news

ఈనెల 11న పోలవరం ప్రాజెక్టు సందర్శనకు వస్తున్న కేంద్ర జలవనరుల శాఖా మంత్రి నితిన్‌గడ్కరీకి సర్వం పక్కా ఆధారాలతో వివరించి, నివేదించేందుకు రాష్ట్ర ప్రభుత్వం అన్ని ఏర్పాట్లు చేస్తోంది. ఈ నేపథ్యంలో సోమవారం రాష్ట్ర జలవనరుల శాఖామంత్రి దేవినేని ఉమామహేశ్వరరావు, ఇతర ప్రజాప్రతినిధులతో కలిసి, పోలవరాన్ని సందర్శించారు. ఈ సందర్భంగా అక్కడ జరుగు తున్న పనులన్నింటిని మంత్రి పరిశీలించారు. కేంద్ర మంత్రి నితిన్‌ గడ్కరీకి ప్రాజెక్టు పనులపై పవర్‌ ప్రజెంటేషన్‌ ఇచ్చేందుకు జలవనరుల శాఖాధికారులు సర్వం సిద్ధం చేస్తున్నారు.అంతేకాకుండా నితిన్‌ గడ్కరీ కి ఇప్పటివరకు పనుల పురోగతిపై ఒక నివేదికను సమర్పించేందుకు కూడా సిద్దమవుతున్నారు. ఈ నివేదికలో ఇప్పటివరకు జరిగిన పనుల పురోగతి, ఏఏ పనికి ఎంతెంత ఖర్చు పెట్టిందీ, ఇంకా ఏమేమి పనులు మిగిలి ఉన్నాయో వాటి గురించే కాకుండా ఇంకా కేంద్రం నుంచి వచ్చిన, రావాల్సిన నిధులతో కూడిన వివరాలతో నివేదికను గడ్కరీకి అందజేసేందుకు రాష్ట్ర జలవనరుల శాఖాధికారులు సమస్తం రడీ అయ్యారు.

కేంద్రమంత్రికి సర్వం తెలిసేలా నివేదిక ఉండాలని ముఖ్యమంత్రి, జలవనరుల శాఖాధికారులను ఆదేశించడంతో ఆ మేరకు అధికారయంత్రాంగం చర్యలు తీసుకుంటుంది . ఇటీవల గడ్కరీ నేరుగా రాష్ట్ర జలవనరుల శాఖా మంత్రి దేవినేని ఉమా మహేశ్వరరావుకు ఫోన్‌ కాల్‌ చేసి, తాను పోలవరం ప్రాజెక్టు సందర్శనకు వస్తున్న సంగతిని తెలిపిన సంగతి తెలిసిందే. 11వ తేదీన గడ్కరీ నేరుగా ముఖ్యమంత్రి నారా చంద్రబాబునాయుడుతో కలిసి పోలవరం ప్రాజెక్టును సందర్శిస్తారు.ఈ సందర్బంగా ఆయన పోలవరం ప్రాజెక్టును మొత్తం కలియ తిరిగి,ప్రాజెక్టులో జరుగుతున్న పనులను పరిశీలించనున్నారు.అక్కడే అధికారులతో ముఖ్య మంత్రితో కలిసి పనుల పురోగతిపై సమీక్షించనున్నారు.

మరో పక్క గడ్కారీ కూడా, అన్ని విషయాలు తెలుసుకుని వస్తున్నారు. చంద్రబాబు అన్నీ అప్డేటెడ్ లో ఉంటారని, నాకు అన్ని వివరాలు చెప్పండి అంటూ, గడ్కరీ సోమవారం ఢిల్లీలో సమీక్ష నిర్వహించారు. ప్రాజెక్టు కోసం కేంద్రం ఎన్ని నిధులను విడుదల చేసింది.. ఇంకా ఎంత ఇవ్వాలి.. పనుల పురోగతి ఎంత వరకు వచ్చింది..పునరావాస ప్యాకేజీ పరిస్థితి ఏంటి... అనే అంశాలపై కేంద్ర జల సంఘం, పోలవరం ప్రాజెక్టు అథారిటీ అధికారులు, కేంద్ర జలవనరుల శాఖ ఉన్నతాధికారులను కేంద్రమంత్రి అడిగి తెలుసుకున్నారు. అలాగే, ప్రాజెక్టు కోసం రూ.10 వేల కోట్లు ఇవ్వాలని ప్రధాని మోదీకి సీఎం చంద్రబాబు రాసిన లేఖపై, రాష్ట్ర నీటిపారుదల శాఖ మంత్రి దేవినేని ఉమా తనకు రాసిన లేఖపైనా మంత్రి చర్చించారు. ప్రాజెక్టు నిర్వాసితులకు పునరావాస ప్యాకేజీపై తీసుకోవాల్సిన చర్యల గురించి ఇటీవల రాష్ట్రపతి రామ్‌నాథ్‌ కోవింద్‌కు జాతీయ ఎస్టీ కమిషన్‌ చైర్మన్‌ నందకుమార్‌ సాయి ఇచ్చిన నివేదికలోని సిఫారసులపై కూడా చర్చించినట్లు సమాచారం. అయితే, రాష్ట్ర బీజేపీ నేతలు, జీవీఎల్ నరసింహారావు లాంటి వాళ్ళు పోలవరం పై చెప్తున్న అబద్ధాలు రేపటితో, బట్టబయలు కానున్నాయి. గడ్కరీ అన్ని విషయాలు చెప్తారు కాబట్టి, వీళ్ళు చెప్పినవి అన్నీ అబద్ధాలే అని రేపటితో తేలిపోనుంది.

చింతలపూడి ఎత్తిపోతల పథకం నుంచి వచ్చే నెల 15న నీటిని విడుదల చేసి, ఆ పథకాన్ని జాతికి అంకితం చేస్తామని రాష్ట్ర జల వనరుల శాఖా మంత్రి దేవినేని ఉమామహేశ్వరరావు తెలిపారు. పోలవరం ప్రాజెక్టు పనుల పరిశీలన అనంతరం తాళ్లపూడి మండలంలో చింతలపూడి ఎత్తిపోతల పథకం పనులను సోమవారం సాయంత్రం ఆయన పరిశీలించారు. ఈ పథకంలో స్టేజ్‌-1లో జరుగుతున్న పనులను పరిశీలించి ఆగస్టు 15వ తేదీలోగా పూర్తి చేయాలని అధికారులను ఆదేశించారు. 2015 ఆగస్టు 15న పట్టిసీమ ఎత్తిపోతల పథకాన్ని జాతికి అంకితం చేశామని, అదేవిధంగా ఈ ఏడాది ఆగస్టు 15న చింతలపూడిని జాతికి అంకితం చేస్తామని తెలిపారు. ఆ తేదీ నాటికి పనులు పూర్తయ్యేలా చూడాలని అధికారులను, సంబంధిత ఏజెన్సీని ఆదేశించారు.

పశ్చిమ గోదావరి, కృష్ణా జిల్లాల ఎగువ ప్రాంతాల నీటి కష్టాలు తీర్చేందుకు రాష్ట్రం ప్రభుత్వం సిద్ధమయింది. గోదావరి నుంచి 38 టీఎంసీల నీటిని ఎత్తిపోసి సాగర్‌ ఎడమ కాలువ ఆయకట్టుకు సరఫరా చేసేందుకు చింతలపూడి ఎత్తిపోతల పథకం రెండోదశపై రాష్ట్ర జల వనరుల శాఖ మొదలు పెట్టింది. ఫేజ్‌-2లో 138.67 క్యూసెక్కుల నీటిని ప్రస్తుత చింతలపూడి ఎత్తిపోతల పథకం ద్వారా పంపింగ్‌ చేసేందుకు ప్రణాళికలు సిద్ధం చేసింది. ముఖ్యంగా ఈ పథకం కృష్ణా, పశ్చిమగోదావరి జిల్లాలోని తొమ్మిది నియోజక వర్గాల పరిధిలో మెట్టభూములకు ఉద్దేశించబడింది. ఈ పథకం వల్ల కృష్ణా జిల్లా తిరువూరు, నందిగామ, గన్నవరం, నూజివీడు శాసనసభ నియోజకవర్గాలతోపాటు పశ్చిమగోదావరి జిల్లాలో పోలవరం, చింతలపూడి అసెంబ్లీ నియోజకవర్గాలకు ప్రయోజనం కలుగుతుందని జల వనరుల శాఖ పేర్కొంటుంది.

దాదాపు 4.80 లక్షల ఆయకట్టుకు సాగునీరు అందించేందుకు రూ. 4,909.80 కోట్లు ఖర్చుతో ఈ ఎత్తిపోతల పథకంకు 2016 సెప్టెంబరు 3వ తేదీనే జి.వో. నెం.94 ద్వారా పరిపాలన ఆమోదం తెలిపారు. ఈ పథకం ద్వారా గోదావరి నీటిని 2 స్టేజిలలో ఎత్తిపోసి, చింతలపూడి ప్రధాన కాలువకు మళ్ళించి, ఈ కాలువను సాగర్‌ ఎడమ కాలువకు ఒక లింకు కెనాల్‌ ద్వారా కలిపి నిర్దేశిత ఆయకట్టుకు నీటిని అందిస్తారు. జి.వో. ఇచ్చిన తరువాత సరిగ్గా ఏడాదిలోనే సెప్టెంబర్‌ 7వ తేదీన రెడ్డిగూడెం మండలంలో మద్దెలపర్వ దగ్గర చింతలపూడి ఎత్తిపోతల పథకానికి భూమిపూజ, పైలాన్‌ ఆవిష్కరణకు ఏ.పి. జలవనరుల శాఖామంత్రి దేవినేని ఉమామహేశ్వరరావు సారథ్యంలో ఏర్పాట్లు పూర్తిచేశారు. ఈ సంవత్సరం ఆగుస్ట్ 15 నాటికి ఈ ప్రాజెక్ట్ సిద్ధం కానుంది.

ఢిల్లీ వేదికగా ఆంధ్రప్రదేశ్ పై జరుగుతున్న కుట్రలు, విభజన హామీలు అమలు చెయ్యక పోవటం, సుప్రీం కోర్ట్ లో కేంద్రం వేసిన అఫిడవిట్, బీజేపీ ముసుగు కప్పుకుని పవన్, జగన్ ఆడుతున్న డ్రామాలు... ఇవన్నీ జూలై 18 నుంచి పక్కాగా ఎండగట్టటానికి చంద్రబాబు రెడీ అవుతున్నారు. ఢిల్లీలో ఈనెల 18వ తేదీ నుంచి ప్రారంభం కానున్న వర్షాకాల సమావేశాల నేపధ్యంలో రాష్ట్రంలో కూడా అదే రోజు నుంచి శాసనసభ, మండలి సమావేశాలను నిర్వహించాలని చంద్రబాబు ప్రభుత్వం యోచిస్తోంది. ప్రజా సమస్యలు, పలు బిల్లులు చర్చకు పెడుతూనే, పార్లమెంట్ లో జరిగే పరిణామాల పై, ఎప్పటికప్పుడు కౌంటర్ ఇవ్వనున్నారు. జూలై 18వ తేదీ నుంచి ఆగస్టు 10 వరకూ జరిగే ఈ సమావేశాల్లో మొత్తం 18 రోజులు ఉభయ సభలు కొలువు తీరాలని పార్లమెంటరీ వ్యవహారాలశాఖ నిర్ణయించింది. ఇదే సమయంలో ఏపీలో కూడా వర్షాకాల సమావేశాలను నిర్వహించి బీజేపీ సహా ఆపార్టీతో లాలూచీ పడ్డారనే కోణంలో వైసీపీ, జనసేన పార్టీలను ఎండగట్టాలని టీడీపీ భావిస్తున్నట్లు తెలుస్తోంది.

పార్లమెంటు సమావేశాలు జరిగిన అన్ని రోజులూ ఇక్కడ అసెంబ్లీ సమావేశాలను జరిపేందుకు ఇప్పటికే ప్రణాళికలను రూపొందించినట్లు సమాచారం. సీఎం చంద్రబాబు సింగపూర్‌ పర్యటన ముగించుకుని వచ్చిన తర్వాత దీనిపై మరింత కసరత్తు చేసేందుకు టీడీపీ నేతలు సిద్ధంగా ఉన్నారు. ఈ సమావేశంలో ఏపీ పునర్విభజన చట్టం -2014లో పొందుపరచిన విభజన అంశాలు, ఏపీకి ప్రత్యేక తరగతి హోదాపై బీజేపీ చేసిన మోసమే ప్రధాన ఎజెండా కానున్నట్లు తెలిసింది. విభజన చట్ట ప్రకారం అన్నీ చేశామని ఇటీవల సుప్రీమ్‌కోర్డులో దాఖలు చేసిన అఫిడవిట్‌పై ఎలాగూ కౌంటర్‌ అఫిడవిట్‌ను దాఖలు చేయాలని నిర్ణయించినందున ఆయా అంశాలపై జరిగే ప్రశ్నోత్తరాలు, జీరో అవర్‌, స్వల్పకాల వ్యవధి చర్చల్లో రాష్ట్రానికి కేంద్రం చేసిన అన్యాయంపై ప్రజాప్రతినిధులు లేవనెత్తే ప్రశ్నలకు మంత్రులు గణాంకాలతో పూర్తి సమాచారం ఇచ్చే విధంగా కార్యాచరణ తయారైనట్లు తెలిసింది.

అలాగే ప్రధాన ప్రతిపక్షం వైసీపీ వ్యవహారశైలి, ఎంపీలు రాజీనామాలు చేసినప్పటికీ బీజేపీతో సన్నిహితంగా ఉండడం, కేంద్రమంత్రులతో వరుస భేటీలపై కూడా చర్చించి వైసీపీపై వ్యతిరేక భావాన్ని ప్రజల్లోకి తీసుకెళ్లాలని లక్ష్యంగా ఎంచుకున్నట్లు సమాచారం. అలాగే సుప్రీంకోర్టులో అఫిడవిట్‌ దాఖలు తర్వాత వైసీపీ అధినేత జగన్‌, జనసేనాని పవన్‌ కల్యాణ్‌లు కేంద్రాన్ని విమర్శించడంలేదని ఇప్పటికే ఆరోపణలు చేస్తున్న టీడీపీ శ్రేణులు వర్షాకాల సమావేశాల్లో ఉభయ సభల్లోనూ రెండు పార్టీల తీరును ఎండగట్టాలని నిర్ణయానికి వచ్చారు. కేంద్రం సహాయం చేయనప్పటికీ గత నాలుగేళ్ల కాలంలో రాష్ట్రంలో జరుగుతున్న అభివృద్ధి పనులను సమావేశాల ద్వారా ప్రజలకు వివరించాలని ఇటీవల జరిగిన మంత్రిమండలి సమావేశంలో పలువురు సూచన చేసినట్లు తెలిసింది. అలాగే ప్రశ్నోత్తరాలు, స్వల్పకాల వ్యవధి చర్చలు, జీరో అవర్‌లో ఆయా అంశాల్లో గృహ నిర్మాణం, పౌరసరఫరాలు, పెన్షన్లు, కొత్త రేషన్‌కార్డుల జారీ, నిరుద్యోగ భృతి, సంక్షేమకార్యక్రమాలపై విస్తృతంగా, లోతుగా, వివరణాత్మకంగా, ఫలవంతంగా చర్చలు జరపాలని నిర్ణయానికి వచ్చినట్లు తెలిసింది.