news

ప్రజా సంక్షేమమే లక్ష్యంగా తాను రాజకీయ ఆరంగేట్రం చేయాలని నిర్ణయించుకున్నానని సీబీఐ మాజీ జేడీ లక్ష్మీనారాయణ స్పష్టం చేశారు. శనివారం తిరుపతిలో ఏర్పాటు చేసిన విలేఖరుల సమావేశంలో ఆయన మాట్లాడుతూ తన ఆలోచనలకు అనుగుణంగా ఏ రాజకీయ పార్టీ అయినా, వ్యక్తులైనా కలిసి వస్తే వారితో పనిచేయడానికి సిద్ధమన్నారు. అలాకాని పక్షంలో సొంత పార్టీ ఏర్పాటు చేసుకుని తన అలోచనలను కార్యాచరణలో పెట్టడానికి కృషి చేస్తానన్నారు. ఇప్పటి వరకు ఏ రాజకీయ పార్టీ అగ్రనేతలైనా మిమ్మల్ని సంప్రదించారా? అని అడిగిన ప్రశ్నకు లేదని సమాధానమిచ్చారు. మీరు ఎవరినైనా సంప్రదించారా? అని అడిగిన ప్రశ్నకు ఆయన మాట్లాడుతూ ఇప్పుడే తన ఆలోచనలకు ఒక రూపకల్పన చేశానని ఇక వాటిని ప్రజా బాహుళ్యంలోకి తీసుకెళతానని తెలియజేశారు. ధనం, కులాలకు అతీతంగా తన రాజకీయ ప్రయాణం ఉంటుందన్నారు.

అభివృద్ధికి తీవ్ర విఘాతంగా మారుతున్న అవినీతికి వ్యతిరేకంగా పోరాడటమే తన ఆలోచనా విధానమన్నారు. ప్రస్తుత ప్రజాస్వామ్య వ్యవస్థలో ధనం, కులం కీలకపాత్ర పోషిస్తున్నాయన్నారు. ఎన్నికలంటేనే ధన వ్యయంతో కూడుకున్న ఒక ప్రక్రియగా మారిందన్నారు. ఎన్నికల్లో పోటీచేసే అభ్యర్థి తన ప్రచారం కోసం నిర్ధిష్టమైన మొత్తాన్ని వ్యయం చేయడానికి ఎన్నికల కమిషన్ అనుమతిస్తోందన్నారు. ఎన్నికల కమిషన్ నిర్దేశించిన మొత్తానికన్నా తక్కువ వ్యయం చేసి ఎన్నికలకు వెళ్లాలన్నది తన వైఖరి అన్నారు. ఎన్నికల సందర్భంగా 50 శాతం మంది ప్రజలు డబ్బులు తీసుకోకుండా ఓట్లు వేస్తే మంచి పరిపాలకులను ఎంచుకోవచ్చని అది ప్రజా సంక్షేమానికి ఎంతగానో దోహదపడుతుందని అన్నారు. జీరో బడ్జెట్ పాలిటిక్స్ అమలు కావాలన్నది తన ఆలోచన అన్నారు.

రాష్ట్ర వ్యాప్తంగా ఆయా గ్రామాలకు సంబంధించిన సమస్యలను అక్కడి ప్రజలే గుర్తించి ఎన్నికలకు ముందు తమ వద్దకు వచ్చే ప్రతి అభ్యర్థి దృష్టికి తీసుకెళ్లాలన్నారు. అంతేకాకుండా ప్రతి అభ్యర్థి వద్ద వంద రూపాయల స్టాంప్ పేపర్‌పై సంతకం తీసుకోవాలన్నారు. ఎన్నికల తరువాత ఎవరు గెలుస్తారో సమస్యల పరిష్కారం కోసం వారిని ప్రశ్నించే అధికారం ప్రజలకు ఉంటుందన్నారు. ఒకవేళ సదరు ఎన్నికైన అభ్యర్థి ప్రజా సమస్యలను పరిష్కరించకపోతే వంద రూపాయల స్టాంప్‌పై సంతకం చేసిన ప్రతిపాదనలకు సంబంధించి న్యాయస్థానంలో పిల్ దాఖలు చేయవచ్చని అన్నారు. ఆ ప్రక్రియకు తాను అన్నివిధాలా ప్రజలకు అందుబాటులో ఉంటానన్నారు.

‘నేను మాత్ర‌మే బతకాలి.. ఇంకెవరూ బతకకూడదు’ అనేది ప్రధాని న‌రేంద్ర‌మోదీ భావజాలమని, తనతో పాటు పది మంది బతకాలనే మనస్తత్వం సీఎం చంద్రబాబు నాయుడుదని తెదేపా ఎంపీ జేసీ దివాకర్‌రెడ్డి వ్యాఖ్యానించారు. పార్లమెంటరీ పార్టీ సమావేశంలో పాల్గొనేందుకు శ‌నివారం విజయవాడ వచ్చిన ఆయన.. కేశినేని భ‌వ‌న్ వ‌ద్ద మీడియాతో మాట్లాడారు. ఈ స‌దంర్భంగా తెలంగాణ సీఎం కేసీఆర్‌, మోదీపై విమర్శలు గుప్పించారు. కేసీఆర్‌ భస్మాసురుడు లాంటి వాడని, భస్మాసురుడు ఎలాగైతే తన చేత్తో తానే భస్మమయ్యాడో ఆయన కూడా తన మూడో కంటితో తానే బూడిదవుతాడని ఎద్దేవా చేశారు.

ఆంధ్ర‌ప్ర‌దేశ్‌లో జరుగుతున్న ఐటీ దాడులకు ఎవరూ భయపడటం లేదని పేర్కొన్నారు. సీఎం చంద్రబాబు పై కేసీఆర్‌ చేసిన వ్యాఖ్యలను దివాకర్‌రెడ్డి ఖండించారు. ముఖ్యమంత్రి స్థానంలో ఉన్న వ్యక్తి అలాంటి భాష వాడటం మంచిది కాదని పేర్కొన్నారు. కేసీఆర్‌ ఏం మాట్లాడుతున్నారో ఆయనకే తెలీదు. కోపం, రాజకీయ శత్రుత్వం ఉండొచ్చుగానీ... ఆ స్థాయిలో ఉన్నవారు అలాంటి భాష మాట్లాడకూడదు. చంద్రబాబుకి ఎంత బాధ కలిగిందో నాకుతెలియదు గానీ, నేనయితే నాలుగంటించే వాడిని. చంద్రబాబుకి, కేసీఆర్‌కి అదే తేడా. కేసీఆర్‌ మూడో కన్ను తెరిస్తే భస్మాసురుడిలా ఆయనే భస్మమై పోతాడన్నారు.

నాలుగేళ్ల పాలనలో తెలంగాణకు చేసింది చెప్పుకోలేకే తెలంగాణ ముఖయమంత్రి కేసీఆర్‌ ఏపీ సీఎం చంద్రబాబుపై విమర్శలు చేస్తున్నారని ఎమ్మెల్సీ బుద్ధా వెంకన్న అన్నారు. హైదరాబాద్‌ ఏమైనా ఆయన ఫాం హౌజ్‌ అనుకుంటున్నారా అని మండిపడ్డారు. శనివారం ఉండవల్లిలో ఆయన విలేకరుల సమావేశంలో మాట్లాడుతూ... కేసీఆర్‌ రాష్ట్రానికి ఏం చేశారో చెప్పగలరా అని ప్రశ్నించారు. దీనిపై చర్చించేందుకు బహిరంగ చర్చకు రావాలని సవాల్‌ విసిరారు. నోటికి ఏది వస్తే అది మాట్లాడవద్దని తెలంగాణ ముఖయమంత్రి కేసీఆర్‌ను ఉద్దేశించి చిత్తూరు ఎంపీ శివప్రసాద్‌ అన్నారు. రాష్ట్ర అభివృద్ధికి అహర్నిశలు పాటుపడుతున్న చంద్రబాబును తిట్టడానికి ఆయనకు నోరు ఎలా వచ్చిందని ప్రశ్నించారు. కేసీఆర్‌ను తిట్టడానికి అసలు బూతులు కూడా లేవని అన్నారు. ప్రధాని మోదీ ఓ బండరాయని, అనుబంధాల విలువ తెలియదని, ఆయన పాలనలో అదే కనిపిస్తోందని విమర్శించారు.

తెలంగాణలో మహాకూటమిలో భాగంగా కాంగ్రెస్‌తో కలసి పోటీ చేసినా, ఆంధ్రప్రదేశ్‌లో మాత్రం వచ్చే ఎన్నికల్లో కాంగ్రెస్‌ సహా ఏ పార్టీతోనూ తెదేపాకు పొత్తు ఉండబోదని ముఖ్యమంత్రి చంద్రబాబు స్పష్టం చేశారు. చంద్రబాబు అధ్యక్షతన శనివారం ఉండవల్లిలోని ప్రజావేదికలో జరిగిన తెలుగుదేశం పార్లమెంటరీ పార్టీ సమావేశంలో పలు కీలక నిర్ణయాలు తీసుకున్నారు. నరేంద్రమోదీ ప్రభుత్వాన్ని గద్దె దించడమే తెదేపా లక్ష్యమని, ఐదు రాష్ట్రాల్లో జరగనున్న ఎన్నికలనుంచే ఆ దిశగా పనిచేయాలని నిర్ణయించారు. ఐదు రాష్ట్రాల ఎన్నికల సమయానికే మమతా బెనర్జీ, అఖిలేష్‌ యాదవ్‌, అరవింద్‌ కేజ్రీవాల్‌, మాయావతి వంటివారిని ఒక తాటిపైకి తెచ్చి డీఎంకే వంటి పార్టీలతోనూ కలిపి ప్రత్యామ్నాయ వేదికను సిద్ధం చేయాలని నిర్ణయించారు.

అవసరమైతే చంద్రబాబు ఆయా నాయకులతో కలిసి ఎన్నికలు జరిగే రాష్ట్రాల్లో భాజపాకు వ్యతిరేకంగా ప్రచారం నిర్వహించాలన్న నిర్ణయానికి వచ్చారు. ఒక పక్క విభజన చట్టంలోని హామీలు, రాష్ట్రానికి రావలసిన ప్రయోజనాల కోసం కేంద్రంపై ఒత్తిడి పెంచుతూనే, మరోవైపు కేంద్ర ప్రభుత్వ వైఫల్యాలను ఎండగట్టేలా జాతీయ స్థాయిలో పోరాడాలన్న నిర్ణయానికి వచ్చారు. మనమేదో కాంగ్రెస్‌తో చేతులు కలుపుతున్నామన్న భావన ప్రజల్లో కలిగించడం మంచిది కాదని, తెలంగాణలో మహాకూటమిలో కాంగ్రెస్‌ కూడా భాగస్వామే తప్ప నేరుగా ఆ పార్టీతో చేతులు కలపలేదని, ఈ విషయంలో ఎంపీలంతా స్పష్టతతో ఉండాల్సిన అవసరం ఉందని ముఖ్యమంత్రి స్పష్టం చేశారు.

ఏపీ అభివృద్ధిని చూసి గుజరాత్‌ కన్నా ఎక్కడ ముందుకు వెళ్తుందో అన్న ఆందోళన ప్రధాని మోడీలో ఉందని అందుకే చంద్రబాబు, వెంకయ్యనాయుడులు ఉన్నారని గుజరాత్‌కు ఎవరున్నారన్న మోడీ చేసిన వ్యాఖ్యలే దీనికి నిదర్శనమన్నారు. రాష్ట్రంలో బీజేపీ, వైకాపా రహస్య పొత్తులపై మీడియాలో అనేక కథనాలు వస్తున్నాయని, గుంటూరులో కన్నా లక్ష్మీనారాయణకు లబ్ధి చేకూర్చేందుకే లేళ్ల అప్పిరెడ్డిని పక్కకు పెట్టారని ప్రజలు, ఆ పార్టీ నేతలు చెప్పుకుంటున్నారని కొందరు ఎంపీలు ఈ సందర్భంగా చంద్రబాబు దృష్టికి తీసుకువచ్చారు. దీనిపై స్పందించిన చంద్రబాబు రాష్ట్రంలో 10, 15 సీట్లు బీజేపీకి ఇచ్చేందుకు సైతం జగన్‌ ఉన్నట్లుగా తెలుస్తుందన్నారు. ఈ అనైతిక పొత్తులు, రహస్య లాలూచీలను ప్రజల్లోకి బలంగా తీసుకువెళ్లి ఎండగట్టాలని చంద్రబాబు ఎంపీలకు సూచించారు.