news

ఆంధ్రప్రదేశ్‌ హైకోర్టు ఏర్పాటు ఉత్తర్వులు బుధవారం విడుదలయ్యాయి. ఈ మేరకు ఉమ్మడి హైకోర్టును ఆంధ్రప్రదేశ్‌, తెలంగాణ మధ్య రెండుగా విభజిస్తూ రాష్ట్రపతి రామ్‌నాథ్‌ కోవింద్‌ బుధవారం ఆదేశాలు జారీచేశారు. జనవరి 1 నుంచి అమరావతి కేంద్రంగా ఆంధ్రప్రదేశ్‌ హైకోర్టు కార్యకలాపాలు ప్రారంభిస్తుందని అందులో స్పష్టం చేశారు. ప్రస్తుతం హైదరాబాద్‌లో ఉన్న న్యాయస్థానం తెలంగాణ రాష్ట్ర హైకోర్టుగా సేవలు కొనసాగిస్తుందని పేర్కొన్నారు. రాజ్యాంగంలోని ఆర్టికల్‌ 214 ప్రకారం ప్రతి రాష్ట్రానికి ప్రత్యేక హైకోర్టు ఉండాలన్న నిబంధన మేరకు ఆంధ్రప్రదేశ్‌లో కొత్త హైకోర్టు ఏర్పాటు చేస్తున్నట్లు స్పష్టం చేశారు.

అయితే ఈ రోజు, ఈ విభజనపై ఉమ్మడి హైకోర్టులో గందరగోళం నెలకొంది. రాష్ట్రపతి ఇచ్చిన ఉత్తర్వుల పై క్లారిటీ లేక, రెండు రాష్ట్రాల న్యాయవాదులు గందరగోళానికి లోనయ్యారు. ఉమ్మడి కేసుల పై స్పష్టతపై లేదని న్యాయవాదులు వాదిస్తున్నారు. అలాగే సిబ్బంది, దస్త్రాల విభజన జరగలేదని ఆందోళన వ్యక్తం చేస్తున్నారు. ఏపీలో కొత్త భవనాలు ఇంకా సిద్ధం కాలేదని న్యాయవాదులు చెబుతున్నారు. అక్కడ సదుపాయాలకి, ఇంకా నెల, రెండు నెలల సమయం పడుతుందని అంటున్నారు. ఈ నాలుగు రోజుల్లో ఏ పని అవ్వదని అంటున్నారు. దీంతో చీఫ్ జస్టిస్ బెంచ్‌ దిగి తన చాంబర్‌లోకి వెళ్లిపోయారు. అటు హైకోర్టు ఆవరణలోనూ విభజనపై న్యాయవాదుల మధ్య చర్చోపచర్చలు జరుగుతున్నాయి. ఈ వ్యహారంపై మరికాసేపట్లో సీజేను ఏపీ న్యాయవాదులు కలువనున్నారు.

రాష్ట్రపతి రామ్‌నాథ్‌ కోవింద్‌ నిన్న(బుధవారం) గెజిట్‌ నోటిఫికేషన్‌ ప్రకారం ఆంధ్రప్రదేశ్‌కు కొత్తగా హైకోర్టును అమరావతిలో ఏర్పాటు చేశారు. ఇక ప్రస్తుతం హైదరాబాద్‌లో ఉన్న హైకోర్టు భవనంలోనే తెలంగాణ హైకోర్టు పనిచేస్తుంది. రెండు ఉన్నతస్థాయి కోర్టులూ జనవరి 1 నుంచి విడివిడిగా పనిచేస్తాయి. ఉమ్మడి హైకోర్టుకు మంజూరు చేసిన మొత్తం న్యాయమూర్తుల సంఖ్య 61. అందులో ఏపీకి 37, తెలంగాణకు 24 విభజించారు. ఏపీకి కేటాయించిన వారిలో 28 మంది శాశ్వతన్యాయమూర్తులు, తొమ్మిది మంది అదనపు న్యాయమూర్తులు ఉంటారు. తెలంగాణ హైకోర్టులో ఈ సంఖ్య 18, 6గా ఉంటుంది. ప్రస్తుతం హైకోర్టు విభజన అయ్యే నాటికి ఉమ్మడి కోర్టులో 27 మంది సేవలందిస్తున్నారు. అందులో ఏపీకి 14, తెలంగాణకు 10 మంది న్యాయమూర్తులను కేటాయించారు. ముగ్గురిపై ఇంకా కొలీజియం నిర్ణయం తీసుకుని కేటాయించాల్సి ఉంది. ఇప్పటివరకు కేటాయించిన న్యాయమూర్తుల సంఖ్యను బట్టిచూస్తే ఏపీలో 23, తెలంగాణలో 14 జడ్జీల పోస్టులు భర్తీ చేయాల్సి ఉంటుంది.

మంత్రి లోకేష్ సింగపూర్ పర్యటనకు వెళ్ళిన సంగతి తెలిసిందే. సింగపూర్‌ ఎయిర్‌పోర్టులో మంత్రి నారా లోకేశ్‌ తెలుగుదేశం ఫోరం సింగపూర్‌ కోర్‌ కమిటీ సభ్యులు బుధవారం ఘనస్వాగతం పలికారు. సమావేశానికి హాజరైన ఆయనకు ఆంధ్రాకు చెందిన పలువురు సింగపూర్‌ విమానం వేళలు మార్పు చేయాలని కోరారు. ప్రస్తుతం గన్నవరం ఎయిర్‌పోర్టు నుంచి మంగళ, గురువారాల్లో ఇండిగో విమాన సర్వీసు సింగపూర్‌కు నడుస్తుందన్నారు. రెండు వారాల్లో సర్వీసు ఉండటం వలన ఒక పూట సెలవు పెట్టి రావాల్సి వస్తుందన్నారు. వారంలో శుక్రవారం రాత్రి 10గంటలకు సింగపూర్‌లో విమానం బయలు దేరేలా చర్యలు తీసుకోవాలన్నారు. శని, ఆదివారం సెలవులు కావున రెండు రోజులు ఆంధ్రాలో ఉండటంతో పాటు వచ్చి వెళ్లడానికి వీలుంటుందన్నారు. స్పందించిన లోకేష్‌ ఇండిగో విమాన సంస్థతో మాట్లాడి తగిన చర్యలు తీసుకుంటామని హామీ ఇచ్చారని తెలుగుదేశం ఫోరం సింగపూర్‌ కోర్‌ కమిటీ సభ్యులు నల్లూరి శ్రీకాంత్‌, నంబూరి నాగ, ఎం. శ్రీకాంత్‌ తెలిపారు.

మరో పక్క లోకేష్ సింగపూర్ పర్యటన కొనసాగుతుంది. అమరావతి అభివృద్ధికి సహకరించాలని మంత్రి లోకేశ్‌ సింగపూర్‌ విదేశీ వ్యవహారాల రాయబారి గోపీనాథ్‌ పిళ్లైను కోరారు. అమరావతి నిర్మాణంలో సహకరించేందుకు సింగపూర్‌ ప్రభుత్వం పిళ్లైను ప్రత్యేక ప్రతినిధిగా నియమించింది. ఎస్‌ఆర్‌ నాథన్‌ ఫెలోషి్‌పలో భాగంగా సింగపూర్‌ పర్యటనకు వెళ్లిన లోకేశ్‌.. బుధవారం పిళ్లైను కలిశారు. స్టార్టప్‌ ఏరియా అభివృద్ధి, మౌలిక వసతుల నిర్వహణపై చర్చించారు. ఆర్థిక వృద్ధికి తోడ్పాటు ఇచ్చే విధంగా క్యాపిటల్‌ రీజియన్‌ ఇన్వె్‌స్టమెంట్‌ ప్రమోషన్‌ ఏజెన్సీ, ఇన్నోవేషన్‌ కారిడార్‌ ఏర్పాటుకు సహకారం ఇవ్వాలని కోరారు. రాష్ట్రంలో ఇన్నోవేషన్‌ వ్యాలీ ఏర్పాటుచేసి అనేక స్టార్టప్‌ కంపెనీల అభివృద్ధికి అనేక చర్యలు తీసుకుంటున్నామని తెలిపారు.

‘ఏంజెల్‌ ఇన్వెస్టర్ల భాగస్వామ్యంతో స్టార్టప్‌ కంపెనీల అభివృద్ధికి మార్గం సుగమమైంది. అందులో మా రాష్ట్రం.. దేశంలోనే లీడర్‌గా ఇటీవల కేంద్ర ప్రభుత్వం ప్రకటించింది. ప్రభుత్వం తరపున స్టార్టప్‌ ఫండ్‌ను ఏర్పాటు చేశాం’ అని చెప్పారు. స్టార్టప్‌ ఏరియా అభివృద్ధికి పూర్తి సహకారం అందిస్తామని, త్వరలోనే దీనిని ప్రారంభిస్తామని పిళ్లై తెలిపారు. అనంతరం సింగపూర్‌ వైల్డ్‌లైఫ్‌ రిజర్వ్‌ సీఈవో మైక్‌బార్లేతో లోకేశ్‌ సమావేశమయ్యారు. ప్రపంచంలోని ఉత్తమ నిర్వహణ ఉన్న జంతు ప్రదర్శనశాలల్లో సింగపూర్‌ జూ ఒకటి. ఏటా 17 లక్షల మంది ఈ జూను సందర్శిస్తారని, 315 జాతుల జంతువులు ఇందులో ఉన్నాయని బార్లే వెల్లడించారు. లోకేశ్‌ మాట్లాడుతూ.. రాష్ట్రంలో సింగపూర్‌ జూ తరహాలో జంతుప్రదర్శనశాల ఏర్పాటు చేయాలని యోచిస్తున్నామని.. దీనికి సహకరించాలని కోరారు.

బీజేపీ పై నాలుగేళ్లుగా బిగిసిన మోదీ, అమిత్‌ షాల పట్టు తప్పుతుంది. ఇటీవలి ఐదు రాష్ట్రాల శాసనసభ ఎన్నికల్లో ఓటమి తర్వాత పార్టీ నాయకత్వంపై ధిక్కార స్వరాలు మొదలయ్యాయి. సార్వత్రిక ఎన్నికలు సమీపిస్తున్న తరుణంలో మోదీ-అమిత్‌ షా ద్వయంపై అసంతృప్తులు వ్యక్తమవుతుండడంతో వారిద్దరి కోటరీలో ఉన్న నేతలు ఆందోళన వ్యక్తం చేస్తున్నారు. మోదీ, అమిత్‌ షాల మీద మంగళవారం కేంద్ర మంత్రి నితిన్‌ గడ్కరీ చేసిన వ్యాఖ్యలు పార్టీలో కలకలం రేపాయి. తాజాగా మరో కీలక నేత పార్టీ నాయకత్వంపై తీవ్ర అసంతృప్తి వ్యక్తం చేశారు. కేంద్ర మాజీ మంత్రి, ప్రముఖ దళిత నేత సంఘ ప్రియ గౌతమ్‌ మాట్లాడుతూ, మంచి పరిపాలన కోసం కేంద్ర మంత్రి నితిన్‌ గడ్కరిని ఉప ప్రధానిగా నియమించాలని డిమాండ్‌ చేశారు.

రాజ్యసభ సభ్యుడైన అమిత్‌ను సభలో వ్యూహరచనకు పరిమితం చేయాలని, మధ్యప్రదేశ్‌ మాజీ సీఎం శివరాజ్‌ సింగ్‌ చౌహాన్‌కు పార్టీ పగ్గాలు అప్పగించాలని ప్రతిపాదించారు. అమిత్‌ షా, మోదీ ఆధిపత్య ధోరణిపై పార్టీలో చాలా మంది నేతలు కోపంగా ఉన్నారు. 2014లో మోదీ ప్రధాని అయిన తర్వాత అనేక రాష్ట్రాల అసెంబ్లీ ఎన్నికల్లో బీజేపీ విజయ ఢంకా మోగించింది. గెలుపును వారిద్దరి ఖాతాలో, ఓటమిని ఇతరుల ఖాతాలో వేయడం ఏంటన్న ప్రశ్నలు కూడా ఎదురవుతున్నాయి. ఏ ఎన్నికల్లో గెలిచినా బీజేపీ ప్రధాన కార్యాలయంలో విలేకరుల సమావేశం ఏర్పాటు చేసే అమిత్‌ షా ఐదు రాష్ట్రాల ఎన్నికల్లో ఓడిపోయిన తర్వాత ఎందుకు మాట్లాడలేదని పార్టీ నేతలు ప్రశ్నిస్తున్నారు. ‘మోదీ, అమిత్‌ షాలే అన్నింటికీబాధ్యత వహించాలి కదా’ అని ఓ నేత ప్రశ్నించారు. మంగళవారం నితిన్‌ గడ్కరీ కూడా ఇదే తరహాలో మాట్లాడిన సంగతి తెలిసిందే. తక్షణమే పార్టీలో అందరి అభిప్రాయాలను పరిగణనలోకి తీసుకొని, సరైన వ్యూహాన్ని రచిస్తూ నష్టనివారణ చర్యలు చేపట్టకపోతే మూల్యం చెల్లించక తప్పదని హెచ్చరిస్తున్న వారూ ఉన్నారు.

ధిక్కార స్వరాల వెనుక సంఘ్‌.. మోదీ, అమిత్‌ షా వ్యవహారాల శైలి పట్ల అసంతృప్తి వ్యక్తం చేస్తూ ధిక్కరణ స్వరాలు వినిపిస్తున్న వారి వెనుక ఆరెస్సెస్‌ ఉందని రాజకీయ పరిశీలకులు అనుమానిస్తున్నారు. ఆరెస్సెస్‌ పెద్దలతో సన్నిహితంగా మెలిగే నితిన్‌ గడ్కరీ, సంఘ ప్రియ గౌతమ్‌ వంటి నేతలు మోదీ, అమిత్‌ షాపై నేరుగా వ్యాఖ్యలు చేయడమంటే వారి వెనుక సంఘ్‌ పెద్దలు లేకపోలేదని పరిశీలకులు విశ్లేషిస్తున్నారు. ‘‘బీజేపీ బలంగా ఉన్న మధ్యప్రదేశ్‌, రాజస్ధాన్‌, ఛత్తీ్‌సగఢ్‌ రాష్ట్రాల్లో పార్టీ ఓడిపోయిన తర్వాత కార్యకర్తల్లో స్థైర్యం దెబ్బతిన్నది’’ అని సంఘ్‌ నేత ఒకరు చెప్పారు.