news

రోడ్డున పడేసిన రాష్ట్రానికి న్యాయం చేస్తాను అంటూ, నమ్మించి మోసం చేసి, తిరుమల వెంకన్న పాదాల చెంత హామీలు ఇచ్చి, ఏపి ప్రజలను గాలికి వదిలేసి, మన రాష్ట్రానికి చేసిన అన్యాయం ఖరీదు, అక్షరాలా రూ.90,283 కోట్లు. రాష్ట్ర పునర్వ్యవస్థీకరణ చట్టం, 2014లో రాజ్యసభలో ఆనాటి ప్రధానమంత్రి మన్మోహన్‌సింగ్‌ ఇచ్చిన హామీల మేరకు ఈ మొత్తం నిధులు విడుదల చేయాల్సి ఉందని తెలిపింది. ఈ మేరకు ముఖ్యమంత్రి చంద్రబాబు ఆదివారం శ్వేతపత్రం విడుదల చేశారు. ‘పునర్విభజన చట్టంలో 14 విభాగాలుగా హామీలు ఇవ్వగా.. అందులో 9 అమలుచేయలేదు. ఐదింటిని పాక్షికంగా అమలుచేశారు. పార్లమెంటు వేదికగా అప్పటి ప్రధాని మన్మోహన్‌సింగ్‌ 2014 ఫిబ్రవరి 20న రాజ్యసభలో.. ప్రత్యేక హోదా, పన్ను ప్రోత్సాహకాలు, ప్రత్యేక అభివృద్ధి ప్యాకేజీ, పోలవరం, సిబ్బంది, ఆస్తులూ అప్పులూ పంపిణీ, వనరుల అంతరం భర్తీపై ఆరు హామీలిచ్చారు. అందులో ప్రత్యేక హోదాకు అతీగతీ లేదు. మిగతా ఐదూ పాక్షికంగా అమలు చేశారు’ అని అందులో పేర్కొన్నారు.

హామీలు, చట్టంలోని అంశాలు, ప్రతిపాదనల ప్రకారం వనరుల లోటుగా రూ. 12,099.26 కోట్లు, కొత్త రాజధాని నిర్మాణానికి రూ. 38,437 కోట్లు, ప్రత్యేక అభివృద్ధి ప్యాకేజీగా రూ. 23,300 కోట్లు, ప్రత్యేక కేటగిరీ హోదా కింద ఐదేళ్లకు 60శాతానికి బదులు 90శాతం వాటాలో వ్యత్యాసం రూ. 16,447 కోట్లు వెరసి రూ. 90,283.26 కోట్లు కేంద్రం విడుదల చేయలేదు. ఇన్ని ప్రతికూలతలు ఉన్నప్పటికీ నాయకులు, అధికారులు, ఉద్యోగుల కఠోర శ్రమ, ప్రజల భాగస్వామ్యంతో నాలుగున్నరేళ్లలో రాష్ట్రం ప్రగతి సాధించింది. 2018-19 ఆర్థిక సంవత్సరానికి 54 కీలక కేంద్ర ప్రతిపాదిత, కేంద్ర రంగ పథకాలలో ఏపీ పనితీరు ఈ ఏడాది నవంబర్ వరకు 14 పథకాల్లో మొదటి ర్యాంక్, మరో 28 పథకాల అమలులో 2 నుండి 5 ర్యాంకులు, 4 పథకాల్లో 6 నుండి 10 ర్యాంకులు సాధించినట్టు శే్వతపత్రంలో వివరించారు.

విభజన చట్టంలోని 9, 10 షెడ్యూళ్లలో ఉన్న సంస్థ ఆస్తుల విలువ రూ.1,97,280 కోట్లు. కేంద్రం నిర్లక్ష్యం కారణంగా ఈ సంస్థల ఆస్తులు, అప్పులను విభజించలేదు. పదో షెడ్యూల్లో 142 సంస్థలు ఉండగా వాటినీ విభజించలేదదు. వీటి ఆస్తుల విలువ రూ.38,772.85 కోట్లు. రాష్ట్రానికి వరప్రదాయిని పోలవరం ప్రాజెక్టును జాతీయ ప్రాజెక్టుగా ప్రకటించారు. ఈ ప్రాజెక్టుకు 2013 నాటి చట్టం ప్రకారం భూసేకరణ, సహాయ, పునరావాస కార్యక్రమాలతో పాటు పెరిగిన అంచనాలకు అనుగుణంగా రూ.57,940.86 కోట్లకు సవరించిన అంచనాలను కేంద్రానికి సమర్పించాం. ఇప్పటివరకు ఆమోదించలేదు. రాష్ట్రప్రభుత్వం ఖర్చు చేసిన రూ.3,342.4 కోట్లను ఇంకా రీయింబర్స్‌ చేయలేదు. ఏపీ జెన్‌కోకు తెలంగాణ డిస్కంలు రూ.5,732.4 కోట్ల బకాయిలున్నాయి. 2014 నాటికి ఉన్న ఈ బకాయిల వసూళ్లపై కేంద్రం ఇప్పటివరకు పరిష్కరించలేదు. గ్రేహౌండ్స్‌ శిక్షణ కేంద్రం ఏర్పాటు, అసెంబ్లీ సీట్ల పెంపు, ఢిల్లీ ఏపీభవన్‌ ఆస్తుల విభజన, పన్ను బకాయులు, రుణాలు, రీఫండ్‌ల కేటాయింపు కూడా చేయలేదు.

బీజేపీ, ప్రధాని మోదీ పై ఏపీ సీఎం చంద్రబాబు నిప్పులు చెరిగారు. రాష్ట్రానికి తీవ్ర అన్యాయం చేసిన మోదీ ఏ ముఖం పెట్టుకుని ఏపీకి వస్తున్నారని ఆయన ప్రశ్నించారు. బతికామా..చచ్చామా అని చూసేందుకు ప్రధాని వస్తున్నారా అని ట్వీట్ చేసారు. "ప్రధాని @narendramodi ఇక్కడకు వస్తామంటున్నారు. ఎందుకు వస్తున్నారు? మేము బతికామా చచ్చామా చూడ్డానికి వస్తున్నారా? మా పట్ల ఇంత దుర్మార్గంగా వ్యవహరించిన మీరు ఏ మొహం పెట్టుకుని రాష్ట్రానికి వస్తామంటున్నారు?" అంటూ చంద్రబాబు ట్వీట్ చేసారు. మరో పక్క ఈ రోజు ఉదయం మీడియాతో కూడా చంద్రబాబు మాట్లాడారు. మోదీ ప్రభుత్వం బ్రిటీష్ వాళ్ల కంటే దారుణంగా ప్రవర్తిస్తోందని ఆయన అన్నారు. కేంద్రం తీరు పై జనవరి ఒకటిన నిరసన తెలుపుతామన్నారు.

ఏం చేయాలన్న దాని పై త్వరలో నిర్ణయం తీసుకుంటామన్నారు. హింసకు తావులేకుండా పోరాటం చేస్తామని ఆయన తెలిపారు. మోసాన్ని ప్రశ్నించకుంటే జీవితాంతం మోసం చేస్తారన్నారు. ప్రజలు అన్నీ గమనిస్తున్నారని..బీజేపీతో పాటు ఆ పార్టీకి సహకరిస్తున్న వారికి ప్రజలు తగిన బుద్ధి చెప్పాలన్నారు. కేంద్రం సాయం లేకుండానే రాష్ట్రంలో అభివృద్ధి చేశామని చంద్రబాబు చెప్పారు. ఇప్పటికే పది జిల్లాల్లో ధర్మ పోరాటాలు చేశామని, మరో రెండు చోట్ల సభలు నిర్వహించనున్నామన్నారు. రాష్ట్రానికి రావాల్సినవి దక్కే వరకు పోరాటం ఆపేది లేదని స్పష్టం చేశారు.

బీజేపీ నాయకులు అధికారం ఉందని విర్రవీగుతున్నారని..రోజురోజుకూ దిగజారిపోతున్నారన్నారు. పెద్ద నోట్లు రద్దు చేయమని చెబితే అంతకంటే పెద్దనోటు తెచ్చారన్నారు. హోదా ఎవ్వరికీ ఇవ్వడం లేదనీ..అందుకే ప్యాకేజీకి ఒప్పుకున్నామన్నారు. ఇస్తామన్న ప్యాకేజీ కూడా ఇవ్వకుండా బీజేపీ మోసం చేసిందని ఆయన తెలిపారు. ఈఏపీ కింద నిధులు ఇస్తామని చెప్పి ఇవ్వలేదన్నారు. కాంగ్రెస్ తెచ్చిన చట్టాన్ని కూడా బీజేపీ అమలుచేయడం లేదన్నారు. అధికారంలోకి వస్తే హోదీ ఇస్తామన్న కాంగ్రెస్‌తో పొత్తు పెట్టుకుంటే తప్పేంటని చంద్రబాబు ప్రశ్నించారు. ఏపీకి ప్రత్యేక హాదాపై అన్ని పార్టీలు మద్దతు పలికాయని చెప్పారు.

గుంటూరు జిల్లా మంచికల్లు గ్రామంలో యరపతినేని నరసింహారావు కారు కింద అమర్చిన బక్కెట్‌ బాంబుల సూత్రధారి, పాత్రధారి మాచర్ల ఎమ్మెల్యే పిన్నెల్లి రామకృష్ణారెడ్డేనని గురజాల ఎమ్మెల్యే యరపతినేని శ్రీనివాసరావు ఆరోపించారు. శనివారం మంచికల్లులోని తన స్వగృహంలో ఏర్పాటు చేసిన విలేకరుల సమావేశంలో యరపతినేని మాట్లాడుతూ పతనావస్థలో ఉన్నప్పుడు ఇలాంటి నీచ ఆలోచనలు పుడతాయన్నారు. కుటిల రాజకీయాలు, హింస, దౌర్జన్యం, బాంబుల సంస్కృతి తమ కుటుంబానికి ఎప్పుడూ లేదన్నారు. యరపతినేని నరసింహారావు తమ కుటుంబీకుడు, రక్తసంబంధీకుడని.. తమ కుటుంబాల మధ్య ఘర్షణలు సృష్టించి పబ్బం గడుపుకునే ప్రక్రియలోనే బాంబులు అమర్చారని యరపతినేని పేర్కొన్నారు.

పార్టీ మారినంత మాత్రాన ఎమ్మెల్యే పీఆర్కేకు నరసింహారావు మీద ప్రేమ ఉండదని, గ్రామాన్ని పాడు చేయడమే వారి ధ్యేయమన్నారు. 2004 వరకు ఎలాంటి అలజడులు లేవని, కాంగ్రెస్‌ హయంలో 2010 జనవరిలో తనను, అప్పటి నరసరావుపేట ఎంపీ మోదుగుల వేణుగోపాలరెడ్డిని గ్రామంలోకి రానీయలేదని గుర్తు చేశారు. వేలాది మంది కార్యకర్తల కోసం భోజనం తయారు చేస్తే పోలీసులతో కుక్కలకు వేయించారని, ఇంత కన్నా నీచమైన సంస్కృతి ఇంకేముంటుందని ఆగ్రహం వ్యక్తం చేశారు. 2019 అసెంబ్లీ ఎన్నికల్లో మాచర్లలో టీడీపీ జెండా ఎగరడం ఖాయమన్నారు. త్వరలో తాను మంత్రినని, జగన్‌ సీఎం అని చెప్పుకోవడం హాస్యాస్పదమని యరపతినేని ఎద్దేవా చేశారు.

నరసింహారావు సోదరుడు యరపతినేని మట్టయ్య మాట్లాడుతూ తామంతా ఒక తల్లి పిల్లలమని, తమ కుటుంబాలను చీల్చడానికి కుట్రలు చేస్తున్నారన్నారు. బక్కెట్‌ బాంబుల నిగ్గు తేల్చే బాధ్యత పోలీసులదేనన్నారు. రెంటచింతల మండలం మంచికల్లులో శుక్రవారం తెల్లవారుజామున పోలీసులకు 15 నాటుబాంబులు లభ్యం కావడంపై ఆ ప్రాంతంలోనే కాదు.. జిల్లాలోనే చర్చనీయాంశంగా మారింది. బాంబులు పట్టుబడింది గురజాల ఎమ్మెల్యే యరపతినేని శ్రీనివాసరావు స్వగృహం సమీపంలోనే. పోలీసు జాగిలాలు అక్కడికి వెళ్లి ఆగిపోయాయి. దీన్నిబట్టి ఎమ్మెల్యే యరపతినేనిని లక్ష్యంగా చేసుకున్నారని స్పష్టమవుతుంది. ప్రశాంతంగా ఉన్న పల్నాడులో బాంబులు బయటపడటం స్థానికులు ఆందోళన వ్యక్తం చేస్తున్నారు. పోలీసులు ఇటువంటి వాటికి అడ్డుకట్ట వేయాలని పల్నాడు వాసులు కోరుతున్నారు.