news

అంతర్జాతీయ స్థాయిలో మరో వేడుక నిర్వహణకు విశాఖపట్నం వేదిక కాబోతుంది. నగరంలో ఏర్పాటవుతున్న మెడ్‌టెక్‌ జోన్‌లో డిసెంబరు 13 నుంచి 15వ తేదీ వరకు 4వ ప్రపంచ ఆరోగ్య సంస్థ(డబ్ల్యూహెచ్‌వో) విశ్వ వైద్య పరికరాల సదస్సు(గ్లోబల్‌ మెడికల్‌ డివైజ్‌ ఫోరమ్‌) జరగనున్నట్లు మెడ్‌టెక్‌ జోన్‌ ప్రతినిధులు ఒక ప్రకటనలో తెలిపారు. ఈ సదస్సుకు 194 దేశాల నుంచి 2వేల మంది ప్రతినిధులు వచ్చే అవకాశముందని వివరించారు. ఇప్పటికే ప్రపంచ ఆరోగ్య సంస్థ పలు వ్యాధులపై ఎన్నో సాంకేతిక పరిష్కారాలతో ముందుకొస్తోందని, ఈ సదస్సు ద్వారా మరింత ఆరోగ్యవంతమైన ప్రపంచాన్ని నిర్మించే అవకాశం ఉంటుందని పేర్కొన్నారు.

వైద్యపరికరాల తయారీ కేంద్రంగా ఆంధ్రప్రదేశ్‌ను తీర్చిదిద్దడమే లక్ష్యంగా ‘మెడ్‌టెక్‌ జోన్‌’కు ఆంధ్రప్రదేశ్ ప్రభుత్వం శ్రీకారం చుట్టింది. విశాఖపట్నం జిల్లా పెదగంట్యాడ మండలం నడుపూరులో 270 ఎకరాల్లో నిర్మించనున్న దేశంలోనే తొలి వైద్య పరికరాల తయారీ పార్కు (మెడ్‌టెక్‌ జోన్‌)కు 2016లో చంద్రబాబు శంకుస్థాపన చేసారు. ఇప్పటికే కొన్ని కంపెనీలు ప్రారంభం అయ్యాయి. ఇప్పుడు ఏకంగా, ఇక్కడ ఒక పెద్ద అంతర్జాతీయ స్థాయి సదస్సు జరుగుతుంది. ఇది చంద్రబాబు సత్తా.

ఆంధ్రప్రదేశ్‌ మెడికల్‌ టెక్నాలజీ జోన్‌(ఏపీ మెడ్‌టెక్‌ జోన్‌) పేరుతో తయారైన ఈ పార్కుకు ఏపీ ప్రభుత్వం 275 ఎకరాలు కేటాయించింది. ఇక్కడ వైద్యపరికరాలను తయారు చేసే పరిశ్రమలకు భూమిని కేటాయించి, మౌలిక వసతులు కల్పించింది. 200కుపైగా పరిశ్రమలు ఇక్కడ ఏర్పాటవుతాయని ప్రభుత్వం అంచనా వేస్తోంది. ఇప్పటికే కొన్ని కంపెనీలు మొదలయ్యాయి. సూది నుంచి స్కానింగ్‌ యంత్రం వరకు అన్నీ ఇక్కడే తయారయ్యేలా ప్రభుత్వం చర్యలు తీసుకోనుంది. ఇక్కడి నుంచి విదేశాలకూ వైద్యపరికరాలను ఎగుమతి చేయాలని ప్రభుత్వం యోచిస్తోంది.

జాతీయ ఉత్తమ ఉపాధ్యాయిని పురస్కార గ్రహీత మేకా సుసత్య రేఖపై ప్రధాని నరేంద్ర మోదీ ప్రశంసల జల్లు కురిపించారు. ఆమె సేవలను కొనియాడుతూ ట్వీట్ చేశారు. చిన్నారులకు అర్ధమయ్యేలా ఆసక్తికరంగా గణితం బోధిస్తున్నారని ప్రశంసించారు. సుసత్య రేఖ కుటుంబంలో అందరూ ఉపాధ్యాయులే. అమ్మ సత్యవతి దేవి, తాత వెంకన్న చౌదరి హిందీ పండిట్లుగా, నాన్న సత్యనారాయణ సోషల్ టీచర్‌గా రిటైర్ అయ్యారు. భర్త గురయ్య, అక్క ఇంద్రాణి, బావ వీరన్న, చెల్లెలు పద్మజారాణి, మేనమామ సత్యనారాయణ ఉపాధ్యాయులుగా పని చేస్తున్నారు. కుటుంబంలో మొదటిసారిగా తమ కుమార్తె జాతీయ పురస్కారం సాధించడం ఆనందంగా ఉందని సుసత్య రేఖ అమ్మ సత్యవతి దేవి చెప్పారు.

ఇది ఇలా ఉండగా, దేశ వ్యాప్తంగా 374కి అవార్డులు ప్రకటిస్తే, మన రాష్ట్రం నుంచి ఒక్కరే ఎంపిక కావటం పట్ల చర్చ జరుగుతుంది. 2016లో రాష్ట్రం నుంచి 10 మంది ఉపాధ్యాయులను జాతీయ అవార్డులకు ఎంపిక చేసిన కేంద్ర ప్రభుత్వం ఈ సారి వాటి సంఖ్యను ఒకటికి తగ్గించడం పట్ల ఆందోళన వ్యక్తమవుతోంది. నవ్యాంధ్రపై కేంద్ర సర్కారు వివక్ష చూపిందన్న అభిప్రాయాలు వ్యక్తమవుతున్నాయి. రాష్ట్రంలో దాదాపు 1.80 లక్షల మంది ఉపాధ్యాయులు ఉండగా, 2017 సంవత్సరానికి సంబంధించి ఒక్కరినే ఉత్తమ ఉపాధ్యాయ అవార్డుకు ఎంపిక చేశారు. శనివారం జాతీయ ఉత్తమ ఉపాధ్యాయ అవార్డుల జాబితాను చూసిన రాష్ట్ర ఉపాధ్యాయులు తీవ్ర నిరాశ వ్యక్తం చేశారు. రాష్ట్రానికి అన్యాయం జరిగిందని అంటున్నారు. విద్యా రంగంలో దేశంలోనే మంచి స్థానంలో ఉన్న ఏపీలో జాతీయ స్థాయి అవార్డులకు అర్హత కలిగిన గురువులు లేరా? అన్న ప్రశ్నలు వినిపిస్తున్నాయి.

కేంద్ర ప్రభుత్వ సూచన మేరకు తాజాగా ఆరుగురు ఉపాధ్యాయలను ఎంపిక చేసి ఆ జాబితాను రాష్ట్రం పంపించింది. కానీ, ఆ జాబితా నుంచి ఏకంగా ఐదుగురి పేర్లను తొలగించి తూర్పుగోదావరి జిల్లాకు చెందిన మేకా సుసత్యరేఖను మాత్రమే ఎంపిక చేశారు. తెలంగాణ, కర్ణాటక రాష్ట్రాల నుంచి ముగ్గురు చొప్పున, కేరళ నుంచి ఇద్దరు ఉపాధ్యాయులను ఎంపిక చేసి పంపమని కోరిన కేంద్రం.. ఆ మేరకు అందరినీ జాతీయ ఉత్తమ ఉపాధ్యాయ అవార్డులకు ఎంపిక చేయడం గమనార్హం. బాగా పనిచేస్తున్న ఉపాధ్యాయుల్ని గుర్తించి ప్రోత్సహించేందుకు, జాతీయ స్థాయిలో ఉపాధ్యాయ వృత్తి గౌరవాన్ని పెంచేందుకు ఈ అవార్డులను ఏర్పాటు చేశారు. భారత ప్రభుత్వం 1958వ సంవత్సరంలో జాతీయ ఉత్తమ ఉపాధ్యాయ అవార్డులను ప్రకటించింది.

అసెంబ్లీ సమావేశాలకు హాజరుకాని వైకాపా ఎమ్మెల్యేలకు జీతాలు ఎందుకుని ఆంధ్రప్రదేశ్‌ ముఖ్యమంత్రి చంద్రబాబునాయుడు ప్రశ్నించారు. అమరావతిలో ఏర్పాటు చేసిన తెదేపా రాష్ట్రస్థాయి కార్యశాలలో సార్వత్రిక ఎన్నికలు, అసెంబ్లీ సమావేశాలపై చర్చించారు. ఈ సందర్భంగా సీఎం మాట్లాడుతూ... వైకాపా పోరాడలేక పారిపోయిన పార్టీ, అసెంబ్లీకి రానివారు ఎమ్మెల్యేలుగా ఉండటం ఎందుకు అని ప్రశ్నించారు. బాధ్యత మరిచిన వైకాపా ఎమ్మెల్యేలు.. జీతాలు తీసుకోవడం మరువలేదని విమర్శించారు. కేంద్రం ఏపీకి నిధులివ్వకపోగా..పీడీ అకౌంట్లపై విమర్శలు చేస్తోంది.. కేంద్రం విమర్శలకు గట్టిగా సమాధానం ఇవ్వాలి. కేంద్రంతో సఖ్యతగా ఉంటే అన్నీఆమోదిస్తున్నారు. ఏపీ విషయంలో మాత్రం కేంద్రం కక్ష గట్టినట్టు వ్యవహరిస్తోంది’’ అని చంద్రబాబు ఆవేదన వ్యక్తం చేశారు.

"తెలుగుదేశం పార్టీలో మొదటి ప్రాధాన్యత బిసిలకే. పదవుల్లో,సంక్షేమంలో,అభ్యున్నతిలో బిసిలకే పెద్దపీట. టిడిపి చేస్తున్న అన్ని పనుల్లో తొలి తాంబూలం బిసిలకే. పేదల పార్టీ తెలుగుదేశం. పేదరికంలేని,ఆర్ధిక అసమానతలు లేని సమాజం ఏర్పాటే టిడిపి లక్ష్యం. క్రమశిక్షణ లేని పార్టీ, కట్టుబాటులేని కుటుంబం,క్రమశిక్షణ లేని వ్యవస్థ కుప్పకూలుతుంది. ఎంతమంది ఉన్నారు అనేదికాదు ఎంత ఐక్యంగా ఉన్నారు అనేది ముఖ్యం. మన కర్రతో మనల్ని కొట్టుకుంటే దెబ్బతగుల్తుందా లేదా..? రాజకీయాల్లో ఎత్తుగడలు ఉంటాయి.కానీ రాజకీయ వ్యూహాలు, ప్రతివ్యూహాలు బహిర్గతం కారాదు.మన కాళ్లకు మనమే బంధాలు వేసుకుంటే ముందుకు పోలేం. ఎన్నికల ముందు అందరూ సంఘటితంగా ఉండాలి. గ్రూపు విభేదాలకు స్వస్తి చెప్పాలి." అని చంద్రబాబు అన్నారు.

కేంద్రంపై ధ‌ర్మ పోరాటం కొన‌సాగుతోందని మరోసారి స్పష్టం చేశారు. పోరాడి ప్రత్యేక హోదా సాధించుకుందామని, యువత ఆత్మహత్యలు చేసుకోవద్దని ఆయన సూచించారు. కేంద్రం తెలంగాణకు సంబంధించిన బిల్లులు నాలుగురోజుల్లోనే పాస్ చేసిందని, ఏపీ విషయాన్ని వచ్చేసరికి క‌క్షక‌ట్టిన‌ట్టు వ్యవ‌హరిస్తున్నారని చంద్రబాబు మండిపడ్డారు. ‘‘నాలుగేళ్లల్లో సగటున 10.5 శాతం వృద్ధిరేటు సాధించాం. ప్రతి సంవ‌త్సరం రెండంకెల వృద్ధిరేటు సాధించిన రాష్ట్రం ఏపీనే. చంద్రన్న భీమా, అన్న క్యాంటిన్లతో ప్రభుత్వానికి మంచి పేరు వ‌స్తోంది. రాష్ట్ర వ్యాప్తంగా 300 అన్న క్యాంటిన్లు పెడతాం. అక్టోబ‌ర్ 2న ముఖ్యమంత్రి యువ‌నేస్తం పథకం ప్రారంభిస్తాం. అమ్మాయి ఆర్ధిక ప‌రిస్ధితుల ప్రాతిపదికన పెళ్ళికానుక ఇస్తాం. రాష్ట్రంలో డెంగ్యూ నివారణకు చర్యలు తీసుకోవాలి అని అధికారులను చంద్రబాబు ఆదేశించారు.