news

ఏపీలో తెలుగుదేశం పార్టీని ఇరుకున పెట్టేందుకు బీజేపీ తన వ్యూహానికి పదును పెడుతోంది. కేంద్రం సాయంతో నడుస్తున్న పథకాలు వివిధ అభివృద్ధి కార్యక్రమాలను టీడీపీ తమ పథకాలుగా ప్రచారం చేస్తోందని ఆరోపిస్తున్న బీజేపీ అవి కేంద్ర పథకాలని ప్రకటించి ప్రచారం చేసేందుకు తాపత్రయపడుతోంది. ఇందులో భాగంగానే ఆయా శాఖల మంత్రులను రాష్ట్రంలో పర్యటించేలా చేసి తద్వారా పధకాలపై బీజేపీ ముద్ర ఉంటుందని ఆపార్టీ నేతలు భావిస్తున్నారు. బీజేపీ తాజా వ్యూహానికి తెలుగుదేశం కూడా కౌంటర్ సిద్దం చేసింది. పోలవరానికి వేల కోట్ల రూపాయల ఆర్ధిక సాయం చేస్తున్నా ప్రాజెక్టు నిర్మాణాన్ని ప్రతి సోమవారం సమీక్షిస్తూ ఇది రాష్ట్ర ప్రభుత్వం నిర్మిస్తుందనే ప్రచారాన్ని తెలుగుదేశం ప్రజల్లోకి తీసుకువెళ్లిందని బీజేపీ నేతలు విశ్లేషిస్తున్నారు. చంద్రబాబు వల్లే ప్రాజెక్టు నిర్మాణం పరుగులు తీస్తోందని ప్రజలు కూడా నమ్ముతున్నారు.

అందుకే, కేంద్ర జలవనరులశాఖ మంత్రి నితిన్ గడ్కరీ పది నెలల తర్వాత పోలవరం వచ్చారు. ప్రాజెక్టు నిర్మాణ పురోగతిని సమీక్షించారు. గడ్కరీ వస్తున్న సందర్భంగా బీజేపీ నేతలు కూడా హడావుడి సృష్టించారు. గడ్కరీ కూడా, ఈ ప్రాజెక్ట్ మోడీ వల్లే అవుతుంది అంటూ చెప్పుకొచ్చారు. మరో పక్క, ఈనెల 13వ తేదీన మంగళగిరికి సమీపంలో నిర్మిస్తున్న అఖిలభారత వైద్య విజ్ఞాన సంస్థ ఆసుపత్రి నిర్మాణ పురోగతిని సమీక్షించేందుకు కేంద్ర వైద్య ఆరోగ్య శాఖ మంత్రి జెపీ నడ్డా కూడా వచ్చారు. ఎయిమ్స్ నిర్మాణ పురోగతి, కేంద్ర ప్రభుత్వం చేస్తున్న సాయం, విభజన చట్టంలో కేంద్రం ఎయిమ్స్ నిర్మిస్తామని ఇచ్చిన హామీని ప్రజలకు గుర్తు చేసారు. ఈ నెలలోనే, కేంద్ర మానవ వనరుల అభివృద్ది శాఖ మంత్రి రాష్ట్రానికి వచ్చి, రాష్ట్రంలో ఏర్పాటైన, వివిధ కేంద్ర విద్యా సంస్థలు పరిశీలించి, ఇదంతా మోడీ చలవే అని చెప్పనున్నారు.

ఈ విధంగా కేంద్ర మంత్రులను రాష్ట్రానికి తీసుకువస్తుండటంతో తెలుగుదేశం కూడా అప్రమత్తమైంది. రాష్ట్ర ప్రభుత్వం ఎయిమ్స్‌కు అత్యంత విలువైన సుమారు వంద ఎకరాల స్థలం ఇచ్చిన విషయం నీరు, రోడ్లు, ఇతర మౌలిక సదుపాయాల్ని కల్పిస్తున్న అంశాలను ప్రజల్లోకి తీసుకువెళ్తుంది. అలాగే, పోలవరం గురించి, ఇప్పటికే కేంద్రం అడుగడుగునా ఎలా కొర్రీలు పెడుతుంది ప్రజలకు చెప్తున్నారు. మరో పక్క కేంద్ర విద్యా సంస్థలకు, రాష్ట్ర ప్రభుత్వం ఎంత ఖరీదైన భూములు ఇచ్చింది, ప్రహరీలు కట్టింది, మౌలిక సదుపాయలు ఇచ్చింది చెప్పి, కేంద్రం వీటికి ఇప్పటికి ఎన్ని డబ్బులు ఇచ్చింది, ఇవి పుర్తవ్వాలి అంటే ఎన్ని దశాబ్దాలు పడుతుందో ప్రజలకు వివరిస్తారు. అలాగే, కేంద్రం మనకు వేసే బిక్ష ఏమి ఉండదు అని, రాష్ట్రాలు ఇచ్చిన డబ్బులే, కేంద్రం తిరిగి రాష్ట్రాలుకు ఇస్తుందనే విషయం బీజేపీ మర్చిపోతుందని, ఈ విషయం కూడా ప్రజల్లోకి తీసుకువెళ్లనున్నారు. రాష్ట్రం నుంచి రూపాయి వెళ్తుంటే, తరిగి 37 పైసలు మాత్రమే వస్తుందని, మిగతా 63 పైసలు కేంద్రం వాడుకుంటుందని గుర్తు చేస్తున్నారు. రాష్ట్రంలో బీజేపీ ఆటలు సాగనివ్వబోమని, ప్రత్యేక హోదా విభజన చట్టంలో ఇచ్చిన మిగతా హామీలను నెరవేర్చకుండా ఎవరు వచ్చి ఏం చేసినా ఉపయోగం లేదని టీడీపీ నేతలు అంటున్నారు.

పార్లమెంట్‌ సమావేశాలు ప్రారంభంలోపే కేంద్రంపై ఒత్తిడి పెంచేందుకు వ్యూహ రచన చేస్తోంది తెలుగుదేశం పార్టీ. జులై 18 నుంచి ఆగస్టు 10 వరకు మాన్‌సూన్‌ సెషన్స్‌ జరగనున్నాయి. మొత్తం 18 రోజుల పాటు సాగనున్న సమావేశాల్లో ఏపీకి చెందిన పార్టీల నేతలు ప్రత్యేక హోదాతో పాటు విభజన చట్టంలోని హామీలపై ప్రభుత్వాన్ని నిలదీయనున్నారు. కేంద్రంపై మరోసారి అవిశ్వాసం పెట్టేందుకు సైతం టీడీపీ సమాయత్తం అవుతోంది. అందులోభాగంగా ప్రత్యేక హోదాపై దేశంలోని బీజేపీ, కాంగ్రెస్సేతర పార్టీలకు సీఎం చంద్రబాబు లేఖలు రాశారు. ఎన్డీయే ప్రభుత్వంపై టీడీపీ పెట్టిన అవిశ్వాసానికి మద్దతివ్వాలని కోరారు. విభజన హామీలు వివరించారు. గత సమావేశాల్లో అవిశ్వాసం పెట్టినా చర్చకు రానీయలేదని బాబు పేర్కొన్నారు. 8 పేజీలతో లేఖలో విభజన హామీలు, ఇప్పటివరకు చేసిన పనులు, చేయాల్సిన పనులను చంద్రబాబు పొందుపర్చారు.

ఇదే అంశంపై టీడీపీ ఎంపీలు సుజనా చౌదరి, కొనకళ్ల నారాయణ.. టీఆర్ఎస్ ఎంపీ కేశవరావును ఆదివారం మధ్యాహ్నం కలిశారు. కేంద్ర ప్రభుత్వం ఏపీకి చేసిన వాగ్ధానాలు పూర్తిగా నెరవేర్చలేదని, ప్రత్యేకహోదా ఇస్తామని మోసం చేసిందని, ఆంధ్రప్రదేశ్‌కు జరిగిన అన్యాయాన్ని ఎంపీలు వివరించారు. ఈ విషయంలో తమకు మద్దతు ఇవ్వాలని కోరారు. అలాగే డీఎంకే, అన్నాడీఎంకే నేతలను కూడా టీడీపీ రాజ్యసభ సభ్యుడు సీఎం రమేష్ కలవనున్నారు. మరోవైపు శివసేన అధినేత ఉద్దవ్‌ థాకరేను టీడీపీ ఎంపీలు కలవాలని అనుకున్నారు. అనివార్యకారణాల రీత్యా వీరి పర్యటన రద్దు అయింది. ప్రస్తుతం ఉద్దవ్‌ థాకరే ముంబైలో లేరు. అందువల్ల వీరి పర్యటనకు తాత్కాలికంగా బ్రేక్ పడింది. సోమవారం లేదా మంగళవారం ఆయన్ను టీడీపీ ఎంపీలు కలిసే అవకాశం ఉంది.

విభజన హామీలపై బీజేపీని ఇరుకున పెట్టేందుకు ఉన్నఅన్ని అవకాశాలనూ పరిశీలిస్తోంది. రాజ్యసభ డిప్యూటీ ఛైర్మన్‌ ఎన్నికలో.. జాతీయ స్థాయిలో విపక్షాలను ఏకతాటిపైకి తెచ్చేందుకు మరోసారి టీడీపీ అధినేత సమాయత్తం అవుతున్నారు. ఢిల్లీలోనూ ఉద్యమ వేడిని రగిలించేందుకు టీడీపీ వ్యూహం రచిస్తోంది. హక్కుల సాధనకోసం దీక్షలు చేస్తూనే.. రాష్ట్రానికి చేసిన అన్యాయంపై కేంద్రాన్ని ఇరుకున పెట్టాలని యోచిస్తున్నారు టీడీపీ అధినేత చంద్రబాబు. పార్లమెంటు వర్షాకాల సమావేశాల తొలిరోజే మోడీ ప్రభుత్వంపై అవిశ్వాస తీర్మానం ప్రవేశ పెడుతూ స్పీకర్‌కు లేఖ ఇవ్వాలని అమరావతిలో గురువారం సీఎం చంద్రబాబు అధ్యక్షతన జరిగిన తెదేపా పార్లమెంటరీ పార్టీ కూడా నిర్ణయించింది.

బీజేపీ జాతీయాధ్యక్షుడు అమిత్ షా మీడియా దిగ్గజం రామోజీ రావును కలిశారు. శుక్రవారం తెలంగాణకు పర్యటనకు వచ్చిన అమిత్ షా.. బీజేపీ నాయకులతో సమావేశం అనంతరం రామోజీ ఫిల్మ్ సిటీకి వెళ్లారు. అక్కడ రామోజీ రావును ఆయన నివాసంలో కలిశారు. ‘సంపర్క్ ఫర్ సమర్థన్’ కార్యక్రమంలో భాగంగా ఆయన రామోజీతో భేటీ అయ్యారు. ఎన్డీయే సర్కారు గత నాలుగేళ్లుగా సాధించిన విజయాల గురించి వివరించారు. మోదీ ప్రభుత్వం ప్రతిష్టాత్మకంగా ప్రారంభించిన కార్యక్రమాలు, సాధించిన విజయాలతో రూపొందించిన బుక్‌లెట్లను రామోజీకి అందజేశారు. ఆయనతో కాసేపు పలు అంశాలపై చర్చించారు. ఈ విషయాన్ని ఆయన ట్విటర్ ద్వారా వెల్లడించారు. అయితే, ఈ సమావేశ ప్రధాన ఉద్దేశం మాత్రం చంద్రబాబే అనే సమాచారం వస్తుంది.

చంద్రబాబు ఎన్డీఏ నుంచి బయటకు వచ్చిన తరువాత, మోడీ - అమిత్ షా గ్రాఫ్ పడిపోవటం మొదలైంది. చంద్రబాబు ఢిల్లీలో ప్రెస్ మీట్ పెట్టి మోడీని ఎండగట్టటం, తెలుగుదేశం పెట్టిన అవిశ్వాస తీర్మానం చర్చించకుండా మోడీ పారిపోవటం, దేశ స్థాయిలో ప్రాంతీయ పార్టీలను చంద్రబాబు ఏకం చెయ్యటం, కర్ణాటకలో బీజేపీ ఓటమికి చంద్రబాబు పిలుపు ఇవ్వటం, తారువాత అన్ని పార్టీలతో కలిసి చంద్రబాబు వేదిక పంచుకోవటం, ఇవన్నీ బీజేపీకి ఇబ్బంది కలిగిస్తున్నాయి. చంద్రబాబు లాంటి నమ్మకమైన మిత్రపక్షం దూరం జరిగిందని, ఎన్డీఏ బలహీనపడుతుంది అనే సంకేతాలు బలంగా వస్తున్నాయి. దానికి తోడు, కాంగ్రెస్, బీజేపీ యేతర పార్టీను చంద్రబాబు ఏకం చేస్తున్నారు. ఇదే ఇప్పుడు బీజేపీకి తలనొప్పిగా మారింది.

మమతా బనర్జీ, మాయావతి లాంటి నేతలు తృతీయ ప్రత్యామ్నయం అని ఎప్పటి నుంచో అంటున్నా, చంద్రబాబు వస్తున్నారు అనేసరికి చాలా ప్రాంతీయ పార్టీలు ఆసక్తి చూపిస్తున్నాయి. అందుకే, బీజేపీ దీనికి కౌంటర్ మొదలు పెట్టింది. రామోజీతో జరిగిన సమావేశంలో, ఇదే విషయం ప్రస్తావించినట్టు సమాచారం. ఇప్పుడన్న పరిస్థితుల్లో చంద్రబాబు మళ్ళీ ఎన్డీఏ కి రారు అని అర్ధమువుతుంది, అయితే ఆయన్ను తృతీయ కూటమి వైపు వెళ్ళకుండా, మా పై విమర్శలు తగ్గించమనండి, ఉన్న పరిధుల్లో రాష్ట్రానికి చెయ్యాల్సినవి చేస్తాం అని చెప్పినట్టు సమాచారం. తద్వారా, కాంగ్రెస్ బలపడటం కాని, తృతీయ కూటమి ఏర్పడటం కాని జరగదని బీజేపీ లెక్క. మొన్న గడ్కరీ కూడా ఇదే విషయం చంద్రబాబుతో చెప్పారని ప్రచారం జరుగుతుంది. దేశ శ్రేయస్సు కోసం కాంగ్రెస్ పార్టీ రాకుండా, చూడాల్సిన బాధ్యత మీ పై కూడా ఉంది అని గడ్కరీ చంద్రబాబుతో చెప్పినట్టు సమాచారం. అయితే ఈ మధ్య కాలంలో రామోజీ నడవిక చూస్తుంటే, బీజేపీకి చాలా దగ్గరైనట్టు తెలుస్తుంది. ఇది వరకు లాగా, చంద్రబాబుకు, రామోజీకి సంబంధాలు లేవనే ప్రచారం కూడా ఉంది. మరి రామోజీ, చంద్రబాబుకు చెప్తారా ? చెప్పినా చంద్రబాబు వింటారా ?