news

ఆంధ్రప్రదేశ్ చరిత్రలో మరో చారిత్రక ఘట్టం ఆవిష్కృతం కానుంది. రాయలసీమ చిరకాల స్వప్నం నెరవేరనుంది. సీమ ముఖ చిత్రాన్ని మార్చే కడప స్టీల్ ఫ్లాంట్‌కు ముఖ్యమంత్రి చంద్రబాబు నాయుడు గురువారం భూమి పూజ చేయనున్నారు. విభజన హామీలను కేంద్రం పట్టించుకోకపోవడంతో ఏపీ ప్రభుత్వమే సొంతంగా స్టీల్ ఫ్లాంట్ ఏర్పాటుకు సిద్ధమైంది. రాయలసీమ చిరకాల స్వప్నం నెరబేరబోతోంది. ఏళ్ల తరబడి సీమవాసుల ఆకాంక్షగా ఉన్న ఉక్కు పరిశ్రమకు చంద్రబాబు ఇవాళ శ్రీకారం చుట్టబోతున్నారు. జిల్లాలోని మైలవరం మండలం, కంబాలదిన్నెవద్ద కడప ఉక్కు ఫ్యాక్టరీకి ముఖ్యమంత్రి ఇవాళ శంఖుస్థాపన చేస్తారు. రూ. 18వేల కోట్ల పెట్టుబడితో, మూడు మిలియన్ టన్నుల ఉత్పత్తి సామర్థ్యంతో అత్యాధునిక సాంకేతిక పరిజ్ఞానంతో ఈ స్టీల్ ప్లాంట్‌ను నిర్మించనున్నారు.

రాష్ట్ర విభజన బిల్లులో 11వ అంశంగా పొందుపరిచిన కడప జిల్లాలో ఉక్కు ఫ్యాక్టరీ అంశం పై నాలుగేళ్లుగా కేంద్రం పట్టించుకోలేదు. ఎన్ని సార్లు చంద్రబాబు కేంద్రాన్ని అడిగినా, ఎంపీలు ఆందోళన చేసినా, కేంద్రం పట్టించుకోలేదు. చివరకు రాజ్యసభ సభ్యుడు సీఎం రమేష్, ఎమ్మెల్సీ ఎం.రవీంద్రనాధరెడ్డి నిరాహారదీక్ష కూడా చేసారు. దీక్ష విరమణ సందర్భంగా ఉక్కు ఫ్యాక్టరీని రాష్ట్ర ప్రభుత్వమే నిర్మిస్తుందని అప్పట్లో చంద్రబాబు ప్రకటించారు. చెప్పినట్టే, రాష్ట్ర ప్రభుత్వమే రంగంలోకి దిగి, రాయలసీమ వాసుల కల నెరవేరుస్తుంది. కడప జిల్లాలో ఉక్కు పరిశ్రమ ఏర్పాటు ఆకాంక్ష ఇప్పటిది కాదు. పదేళ్ల క్రితమే ‘బ్రహ్మణి ఉక్కు పరిశ్రమ’ పేరిట ఆ దిశగా అడుగులు పడ్డాయి. పదివేల ఎకరాల్లో నిర్మించేందుకు అనుమతులు లభించినా, రాజశేఖర్ రెడ్డి, జగన్, గాలి జనార్ధన్ రెడ్డి చేసిన అవినీతి బయట పడటంతో, అది అటకెక్కింది. అనంతరం రాష్ట్ర విభజన జరగడం, విభజన చట్టం హామీల్లో కడప ఉక్కు ప్రస్తావన రావడం తెలిసిందే. కేంద్రం పరిశ్రమ ఏర్పాటు చేయాల్సి ఉన్నా ఏళ్ల తరబడి కాలయాపనే జరిగింది. రాష్ట్ర అధికారులు, ప్రజాప్రతినిధులు పలుమార్లు దిల్లీ పెద్దలకు విన్నవించినా ఫలితం లేకపోయింది.

మెకాన్‌ సంస్థ పరిశ్రమ ఏర్పాటుకు అనుకూలంగా నివేదిక ఇచ్చినా కేంద్రం బహిర్గతం చేయలేదు. చివరకు పార్టీలకు అతీతంగా ఉద్యమ బాట పట్టడం, రాజ్యసభ సభ్యులు సీఎం రమేష్‌ ఆమరణదీక్షకు దిగడంతో దేశవ్యాప్తంగా చర్చకు వచ్చింది. విషయం రెండు నెలల్లోగా తేల్చాలని చంద్రబాబు కేంద్రానికి అల్టిమేటం ఇచ్చినా స్పందన కరవైంది. ఈ నేపథ్యంలో రాష్ట్రప్రభుత్వమే దాన్ని ఏర్పాటు చేస్తుందని ముఖ్యమంత్రి ప్రకటించారు. దీనికి ‘రాయలసీమ స్టీల్‌ కార్పొరేషన్‌’గా నామకరణం చేశారు. ప్రొద్దుటూరులో ధర్మపోరాట వేదికపై ఉక్కు పరిశ్రమ గురించి ప్రస్తావించిన చంద్రబాబు.. నెలలో పునాదిరాయి వేసి కడప ప్రజల రుణం తీర్చుకుంటామని స్పష్టం చేశారు. తదనుగుణంగా ఏర్పాట్లన్నీ పూర్తయ్యాయి. గురువారం ఉదయం 11.12 గంటలకు ముఖ్యమంత్రి చంద్రబాబు శంకుస్థాపన చేయనున్నారు. కడపలో ఉక్కు పరిశ్రమకు పునాదిరాయి వేసే వరకు గడ్డం తీయబోనంటూ దీక్షబూనిన రాజ్యసభ సభ్యులు సీఎం రమేష్‌ గురువారం తన దీక్ష విరమించనున్నారు. పునాదిరాయి కార్యక్రమం పూర్తయ్యాక తిరుమల చేరుకుని స్వామికి తలనీలాలు సమర్పించడంతో పాటు గడ్డం తొలగించనున్నారు.

అమరావతి నిర్మాణంలో మరొక కిలక ఘట్టం ఆవిష్కృతమైంది. సచివాలయం ఐదు టవర్ల నిర్మాణంలో భాగంగా ర్యాఫ్ట్ ఫౌండేషన్ పనులను ముఖ్యమంత్రి చంద్రబాబు గురువారం ఉదయం ప్రారంభించారు. శాంతి హోమం నిర్వహించిన తర్వాత సరిగ్గా ముహూర్త సమయం 8-50 గంటలకు ర్యాప్ట్ ఫౌండేషన్ పనులు ప్రారంభించారు. ఈ కార్యక్రమానికి స్పీకర్‌ కోడెల శివప్రసాదరావు, మంత్రులు నారాయణ, ప్రత్తిపాటి, దేవినేని ఉమ, నక్కా ఆనందబాబు, ఎమ్మెల్యే శ్రవణ్‌, స్థానిక నేతలు తదితరులు హాజరయ్యారు. దేశంలోనే తొలిసారి అమరావతిలో ర్యాప్ట్‌ ఫౌండేషన్‌ పనులను చంద్రబాబు ప్రారంభించారు. 11వేల క్యూబిక్‌ మీటర్ల కాంక్రీట్‌తో సచివాలయ టవర్లకు ర్యాప్ట్‌ ఫౌండేషన్‌ వేస్తున్నారు.

13 అడుగుల లోతులో 4 మీటర్ల ఎత్తున ర్యాప్ట్‌ ఫౌండేషన్‌ నిర్మాణం జరుగుతోంది. 72 గంటలపాటు ఏకధాటిగా ఈ పనులు జరగనున్నాయి. ఐదు టవర్లలో సచివాలయం, హెచ్‌వోడీల భవనాలు, డయాగ్రిడ్‌ నమూనాలో ఫ్రేమ్‌ ఆధారంగా టవర్ల నిర్మాణం జరగనుంది. 41 ఎకరాల్లో 69 లక్షల చదరపు అడుగుల విస్తీర్ణంలో సచివాలయ నిర్మాణం జరుగుతుంది. 50 అంతస్థులతో ఐకానిక్‌గా జీఏడీ టవర్‌ నిర్మాణం జరుగుతుంది. 225 మీటర్ల ఎత్తుతో ప్రపంచంలోనే అతి ఎత్తయిన సచివాలయ భవనం నిర్మించనున్నారు. భూకంపాలు, పెనుగాలుల వంటి ప్రకృతి వైపరీత్యాలను తట్టుకునేలా డిజైన్‌ రూపొందించారు.

నిర్ణీత ప్రాంతం మొత్తాన్ని కాంక్రీట్‌తో నింపే ప్రక్రియనే రాఫ్ట్‌ ఫౌండేషన్‌ విధానంగా పేర్కొంటారు. ఒక రకంగా చెప్పాలంటే స్టీలు, కాంక్రీటుతో అత్యంత పటిష్ఠమైన, మందపాటి కాంక్రీట్‌ దిమ్మెను నిర్మించడమే. సాధారణంగా నేల లోతు నుంచి స్తంభాలు వేసి పునాది నిర్మించాలంటే గుంతలు తవ్వాలి. బోర్లు వేసి స్టీలు పెట్టాలి. కాంక్రీట్‌ పోయాలి.. కనీసం నెలన్నర వ్యవధి పడుతుంది. అదే రాఫ్ట్‌లో అయితే మూడు రోజుల్లో పునాది వేయొచ్చు. ఫైల్‌ విధానంతో పోలిస్తే ఖర్చు ఎక్కువైనా నిర్మాణం పటిష్ఠంగా ఉంటుంది. సచివాలయ భవనాలకే రాఫ్ట్‌ ఫౌండేషన్‌లో పునాది వేస్తున్నారు. 72 గంటలపాటు నిరాటంకంగా పనులు చేస్తారు. మూడోపార్టీగా వ్యవహరిస్తున్న ఐఐటీ చెన్నై నిపుణులు కాంక్రీట్‌మిక్స్‌ను డిజైన్‌ చేశారు. భారీ యంత్రాల వినియోగం... 60, 40 టన్నుల సామర్థ్యపు క్రేన్లు, 10 మీటర్ల వరకు వినియోగించే హైడ్రాస్‌, కాంక్రీట్‌ వేసే నాలుగు పంపులు, 30 ట్రాన్సిట్‌ మిక్సర్లు (అందుబాటులో అదనంగా మరో ఆరు).

ధర్మపోరాట దీక్షలో భాగంగా ముఖ్యమంత్రి నారా చంద్రబాబునాయుడు పర్యటనలో తాడు ఉండ కలకలం రేపింది. శిల్పారామంలో ఏర్పాటు చేసిన హెలిప్యాడ్‌, ప్రధాన రహదారి మధ్య ప్రాంతంలో తాడుతో చుట్టిన ఉండ(నాటు బాంబు మాదిరిగా) కనిపించింది. పక్కనే సున్నపు గుర్తులు ఉన్నాయి. దీన్ని చూసి కొందరు భయపడి పోయారు. ఇంతకూ అదేమిటో గుర్తించలేకపోయారు. అయితే సాధారణంగా తోటల్లో పందులను బెదరగొట్టేందుకు ఉపయోగిం చే నాటుబాంబులాగా అది ఉండడం గమనార్హం. సీఎం పర్యటనలో ఈ ఉండ కలకలం రేపింది. పోలీసుల నిఘా పటిష్టంగా ఉన్నప్పటికీ అది కనిపించడం గమనార్హం.

నాలుగున్నరేళ్లలో అనంతలో భేషైన అభివృద్ధి జరిగింది. కేంద్రం సహకరించకపోయినా, రాష్ట్రంలో లోటు బడ్జెట్‌ ఉన్నా.. మునుపెన్నడూ లేనంతగా అభివృద్ధి చేసి చూపాం. రాష్ట్రంలో నీటి భద్రతతోపాటు, అనంతపురంలోని కరవు నివారించేందుకు పోలవరం ఎంతో అవసరం. పోలవరం, పట్టిసీమ, గోదావరి-కృష్ణా నదుల అనుసంధానం కాకపోయి ఉంటే హంద్రీనీవా ద్వారా జిల్లాకు ఎక్కువ నీళ్లు వచ్చేవా? కృష్ణమ్మ పుణ్యమా అని పుష్కలంగా నీటిని తెచ్చి గొల్లపల్లి, మారాల, చెర్లోపల్లి జలాశయాలను నింపామని తెదేపా జాతీయ అధ్యక్షుడు, ముఖ్యమంత్రి చంద్రబాబు పేర్కొన్నారు. అనంతపురంలోని బళ్లారి రోడ్డులోని ఓ ఫంక్షన్‌ హాల్‌ సమీపంలో బుధవారం నిర్వహించిన ధర్మ పోరాట దీక్ష సభలో చంద్రబాబు పాల్గొని మాట్లాడారు. అనంతపురం జిల్లా తెదేపాకు కంచుకోట అనీ... 1984లో ప్రజాస్వామ్య పరిరక్షణకు ఇక్కడి ప్రజలంతా రహదారులపైకి వచ్చి ఉద్యమించి, ఎన్టీఆర్‌ను మళ్లీ సీఎం చేశారన్నారు.

నేను, తెలుగుదేశం పార్టీ అనంతపురం జిల్లాకు రుణపడి ఉన్నామని చంద్రబాబు తెలిపారు. త్వరలో ఎన్నికలు జరగనున్న నేపథ్యంలో కుట్రలు కుతంత్రాలపై అప్రమత్తంగా ఉండాలన్నారు. అభివృద్ధి చేసే పార్టీనే గెలిపించాలని ప్రజలందరికీ వివరించాలన్నారు. ప్రజలను మెప్పించే బాధ్యత కార్యకర్తలు అంతా తీసుకోవాలన్నారు. నాయకులు వ్యక్తిగత ప్రాబల్యాలకు పోతే నష్టపోతామని చెప్పారు. ఎంత ఉన్నత పదవులు వస్తే, అంత ఒదిగి ఉండాలన్నారు. అంతా సేవాభావంతో పనిచేయాలనీ, నాయకులు... కార్యకర్తలకు అండగా ఉండాలన్నారు. తెదేపా గెలుపు చారిత్రక అవసరమనీ, అంతా విభేదాలు పక్కనపెట్టి పని చేయాలని సూచించారు. వచ్చే ఎన్నికల్లో రాగద్వేషాలకు అతీతంగా సరైన అభ్యర్థులను నిలుపుతామనీ, జిల్లాలోని 14 శాసనసభ స్థానాలు, 2 ఎంపీ స్థానాలను గెలిపించాలని అధినేత పిలుపునిచ్చారు.