news

అమరావతి బాండ్లు బీఎస్ఈలో లిస్టింగ్ అయ్యే సందర్భంగా జరిగే కార్యక్రమంలో పాల్గొడానికి ముఖ్యమంత్రి చంద్రబాబు నాయుడు ఈ నెల 27న ముంబైకి వెళ్లనున్నారు. ఆ రోజు ఉదయం 9.05 గంటలకు మార్కెట్ తెరిచిన వెంటనే లిస్టింగ్ జరగబోతోంది. ఈ పర్యటన సందర్భంగా ముఖ్యమంత్రి పలువురు పారిశ్రామికవేత్తలతో భేటీ కానున్నారు. అమరావతి బాండ్లకు మంచి స్పందన వచ్చిందని, అమరావతి అభివృద్ధిలో పలు జాతీయ అంతర్జాతీయ సంస్థలు భాగస్వామ్యం కావడానికి ఆసక్తి చూపుతున్నాయనడానికి ఇదే తార్కాణమని ముఖ్యమంత్రి అన్నారు. ఈ సంద‌ర్భంగా గురువారం జ‌రిగిన సీఆర్డీఏ సమావేశంలో అమరావతి బాండ్ల గురించి ముఖ్యమంత్రి అధికారులకు వివరించారు.

ఉండవల్లిలో ప్రజా వేదికలో జరిగిన సీఆర్డీఏ సమావేశంలో ముఖ్యమంత్రి పలు ప్రోజెక్టుల ప్రగతిని సమీక్షించారు. విజయవాడలో ఉన్న మూడు కెనాళ్లతో పాటు కరకట్ట, ప్రకాశం బ్యారేజీ - కృష్ణ నదీ తీరప్రాంతాన్ని నీల-హరిత సుందర ప్రాంతంగా తీర్చిదిద్దడానికి వెంటనే చర్యలు చేపట్టాలని ముఖ్యమంత్రి నారా చంద్రబాబు నాయుడు సీఆర్డీఏ, అమరావతి అభివృద్ధి సంస్థ అధికారులను ఆదేశించారు. అమరావతిలో వైకుంఠపురం నుంచి చోడవరం వరకు దాదాపు 30 కిలోమీటర్ల పైగా ఉన్న నది తీరప్రాంతాన్ని అత్యంత ఆకర్షణీయంగా అభివృద్ధి చేయడానికి ప్రణాళికలు త్వరగా సిద్ధం చేసి అమలు చేయాల్సిందిగా ముఖ్యమంత్రి సూచించారు.

విజయవాడ-గుంటూరు-తెనాలి వెంబడి ఉన్న కాల్వలను సుందరంగా మార్చేలా ప్రతిపాదనలు వెంటనే రూపొందించి అమలు చేయడానికి చర్యలు తీసుకోవాలని ముఖ్యమంత్రి తెలిపారు. ప్రకాశం బ్యారేజీ పరిసరాల లో ఉన్న కొండ ను, ఘాట్లను సందర్శకులకు ఆహ్లాదం ఆనందం కలిగించేలా తీర్చిదిద్దాలని, వీటికి సంబంధించిన పనులను త్వరగా ప్రారంభించాలని ఆదేశించారు. 'స్వచ్ఛమైన, శుభ్రమైన జలాలు 365 రోజులు కెనాళ్లలో పారే అవకాశం ఉంది. అందుకు తగ్గట్టుగా ఆ కాల్వల చుట్టుపక్కల ఉన్న ముళ్లకంపలు, వ్యర్ధాలను, తొలగించి పరిశుభ్రం చేసి హరితహారాలను అభివృద్ధి చేయాలి. ప్రకాశం బ్యారేజీ నుంచి కరకట్ట వైపు ఇంకా రహదారులను విస్తరించడం, ఆకర్షణీయ ప్రాంతాలుగా రూపొందించడం చేయాలి" అని ముఖ్యమంత్రి చెప్పారు.ఈ ప్రోజెక్టుల నిర్మాణానికి సంబంధించిన వివరాలను జాతీయ హరిత ట్రిబ్యునల్ (ఎన్జీటీ) దృష్టికి కూడా తీసుకెళ్లి పర్యావరణంగా తగు అనుమతులు కూడా తీసుకోవాలని సూచించారు.

పలు రాష్ట్రాల్లో అధునాతన టెక్నాలజీ వినియోగంతో, జే ఫార్మ్ లెర్నింగ్ సెంటర్లు నిర్వహిస్తూ,వ్యవసాయంలో ఉత్పత్తి పెంచేందుకు ఆధునిక పరికరాల వినియోగం, ఏ పంట వెయ్యాలి, వాడాల్సిన విత్తనాలు,ఫెర్టిలైజర్స్, ఇలా ఉత్పత్తి వచ్చే వరకూ అన్ని విషయాల్లోనూ రైతులకు సలహాలు, శిక్షణ ఇస్తున్నాయి జే ఫార్మ్ లెర్నింగ్ సెంటర్ల ప్రతినిధులు ఈ రోజు మంత్రి లోకేష్ తో సమావేశం అయ్యారు. ఆంధ్రప్రదేశ్ ప్రభుత్వ సహకారంతో జే ఫార్మ్ లెర్నింగ్ సెంటర్ ఏర్పాటు చేసేందుకు సిద్ధంగా ఉన్నారు. రైతులకు ఆదాయం పెంచే విధంగా నూతన యాప్ రూపొందించిన జే ఫార్మ్. ఊబర్ మోడల్ లో వ్యవసాయం కోసం వినియోగించే ట్రాక్టర్లు, ఇతర పరికరాలను అద్దెకు ఇచ్చే విధంగా యాప్ రూపకల్పన చేసారు.

ప్రకాశం,చిత్తూరు జిల్లాలో జే ఫార్మ్ ఇప్పటికే పైలెట్ ప్రాజెక్ట్ చేపట్టింది. రైతులు సొంతంగా ట్రాక్టర్లు,ఇతర వ్యవసాయ పరికరాలు కొనాల్సిన అవసరం లేకుండా,యాప్ లో రిజిస్టర్ అవ్వడానికి ఎటువంటి ఖర్చు లేకుండా, ఇతర రైతుల నుండి పరికరాలు అద్దెకు తీసుకునే అవకాశం ఉంటుంది. జే ఫార్మ్ యాప్ కి  ప్రకాశం,చిత్తూరు జిల్లాలో రైతుల నుండి మంచి స్పందన వచ్చింది. పైలెట్ ప్రాజెక్ట్ ద్వారా రెండు జిల్లాల్లో యాప్ వినియోగించిన రైతులకు అదనపు ఆదాయం వచ్చింది. ప్రభుత్వ సహకారం అందిస్తే 13 జిల్లాల్లో జేఫార్మ్ సేవలు విస్తరిస్తాం. 

టఫే ట్రాక్టర్ల కంపెనీ సిఓఓ టిఆర్ కేశవన్, కంపెనీ ప్రతినిదులతో మంత్రి నారా లోకేష్ భేటీ అయ్యారు. టఫే ప్రపంచంలోనే మూడోవ అతిపెద్ద ట్రాక్టర్ల తయారీ కంపెనీ. మంత్రి లోకేష్ మాట్లాడుతూ "టెక్నాలజీ వినియోగంలో అందరికంటే ముందు ఉన్నాం. తక్కువ వర్షపాతం ఉన్నా వ్యవసాయ రంగంలో వృద్ధి సాధించాం. నూతన పద్ధతులు,న్యాచురల్ ఫార్మింగ్,నీటి సంరక్షణ పద్ధతులకు అధిక ప్రాధాన్యత ఇస్తున్నాం. వ్యవసాయ రంగంలో నూతన ఆవిష్కరణలు,టెక్నాలజీ అనుసంధానం కోసం నాస్కామ్ తో కలిసి వ్యవసాయంలో సెంటర్ ఆఫ్ ఎక్సలెన్స్ ఏర్పాటు చేసాం. తక్కువ ఖర్చుతో రైతుల ఉత్పత్తి పెంచేందుకు టెక్నాలజీ ముఖ్యపాత్ర పోషిస్తుంది. డేటా అనలిటిక్స్ ద్వారా దేశ వ్యాప్తంగా పంటలకు ఉన్న డిమాండ్,ధరల్లో మార్పులు,ఎటువంటి పంటలు వేస్తే అధిక లాభాలు వస్తాయి...ఇలా అనేక విషయాలు ముందుగానే తెలుసుకొని రైతులకు సరైన సలహాలు ఇచ్చే అవకాశం ఉంటుంది. టఫేకి ప్రభుత్వం తరపున పూర్తి సహకారం అందిస్తాం. జే ఫార్మ్ లెర్నింగ్ సెంటర్ ఏర్పాటు, 13 జిల్లాలో యాప్ అమలుకు కావాల్సిన పూర్తి సహకారం అందిస్తాం" అని లోకేష్ అన్నారు..

కొన్ని రోజుల క్రిందట, శ్రీశైలం ఫారెస్ట్‌ ఆఫీసర్‌ను కొట్టి, కాళ్లు మొక్కించుకున్న వీడియో సోషల్ మీడియాలో బాగా వైరల్ అయ్యింది. దాడికి పాల్పడిన ఆరుగురు తెలంగాణకు చెందిన వారిని ఇప్పటికే ఆరెస్ట్ చేసి జైలుకు పంపారు. మరోవైపు శ్రీశైలం ఎస్సైపై టిడిపి ఎమ్మెల్యే కొడుకు దాడి చేశాడనే రెండు రోజుల నుంచి బీజేపీ కార్యకర్తలు కొంత మంది జాతీయ స్థాయి లో ప్రచారం చేస్తున్నారు. వీళ్ళకి వైసీపీ, జనసేన తోడయ్యారు. అయితే, ఇది అవాస్తవమని పోలీసు ఉన్నతాధికారులు చెబుతున్నారు. వీటిపై సాక్షాత్తూ ఏపీ డీజీపీ ఠాకూర్‌ సీరియస్‌ అయ్యారు. దీంతో కర్నూలు జిల్లా ఎస్పీ స్పందించారు. దీనిపై సోషల్ మీడియాలో దుష్ప్రచారం చేసిన వారిపై పోలీసులు కేసులు నమోదు చేశారు.

ఈ నెల 14వ తేది రాత్రి 12 గంటల సమయంలో శ్రీశైలం ఫారెస్ట్ ఆఫీస్‌ వద్ద మద్యం సేవిస్తున్న ఆరుగురిని విధుల్లో ఉన్న ఫారెస్ట్ సెక్షన్ ఆఫీసర్ జ్యోతి స్వరూప్ వారించారు. ఇక్కడ మందు తాగొద్దని చెప్పారు. దీంతో మందు బాబులు రెచ్చిపోయి ఎమ్మెల్సీ కొడుకునే వెళ్లిపోమంటావా అని సెక్షన్ ఆఫీసర్‌పై దాడికి పాల్పడ్డారు. అంతేకాదు నానా బూతులు తిడుతూ గన్‌తో కాల్చిపడేస్తామంటూ మందుబాబులు బెదిరించారు. సెక్షన్‌ ఆఫీసర్‌ను కొట్టడమే కాకుండా చివరకు అతనితోనే కాళ్లు పట్టించుకుని వదిలిపెట్టారు. అయితే సెక్షన్‌ ఆఫీసర్‌పై దాడిచేస్తున్న దృశ్యాలను ఆ మందుగ్యాంగ్‌లోని ఓ వ్యక్తి తన సెల్‌ఫోన్‌లో రికార్డ్‌ చేశాడు. తాము డ్యూటీలో ఉన్న ఫారెస్ట్‌ ఆఫీసర్‌నే కొట్టి అతనితోనే కాళ్లు పట్టించుకున్నామని బయట చెప్పుకొని ఫోజులు కొట్టొచ్చనుకున్నాడు. అయితే ఆ ప్లాన్‌ రివర్స్‌ అయ్యింది.

తాము తీసుకున్న గోతిలో తామే పడిపోయారు. నిందితుల బండారాన్ని తాము తీసిన వీడియోనే బయటపెట్టింది. దీంతో రంగంలోకి దిగిన ఫారెస్ట్‌ అధికారులు ఈ ఘటనకు కారకులైన ఆరుగురిని పట్టుకొని పోలీసులకు అప్పగించారు. నిందితులను అరెస్ట్‌ చేసిన పోలీసులు నందికొట్కూరు న్యాయమూర్తి ఎదుట హాజరు పరిచారు. దీంతో న్యాయమూర్తి వారికి రిమాండ్‌ విధించారు. అయితే దీని పై, బీజేపీ, వైసీపీ దుష్ప్రచారం చేసాయి. శ్రీశైలం దాడి దృశ్యాలను సోషల్ మీడియాలో పోస్ట్‌ చేసి శ్రీశైలం ఎస్సైపై తెలుగుదేశం పార్టీ ఎమ్మెల్యే కొడుకు దాడి చేశాడని, చంద్రబాబు వైఫల్యం అంటూ పోస్ట్ లు పెట్టారు. అయితే ఈ వీడియో, ప్రచారం వాస్తవం కాదని ఏపీ డీజీపీ ఆర్పీ ఠాకూర్‌ స్పష్టం చేశారు. కొందరు దురుద్దేశ్యంతో శాంతిభద్రతలకు విఘాతం కలిగించేలా వ్యవహరించారని నిర్ధారించారు.