news

ఆంధ్రప్రదేశ్ ముఖ్యమంత్రి చంద్రబాబు ఈ రోజు మీడియాతో మాట్లాడారు. అయితే, చాలా రోజుల తరువాత మెగాస్టార్ చిరంజీవి పై వ్యాఖ్యలు చేసారు. కొన్ని రోజుల క్రిందట, చిరంజీవి తెలుగుదేశం పార్టీలో చేరతారనే సంకేతాలు వచ్చాయి. అయితే అనూహ్యంగా బీజేపీ, పవన్ ను తెర మీదకు తీసుకురావటం, పవన్ ఆక్టివ్ అవ్వటంతో, చిరంజీవి తన తమ్ముడు పార్టీలో చేరతారనే అనే వార్తలు వస్తున్నాయి. ఈ నేపధ్యంలో చిరంజీవి పై, ఈ రోజు చంద్రబాబు వ్యాఖ్యలు చేసారు. మాజీ సియం కిరణ్ కుమార్ రెడ్డి కాంగ్రెస్ పార్టీలో చేరటం పై, విలేఖరులు అడగగా, చంద్రబాబు స్పందించారు. కిరణ్‌కుమార్‌రెడ్డి పార్టీ పెట్టారు.. ప్రజలు ఆదరించలేదు.. మళ్లీ కాంగ్రెస్‌లోకి వెళ్లిపోయారు.. కానీ చిరంజీవి కాంగ్రెస్‌లో ఉన్నారో లేదో స్పష్టత లేదని చంద్రబాబు వ్యాఖ్యానించారు... వీరంతా కష్ట కాలంలో పోరాడాల్సింది, ఎవరూ ముందుకు రాలేదని అన్నారు.

కేంద్రంతో సమస్యలున్నా... పోలవరం ప్రాజెక్ట్ ఆగదని ముఖ్యమంత్రి చంద్రబాబు స్పష్టం చేశారు. తనపై బీజేపీ, వైసీపీ నేతలు తప్పుడు ప్రచారం చేస్తున్నారన్నారు. వాళ్లతో పవన్‌కల్యాణ్ కూడా కలిశారని చెప్పుకొచ్చారు. రాష్ట్రంలో పుట్టినవారు కూడా పోలవరంపై తప్పుడు ప్రచారం చేస్తున్నారని మండిపడ్డారు. కేసుల విషయంలో లాలూచీపడి.. రాష్ట్ర ప్రయోజనాల పట్ల దుర్మార్గంగా వ్యవహరిస్తున్నారని ధ్వజమెత్తారు. కేంద్ర ప్రభుత్వంలో చేరడానికి వైసీపీ ఆశ పడుతోందని తెలిపారు. పార్లమెంట్‌లో పోరాటం నుంచి తప్పించుకునేందుకే వైసీపీ డ్రామాలాడుతోందని సీఎం చంద్రబాబు ధ్వజమెత్తారు. పోరాడే సమయంలో వైసీపీ ఎంపీలు ఎందుకు రాజీనామా చేశారని ప్రశ్నించారు. ఎన్నికలు రాని రాజీనామాలు ఎందుకు? అని నిలదీశారు. అసెంబ్లీకి రాని ఎమ్మెల్యేలు ఎందుకు? అని అడిగారు.

వచ్చే నెలలో అమరావతికి ఓ రూపం వస్తుందని సీఎం చంద్రబాబు అన్నారు. ఆంధ్రప్రదేశ్ ఒక బెస్ట్‌ టీమ్‌ అని దేశంలో నిరూపితమైందని చెప్పారు. కోర్టుల్లో, ట్రిబ్యునల్‌లో ప్రభుత్వానికి వ్యతిరేకంగా కేసులు వేశారని ఆవేదన వ్యక్తం చేశారు. చివరికి ప్రపంచ బ్యాంకుకు సైతం తప్పుడు ఫిర్యాదులు చేశారని వాపోయారు. గ్రామదర్శిని పేరుతో జనవరి వరకు ప్రజల వద్దకు వెళ్తామని చెప్పారు. గ్రామదర్శిని కార్యక్రమంలో 75చోట్ల తాను పాల్గొంటానని సీఎం వెల్లడించారు. అన్న క్యాంటీన్‌ అద్భుతంగా విజయవంతమైందని చంద్రబాబు అన్నారు. టీడీపీ అధికారంలోకి వచ్చి ఈనెల 16వ తేదీకి 1500రోజులు పూర్తవుతుందని వెల్లడించారు. విభజన అనంతరం రాష్ట్ర పరిస్థితి ఆందోళన కలిగించిందన్నారు. సంతృప్తితో కూడిన అభివృద్ధి కోసం మా ప్రయత్నం చేశామని తెలిపారు. రైతుల రుణమాఫీ కోసం రాష్ట్ర నిధులు ఖర్చు చేస్తే.. కేంద్రం రెవెన్యూ లోటులో కోత పెట్టిందని ఆరోపించారు.

ఇది కార్పొరేట్ ప్రీ స్కూల్ అనుకునేరు. కానే కాదు. దానిని తలదన్నే రీతిలో రూపుదిద్దుకున్న అంగన్ వాడీ కేంద్రం. నమ్మలేకపోతున్నారా? నమ్మి తీరాల్సిందే. ఇది ప్రభుత్వం ఆధ్వర్యంలో నడిచే అత్యాధునిక అంగన్ వాడీ కేంద్రం. కృష్ణా జిల్లా యంత్రాంగం ప్రత్యేక శ్రద్ధతో దీనిని తీర్చిదిద్దింది. జిల్లా వ్యాప్తంగా ఉన్న అంగన్ వాడీ కేంద్రాలను దశల వారీగా 'మోడల్ అంగన్ వాడీ సెంటర్స్'గా తీర్చిదిదటానికి చర్యలు తీసుకుంటామని కలెక్టర్ లక్ష్మీకాంతం కొద్దికాలం క్రితం ప్రకటించారు. స్వీకారం కార్యక్రమంలో భాగంగా హాస్టల్స్, పాఠశాలలు, ఆసుపత్రులను దాతల సహాయ సహకారాలతో ఆధునికీకరిస్తున్న కలెక్టర్ అంగన్ వాడీ కేంద్రాలను కూడా ప్రత్యేకంగా తీర్చిదిద్దాలని భావించారు.

కృష్ణా జిల్లా వ్యాప్తంగా మోడల్ అంగన్ వాడీ స్కూళ్ళ ఏర్పాటు కోసం ప్రణాళికలు రూపొందించారు. ప్రత్యేకంగా బడ్జెట్ కేటాయించారు. ముందుగా ఒక స్కూల్ను మోడల్గా తీర్చిదిద్దాలని నిర్ణయించారు. దానిని ఆత్కూరు గ్రామంలో ఏర్పాటు చేయాలని నిర్ణయించారు. అత్యద్భుతంగా తీర్చిదిద్దారు. భవనం లోపల చక్కటి ఫ్లోరింగ్, సీలింగ్, వాల్కేరింగ్ సదుపాయాలు కల్పించారు. అంగన్ వాడీ పిల్లలకు విజ్ఞానాన్ని, వినోదాన్ని పంచే విధంగా తీర్చిదిద్దారు. పై ఫ్లోర్, గోడల నిండా విద్యాసంబంధ చిత్రాలు, ప్రహరీ లోపల, బయట సామాజిక స్పృహను పెంపొదించే ఛాయా చిత్రాలు ఉన్నాయి.

పిల్లల కోసం చిన్నపాటి స్విమ్మింగ్ పూల్ ను ఏర్పాటు చేశారు. మూత్రశాలలు, మరుగుదొడ్డి కూడా సౌకర్యవంతంగా తీర్చిదిద్దారు. పిల్లలు ఆడుకోవటానికి ఆటపరికరాలను ఏర్పాటు చేశారు. కింద టైల్స్ పరిచారు. చుట్టూ చక్కని గార్డెనింగ్తో చూడచక్కటి వాతావరణాన్ని రూపొందించారు. ఇవన్నీ పేద పిల్లల కోసం. మనం, మన పిల్లలను పమించే కార్పొరేట్ ప్రీ స్కూల్స్ కూడా ఇంత అందంగా, సౌకర్యవంతంగా, హంగులతో ఉండదు అంటే ఆశ్చర్యం కాదు. ఇప్పుడు ఈ మోడల్, రాష్ట్రమంతటా ఏర్పాటు చేయ్యనుంది ప్రభుత్వం. త్వరలోనే అన్ని అంగన్ వాడీ కేంద్రాలు ఇలా మారనున్నాయి.

ప్రయాణికులకు అతి తక్కువ ధరల్లో స్వచ్ఛమైన తాగునీటిని అందజేయాలన్న లక్ష్యంతో రూపొందిన ‘రైల్‌ నీర్‌’ బాట్లింగ్‌ ప్లాంట్‌ ఏర్పాటుకు అడుగు ముందుకుపడింది. విజయవాడ దగ్గరలోని మల్లవల్లి ఇండస్ర్టియల్‌ కారిడార్‌లో ‘ రైల్‌నీర్‌ బాట్లింగ్‌ ప్లాంట్‌’ ఏర్పాటు చేయటానికి ఇండియన్‌ రైల్వే క్యాటరింగ్‌ అండ్‌ టూరిజం కార్పొరేషన్‌ (ఐఆర్‌సీటీసీ) శ్రీకారం చుట్టింది. మల్లవల్లిలో ప్లాంట్‌ కోసం 1.04 ఎకరాల భూమిని ఏపీఐఐసీ నుంచి ప్రభుత్వం నిర్ణయించిన ఎకరం రూ. 16.50 లక్షల ధరకు అవుట్‌రేట్‌ సేల్‌ కింద కొనుగోలు చేయాలని ఐఆర్‌సీటీసీ నిర్ణయించింది. భూమి కేటాయింపుపై ఇప్పటికే ఏపీఐఐసీ నుంచి ఐఆర్‌సీటీసీకి మౌఖికంగా అనుమతి లభించింది. అధికారికంగా ఐఆర్‌సీటీసీకి, ఏపీఐఐసీ భూమిని కేటాయించాల్సి ఉంది.

స్వాధీనంచేసే భూమిలో మౌలిక సదుపాయాలను కల్పించేందుకు ఏపీఐఐసీ ఆసక్తి చూపింది. ఏపీఐఐసీ ఇంకా భూమిని తమకు కేటాయించకపోవటంతో బుధవారం ఐఆర్‌సీటీసీ ప్రతినిధులు మల్లవల్లి ఇండస్ర్టియల్‌ కారిడార్‌లో తమకు ప్రతిపాదించిన భూమిని పరిశీలించారు. ఆ తర్వాత ఏపీఐఐసీ అధికారులను ఎప్పటికి భూమిని స్వాధీనం చేస్తారని అడిగారు. అలాట్‌మెంట్‌ చేసిన తర్వాత సేల్‌ డీడ్‌ రాసుకున్నాక భూమిని స్వాధీనం చేస్తామని, దీనికి నెల రోజుల సమయం పట్టవచ్చని ఐఆర్‌సీటీసీ ప్రతినిధులకు ఏపీఐఐసీ అధికారులు తెలిపారు. తాము త్వరగా ‘రైల్‌ నీర్‌’ బాట్లింగ్‌ యూనిట్‌ను ఏర్పాటు చేయదలిచామని, సంసిద్ధంగా ఉన్నామని చెప్పారు. స్థలం స్వాధీనంతోనే ప్లాంట్‌ పనులు ప్రారంభిస్తామని ఐఆర్‌సీటీసీ ప్రతినిధులు ఏపీఐఐసీ దృష్టికి తీసుకు వచ్చారు.

సరిగ్గా 2012-13 ఆర్థిక సంవత్సరంలో కేంద్ర రైల్వే బడ్జెట్‌లో రైల్‌ నీర్‌ బాట్లింగ్‌ ప్లాంట్‌ ఏర్పాటుకు కేటాయింపులు చేయటం జరిగింది. దక్షిణ మధ్య రైల్వేలో సికింద్రాబాద్‌ తర్వాత కీలకమైన విజయవాడ డివిజన్‌లో ‘రైల్‌ నీర్‌ ’ ప్లాంట్‌ ఏర్పాటుకు కేంద్రం కేటాయింపులు చే సింది. విజయవాడలో పుష్కలంగా నీటి లభ్యత ఉందని, కృష్ణానది చెంతనే ఉండటం వల్ల నీటికి సమస్య ఉండదని గుర్తించిన కేంద్రం ఈ ప్రాజెక్టును ఏరికోరి మరీ అప్పట్లో విజయవాడ డివిజన్‌కు కేటాయించింది. అప్పట్లో రూ.10 కోట్ల వ్యయంతో ‘రైల్‌ నీర్‌ ’ బాట్లింగ్‌ ప్లాంట్‌ ఏర్పాటుచేయాలని బడ్జెట్‌లో కేటాయింపులు చేశారు. కానీ, కార్యరూపం దాల్చటంలో అంతులేని జాప్యం చోటుచేసుకుంది.