news

‘కేసీఆర్‌ హుందాతనాన్ని కోల్పోయి చాలా దారుణంగా మాట్లాడారు. వాడే భాష కూడా అసభ్యంగా.. నాగరిక ప్రపంచం అంగీకరించని రీతిలో ఉంది.. దీన్ని తీవ్రంగా ఖండిస్తున్నా.. గర్హిస్తున్నా..’ అని ఆంధ్రప్రదేశ్‌ ముఖ్యమంత్రి చంద్రబాబునాయుడు పేర్కొన్నారు. ఆంధ్రప్రదేశ్‌ అభివృద్ధి కాకూడదనే లక్ష్యంతోనే మోదీ, కేసీఆర్‌, జగన్‌ కలిసి కుట్రలు, కుతంత్రాలు చేస్తున్నారని ధ్వజమెత్తారు. ఆదివారం శ్వేతపత్రం విడుదల సందర్భంగా జరిగిన విలేకరుల సమావేశంలో తెలంగాణ ముఖ్యమంత్రి కేసీఆర్‌ చేసిన వ్యాఖ్యలపై, వాడిన భాషపై చంద్రబాబు మండిపడ్డారు. ‘ఆయన ఒడిశాకు.. పశ్చిమబెంగాల్‌కు వెళ్లారు.. అక్కడ ఏమీ అనుకూలించలేదని నిరాశకు గురైతే నేనేం చేస్తాను.. నాకేం సంబంధం...’ అని పేర్కొన్నారు. అలాగే పదే పదే ఓటుకు నోటు పై కేసీఆర్ బెదిరించటం పై కూడా మాట్లాడారు.

"మాట్లాడితే ఓటుకు నోటు అంటున్నారు.. దానిపై కొంత మంది కోర్టుకు వెళ్లారు.. దాన్ని కొట్టేశారు.. ఏముంది దీనిలో కేసే లేదు.. ఆయన మాటలే అయినా ఇందులో విషయం లేదన్నారు.. అయినా రుబాబు చేయాలనుకుంటున్నారా? బెదిరించడం.. బ్లాక్‌మెయిల్‌ చేయడం.. ఏంటి ఇదంతా? కేసులు పెడతారా? మీరొక కేసు పెడితే.. నేను నాలుగు కేసులు పెడతా? ఫోన్‌ ట్యాపులు ఉన్నాయి.. ఇంకొకటి ఇంకొకటి చాలా ఉన్నాయి. అన్నీ బయటకు వస్తాయి. వివాదాలెందుకని నేను హుందాతనంగా ఉంటుంటే.. వీళ్లే తెలివైన వారిమన్నట్లు ఇష్ట ప్రకారం మాట్లాడి జనాల్ని తప్పుదారి పట్టించాలనుకుంటున్నారు. ఎలుగుబంటి సూర్యనారాయణ, ఈఎస్‌ఐ కేసుల నుంచి తప్పించి పెద్ద సాయం చేశారు. మోదీ పని అదే కదా? కేసు లేకపోతే పెడతారు.. ఉంటే తప్పిస్తారు.. తన దగ్గరకు వచ్చేలా బ్లాక్‌మెయిల్‌ చేస్తారు.. లాలూ ప్రసాద్‌ యాదవ్‌ మీద తప్పుడు కేసులు పెట్టించారని సీబీఐ డైరెక్టరే చెప్పారు." అని చంద్రబాబు అన్నారు.

‘మోదీ, ఆయన కలిసి దేశాన్ని మోసం చేద్దామనుకున్నారు.. ఎవరి సహకారం లభించడం లేదు. అక్కసుతో మనపై పడుతున్నారు...’ అని విమర్శించారు. ‘దేశ ప్రయోజనాల కోసం.. ప్రజాస్వామ్యాన్ని పరిరక్షించుకోవాలనే ఆలోచనతో.. మోదీ చేసే అన్యాయాలపైనే పోరాడుతున్నా.. నేను ఎక్కడా మాట తూలనప్పుడు కేసీఆర్‌ ఇష్టానుసారం మాట్లాడటం ఏమిటి? భగవంతుడు నోరిచ్చాడని పారేసుకోవడం తప్పు కదా?...’ అని ఆగ్రహం వెలిబుచ్చారు. ‘ఎన్ని సంక్షోభాలు చూడలేదు.. మోదీతోనే పోరాటం చేస్తున్నా.. నన్ను మానసికంగా దెబ్బతీసే శక్తి ఎవరికీ లేదు...’ అని వివరించారు. ‘నా రాజకీయ జీవితమంతా విలువలతో కూడినదే. కష్టాలొచ్చినా... ఇబ్బందులొచ్చినా.. అవతలి వాళ్లు పరుషంగా మాట్లాడినా.. చులకనగా, హేళనగా మాట్లాడినా.. ఎప్పుడూ హుందాతనం కోల్పోలేదు. అదే సమయంలో సమస్యలపై రాజీ పడలేదు....‘ అని స్పష్టం చేశారు. ‘నేనెప్పుడూ వ్యక్తిగతంగా ఎవరి మీదకు పోను.. చెప్పాల్సి వచ్చినప్పుడు గట్టిగా చెప్పాల్సి వస్తోంది. గెలిచిన తర్వాత హుందాతనం పెరగాలి..’ అని ముఖ్యమంత్రి పేర్కొన్నారు.

ఏపీలో సచివాలయం నిర్మాణానికి ముప్పై మూడు వేల ఎకరాలను రైతులు ఇచ్చారని, తనపై విశ్వాసంతోనే వారు ఇచ్చిన విషయాన్ని ఏపీ సీఎం చంద్రబాబు గుర్తుచేశారు. ఈ విషయమై కూడా కేసీఆర్ విమర్శలు చేస్తున్నారని, దీని నిర్మాణానికి రూ.250 కోట్లు అయితే సరిపోతుందంటున్న ఆయన ఇంటికి మాత్రం రూ.300 కోట్లు కావాలా? అని ఘాటుగా ప్రశ్నించారు. ప్రజలకు ఒక పవిత్రమైన దేవాలయం సెక్రటేరియట్ అని, దాన్ని చూడగానే గౌరవం కలిగేలా ఉండాలని అన్నారు. కేసీఆర్ కు ఎక్కువ మెచ్యూరిటీ ఉందని మోదీ ఇటీవల చెప్పిన విషయాన్ని ఈ సందర్భంగా చంద్రబాబు ప్రస్తావించారు.

‘ఆ మెచ్యూరిటీ ఏంటంటే.. ఇద్దరు ఎంపీలతో తెలంగాణ సాధించడం. ఎంత తెలివైన వాడండి! కాంగ్రెస్ పార్టీకి ఏం చెప్పాడండి? తెలంగాణ రాష్ట్రం ఇవ్వగానే కాంగ్రెస్ పార్టీలో టీఆర్ఎస్ ను కలిపేస్తానని చెప్పారు. అదే ఆయన మెచ్యూరిటీ’ అని చంద్రబాబు వ్యంగ్యాస్త్రాలు సంధించారు. ‘మోదీ గాడు’ అంటే మోదీకి బాధ లేదు.. అంటే, దాని అర్థమేంటి? లాలూచీ రాజకీయాలేగా? అని విమర్శించారు. ఇష్టపడే ఇద్దరూ తిట్టుకుంటున్నారని, మళ్లీ ఇధ్దరూ కలిసి కుట్రలు, కుతంత్రాలు చేస్తున్నారని ఆరోపించారు. తనకేమో భాష రానట్టు.. కేసీఆర్ కు ఏదో బాగా వచ్చన్నట్టు, ఆక్స్ ఫర్డ్ యూనివర్శిటీలో చదువుకుని వచ్చినట్టు మాట్లాడుతున్నాడని సీఎం చంద్రబాబు విమర్శలు చేశారు. అమరావతిలో ఈరోజు ఆయన మీడియాతో మాట్లాడుతూ, ‘నాతో ‘జై తెలంగాణ’ అనిపించానని అంటున్నాడు. ఆయన అనిపించడమేంటి? తెలంగాణతో నేనెప్పుడు విభేదించాను?

ఆ రోజున రాష్ట్రం కోసం సంపద సృష్టించాను. విభజన కారణంగా ఆ సంపద ఇంకో రాష్ట్రానికి పోయినప్పుడు చాలా మంది నన్ను ‘మీకు బాధగా ఉందా?’ అని అడిగారు. నేను చెప్పాను, ‘నా కెప్పుడూ బాధ లేదు. తెలుగు జాతి కోసం సంపద సృష్టించాను.. ఎంజాయ్ చేస్తారు. భగవంతుడు నాకు శక్తిని ఇచ్చాడు. హైదరాబాద్ కు ఈక్వల్ గా అభివృద్ధి చేస్తాను’ అని చెప్పాను. నరేంద్ర మోదీ పన్నెండు సంవత్సరాలు ముఖ్యమంత్రిగా చేశారు. ముఖ్యమంత్రిగా ఏం చేశారు? ఏమీ చేయలేదు. అహ్మదాబాద్ లో ఏముంది? ఒక్క ఐటీని ప్రమోట్ చేయలేక పోయారు. నాలెడ్జి ఎకానమీ ఏమీ చేయలేకపోయారు. ఇప్పుడు, ఆంధ్రప్రదేశ్ లో ఒక్క నాలుగేళ్లలోనే ఎకో సిస్టమ్ క్రియేట్ అవుతోంది. హార్డ్ వేర్, ఎలక్ట్రానిక్స్,ఫుడ్ ప్రాసెసింగ్, ఆటోమొబైల్, ఇండస్ట్రీస్ అన్నీ వస్తున్నాయి. వీళ్లు నన్ను ఇబ్బంది పెట్టి ఎట్టి పరిస్థితిలో అమరావతి రాకుండా ఉండాలని ప్రయత్నం చేశారు. ఈరోజున వారు డబ్బులు ఇవ్వకపోయినా అమరావతి రియాల్టీ అవుతుంది. వాళ్లకు అసూయ. ప్రధానమంత్రి మన మీద చాలా కక్ష గట్టారు’ అని బాబు విమర్శించారు.

తెలంగాణ ముఖ్యమంత్రి కేసీఆర్ శనివారం విలేకర్ల సమావేశంలో మాట్లాడుతూ ముఖ్యమంత్రి చంద్రబాబుకు రిటర్న్ గిఫ్ట్ ఇస్తానంటూ మరోసారి అన్నారు. కాగా దీనిపై చంద్రబాబు స్పందించారు. కేసీఆర్ తనకు రిటర్న్ గిఫ్ట్ ఇస్తామంటున్నారని, అయితే అది ఇప్పటికే వైసీపీ నేతలకు ఇచ్చారని అన్నారు. ఆదివారం మీడియా సమావేశంలో మాట్లాడుతూ వైసీపీ నేతలకు కాంట్రాక్టుల రూపంలో కేసీఆర్ చాలా గిఫ్ట్‌లు ఇచ్చారని, దీనితో పాటు డబ్బులు ఇచ్చారని ఆయన ఆరోపించారు. కేసీఆర్‌కు బీజేపీ, మోదీ ఆదర్శమని చంద్రబాబు ఆరోపించారు. డొంక తిరుగుడు రాజకీయాలు కేసీఆర్ మానుకోవాలని సూచించారు. ఒడిశా, బెంగాల్‌ వెళ్లిన కేసీఆర్‌కు ఏమీ జరగకపోవడంతో ఇలా మాట్లాడుతున్నారని అన్నారు.

తనని, మోదీని కేసీఆర్ తిట్టారని.. నోరు ఉందికదా అని ప్రతి ఒక్కరిని ఇలా తిడితే ఎలా అని ప్రశ్నించారు. ఫోన్ ట్యాపింగ్ లాంటి చాలా వ్యవహారాలు ఉన్నాయని, కేసీఆర్ బ్లాక్‌మెయిలింగ్‌కు భయపడేది లేదని పేర్కొన్నారు. తాను నిప్పులా బతికానని, రాష్ట్రం కోసం నిరంతరం ఫైట్ చేస్తానని చంద్రబాబు అన్నారు. నోరుందని పారేసుకోకూడదని హితవు పలికారు. ఏపీలో మోదీ, జగన్‌, కేసీఆర్‌ కలిసి పోటీ చేస్తానంటే చేయండి.. అంతేగానీ దాగుడు మూతలు ఎందుకు అని ప్రశ్నించారు. కేసీఆర్‌ మిడిల్‌ మోదీ అయితే, జగన్‌ జూనియర్‌ మోదీ అని ఎద్దేవాచేశారు. ప్రజావేదికలో ఎనిమిదో శ్వేతపత్రం విడుదల సందర్భంగా ఆయన మీడియాతో మాట్లాడారు. శనివారం మీడియాతో సీఎం కేసీఆర్‌ చేసిన వ్యాఖ్యలపై స్పందిస్తూ ఆయన ఈ సందర్భంగా మోదీ, కేసీఆర్‌, జగన్‌పై విమర్శలు గుప్పించారు. తనకు చేసింది చెప్పడమే అలవాటు అని, పద్ధతిలేని రాజకీయాలు ఏనాడు చేయలేదని తెలిపారు.

‘‘కేసీఆర్‌ ఎక్కడి నుంచి వచ్చారో ఒక్కసారి తెలుసుకోండి. 2004లో కాంగ్రెస్‌తో, 2009లో తెలుగుదేశంతో పొత్తు కేసీఆర్‌ పెట్టుకోలేదా? తెలంగాణ ఇస్తే పార్టీని కాంగ్రెస్‌లో కలిపేస్తానని చెప్పారు. మరి ఏం చేశారు. ఎప్పటికి ఏది దొరికితే అది కేసీఆర్‌ మాట్లాడతారు. ఏపీకి వచ్చి మోదీ, జగన్‌, కేసీఆర్‌ కలిసి పోటీ చేయండి. దాగుడుమూతలు ఎందుకు? ఇక్కడున్న వారు కేసీఆర్‌కు కావాలి. మళ్లీ ఆంధ్రవాళ్లను తిట్టాలి. ఇదేం రాజకీయం. మోదీ నమ్మించి మోసం చేయడం వల్లే వ్యతిరేకించాం. అవిశ్వాస తీర్మానం, హోదా విషయంలో కాంగ్రెస్‌ సహకరించింది. అందుకే కాంగ్రెస్‌తో కలిశాం.