news

రాజధాని అమరావతి నిర్మాణం ప్రపంచానికే తలమానికం కానుందని.. ముఖ్యమంత్రి చంద్రబాబునాయుడి శ్రమకు తగిన గుర్తింపు లభిస్తోందని సందర్శకులు కొనియాడారు. రాజధాని అమరావతి సందర్శనకు ఏపీ సీఆర్‌డీఏ శ్రీకారం చుట్టింది. శుక్రవారం కర్నూలు జిల్లా సంజామల మండలం, విజయనగరం జిల్లా కురుపాం మండలం, చిత్తూరు జిల్లా శాంతిపురం, రామకుప్పం మండలం, ప్రకాశం జిల్లా త్రిపురాంతకం, తూర్పుగోదావరి జిల్లా రంపచోడవరం, పశ్చిమగోదావరి జిల్లా భీమవరం మండలాల నుంచి ప్రజలు బస్సుల్లో అమరావతి సందర్శనకు తరలి వచ్చారు. వారు తొలుత రాజధాని అమరావతి నిర్మాణానికి శంకుస్థాపన చేసిన ఉద్దండ్రాయునిపాలెం సందర్శించారు

అనంతరం సీడ్‌యాక్సెస్‌ రహదారి మీదుగా మందడం వెళ్లి అక్కడ పేదలకు ఎన్టీఆర్‌ గృహ నిర్మాణ పథకం కింద నిర్మిస్తున్న భవనాలు తిలకించారు. ఆపై ఎమ్మెల్యే, ఎమ్మెల్సీల నివాస భవనాలు, తాత్కాలిక హైకోర్టును సందర్శించారు. తదుపరి తాత్కాలిక సచివాలయ భవనాలు, విట్‌(ఏపీ)విశ్వవిద్యాలయం చూశారు. ఆ తర్వాత విజయవాడలోని కనకదుర్గమ్మ అమ్మవారి దర్శనానికి వెళ్లారు. ఏపీ సీఆర్‌డీఏ ఓఎస్‌డీ అన్నే సుధీర్‌బాబు రాజధానిలో జరుగుతున్న అభివృద్ధి పనులను వివరించారు. అయితే అమరావతిలో ఇంత పని జరుగుతుందనే విషయం తెలియదని, వార్తల్లో ఇవన్నీ చూపించటం లేదని, ఇంత పెద్ద పెద్ద బిల్డింగ్ లు, ఇక్కడే జరిగే పనులు చూస్తుంటే చంద్రబాబు చెప్పే మాటలు నిజమే అనే నమ్ముతున్నామని అన్నారు.

మా ఊరికి వెళ్లి, అందరినీ అమరావతి చూసి రమ్మని చెప్తామని అంటున్నారు. కొన్ని పార్టీలు అసలు అక్కడ ఏమి లేవు, భ్రమరావతి, గ్రాఫిక్స్ అంటుంటే, చంద్రబాబు ప్రజలను అక్కడకు తీసుకువెళ్ళి అక్కడ జరుగుతుంది చూపిస్తున్నారని అంటున్నారు. పోలవరం యాత్ర లాగే, అమరావతిలో జరుగుతున్న అభివృద్ధి, ప్రజలకు చూపించంటానికి, అద్భుతమైన రాజధాని నిర్మాణంలో ప్రజలను భాగస్వామ్యం చెయ్యటానికి, అమరావతి యాత్ర కూడా మొదలు పెట్టారు. ఈనెల 27 నుండి, ప్రతిరోజు ఒక మండలం చొప్పున, అన్ని జిల్లాల నుంచి, అమరావతి సందర్శన యాత్రకు ఉచిత బస్సులు పెట్టారు. ముఖ్యంగా, సీమ, ఉత్తరాంధ్ర ప్రజలకు, అమరావతిలో భాగస్వామ్యం చేస్తూ, వారికి ఎక్కువ ప్రాధాన్యత ఇస్తున్నారు.

ప్రధాని మోదీ పర్యటన వాయిదా పడింది. ‘అనుకోకుండా వచ్చిన ముఖ్యమైన కార్యక్రమాల వల్లే రాష్ట్ర పర్యటనకు మోదీ రాలేకపోతున్నారు’ అని చెబుతున్నప్పటికీ... ఆయన తిరిగి ఎప్పుడు సీమాంధ్రకు వస్తారు, ఇప్పుడు పర్యటన వాయిదాకు కారణమేమిటో బీజేపీ రాష్ట్ర నేతలెవరూ అధికారికంగా చెప్పడంలేదు. ప్రస్తుతానికి ఆయన కార్యక్రమం రద్దయినట్లేనని, ఎన్నికల ప్రచారానికిగానీ రాష్ట్రానికి వచ్చే అవకాశం లేదని చెబుతున్నారు. ఎందుకు రద్దు అయ్యింది, కారణం ఏంటి అని మీడియా అడిగితే, సమాధానం లేదు. ముందుగా ఖరారైన కార్యక్రమం ప్రకారం జనవరి 6న గుంటూరులో మోదీ బహిరంగ సభ జరగాల్సి ఉంది. టీడీపీతో కటీఫ్‌, కేంద్రంపై రాష్ట్ర ప్రభుత్వ యుద్ధం నేపథ్యంలో... ప్రధాని సభను బీజేపీ నేతలు ప్రతిష్ఠాత్మకంగా తీసుకున్నారు.

‘రాష్ట్రానికి మేం ఏం చేశామో మోదీ చెబుతారు. ఆ తర్వాత రాష్ట్రంలో పరిస్థితి మారిపోతుంది’ అని కూడా తెలిపారు. మరోవైపు... మోదీ పర్యటనపై అధికార టీడీపీ, ఇతర పార్టీలు కూడా తీవ్రస్థాయిలో మండిపడుతున్నాయి. మోదీ క్షమాపణ చెప్పాకే రావాలనే డిమాండ్లు మొదలయ్యాయి. ‘‘రాష్ట్రానికి తీరని అన్యాయంచేసి.. చచ్చామో బతికామో చూసేందుకు వస్తున్నారా?’’ అని సీఎం చంద్రబాబు మండిపడ్డారు. మోదీ పర్యటనను వ్యతిరేకిస్తూ టీడీపీ శ్రేణులు, వామపక్షాలు, ప్రజా సంఘాలు నిరసన తెలిపేందుకు సిద్ధమయ్యాయి. పరిస్థితులపై కేంద్ర నిఘా వర్గాలు ఆరా తీశాయి. భద్రతపై రాష్ట్ర పోలీసు ఉన్నతాధికారులను ఆరా తీసినట్లు తెలిసింది.

భద్రతకు ఎలాంటి ఢోకా ఉండదని, అయితే సభా ప్రాంగణంలో ప్రత్యేక హోదా కోసమో, ప్రధానికి వ్యతిరేకంగానో నినాదాలు చేసే అవకాశం ఉందని వారు చెప్పినట్లు సమాచారం. ఈ విషయాన్ని ఇతర మార్గాల్లో నిఘా వర్గాలు ధ్రువీకరించుకున్నాయి. మొత్తానికి... వాతావరణం అనుకూలంగా లేదని, బహిరంగ సభలో తీవ్ర నిరసనలు వ్యక్తమయ్యే అవకాశముందని ప్రధాని కార్యాలయానికి సమాచారం ఇచ్చినట్లు తెలిసింది. ఈ నేపథ్యంలో ప్రస్తుతానికి మోదీ ఆంధ్రకు వెళ్లకుండా ఉంటేనే మంచిదన్న నిర్ణయానికి కేంద్ర పెద్దలు వచ్చారు. కాగా ప్రధాని మోదీ పర్యటన వాయిదా పడిందని, ఎప్పుడు జరిగేదీ త్వరలో ప్రకటిస్తామని బీజేపీ రాష్ట్ర అధ్యక్షుడు కన్నా లక్ష్మీనారాయణ గుంటూరులో చెప్పారు.

కర్నూలు జిల్లా ఓర్వకల్లులో నిర్మిస్తున్న ‘గ్రీన్‌ఫీల్డ్‌’ విమానాశ్రయం పనులు తుదిదశకు చేరాయి. వచ్చే ఏడాది జనవరి 7న ముఖ్యమంత్రి చంద్రబాబునాయుడు చేతుల మీదుగా దీనిని ప్రారంభించనున్నారు. ఇందుకు సంబంధించిన ఏర్పాట్లు ప్రస్తుతం చకచకా జరుగుతున్నాయి. ఈ నెల 31న ప్రయోగాత్మక పనితీరు(ట్రయిల్‌ రన్‌) నిర్వహించనున్నారు. దీనికి అనుగుణంగా విమానం దిగేందుకు, ఎగిరేందుకు రంగం సిద్ధం చేశారు. ట్రయిల్‌రన్‌ను రాష్ట్ర ఇంధన శాఖ ముఖ్య కార్యదర్శి అజయ్‌జైన్‌, ఏపీఏడీసీఎల్‌ ఎండీ వీరేంద్రసింగ్‌ త్వరలో పరిశీలించనున్నారు. ఇప్పటికే రన్‌వే, ఆప్రాన్‌లను రంగులతో సుందరంగా తీర్చిద్దారు.

ఓర్వకల్లు గ్రీన్‌ఫీల్డ్‌ విమానాశ్రయాన్ని వచ్చే ఏడాది ఏప్రిల్‌ నాటికి పూర్తిస్థాయిలో అందుబాటులోకి తీసుకురానున్నారు.దేశీయ విమానసేవల్లో భాగంగా ఓర్వకల్లు నుంచి విజయవాడ, చెన్త్నె, బెంగళూరుకు సర్వీసులు తిరిగే అవకాశం ఉంది. రాష్ట్రంలోని పలు ప్రాంతాల్లో విమానాశ్రయాల ఏర్పాటుకు ప్రభుత్వం నాంది పలికింది. రాష్ట్ర రాజధాని అమరావతికి వాయు మార్గంలో చేరుకోవాలనే లక్ష్యంతో పనిచేస్తున్నారు. ఏటీసీ కేంద్రం పనులు ముగిసిన తర్వాత డిసెంబరు ఆఖరు లోగా ఓర్వకల్లు నుంచి ఏప్రిల్‌ నెలలో, విజయవాడ, చెన్నైలకు విమానాలు తిరిగేలా చర్యలు తీసుకుంటున్నారు..

కర్నూలు జిల్లా ఓర్వకల్లు సమీపంలో గ్రీన్‌ఫీల్డ్‌ విమానాశ్రయం నిర్మాణానికి చంద్రబాబు జూన్ 2017లో శంకుస్థాపన చేశారు. ఈ విమానాశ్రయంతో కర్నూలు జిల్లా నుంచి వివిధ నగరాలకు విమానం ద్వారా వెళ్లే వెసులుబాటు ఉంటుందన్నారు. ఓర్వకల్లులో ఏర్పాటు చేస్తోన్న గ్రీన్‌ఫీల్డ్‌ విమానాశ్రయం మూడు విభాగాలుగా ఉంటుందని అధికారులు తెలిపారు. మొదటి విభాగంలో ఎనిమిది విమానాలను నిలుపుకొనేందుకు అవకాశం ఉంటుంది. మరో విభాగంలో మూడు విమానాలు, ఇంకో విభాగంలో మరమ్మతులకు గురైన విమానాలు ఆపేందుకు అవకాశం ఉంటుంది. విమాన రాకపోకలు పెరిగాక మరో విభాగం ఏర్పాటు చేయనున్నారు.