news

రాష్ట్రంలో ఎన్నికలకు దాదాపు ఏడాది ముందు వైసీపీ అధ్యక్షుడు జగన్మోహన్‌రెడ్డి చేపట్టిన పాదయాత్ర అసెంబ్లీ నియోజకవర్గాల్లో జగడాలు పెంచుతూ, పార్టీ నాయకుల మధ్య ఆధిపత్య పోరును తీవ్రతరం చేస్తున్నది. ఇప్పటికే పది జిల్లాల్లో పాదయాత్ర పూర్తిచేసిన ఆయన చివరి ఘట్టంగా ఉత్తరాంధ్ర మూడు జిల్లాల్లో ప్రజా సంకల్పయాత్రకు ఈ నెల 14న శ్రీకారం చుట్టారు. విశాఖ జిల్లాలో నర్సీపట్నం నియోజకవర్గంలోని గన్నవరం మెట్ట వద్ద నుంచి జగన్‌ పాదయాత్ర ప్రారంభమైంది. కొన్ని నియోజకవర్గాల్లో నాయకుల మధ్య ఆధిపత్య పోరు, విభేదాలు జగన్‌ లక్ష్యానికి, పార్టీ పటిష్ఠానికి అడ్డంకిగా మారుతున్నాయని కొంతమంది నేతలే ఆందోళన వ్యక్తం చేస్తున్నారు. జగన్‌ పాదయాత్రకు ముందు ఆ పార్టీ జాతీయ ప్రధాన కార్యదర్శి విజయసాయిరెడ్డి అసెంబ్లీ నియోజకవర్గాల వారీగా నిర్వహిస్తున్న సమావేశాల్లో తీవ్రస్థాయిలో నాయకుల మధ్య వాగ్వాదాలు చోటుచేసుకుంటున్నాయి. ఇన్నాళ్లూ నివురుగప్పిన నిప్పులా వున్న అభిప్రాయ భేదాలు పార్టీ అధినేత రాకకు ముందు, తర్వాత కూడా బయటపడుతున్నాయి.

రెండు రోజుల క్రితం (శనివారం) పాయకరావుపేట నియోజకవర్గ సమన్వయ కమిటీ సమావేశం కోటవురట్ల మండలం తంగేడులో జరిగింది. ఆ సమావేశంలో పార్టీ కోటవురట్ల మండల అధ్యక్షుడు పైలా రమేష్‌కు, తంగేడు రాజులకు మధ్య వున్న విభేదాలు బయటపడ్డాయి. విజయసాయిరెడ్డి సమక్షంలోనే పార్టీ నాయకులు రెండు వర్గాలుగా విడిపోయి గొడవపడడం గమనార్హం. వైసీపీ నాయకుల గొడవను చిత్రీకరించిన పత్రికా విలేఖరుల వద్ద నుంచి విజయసాయిరెడ్డి వర్గీయులు కెమెరాలు లాక్కొని బలవంతంగా ఆ చిత్రాలను తొలగించారు. అదేవిధంగా ఆదివారం జరిగిన ఎలమంచిలి అసెంబ్లీ నియోజకవర్గ స్థాయి సమావేశంలో వైసీపీ నాయకులు కన్నబాబురాజు, బొడ్డేడ ప్రసాద్‌ పరస్పరం తీవ్ర ఆరోపణలు చేసుకోవడంతో విజయసాయిరెడ్డి కంగుతిన్నారు. ఇరువురు నాయకులు ఒకరిపై ఒకరు విమర్శలు చేసుకోవడమే కాకుండా పార్టీ అధినేత జగన్‌ను కూడా ఇందులోకి లాగడం, తాను ఆయనకు భారీగా డొనేషన్‌ ఇచ్చానంటూ కన్నబాబురాజు పేర్కొనడం కలకలం రేపింది.

వైసీపీలో విభేదాలు లేవని, అంతా మీడియా సృష్టి అని, కొందరు ఉద్దేశపూర్వకంగా పార్టీకి వ్యతిరేకంగా ప్రచారం చేస్తున్నారంటూ ఈ నెల 13న నర్సీపట్నంలో పార్టీ జాతీయ ప్రధాన కార్యదర్శి విజయసాయిరెడ్డి వ్యాఖ్యానించారు. పాయకరావుపేట, ఎలమంచిలి నియోజకవర్గాల సమావేశాలతో ఆయనకు వాస్తవమేమిటో అర్థమయ్యిందని పార్టీ నేతలు అంటున్నారు. ఇక విశాఖ జిల్లాలో తొలుతగా పాదయాత్ర ప్రారంభించి ఏకంగా వారం రోజులు పాటు జగన్‌ సమయం కేటాయించిన నర్సీపట్నం నియోజకవర్గంలో కూడా పాదయాత్ర అనంతరం పరిణామాలు పార్టీకి నష్టం కలిగించేవిగా మారాయి. పాదయాత్రలో జగన్‌ గానీ, పార్టీ సీనియర్లుగానీ తమకు ఎటువంటి ప్రాధాన్యం ఇవ్వలేదని కొందరు నాయకులు బహిరంగంగా, మరికొందరు నిగూఢంగా అసంతృప్తి వ్యక్తం చేస్తున్నారు. గత ఎన్నికల్లో టీడీపీ అభ్యర్థి అయ్యన్నపాత్రుడుకు గట్టి పోటీ ఇచ్చిన గణేష్‌కే మళ్లీ టిక్కెట్టు ఇస్తారంటూ ప్రచారం జరుగుతుంది. అయితే నియోజకవర్గంలో వారం రోజుల పాటు పాదయాత్ర నిర్వహించిన జగన్‌ కనీసం నర్సీపట్నం బహిరంగ సభలో కూడా గణేష్‌ను అభ్యర్థిగా ప్రకటించకపోవడం చర్చనీయాంశమైంది.

విజయవాడ అంతర్జాతీయ విమానాశ్రయం నుంచి దేశ రాజధానికి ఇప్పటివరకు ఎయిర్‌ ఇండియా మాత్రమే విమాన సర్వీసులు నడుపుతోంది. ఇటీవల కాలంలో విజయవాడ రూట్‌లో వారంలో ఏడు రోజుల పాటు నడపాల్సిన విమానాలను నాలుగు రోజుల చొప్పున కుదించి నడుపుతోంది. మరో నెల రోజుల్లో ఈ సమస్య నుంచి బయట పడతామని ఎయిర్‌ ఇండియా ప్రకటిస్తూ వస్తోంది. ఇదే తరుణంలో ఇండిగో విమానయాన సంస్థ కీలక నిర్ణయం తీసుకుంది. ఢిల్లీకి ఉన్న డిమాండ్‌ను క్యాష్‌ చేసుకోవాలని నిర్ణయించింది. వెంటనే ఢిల్లీకి విమాన సర్వీసు నడిపే విషయంలో తమ బృందం చేత అధ్యయనం చేయించింది. ఢిల్లీకి ముందుగా ఒక సర్వీసు ఎక్కడా స్టాప్‌ లేకుండా నేరుగా నడపాలని నిర్ణయించింది.

ఈ మేరకు అక్టోబర్‌ 1 నుంచి బుకింగ్స్‌ కూడా ఇప్పటి నుంచే చేపడుతోంది. ఇండిగో అధికారిక వెబ్‌సైట్‌లో బుకింగ్‌కు అవకాశం కల్పించింది. ప్రారంభ ధర రూ.5,316గా ప్రకటించింది. నూతన సర్వీసును ప్రారంభిస్తున్న సమాచారాన్ని ఇంతవరకు ఇండిగో ఎయిర్‌లైన్స్‌ విజయవాడ విమానాశ్రయ అధికారుల దృష్టికి అయితే తీసుకు రాలేదు. రోజూ సాయంత్రం 4 గంటలకు..రోజూ సాయంత్రం నాలుగు గంటలకు ఢిల్లీకి విమానాన్ని నడపాలని ఇండిగో విమానయానసంస్థ నిర్ణయించింది. సాయంత్రం 3.45 గంటలకు విజయవాడ వస్తుంది. విజయవాడ నుంచి 4 గంటలకు ఈ విమానం బయలు దేరుతుంది. సాయంత్రం సమయంలో ముందుగా ఢిల్లీకి బయలుదేరాలనుకునే వారికి ఈ విమాన సర్వీసు సౌకర్యవంతంగా ఉంటుంది.

విజయవాడ అంతర్జాతీయ ఎయిర్‌పోర్టు నుంచి దేశ రాజధాని ఢిల్లీకి నడిచే విమాన సర్వీసుల సంఖ్య మొత్తం నాలుగుకు చేరింది. ఎయిర్‌ ఇండియా సంస్థ మొత్తం మూడు సర్వీసులను నడుపుతోంది. ఉదయం 9.10 నిమషాలకు ఒకటి, సాయంత్రం 5.20 గంటలకు ఒక సర్వీసు, రాత్రి 9.10 గంటలకు మరో సర్వీసు చొప్పున నడుపుతోంది. ఈ సర్వీసులకు తోడు ఇండిగో విమాన సర్వీసు కూడా జతకూడటంతో విజయవాడ నుంచి ఢిల్లీకి నాలుగు సర్వీసులతో మెగా రూట్‌గా ఉంది.

కృష్ణా జిల్లా మల్లవల్లి గ్రామంలో నిర్మిస్తున్న లేల్యాండ్ ప్లాంట్ ఉద్యోగాలకు, ఉపాధి కల్పనా కార్యాలయం, ప్రకటన విడుదల చేసింది. అశోక్ లేల్యాండ్ ప్లాంట్ లో, ట్రైనీ ఉద్యోగాలకు గ్రామీణ ప్రాంత నిరుద్యోగు యువతీ యువకులు దరఖాస్తు చేసుకోవాల్సిందిగా కోరింది. ITI విద్యార్హత ఉన్న వారికి 150 ఖాళీలు ఉన్నాయని, నెలకు 12 వేల జీతం అని చెప్పారు. వయుసు, 18 నుంచి 23 సంవత్సరాలు ఉండాలి. దీనికి సంబంధించి ఈ నెల 25న గుంటూరులో, 27న తెనాలిలో ఇంటర్వ్యూ లు ఉంటాయి. ఆసక్తి కలిగిన వారు, సర్టిఫికేట్ జెరొక్ష్ కాపీ, రేషన్ కార్డు, ఆధర్ కార్డు, మరియు పాస్పోర్ట్ సైజు ఫోటోతో, ఉదయం 9 గంటలకు, ఇంటర్వ్యూ వేదికకు చేరుకువాలి.

మల్లవల్లి గ్రామంలో రూ. 135కోట్ల పెట్టుబడితో ఈ సంస్థను ఏర్పాటు చేస్తున్నారు. తొలిదశలో ఏటా 2400 బస్ బాడీలు తయారు చేసే బిల్లింగ్ యూనిట్సు రూ.90 కోట్లతో ఏర్పాటు చేస్తారు. రెండు దశలో మరో రూ.45 కోట్లతో 2400 బస్ బాడీలను తయారు చేసే మరో యూనిటీను ఏర్పాటు చేస్తారు. ఈ సంస్థకు 100 ఎకరాలను ప్రభుత్వం కేటాయించింది. ఈ యూనిట్లలో 2400 మందికి ఉపాధి అవకాశాలు కలుగుతాయి. తర్వాత విడతలో ఛాసిస్లు తయారుచేసే యూనిట్ ను నెలకొల్పవచ్చని సమాచారం. రాష్ట్ర ప్రభుత్వంతో కుదుర్చుకున్న ఒప్పందంలో భాగంగా స్థానికంగా 2,295 మందికి ఉపాధిని ఈ సంస్థ కల్పించనుంది.

మల్లవల్లి గన్నవరం దగ్గర ఉన్న, మోడల్‌ ఇండస్ర్టియల్‌ పార్క్‌ లో మొత్తం 1260.06 ఎకరాల సువిశాల భారీ మోడల్‌ ఇండస్ర్టియల్‌ పార్క్‌లో 964 ప్లాట్లు ఉండగా, కేటాయింపులకు ముందే హౌస్‌ఫుల్‌ బోర్డు పెట్టాల్సిన పరిస్థితి ఏర్పడింది... మరో పక్క ఇదే ఇండస్ర్టియల్‌ పార్క్‌ లో, మోహన్‌ స్పిన్‌టెక్స్‌ సంస్థకు ఇంటిగ్రేటెడ్‌ మెగా టెక్స్‌టైల్స్‌ పార్క్‌ ఏర్పాటుకు 81 ఎకరాలను ప్రభుత్వం కేటాయించింది... భారీ పరిశ్రమల కేటగిరిలో ఇవి పోను గోల్డ్‌ ప్రాసెసింగ్‌ యూనిట్‌తో పాటు అనేక స్పి న్నింగ్‌ మిల్లులు, ఫార్మా కంపెనీలు ఆసక్తి చూపిస్తున్నాయి..