news

కియా రాకతో అనంతపురం ఎలా మారిపోయిందో, ఇప్పుడు కాకినాడ కూడా అలా మారే అవకాసం కనిపిస్తుంది. కాకినాడ ప్రత్యేక ఆర్థిక మండలి(సెజ్)లో మెగా పెట్రోకెమికల్ ప్రాజక్ట్ ఏర్పాటు ప్రతిపాదన ప్రభుత్వ పరిశీలనలో ఉంది. సచివాలయం 1వ బ్లాక్ మొదటి అంతస్తులోని ప్రభుత్వ ప్రధాన కార్యదర్శి సమావేశ మందిరంలో సీఎస్ అనిల్‌చంద్ర పునీఠ అధ్యక్షతన శుక్రవారం సాయంత్రం స్టేట్ ఇన్వెస్ట్‌మెంట్ ప్రమోషన్ కమిటీ స‌మావేశంలో ఈ ప్రాజక్ట్ విషయమై చర్చించారు. హల్డియా పెట్రోకెమికల్స్ సంస్థతో కలసి టీసీజీ రిఫైనరీ లిమిటెడ్ ఈ కెమికట్ మాన్యుఫ్యాక్చరింగ్ కాంప్లెక్స్ ప్రాజక్ట్ ని చేపట్టడానికి ముందుకు వచ్చినట్లు అధికారులు సీఎస్ కు వివరించారు.

ఆ సంస్థ ప్రతిపాదించిన ప్రకారం అయిదు ఏళ్లలో పూర్తి అయ్యే ఈ ప్రాజక్టుకు దశలవారీగా రూ.62 వేల కోట్ల పెట్టుబడి పెడతారని, ప్రత్యక్షంగా 5 వేల మందికి ఉపాధి లభిస్తుందని తెలిపారు. ఈ ప్రాజక్టుకు అవసరమైన 2500 ఎకరాల ప్రైవేటు భూములను ఆ సంస్థ కొనుగోలు చేస్తుందని చెప్పారు. ఈ సమావేశంలో ప్రవేట్ భూముల ధరలు, పెట్టుబడులు, జీఎస్టీ, బాహ్య మౌలిక సదుపాయాల అభివృద్ధి ఫండ్(ఇఐడిఎఫ్), కాపిటల్ ఇన్వెస్ట్ మెంట్, ఎక్సట్రనల్ కాపిటల్ ఇన్వెస్ట్ మెంట్, విద్యుత్ సబ్జిడీ తదితర అంశాలను చర్చించారు. రెవెన్యూ శాఖ ప్రత్యేక ప్రధాన కార్యదర్శులు డాక్టర్ మన్మోహన్ సింగ్, డాక్టర్ డి.సాంబశివరావు, ఆర్థిక శాఖ ప్రత్యేక ప్రధాన కార్యదర్శి ఎం.రవిచంద్ర, ఎనర్జీ, ఇన్ఫ్రాస్టక్చర్, ఇన్వెస్ట్‌మెంట్ ముఖ్య కార్యదర్శి అజయ్ జైన్, మున్సిపల్ పరిపాలన, పట్టణాభివృద్ధి శాఖ ముఖ్య కార్యదర్శి ఆర్.కరికాల వళవన్, పరిశ్రమలు, వాణిజ్య శాఖ కార్యదర్శి సాల్మన్ అరోకియా రాజ్ తదితరులు పాల్గొన్నారు.

కనకదుర్గా ఫ్లై ఓవర్‌ భవితవ్యంపై నెలకొన్న చిక్కుముడి వీడింది. ఆర్థిక సంక్షోభంలో మునిగిపోయిన కాంట్రాక్టు సంస్థ ‘సోమా’ను ఒడ్డున వేసేందుకు రాష్ట్ర ప్రభుత్వం చొరవ చూపింది. కేంద్రం నుంచి నిధుల విడుదలకు, రాష్ట్ర ప్రభుత్వం నుంచి నిధులు చెల్లించేందుకు మార్గం సుగమం చేసింది. మరోవైపు కార్మికులు కూడా పూర్తి స్థాయిలో సమ్మెను విరమించి విధులకు హాజరు కావటంతో దుర్గా ఫ్లై ఓవర్‌ పనులు తిరిగి పట్టాలెక్కాయి. తీవ్ర ఆర్థిక ఇబ్బందులను ఎదుర్కొంటున్న దుర్గా ఫ్లై ఓవర్‌ కాంట్రాక్టు సంస్థ కొద్దినెలలుగా కార్మికులకు సరిగా జీతాలు చెల్లించలేకపోతోంది. వరుసగా నాలుగునెలల నుంచి జీతాలను చెల్లించకపోవటంతో ఓపిక పట్టిన కార్మికులు మెరుపు సమ్మెకు దిగటంతో దుర్గా ఫ్లై ఓవర్‌ పనులు అర్థంతరంగా నిలిచిపోయాయి.

దీనిపై రాష్ట్ర ప్రభుత్వం వెంటనే స్పందించింది. ముఖ్యమంత్రి చంద్రబాబునాయుడు ఆదేశాలతో సోమా ప్రతినిధులను ఆగమేఘాల మీద గురువారం సాయంత్రం సచివాలయానికి పిలిపించారు. రాజధానిలో శంకుస్థాపనలు ఉన్నందున సీఎం వారితో సమావేశం కాలేకపోయారు. సీఎం పాల్గొనలేకపోయినా వ్యక్తిగత కార్యదర్శి రాజమౌళి సమక్షంలో అధికారులతో సమావేశం కావాలని సూచించారు. సోమా ఆర్థిక ఇబ్బందుల గురించి సీఎంవో అధికారులు ఆరా తీశారు. కేంద్ర ప్రభుత్వం దగ్గర రూ.6 కోట్ల బిల్లులకు సంబంధించి నిలిచిపోయాయని సోమా ప్రతినిధులు తెలిపారు. దీనిపై రీవాల్యుయేషన్‌ త్వరగా పూర్తిచేసి కేంద్ర స్థాయిలో మాట్లాడి త్వరగా బిల్లు మంజూరుకు కృషి చేస్తామని హామీ ఇచ్చారు.

శనీశ్వరాలయం దగ్గర చేపట్టిన వయాడక్ట్‌ పనులకు సంబంధించిన రూ.6.50 కోట్ల బిల్లులకు కూడా తమకు స్పష్టత లేదని కాంట్రాక్టు సంస్థ ప్రతినిధు అధికారుల దృష్టికి తీసుకొచ్చారు. ఈ పనుల వ్యయాన్ని రాష్ట్ర ప్రభుత్వం భరించాలని గతంలో నిర్ణయించటంతో అధికారులు కూడా సానుకూలంగా స్పందించారు. తక్షణం బిల్లులు పెట్టి క్లెయిమ్‌ చేసుకోవాల్సిందిగా కాంట్రాక్టు సంస్థ ప్రతినిధులకు సూచించారు. దీంతో సోమా సంస్థకు గొప్ప ఊరట లభించినట్టు అయింది.అతి త్వరలో కాంట్రాక్టు సంస్థకు అటు కేంద్ర బిల్లులు, ఇటు రాష్ట్ర బిల్లులు కలిపి రూ.12 కోట్లు సర్దుబాటయ్యే అవకాశం ఉంది. ఈ పరిణామాలతో కాంట్రాక్టు సంస్థ ‘సోమా’కు మరో ఊరట లభించింది. మెరుపు సమ్మెలోకి దిగిన కార్మికులు కూడా పట్టు సడలించారు. సోమా ప్రతినిధులు పండుగ లోపు అంటే జనవరి 10 వ తేదీన రెండు నెలల జీతాలు చెల్లిస్తామని హామీ ఇవ్వటంతో పూర్తి స్థాయిలో 450 మంది కార్మికులంతా సమ్మె విరమించారు.

ప్రైవేట్‌, కార్పొరేట్‌ ఆస్పత్రుల్లో ప్రసవాలు ఖరీదైన వైద్య చికిత్సగా మారింది. ఓ మాదిరి సౌకర్యాలు కల్గిన ప్రైవేట్‌ నర్సింగ్‌ హోమ్‌లోనూ సుఖ ప్రసవానికి రూ.15 వేలకుపైగా వసూలు చేస్తున్నారు. ఇక సిజేరియన్‌ చేస్తే రూ.30 వేల నుంచి రూ.50 వేల దాకా చెల్లించాల్సిందే. దీంతో పేద, మధ్య తరగతి గర్భిణులు ప్రైవేటు వైద్యానికి దూరమవుతున్నారు. ఎక్కువగా ప్రభుత్వ ఆస్పత్రులపై ఆధార పడ్డారు. ఈ నేపథ్యంలో రాష్ట్ర ప్రభుత్వం కీలక నిర్ణయం తీసుకుంది. ఎన్టీఆర్‌ వైద్య సేవ ద్వారా ప్రైవేట్‌ ఆస్పత్రుల్లో ఉచిత ప్రసవం పొందే అవకాశాన్ని కల్పించనుంది. ఇందుకు అయ్యే వ్యయాన్ని ప్రభుత్వమే ఆయా ఆస్పత్రులకు చెల్లించనుంది. దీన్ని జనవరి నుంచి అమలు చేయనున్నారు.

ఇప్పటికే గవర్నమెంట్ హాస్పిటల్స్ కి పేదలు కాకుండా, మధ్య తరగతి ప్రజలు కూడా వస్తున్నారు. ఇక్కడ వైద్య చికిత్స మెరుగ్గా ఉండటం, ఎన్టీఆర్‌ బేబి కిట్‌, రానుపోను అంబులెన్స్‌ ఏర్పాటు, జేఎస్‌వై పంపిణీ.. వంటి సౌకర్యాలు కల్పిస్తుండటం, ప్రైవేట్‌లో ఫీజులు చెల్లించలేక పోవడం.. వంటి కారణాలతో గవర్నమెంట్ హాస్పిటల్స్ కే ఎక్కువమంది వస్తున్నారు. తాజాగా ఎన్టీఆర్‌ వైద్య సేవ కింద ఉచిత ప్రసవాలను జత చేయడంపై హర్షం వ్యక్తమవుతోంది. గురువారం విడుదల అయిన ఉత్తర్వుల ప్రకారం, ఎన్టీఆర్‌ వైద్య సేవ పథకం కింద లబ్ధిదారులైన గర్భిణులకు నిర్వహించే వైద్య పరీక్షల నుంచి కాన్పు వరకు అన్నీ ఉచితంగా నిర్వహిస్తారు. పూర్తి ఉచితంగా లభించే ఈ సేవలకు సంబంధించి వైద్య ఆరోగ్య శాఖ ప్రత్యేక ప్రధాన కార్యదర్శి పూనం మాల కొండయ్య గురువారం జీవో జారీ చేశారు. ఈ సేవలకు సంబంధించిన ప్యాకేజీలను కూడా జీవోలో పొందుపరిచారు.

ప్రసూతి కాన్పు సేవలను ఎన్టీఆర్‌ వైద్య సేవ పథకం పరిధిలోకి చేర్చడంతో ప్రతి నెల గర్భస్థ శిశువు ఎదుగుల పరీక్షలతో పాటు గర్భిణులకు రక్త పరీక్షలు ఉచితంగానే నిర్వహిస్తారు. కాన్పు కోసం ప్రభుత్వ, ప్రైవేటు వైద్యశాలలకు తరలించేందుకు 108 వాహన సదుపాయం, డెలివరీ అయ్యాక ఇంటికి వెళ్లడానికి తల్లీ బిడ్డ ఎక్స్‌ప్రెస్‌ ద్వారా సేవలు అందిస్తారు. ప్రైవేటు వైద్యశా లల్లో ఉచితంగా కాన్పు, సిజేరియన్‌ ఆపరేషన్‌ పొందేందుకు గర్భిణులకు ఎన్టీఆర్‌ వైద్య సేవ కార్డు లేదా తెలుపు రంగు రేషన్‌ కార్డు ఉండాలి. ఏ ఆసుపత్రిలో పురుడు పోసుకోవాలనుకుంటున్నారో అక్కడ పేరు నమోదు చేయిం చుకోవాలి. సాధారణ ప్రసవంతో పాటు సిజేరియన్‌ కాన్పు చేసేందుకూ ప్రభుత్వం అవకాశం కల్పించింది. ఇది పక్కాగా అమలైతే తల్లీ బిడ్డ సంరక్షణకు ఎక్కువ అవకాశం కలుగుతుంది. మరణాల రేటు కూడా గణణీ యంగా తగ్గుతుందని ప్రసూతి వైద్య నిపుణులు చెబుతున్నారు.