news

గత ఏడాది వంశధార ట్రిబ్యునల్ ఇచ్చిన తీర్పుపై వివరణ కోరుతూ ఒడిశా, కేంద్రప్రభుత్వాలు పిటిషన్లు దాఖలు చేసిన నేపథ్యంలో క్షేత్రస్థాయిలో పరిశీలన కోసం ట్రిబ్యునల్ సోమవారం జిల్లాకు వచ్చింది. కొన్ని దశాబ్దాలుగా ఆంధ్రా, ఒడిశా రాష్ట్రాల మధ్య జల వాటాలు, ముంపు గ్రామాలు, వరదపోటు వంటి అంశాలపై జరగుతున్న విదానానికి చివరి మజిలీ ఆరంభమైంది. సుప్రీంకోర్టు ఆదేశాల మేరకు ఏర్పాటైన వంశధార ట్రిబ్యునల్ సోమవారం మరోసారి శ్రీకాకుళం జిల్లాలో వంశధార రిజర్వాయర్ ప్రాంతాలైన హిరమండలం, కొత్తూరు, భామిని ప్రాంతాల ప్రజలతో నేరడి బ్యారేజీ నిర్మాణంపై గల అభిప్రాయాలను రికార్డు చేసారు. గతంలో ట్రిబ్యునల్ ఇచ్చిన ఆదేశాల మేరకు కాట్రగడ్డ వద్ద సైడ్‌వీయర్ నిర్మాణ ప్రాంతాన్ని ట్రిబ్యునల్ చైర్మన్ జస్టిస్ ముకుందకమ్ శర్మ, సభ్యులు పరిశీలించారు. అక్కడ సైడ్‌వీయర్ నిర్మాణం జరిగితే ఒడిషా రాష్ట్రంలో ఎన్ని ఎకరాల వ్యవసాయభూములు వరదపోటుకు గురవుతాయన్న వివరాలను అడికి తెలుసుకున్నారు. ఏ మేరకు ఒడిషా నుంచి దిగువప్రాంతానికి వచ్చే నీటిని ఆంధ్రప్రదేశ్ ప్రభుత్వం వినియోగించుకుంటుందన్న అంశాలను కలెక్టర్ ట్రిబ్యునల్‌కు వివరించారు.

గ్రామాలు, మండలాల వారీగా రైతులు, అక్కడ ప్రజలను ట్రిబ్యూనల్ పలు అంశాలపై వారి వాయిస్‌ను రికార్డులను చేసింది. 2012, 2013లో రెండు పర్యాయాల వచ్చిన ఈ ట్రిబ్యునల్ అప్పట్లోనే ఒడిశా అభ్యంతరాల్లో వాస్తవాలు లేవన్న విషయాన్ని గ్రహించింది. అందుకే, వంశధార జలవివాదంలో అనుకూలమైన తీర్పు పొందిన ఆంధ్రప్రదేశ్ ఇకపై ఒడిశాతో జలజగడం పూర్తిగా సమసిపోయేలా మరో వాదనను ట్రిబ్యునల్ ముందు వినిపించగా, సోమ, మంగళవారాల్లో ఆంధ్రా, ఒడిశా రాష్ట్రాల్లో వంశధార జలవివాదానికి తెరవేసేలా తుది ప్రయత్నంలో జిల్లా అధికారులంతా నిమగ్నమయ్యారు. సోమవారం ఆంధ్రలో శ్రీకాకుళం జిల్లాలో హిరమండలం, గొట్టాబ్యారేజీ, కాట్రగడ్డ సైడ్‌వీయర్ నిర్మాణ జరిపే ప్రాంతాలతోపాటు నేరడి బ్యారేజీ ప్రాంతంలో గల ప్రజలతో ట్రిబ్యునల్ ఛైర్మన్ జస్టిస్ ముకుందకం శర్మ నేరుగా మాట్లాడారు. అలాగే, ఆయనతోవచ్చిన సభ్యులు కూడా పలు అంశాలపై ఆరా తీసి రికార్డు చేసారు. ఒడిశాకు కేవలం 200 క్యూసెక్కుల నీటివనరులు అవసరమని, అదే ఆంధ్రాలో 4000 క్యూసెక్కులు అరవై రోజులు నిల్వ చేసుకునే అవకాశం వంశధార అనుసంధానంతో కాట్రగడ్డ వద్ద సైడ్‌వీయర్ నిర్మాణంతో ఉంటోందని ట్రిబ్యునల్ ఛైర్మన్‌కు తెలిపారు.

2000 ఆయకట్టుకు మాత్రమే ఒడిశా సర్కార్ నీటివనరులు అడిగారని, అదేవిధంగా జలవాటాలు జరిగితే 15 టి.ఎం.సి.ల నీటిని అధనంగా నేరడి బ్యారేజీ వద్ద 30 టి.ఎం.సి.ల నీటి నిల్వలు చేసే అవకాశం శ్రీకాకుళం జిల్లాకు ఉంటోందని వివరించారు. ఆంధ్రా 30 టి.ఎం.సి.ల నీటిని వినియోగించుకునేందుకు అభ్యంతరాలు ఒడిశాకు ఏమీ లేవని, ఆ ప్రభుత్వానికి కలిగిన అపోహాలన్నీ తొలగించేలా ట్రిబ్యునల్ ముందు కలెక్టర్, వంశధార ఇంజనీర్లు అంశాలన్నీ వివరించారు. 74 - 76 మీటర్లు ఎత్తులో వంశధార రిజర్వాయర్‌లో నీటి నిల్వలు చేస్తే ఒడిషాలో భూములు ముంపునకు గురి అవుతాయన్నది అక్కడ అధికారుల అపోహాలని వాటి మూలంగా ముంపునకు గురైన గ్రామాలకు, వ్యవసాయ భూములకు పరిహారం ఆంధ్ర ప్రభుత్వం ఇచ్చేందుకు అంగీకరించిందని, అటువంటి పరిస్థితుల్లో ఒడిశా ప్రభుత్వానికి జరిగే నష్టం మరేవిధంగా లేదని కలెక్టర్ ట్రిబ్యునల్ చైర్మన్, సభ్యులకు వివరించారు. మంగళవారం ఒడిషా రాష్ట్రంలో ట్రిబ్యునల్ పరిశీలన అనంతరం వంశధార జలవివాదంపై తుది తీర్పు రానున్నది.

మోదీది అత్యంత సంపన్నుల పార్టీ.. టన్నుల కొద్దీ డబ్బు ఉంది.. అదంతా ఎన్నికల్లో ఖర్చు పెడుతున్నారు..అందుకే రెండువేల రూపాయల నోటు రద్దుచేయలేదు.. ప్రజాస్వామ్యాన్ని ఈవీఎం చిప్ మేనేజ్‌మెంట్ కు అప్పగిస్తున్నారని ముఖ్యమంత్రి చంద్రబాబునాయుడు ధ్వజమెత్తారు. బ్యాలెట్ ఓటింగ్ వల్ల నష్టమేంటని ప్రశ్నించారు. అభివృద్ధిలో ఏపీ నమూనా గుజరాత్‌ను మించిపోతోందనే కసితోనే మోదీ అడుగడుగునా అభివృద్ధిని అడ్డుకుంటున్నారు.. కేసీఆర్‌కు కావాల్సింది కూడా ఇదే.. ఏపీలో కీలుబొమ్మ ప్రభుత్వం ఉండి.. అస్థిరత నెలకొంటే జాతీయ స్థాయిలో ప్రయోజనం పొందాలనే టీడీపీ ప్రభుత్వంపై బురద జల్లుతున్నారని విమర్శించారు. ఉండవల్లి ప్రజావేదికలో ‘ప్రభుత్వ పాలన’ (గవర్నెన్స్)పై శే్వతపత్రం-2ను ముఖ్యమంత్రి సోమవారం విడుదల చేశారు. ఈ సందర్భంగా మీడియాకు శే్వతపత్రంలో అంశాలను విశదీకరించారు.

గత నాలుగున్నరేళ్లలో రాష్ట్రంలో ఏర్పాటైన ఐటీ పరిశ్రమలు గుజరాత్‌లో కూడా లేవన్నారు. దూరదృష్టి.. లక్ష్యం ఉంటే ఏదైనా సాధించ గలమన్నారు. తలసరి ఆదాయంలో ధనిక రాష్ట్రం, జనాభా తక్కువ ఉన్న తెలంగాణ సైతం మన రాష్ట్రం కంటే వెనుకబడి ఉందన్నారు. ఈ కారణంగానే మోదీ, కేసీఆర్‌లు తమపై కక్షకట్టారని ఆరోపించారు. కీలుబొమ్మ ప్రభుత్వం ఉండి, ఏపీలో అస్థిరత ఉంటే తాము లబ్ధిపొందాలనుకోవటం మంచి పద్ధతి కాదన్నారు. గత నాలుగున్నరేళ్లలో మోదీ వ్యవస్థలను భ్రష్టు పట్టించారని దీనివల్ల ఓటమి పాలయ్యారని విమర్శించారు. గుజరాత్‌లో 12 సంవత్సరాలు ముఖ్యమంత్రిగా ఏం ఒరగబెట్టారని నిలదీశారు. అన్న క్యాంటీన్‌లు, చంద్రన్న బీమా, రైతులకు ఇన్‌పుట్ సబ్సిడీ, మైక్రో న్యూట్రియంట్స్, పండుగ కానుకలు దేశంలో ఎక్కడా అమలు కావటం లేదని తెలిపారు. దేశానికి ఇప్పుడు ఏపీ లీడర్‌గా నిలిచే స్థాయికి చేరిందన్నారు. పోలవరం ప్రాజెక్ట్‌పై తెలంగాణ అభ్యంతరం చెప్పటంలో అర్థం లేదన్నారు. ఎగువన కాళేశ్వరం నిర్మిస్తూ దిగువన కట్టే ప్రాజెక్ట్‌లకు అభ్యంతరం చెప్పటమేంటని ప్రశ్నించారు. రాష్ట్రంలో ప్రధాన ప్రతిపక్షం అభివృద్ధికి అడుగడుగునా అడ్డుపడుతున్నా అధిగమిస్తున్నామని స్పష్టం చేశారు.

వివిధ శాఖల పరిధిలో మొత్తం 615 అవార్డులు సాధించటం వెనుక అధికార యంత్రాంగం కష్టం ఉందన్నారు. ప్రజల ఆహార అలవాట్లలో మార్పుల కనుగుణంగా చెత్త, వ్యర్థాల నిర్వహణతో సంపద సృష్టించే స్థితికి చేరామన్నారు. అత్యుత్తమ సంస్థలు, జవాబుదారీతనం, ప్రభుత్వ విధానాలు, వినూత్న ఆలోచనలతో అభివృద్ధిపధంలో రాష్ట్రం దూసుకు పోతోందని వివరించారు. పోలవరానికి కేంద్రం డబ్బులు మాత్రం ఇవ్వదు.. తప్పకపోవటంతోనే అవార్డులు ఇస్తోందని వ్యాఖ్యానించారు. ఒడిశా ప్రభుత్వంతో సమావేశపరిచేందుకైనా ప్రయత్నించటం లేదని చెప్పారు. రెండు రాష్ట్రాల్లో నష్టపరిహారాన్ని చెల్లించే దిశగా సంప్రదింపులు జరుగుతున్నాయని తెలిపారు. తాను కాంగ్రెస్ పార్టీకి మద్దతిస్తే ఎన్టీఆర్‌కు ద్రోహం చేసినట్లు మోదీ విమర్శించటంలో అర్థం లేదన్నారు. జాతీయ స్థాయిలో తృతీయ ఫ్రంట్ అనేది చరిత్రలోలేదని, కాంగ్రెస్, బీజేపీలకు మద్దతివ్వక తప్పని పరిస్థితులు నెలకొన్నాయని వివరించారు. కేసీఆర్ ఫెడరల్ ఫ్రంట్ ప్రయత్నాలు హాస్యాస్పదమన్నారు. బీజేపీ యేతర ఐక్య ఫ్రంట్‌కు తమ ప్రయత్నాలు కొనసాగిస్తామని స్పష్టం చేశారు.

వైఎస్సార్ కాంగ్రెస్ పార్టీ అధ్యక్షుడు, ప్రతిపక్ష నేత జగన్మోహన్ రెడ్డి పై ముఖ్యమంత్రి చంద్రబాబు సంచలన వ్యాఖ్యలు చేశారు. జగన్‌కు పంచాయతీ బోర్డు మెంబర్‌కున్న అనుభవం కూడా లేదని ఎద్దేవా చేశారు. జగన్‌కు ఎకనామిక్స్‌, సోషియాలజీ తెలియదని అన్నారు. అన్నీ ఇచ్చేస్తామని ఆయన కబుర్లు చెబుతున్నారని, ఇలాంటి అనుభవశూన్యులతో భవిష్యత్‌కు ప్రమాదమని చంద్రబాబు అన్నారు. మంగళవారం సంక్షేమ రంగంలో అమలు చేస్తున్న కార్యక్రమాలు... సాధించిన ప్రగతిపై చంద్రబాబు శ్వేతపత్రం విడుదల చేశారు. ఈ సందర్భంగా మీడియా సమావేశంలో మాట్లాడుతూ మెక్‌డొనాల్డ్స్‌‌, కేఎఫ్‌సీ కన్నా... అన్న క్యాంటీన్లలోనే శుభ్రత, నాణ్యత ఎక్కువని చెప్పారు. ఇంత తక్కువ ధరకు రుచికరమైన భోజనం అందిస్తున్న... క్యాంటీన్లు ఎక్కడున్నాయో చెప్పాలన్నారు.

ప్రభుత్వానికి వస్తున్న ఆదాయంలో కొంత రాజధానికి ఖర్చు చేస్తే... సంక్షేమ కార్యక్రమాలు అమలు చేయలేమని సీఎం అన్నారు. అందుకే కొత్త పద్ధతుల్లో రాజధాని కోసం నిధులు సమీకరిస్తున్నామని, ఇలాంటి విధానాల్లోనే ఏపీ గెలుపు ఉందని చంద్రబాబు అభిప్రాయం వ్యక్తం చేశారు. పాదయాత్ర చేసిన సమయంలో రైతుల కష్టాలు చూశామన్నారు. ఆర్థిక అసమానతలతో బాధపడుతున్నారని, అందుకే సంక్షేమ కార్యక్రమాలకు ఎక్కువ ప్రాధాన్యత ఇచ్చామని ఆయన తెలిపారు. ఆర్థిక సంస్కరణలద్వారా వచ్చే ఫలితాలను.. సంక్షే్మ కార్యక్రమాల ద్వారా, ఆర్థిక అసమానతలు తగ్గించే కార్యక్రమానికి శ్రీకారం చుట్టామని ముఖ్యమంత్రి పేర్కొన్నారు. ప్రభుత్వానికి, సమాజానికి అతి ముఖ్యమైనది సంక్షేమమని అన్నారు.

సామాజిక కారణాలు, చారిత్రక, భౌగోళిక కారణాలతో... పేదరికం, ఆర్థిక అసమానతలతో ఇబ్బంది పడుతున్నారని, సంపద సృష్టించకుండా పేదరికం పోదని, సంపద సృష్టించగలిగితే పేదరికం తొలగిపోతుందని చంద్రబాబు వ్యాఖ్యానించారు. అనాథలైనా.. బిడ్డలు పట్టించుకోని తల్లిదండ్రులైనా.. వారికి తమ ప్రభుత్వం అండగా ఉంటోందని, తాను పెద్దకొడుకులా కాపాడుకుంటానని మాటిస్తున్నానని చంద్రబాబు నాయుడు స్పష్టం చేశారు.రెసిడెన్షియల్ స్కూళ్ల సంఖ్యను పెంచామని, నిధుల కన్వర్జెన్సీ ద్వారా మౌలిక సదుపాయాలను కల్పిస్తున్నామని చంద్రబాబు అన్నారు. ప్రజలకు సంతృప్తకర స్థాయిలో నిత్యావసరాల్ని అందిస్తూ... ప్రజాపంపిణీ వ్యవస్థను తీర్చిదిద్దామని ఆయన తెలిపారు. మధ్యాహ్న భోజన పథకంలో 66 శాతం సంతృప్తి వచ్చిందన్నారు. దేశంలో ఎక్కడా లేని విధంగా అన్న క్యాంటీన్లను ప్రవేశపెట్టామని, జగ్జీవన్‌రామ్ జ్యోతి పథకం కింద ఉచిత విద్యుత్ కల్పిస్తున్నామని చెప్పారు. చంద్రన్నబీమా పథకం క్లయిమ్స్‌లో 94 శాతం సంతృప్తికరంగా ఉందన్నారు. పెద్దఎత్తున ఎన్టీఆర్ భరోసా పెన్షన్లు అందిస్తున్నామని చంద్రబాబు పేర్కొన్నారు.