news

నిన్నటి వరకు వివిధ పార్టీల నేతలను కలిసిన తెరాస అధినేత, తెలంగాణ సీఎం కేసీఆర్‌.. బుధవారం ప్రధాని మోదీతో భేటీ కానుండటంపై ఏపీ సీఎం చంద్రబాబు స్పందించారు. ఫ్రంట్‌ అంటూ పర్యటనలు చేస్తున్న కేసీఆర్‌ ప్రధానిని కలవడంలో అర్థమేంటన్నారు. మోదీని కలిసి రాష్ట్ర సమస్యలు వివరిస్తారా? బ్రీఫింగ్‌ చేయడానికి వెళ్తున్నారా? అని కేసీఆర్‌ను చంద్రబాబు ప్రశ్నించారు. ఏదైనా ఒక మాట చెప్పడం వేరని, చేసే పనులు వేరేగా ఉంటున్నాయని ఆయన వ్యాఖ్యానించారు. నిన్నటి వరకు వివిధ పార్టీలను కలిసిన కేసీఆర్‌ ఇవాళ ప్రధానిని కలుస్తున్నారన్నారు. ఫ్రంట్‌ అంటూ కేసీఆర్‌ పర్యటనలు చేస్తూ ప్రధానిని కలుస్తున్నారంటే అర్థమేమిటి అని ప్రశ్నించారు. మోదీకి బ్రీఫింగ్‌ చేయడానికి వెళ్తున్నారా...లేక సమస్యలు చెప్పడానికి వెళ్తున్నారా అని చంద్రబాబు అడిగారు.

దేశంలో ఉన్నది రెండే ఫ్రంట్ లని, ఒకటి బీజేపీ అనుకూల ఫ్రంట్, మరొకటి బీజేపీ వ్యతిరేక ఫ్రంట్ అని చంద్రబాబు అన్నారు. ఇప్పుడున్న రాజకీయ పరిస్థుతుల్లో అటు బీజేపీ కాని, ఇటు కాంగ్రెస్ కాని లేకుండా, మూడో ఫ్రంట్ అనేది సాధ్యం కాదని, ఈ విషయం పై 22 పార్టీలు ఏకాభిప్రాయానికి వచ్చాయని చంద్రబాబు అన్నారు. కేసీఆర్ ఏ ఫ్రంట్ లో ఉంటారో తేల్చుకోవాలని, అంతే కాని, కూటమిలో చీలక తెచ్చి మోడీకి లబ్ది చేకూర్చే ప్రయత్నం చేద్దమనుకుంటే, కుదరదని అన్నారు. మరో పక్క, ఇటు జగన మోహన్ రెడ్డిని, అటు పవన్ కళ్యాణ్ ని కూడా ఇదే విషయం పై స్పష్టత కోరారు చంద్రబాబు. జగన్, పవన్ అటు బీజేపీ పక్షమో, బీజేపీ వ్యతిరేక పక్షమో చెప్పాలని, ఇప్పటి వరకు వారికి దీని పై సమాధానం లేదని అన్నారు.

దేశ రాజకీయాల్లో గుణాత్మక మార్పు తెస్తాను అంటూ, దీనికోసం భాజపా, కాంగ్రెసేతర పక్షాలు ఏకం కావాలంటూ కేసీఆర్‌ వివిధ రాష్ట్రాల నేతలను కలుస్తున్నారు. ఇటీవల ఒడిశా, పశ్చిమ్‌బంగ ముఖ్యమంత్రులు నవీన్‌పట్నాయక్‌, మమతా బెనర్జీతో భేటీ అయి ఫెడరల్‌ ఫ్రంట్‌ ఏర్పాటుకు సహకరించాలని కోరారు. అయితే వారి నుంచి కేసీఆర్ కు సహకారం అందలేదు. నవీన్ పట్నాయక్ మీడియాతో మాట్లాడుతూ, మేము పోలవరం పై చర్చించుకున్నామని అంటే, మమత అసలు మీడియాతోనే మాట్లాడలేదు. వీరిద్దరినీ కలవగానే, ఈ రోజు ఢిల్లీ వెళ్లి మోడీని కలిసారు కేసీఆర్. అయితే కేసీఆర్ చేస్తున్న ప్రయత్నం, ప్రతిపక్షాల పార్టీల్లో చీలక తెచ్చి, వారిని బలహీన పరిచి, బీజేపీకి లబ్ది చేకూర్చటమే అని, చాలా పార్టీలు నమ్ముతున్నాయి. అందుకే కేసీఆర్ వైపు ఎవరూ మొగ్గు చూపించటం లేదు. మరోవైపు కేంద్రంలో భాజపాయేతర కూటమి ఏర్పాటుకు చంద్రబాబు ప్రయత్నాలు చేస్తున్నారు. మోడీ విధానాలతో దేశం నాశనం అయ్యిందని, దేశాన్ని కాపాడుకోవాలని చంద్రబాబు పిలుపుకు, 22 పార్టీలు స్పందించాయి.

రాష్ట్రంలో చేపట్టిన అభివృద్ధి కార్యక్రమాలపై గత మూడు రోజులుగా శ్వేతపత్రాలు విడుదల చేస్తున్న ఏపీ సీఎం చంద్రబాబు.. బుధవారం మరో శ్వేతపత్రాన్ని విడుదల చేశారు. రైతు సంక్షేమంపై విడుదల చేసిన ఈ శ్వేతపత్రంలో రాష్ట్రంలో రైతులు, వ్యవసాయం అభివృద్ధికి చేపట్టిన కార్యక్రమాలను ఆయన వివరించారు. ఎట్టిపరిస్థితుల్లోనూ రైతులను రుణవిముక్తి చేయాలని సంకల్పించామని.. అందుకే అధికారంలోకి వచ్చిన తర్వాత రైతులకు రూ.24 వేల కోట్ల రుణమాఫీ చేశామని చంద్రబాబు చెప్పారు. ధనిక రాష్ట్రాలు కూడా చేయని విధంగా రూ.1.50లక్షల వరకు రుణాలను మాఫీ చేశామన్నారు. తెదేపా ప్రభుత్వం అధికారంలో వచ్చాక 62 ప్రాజెక్టులు చేపట్టగా వాటిలో 17 పూర్తి చేశామని, మరో 6 ప్రారంభోత్సవాలకు సిద్ధంగా ఉన్నాయన్నారు. మిగతా ప్రాజెక్టుల నిర్మాణాలు కొనసాగుతున్నాయని చెప్పారు. పట్టిసీమతో కృష్ణా డెల్టా సస్యశ్యామలమైందని, పట్టిసీమ నీళ్లు శ్రీశైలానికి మళ్లించి అక్కడి నుంచి రాయలసీమకు తీసుకెళ్లామని.. వర్షాలు పడకపోయినా ఇబ్బందిలేని విధంగా చేశామని చెప్పారు.

రాష్ట్రంలో రైతులు ఇబ్బందుల్లో ఉన్నారని, ఎంతో మంది ఆత్మహత్యలకు పాల్పడుతున్నారని ఎన్నికల ప్రచారం సమయంలో ప్రధాని మోదీ దృష్టికి తీసుకెళ్లానని చంద్రబాబు తెలిపారు. ప్రచారంలో రైతు రుణమాఫీపై హామీ ఇవ్వాలని మోదీని అప్పుడు కోరానని, దేశవ్యాప్తంగా చేయాల్సి వస్తుందని ఆయన పట్టించుకోలేదని చంద్రబాబు అన్నారు. కాని ఇప్పుడు మాత్రం, రైతులని పట్టించోకుండా, కార్పొరేట్ వ్యక్తులకు రుణాలు మాఫీలు చేస్తున్నారని అన్నారు. 2014లో ఏపీలో ఆత్మహత్యలు, కరెంట్ కోతలతో రైతులు అల్లాడేవారనీ, చివరికి కోనసీమ వాసులు కూడా ఇబ్బంది పడ్డారని గుర్తుచేశారు. గత 20 ఏళ్లలో 16 సంవత్సరాలు అనంతపురం జిల్లాలో కరవు విలయతాండవం చేసిందని ముఖ్యమంత్రి తెలిపారు. ఇవన్నీ ఆ రోజు మోడీకి చెప్పి, మేం రైతులకు రుణాలు మాఫీ చేస్తామని చెప్పాం. మీరూ ఓ మాట చెప్పండి’ అని తాను కోరాననీ, ఇందుకు ప్రతిగా ‘నేను చెప్పను. ఒకవేళ ఇక్కడ చెబితే దేశమంతా అమలు చేయాల్సి ఉంటుంది’ అని మొహం మీదే చెప్పారని, ఇప్పుడు కార్పొరేట్ లకు మాఫీలు చేస్తున్నారని ఆవేదన వ్యక్తం చేశారు.

రాష్ట్రంలో ఆక్వా రంగానికి పెద్దపీట వేశామని, ఉద్యాన పంటలను ప్రోత్సహించామని చంద్రబాబు చెప్పారు. దేశంలో రెండంకెల వృద్ధి సాధించిన ఏకైక రాష్ట్రం ఆంధ్రప్రదేశే అన్నారు. మహారాష్ట్ర, తెలంగాణ, కర్ణాటకలో అత్యధికంగా రైతు ఆత్మహత్యలు నమోదవుతున్నాయని, ఏపీలో ఆత్మహత్యలు గణనీయంగా తగ్గించగలిగామన్నారు. ఈ నాలుగుళ్ల కాలంలో వ్యవసాయానికి రూ.2.52 లక్షల కోట్లు కోట్లు ఖర్చుపెట్టామన్నారు. దేశంలో వ్యవసాయానికి అత్యధికంగా ఖర్చు చేసింది ఏపీ ప్రభుత్వమేనని చెప్పారు. నదుల అనుసంధానంతో గోదావరి నీళ్లు కృష్ణాకు తెచ్చామన్నారు. తక్కువ పెట్టుబడితో రైతులకు ఎక్కువ ఆదాయం వచ్చేలా చర్యలు చేపట్టామని చంద్రబాబు వివరించారు. వ్యవసాయ రంగం అభివృద్ధి చెందితే మిగతా రంగాలూ అభివృద్ధి చెందుతాయని చెప్పారు. దేశంలో ఎక్కడా లేదని విధంగా కౌలు రైతులకు రూ.9,411 కోట్లు ఇచ్చామన్నారు. దీంతో 25లక్షల మంది కౌలురైతులకు మేలు చేకూర్చామని సీఎం తెలిపారు.

కేంద్ర విధానాల పై దేశ వ్యాప్తంగా పోరాడుతూ, ముఖ్యంగా ఈవీఎంల పై, మహిళా రిజర్వేషన్ పై, చంద్రబాబుకి మద్దతు తెలుపుతూ, దేశ రాజకీయాల్లో కూడా మద్దతు ప్రకటిస్తూ, ఒరిస్సా సియం నవీన్ పట్నాయిక్ నిన్న తన ప్రతినిధిని అమరావతి పంపించిన సంగతి తెలిసిందే. మంగళవారం రాత్రి ఉండవల్లిలో ముఖ్యమంత్రి చంద్రబాబును, ఎంపీ సౌమ్యా రంజన్‌ పట్నాయక్‌ కలిసి మద్దతు ప్రకటించారు. దీని పై చంద్రబాబు ట్వీట్ చేసారు. "ఒడిషా, ఆంధ్రప్రదేశ్ మధ్య స్నేహపూరిత సంబంధాలకు ముందడుగు వేశాం. ఎంపీ సౌమ్యా రంజన్ పట్నాయక్‌ ద్వారా జాతీయ స్థాయిలో మేము చేస్తోన్న పోరాటానికి మద్దతిచ్చిన ఒడిషా ముఖ్యమంత్రి @Naveen_Odishaకు అభినందనలు. రెండు రాష్ట్రాల మధ్య ఉన్న చిన్నచిన్న సమస్యలను చర్చించుకుని పరిష్కరించుకుంటాం." అంటూ ట్వీట్ చేసారు.

మంగళవారం అమరావతికి వచ్చిన బీజేడీ ఎంపీ, సీఎం చంద్రబాబును కలిసి తమ నేత అభిమతాన్ని వివరించారు. ప్రస్తుతం ఎన్నికల్లో వినియోగిస్తోన్న ఎలక్ట్రానిక్‌ ఓటింగ్‌ యంత్రాల స్థానంలో పేపర్‌ బ్యాలెట్‌ విధానాన్ని తిరిగి తీసుకురావాలని కోరుతోన్న ఏపీ చంద్రబాబు డిమాండ్‌కు తమ మద్దతు ఉంటుందని తెలిపారు. అంతేకాదు, ప్రజాస్వామ్య పరిరక్షణ కోసం జాతీయ స్థాయిలో చంద్రబాబు చేస్తున్న పోరాటానికి బాసటగా ఉంటామని ఎంపీ సౌమ్యా రంజన్‌ పట్నాయక్‌ పేర్కొన్నారు. తాను కూడా కేంద్రంలోని బీజేపీ ప్రభుత్వం దిగిపోవాలని కోరుకుంటున్నానని, అందుకు ప్రాంతీయ పార్టీలన్నీ కలసి పనిచేయాల్సిన అవసరం ఉందని తన లేఖలో నవీన్ పట్నాయక్ అభిప్రాయపడ్డారు.

అలాగే, చట్టసభల్లో మహిళలకు 33 శాతం రిజర్వేషన్లపైనా పోరాడాల్సిన అవసరం ఉందని పేర్కొన్నారు. మరోసారి బీజేపీ రాకూడదన్నది తమ సీఎం అభిప్రాయమని, ఈవీఎంలకన్నా, బ్యాలెట్ పేపర్లపైనే తమకు ఎక్కువ విశ్వాసముందని సౌమ్యా రంజన్ పట్నాయక్ అన్నారు. ప్రజల భవిష్యత్తును నిర్ణయించే అంశాన్ని కంప్యూటర్ చిప్‌లను తయారు చేసే మేనేజర్ల చేతిలో పెట్టడం ప్రమాదకరమని చంద్రబాబు చేసిన వ్యాఖ్యలను సౌమ్యా రంజన్ కూడా అంగీకరించారు. వీరిద్దరి భేటీలో ఢిల్లీలో రాష్ట్ర ప్రభుత్వ ప్రత్యేక ప్రతినిధి కంభంపాటి రామ్మోహన్‌రావు కూడా పాల్గొన్నారు.