ్రయం ప్రయాణికులకు అందుబాటులోకి రానుంది. సీఎం చంద్రబాబు చేతుల మీదుగా జనవరి 7న ప్రారంభం కానున్న ఈ ఎయిర్‌పోర్టు రాయలసీమలో నాలుగో ఎయిర్‌పోర్టుగా రికార్డులకెక్కనుంది. ఇప్పటికే పుట్టపర్తి, రేణిగుంట, కడపలో విమానాశ్రయాలు ఉన్న సంగతి తెలిసిందే. ఓర్వకల్లు ఇండస్ట్రియల్ హబ్‌ కేంద్రంగా ఔత్సాహిక ప్రారిశ్రామికవేత్తలు రావాలంటే రవాణా మెరుగుపడాలని ఎయిర్‌పోర్టు నిర్మాణానికి సీఎం చంద్రబాబు శ్రీకారం చుట్టారు.

రాష్ట్ర ప్రభుత్వం 999.50 ఎకరాలను ఆంధ్రప్రదేశ్‌ ఎయిర్‌పోర్టు డెవలప్‌మెంట్‌ అధారిటీకి కేటాయించింది. రూ.90.5 కోట్లతో 2017 జూన్‌లో పనులు చేపట్టారు. కీలకమైన రన్‌వే, అప్రాన్‌, టర్మినల్‌, టవర్‌ భవనం, అప్రోచ్‌ రోడ్ల నిర్మాణాలు ఇప్పటికే పూర్తయ్యాయి. ఓర్వకల్లు గ్రీన్‌ఫీల్డ్‌ విమానాశ్రయాన్ని మరో నెల రోజుల్లో పూర్తిస్థాయిలో అందుబాటులోకి తీసుకురానున్నారు.దేశీయ విమానసేవల్లో భాగంగా ఓర్వకల్లు నుంచి విజయవాడ, చెన్త్నె, బెంగళూరుకు సర్వీసులు తిరిగే అవకాశం ఉంది. రాష్ట్రంలోని పలు ప్రాంతాల్లో విమానాశ్రయాల ఏర్పాటుకు ప్రభుత్వం నాంది పలికింది. రాష్ట్ర రాజధాని అమరావతికి వాయు మార్గంలో చేరుకోవాలనే లక్ష్యంతో పనిచేస్తున్నారు. ఏటీసీ కేంద్రం పనులు ముగిసిన తర్వాత
ఓర్వకల్లు నుంచి ఏప్రిల్‌ నెలలో, విజయవాడ, చెన్నైలకు విమానాలు తిరిగేలా చర్యలు తీసుకుంటున్నారు.

కర్నూలు జిల్లా ఓర్వకల్లు సమీపంలో గ్రీన్‌ఫీల్డ్‌ విమానాశ్రయం నిర్మాణానికి చంద్రబాబు జూన్ 2017లో శంకుస్థాపన చేశారు. ఈ విమానాశ్రయంతో కర్నూలు జిల్లా నుంచి వివిధ నగరాలకు విమానం ద్వారా వెళ్లే వెసులుబాటు ఉంటుందన్నారు. ఓర్వకల్లులో ఏర్పాటు చేస్తోన్న గ్రీన్‌ఫీల్డ్‌ విమానాశ్రయం మూడు విభాగాలుగా ఉంటుందని అధికారులు తెలిపారు. మొదటి విభాగంలో ఎనిమిది విమానాలను నిలుపుకొనేందుకు అవకాశం ఉంటుంది. మరో విభాగంలో మూడు విమానాలు, ఇంకో విభాగంలో మరమ్మతులకు గురైన విమానాలు ఆపేందుకు అవకాశం ఉంటుంది. విమాన రాకపోకలు పెరిగాక మరో విభాగం ఏర్పాటు చేయనున్నారు.

ఆంధ్రప్రదేశ్ ముఖ్యమంత్రి చంద్రబాబు అంటే ఒక బ్రాండ్.. 1995లో ఆయన ముఖ్యమంత్రిగా ఉంటూ, ఐటిని ప్రవేశపెట్టిన విధానం, ఐటిని పాలనలో వాడటం, ఇవన్నీ చూసి ప్రపంచ దేశాలే ఆశ్చర్యపోయాయి. అప్పట్లో రాష్ట్ర పర్యటనకు వచ్చిన టోనీ బ్లెర్, హైదరాబాద్ లో ఆన్లైన్ లో, డ్రైవింగ్ లైసెన్స్ తీసుకొచ్చిన విధానం చూసి ఆశ్చర్యపోయి, స్వయంగా పరిశీలించారు. ఇక ఐటిలో వేసిన అడుగులు, చంద్రబాబు పరిపాలన స్టైల్, ఆయన కష్టపడే తత్త్వం, ఆయన విజన్, ఇవన్నీ ఒక సెన్సేషన్. ఎక్కడో మారుమూల ఉండే ఏపిలోని సైబెరాబాద్ వరల్డ్ డెస్టినేషన్ అయ్యింది అంటే, అది ఆ నాడు చంద్రబాబు చూపించిన చొరవ. దేశాధినేతలు కూడా ఆయన అభిమానులు అయ్యారు అంటే, అది చంద్రబాబు విజన్.

ఎంత మంది ఎంత హేళన చేసిన, అది చరిత్ర. చెరిపేస్తే, చింపేస్తే, పోదు. ఇది నిజం అని మరోసారి రుజువైంది. ఉత్తరప్రదేశ్ లో జనవరి 15 నుంచి ప్రయాగలో జరిగే కుంభమేళ ఉత్సవంలో పాల్గొనాలని ముఖ్యమంత్రి చంద్రబాబునాయుడుకు ఉత్తరప్రదేశ్ ప్రభుత్వం నుంచి ఆహ్వానం అందింది. యూపీ సీఎం యోగీ ఆధిత్యనాధ్ తరఫున ఆ రాష్ట్ర పరిశ్రమల శాఖ మంత్రి సతీష్ మహనా ఉండవల్లిలోని నివాసంలో ముఖ్యమంత్రి చంద్రబాబునాయుడును కలసి ఆహ్వానం అందజేశారు. వారణాసిలో జనవరి 21 నుంచి మూడురోజులపాటు జరిగే ప్రవాస భారతి దినోత్సవానికి కూడా హాజరు కావాలని ముఖ్యమంత్రి చంద్రబాబునాయుడుకు ఆహ్వానం అందించారు.

ఈ సందర్భంగా యూపీ మంత్రి సతీష్ మహనా మాట్లాడుతూ అభివృద్ధి , సంక్షేమ కార్యక్రమాల అమలులో "మీరే నాకు స్పూర్తి" అంటూ ముఖ్యమంత్రి చంద్రబాబునాయుడును ప్రశంసలతో ముంచెత్తారు. "ప్రజలకు సేవ చేయాలన్న తపనతో నిరంతరం విశ్రమించని నేత మీరని" అభినందించారు. పాలన ద్వారా అనునిత్యం ప్రజలకు మంచి చేయడానికి మీరు పడుతున్న తపన ఆదర్శనీయమన్నారు."ఆనాడు మీరు హైదరాబాద్ లో చేసిన అభివృద్ధిని స్పూర్తిగా తీసుకుని తాను గతంలో యూపీ పట్టణాభివృద్ధి శాఖ మంత్రిగా ఉన్నప్పుడు అమలు చేశానని గుర్తు చేసుకున్నారు. " మీహయాంలో రాష్ట్రాభివృద్ధి, పాలనా వ్యవహారాల్లో సాధిస్తున్న విధానంతో మిమ్మలను సీఈవొ అని ముద్దుగా పిలుచుకునే వారమని స్మరించుకున్నారు. ఈ సమావేశంలో సీఎం కార్యదర్శులు రాజమౌళి, సాయి ప్రసాద్ లు పాల్గొన్నారు.

ఆంధ్రప్రదేశ్‌ రాష్ట్ర స్థాయి ఫోరెన్సిక్‌ సైన్సు ప్రయోగశాల సేవలు మంగళవారం నుంచి అమరావతి కేంద్రంగా ప్రారంభం కానున్నాయి. విభజన చట్టంలోని పదో షెడ్యూల్‌లో ఉన్న ఈ సంస్థ సిబ్బంది విభజన ఇటీవల పూర్తయ్యింది. ఆంధ్రప్రదేశ్‌కు మొత్తం 117 పోస్టులను కేటాయించగా...అందులో 72 పోస్టులు ఖాళీగా ఉన్నాయి. ప్రస్తుతం 45 మంది సిబ్బందితోనే ఇక్కడ కార్యకలాపాలు నిర్వహించనున్నారు. త్వరలో మరో 30 మందిని పొరుగు సేవల ప్రాతిపదికన నియమించుకోనున్నారు. మంగళగిరి ఏపీ పోలీసు పటాలంలోని సాంకేతిక సౌధం భవనంలో ఈ ప్రయోగశాల కోసం తాత్కాలికంగా రెండంతస్తుల్లో 25 వేల చదరపు అడుగుల నిర్మిత ప్రాంతాన్ని కేటాయించారు.

రాజధాని నగరంలో నిర్మిస్తున్న శాశ్వత భవనం నిర్మాణం పూర్తయ్యేంత వరకూ సాంకేతిక సౌధంలోనే రాష్ట్ర స్థాయి ఫోరెన్సిక్‌ ప్రయోగశాల నడవనుంది. దీనికి సంబంధించి కావాల్సిన అన్ని రకాల పరికరాలను ఇప్పటికే కొనుగోలు చేశామని ఏపీ ప్రభుత్వ ఫోరెన్సిక్‌ సలహాదారు డా.కేపీసీ గాంధీ తెలిపారు. దాదాపు రూ.30 కోట్ల విలువైన అత్యాధునిక పరికరాలతో ఈ ప్రయోగశాలను ఏర్పాటు చేసినట్లు వివరించారు. రాష్ట్ర స్థాయి ఫోరెన్సిక్‌ ప్రయోగశాలకు ఏపీకి సంబంధించి సంవత్సరానికి సగటున 15 వేల కేసులకు చెందిన నమూనాలు వెళ్తున్నాయి. ఇప్పటివరకూ వీటిని ఇక్కడి నుంచి హైదరాబాద్‌కు తీసుకెళ్లడం ప్రయాసగా ఉండేది. ఎంతో సమయం కూడా వృథా అయ్యేది. ఇకపై అలాంటి పరిస్థితి ఉండదు.