news

అన్నదాతల సంక్షేమమే లక్ష్యంగా రాష్ట్ర ప్రభుత్వం అమలు చేస్తున్న ‘చంద్రన్న రైతు బీమా’ పథకంలో పేర్ల నమోదు కార్యక్రమం శనివారం నుంచి ప్రారంభమయ్యింది. చంద్రన్న బీమా పథకం తరహాలో రైతులకు కూడా బీమా సదుపాయం కల్పించాలని ప్రభుత్వం సంకల్పించింది. ఇందులో భాగంగా అధికారులు జిల్లాలోని రైతులకు జీవిత బీమా, వ్యక్తిగత ప్రమాద బీమాను వర్తింప చేసి వారి కుటుంబ సభ్యులకు సామాజిక, ఆర్థిక భద్రత కల్పించేందుకు చర్యలు చేపట్టారు. గత నెల 28వ తేదీన ఏరువాక కార్యక్రమంలో చంద్రన్న రైతు బీమా పథకాన్ని సీఎం చంద్రబాబు ప్రారంభించారు. ఈ పథకం కింద ఎలాంటి రుసుం వసూలు చేయకుండా పేర్ల నమోదు ప్రక్రియను నిర్వహించనున్నారు.

గ్రామ నమోదు కమిటీల ద్వారా ఈ కార్యక్రమం జరగనుంది. ఇందులో డ్వాక్రా సంఘాల సభ్యులు ముగ్గురు ఉంటారు. వీరు ట్యాబ్‌ల ద్వారా రైతుల నమోదు ప్రక్రియను నిర్వహిస్తారు. చంద్రన్న బీమా పథకంలో నమోదు కాని రైతులు ఈ పథకంలో నమోదు చేసుకోవడానికి అవకాశం కల్పించారు. ఇవీ అర్హతలు.. 18 నుంచి 69 ఏళ్లలోపు వయసుండాలి... ఆధార్‌ కార్డులో నమోదైన వయసును పరిగణలోకి తీసుకుంటారు... పట్టాదారు పాసు పుస్తకం ఉండాలి... కౌలు రైతులకు రుణ అర్హత కార్డులు ఉండాలి.. రైతు వార్షిక ఆదాయం రూ.2.50 లక్షలు లోపు ఉండాలి.. బీమా నమోదు సమయంలో రైతు పూర్తి ఆరోగ్యవంతుడై ఉండాలి.. స్థానికంగా నివసిస్తూ ఉండాలి..

బీమా ప్రయోజనాలు ఇలా.. ఆధార్‌ కార్డు ప్రకారం వయసును పరిగణనలోకి తీసుకుంటారు... 18 నుంచి 50 ఏళ్లలోపు వారు సహజ మరణం చెందితే రూ.రెండు లక్షలు, 51 నుంచి 59 ఏళ్లలోపు వారు మరణిస్తే రూ.30 వేలు పరిహారంగా అందజేస్తారు... 18 నుంచి 69 ఏళ్లలోపు వారు ప్రమాదంలో మరణిస్తే రూ.అయిదు లక్షలు పరిహారంగా ఇస్తారు.... ప్రమాదంలో పాక్షిక అంగవైకల్యం పొందితే 19 నుంచి 69 ఏళ్లలోపు వారికి రూ.2.50 లక్షలు, పూర్తి అంగవైకల్యం చెందితే 18 నుంచి 69 ఏళ్లలోపు వారికి రూ.అయిదు లక్షలు పరిహారంగా అందజేస్తారు... నమోదు బృందాలకు ఎలాంటి రుసుం చెల్లించాల్సిన అవసరం లేదు. ఆధార్‌తో అనుసంధానమై బ్యాంకు ఖాతా వివరాలు అందజేయాలి. ఈనెల 15వ తేదీలోగా రైతుల నమోదు ప్రక్రియ పూర్తవుతుంది. ప్రత్యేక బృందాల సభ్యులు ఇంటింటికీ వచ్చి వివరాలు సేకరిస్తారు.

పవన్ కళ్యాణ్ పక్కా ప్లాన్ తో, ఢిల్లీ ఇచ్చిన స్క్రిప్ట్ తో ఉత్తరాంధ్రలో వేర్పాటు వాదం తీసుకురావటానికి అన్ని విధాలుగా ప్రయత్నాలు చేస్తున్నారు. కాని పవన్ మాట్లాడే లాజిక్ లేని మాటలే అర్ధం కావటం లేదు. ఉత్తరాంధ్రని దోచుకుంటున్నారు అంటూనే, ఉత్తరాంధ్రను అభివృద్ధి చెయ్యట్లేదు అంటాడు. ఫ్రాంక్లిన్ టెంపుల్టన్ కు భూములు అంటూ అనాలోచితంగా మాట్లాడినా, ఉత్తరాంధ్ర ప్రత్యేక రాష్ట్రము అంటూ ఆయాసంగా మాట్లాడినా ఆయనకే సాధ్యం. ఏదన్నా వింటే అర్ధం కాదు, ఆలోచిస్తే అవుతుంది. ఫ్రాంక్లిన్ టెంపుల్టన్ సంస్థ గురించి తెలిసిందే. అది ఎంత పెద్ద కంపెనీనో ప్రపంచం మొత్తం తెలుసు. ఆ కంపెనీ కోసం 5 రాష్ట్రాలు పోటీ పడితే, చివరకు మన రాష్ట్రానికి సాధించారు చంద్రబాబు. అవకాశాలు లేకుండా ఇంత పెద్ద కంపెనీ పెట్టుబడులు పెట్టదు. అంతర్జాతీయ కంపెనీలు ఉత్తరాంధ్రలో అవకాశాలు గుర్తించి పెద్ద ఎత్తున పెట్టుబడులు పెడుతుంటే, ప్రభుత్వం ప్రోత్సహిస్తూ, అనుమతులను త్వరితగతిన ఇస్తుంది.

అభివృద్ధి చెందాలి అంటే కంపెనీలు రావాలి, అర్హత కల ప్రతి ఒక్కరికి అవకాశాలు రావాలి. ప్రభుత్వం ఇచ్చే అనుమతుల్లో లోపాలను ఎత్తిచూపొచ్చు, నియమాలను పాటించకపోతే వివరాలు అడగొచ్చు. అనుమానాలు లేపుతూ ప్రజలను పక్కదారి పట్టించటం తప్పు. ప్రభుత్వం చేసే ప్రతి నిర్ణయాన్ని కాగ్ ఆడిట్ చేస్తుంది. ఆ ఆడిట్ కి ప్రభుత్వం జవాబు చెప్తుంది. ఒప్పందాల ప్రకారం కంపెనీలు ప్రారంభిచకపోతే ప్రాసెస్ ని ప్రశ్నించాలి. ప్రతి దానిలో అనుమానాలను రాజకీయాలకు లేపుతూ రాష్ట్రాన్ని అధోగతి చేస్తున్నాడు. మరో పక్క అన్నీ అమరావతిలోనేనా అని చెప్పే పవన్, తన ఇల్లు అమరావతిలో కట్టుకుంటున్నాడు, తన ఆఫీస్ అమరావతిలో, చివరకు 2 లక్షల అద్దె ఇల్లు కూడా అమరావతిలోనే తీసుకున్నాడు. ఏ ఉత్తరాంధ్రలో పెట్టవచ్చుగా ?

సరే, ఇదంతా బాగానే ఉంది.. ఉత్తరాంధ్ర బాగుపడాలి అంటే, మనకు విభజన హామీల్లో ఇచ్చిన రెండు అంశాలు ఇప్పటికీ కేంద్రం తేల్చలేదు. కొన్ని దశాబ్దాలుగా రైల్వే జోన్ పై విశాఖలో ఆందోళనలు జరుగుతున్నాయి. దీనికి డబ్బులు కూడా ఏమి పెట్టనవసరం లేదు. ఒక నిర్ణయంతో మోడీ, రైల్వే జోన్ ఇవ్వచ్చు. కాని, మనకు ఆదాయం అంతా మన వైజాగ్ కు వస్తుంది కాబాట్టి, మోడీ ఇవ్వటం లేదు. దీని పై ఉత్తరాంధ్ర ప్రజలు, ఎప్పటి నుంచో ఆందోళన చేస్తున్నారు. అలాగే, వెనుకబడిన జిల్లాలు అయిన, విజయనగరం, శ్రీకాకుళం జిల్లాలకు, నిధులు ఇస్తాం అని విభజన చట్టంలో పెట్టారు. మొన్న 350కోట్లు మన రాష్ట్ర ఎకౌంటు లో వేసి, చంద్రబాబు ఎదురు తిరిగాడు అని, ఆ 350కోట్లు వెనక్కు తీసుకున్నారు. మరి ఇవి ఉత్తరాంధ్రకు అన్యాయం చెయ్యటం కాదా ? ఇలాంటి నిజమైన సమస్యల పై కేంద్రాన్ని అడిగే దమ్ము లేదు కాని, ఫ్రాంక్లిన్ టెంపుల్టన్ లాంటి పెట్టుబడులు పెట్టి, వేల ఉద్యోగాలు ఇచ్చే కంపెనీ పై మాత్రం, ఏడుస్తాం అంటే ఎలా పవన్ గారూ ?

మ‌హాత్ముడు న‌డ‌యాడిన గాంధీ కొండ కొత్త రూపును సంత‌రించుకోనుంది. నాడు విజ‌య‌వాడ‌కు శాస్త్ర సాంకేతిక ప‌ర్యాట‌క ప్రాంతంగా విరాజిల్లిన ఈ కొండ కాల‌క్ర‌మంలో ఆధునీక‌ర‌ణ‌కు నోచుకోక‌, గ‌త కొంతకాలంగా ప‌ర్యాట‌క ఆద‌ర‌ణ‌కు దూర‌మైంది. ఈ ప‌రిస్థితిని గ‌మ‌నించిన ఆంధ్ర‌ప్ర‌దేశ్ టూరిజం అధారిటీ ఈ విష‌యంపై ప్ర‌త్యేకంగా దృష్టి సారించింది. గాంధీ హిల్ పౌండేష‌న్ ఆధీనంలో ఈ కొండ ఉండ‌గా, ప్ర‌భుత్వ ఆకాంక్ష‌ల మేర‌కు ప‌ర‌స్ప‌ర అంగీకారంతో ఈ ప‌ర్యాట‌క ప్రాంతాన్ని అభివృధ్ది చేయ‌నున్నారు. రాష్ట్ర విభ‌జ‌న అనంత‌రం అమ‌రావ‌తి ప్రాంత ప‌ర్యాట‌క అభివృద్ధిపై ముఖ్య‌మంత్రి ప్ర‌త్యేక శ్ర‌ద్ధ తీసుకోగా, శుక్ర‌వారం జ‌రిగిన ఎపిటిఎ పాల‌క‌మండ‌లి స‌మావేశం కొండ ఆధునీక‌ర‌ణ‌కు రూ.5 కోట్లు వ్య‌యం చేయాల‌ని నిర్ణ‌యించింది. పాల‌క మండ‌లి ఛైర్మ‌న్, ప‌ర్యాట‌క భాషా సాంస్కృతిక శాఖ కార్య‌ద‌ర్శి ముఖేష్ కుమార్ మీనా అధ్య‌క్ష‌త‌న స‌చివాల‌యంలో జ‌రిగిన స‌మావేశం ఈ మేర‌కు ప్రాధ‌మికంగా నిర్ణ‌యం తీసుకుంది.

ఈ మొత్తంతో గాంధీ కొండ రూపురేఖ‌లు మార్చాలని, విజ‌య‌వాడ‌లో భ‌వానీ ద్వీపం మాత్ర‌మే ప‌ర్యాట‌క అవ‌స‌రాల‌ను తీర్చుతున్న‌త‌రుణంలో దీనికి కూడా పూర్తి స్ధాయిలో కొత్త రూపు తీసుకు రావాల‌ని మీనా సూచించారు. భ‌వానీ ఐలండ్ టూరిజం కార్పోరేష‌న్ ఈ ప‌నుల‌కు సంబంధించిన కార్యాచ‌ర‌ణ‌ను చేప‌ట్ట‌నుండ‌గా, గాంధీ హిల్ పౌండేష‌న్ పెద్ద‌ల‌తో ప‌ర్యాట‌క శాఖ అధికారులు ఇప్ప‌టికే ప‌లు మార్లు భేటీ అయ్యారు. తొలుత రూ.3.15 కోట్ల‌తో ఒక్క న‌క్ష‌త్రశాల‌ను మాత్ర‌మే ఆధునీక‌రించాల‌ని తొలుత భావించినా, పాల‌క మండ‌లి స‌మావేశం నిధుల స‌మ‌స్య రాకుండా చూస్తామ‌ని, అన్నివిభాగాల‌ను ఆధునీక‌రించి ప‌ర్యాట‌క భ‌రితంగా తీర్చి దిద్దాల‌ని నిర్ణ‌యించింది. ఈ నేప‌ధ్యంలో మీనా మాట్లాడుతూ అక్క‌డి పిల్ల‌ల రైలును తిరిగి న‌డ‌పాల‌ని, అదే క్ర‌మంలో గ్రంధాల‌య భ‌వ‌నానికి మెరుగులు దిద్ది ప్ర‌తి ఒక్క‌రూ వినియోగించుకునేలా చూడాల‌ని అన్నారు. స‌ర్వాంగ సుంద‌రంగా కొండ ప్రాంతం ఉండాల‌ని ల్యాండ్ స్కేపింగ్‌ మంచి ఆర్కిటెక్చ‌ర్‌కు అప్ప‌గించాల‌ని బోర్డు నిర్ణ‌యించింది.

మ‌రోవైపు భ‌వానీ ద్వీపంలో వెలుగుల ఉద్యాన‌వ‌నం ఏర్పాటు చేయాల‌ని ఆంధ్ర‌ప్ర‌దేశ్ టూరిజం అధారిటీ పాల‌క మండ‌లి నిర్ణ‌యించింది. దేశంలోనే తొలిసారిగా ప‌దిల‌క్ష‌ల‌కు పైగా ఎల్ఇడిల‌తో వెలుగుల ఉద్యాన‌వ‌నం తీర్చిదిద్ద‌నున్నారు. ఈ వెలుగులు కృష్ణాన‌దిలో ప్ర‌తిబింబించ‌నుండ‌గా, అమ‌రావ‌తి ప్రాంతానికి కొత్త అందాల‌ను స‌మ‌కూర్చుతాయి. సాధార‌ణంగా మొక్క‌ల‌తో జంతువులు, ప‌క్షుల ఆకారాల‌ను తీర్చిదిద్ద‌టం మ‌నం చూస్తుంటాం, ఈ వెలుగుల ఉద్యాన‌వ‌నంలో అవ‌న్ని ఎల్ఇడి వెలుగుల ద్వారానే రూపుదిద్దుకుంటాయి. ఈ నేప‌ధ్యంలో టూరిజం అధారిటీ సిఇఓ హిమాన్హు శుక్లా మాట్లాడుతూ, వెలుగుల ఉద్యాన‌వ‌నం ప్ర‌పంచ శ్రేణి ప‌ర్యాట‌క కేంద్రాల‌లో ఒక‌టిగా ఉండ‌నుంద‌ని, స‌మావేశం దృష్టికి తీసుకువ‌చ్చారు. ఉద్యోగుల పున‌ర్ నిర్మాణంకు సంబంధించి అంశాలు పాల‌క మండ‌లి ఎజండా అంశాలుగా ఉండ‌గా వాటిని ప్ర‌భుత్వ ప‌రిశీల‌నకు పంపాల‌ని మీనా నిర్ణ‌యించారు. ఈ స‌మావేశంలో సంస్ధ పాల‌నా వ్య‌వ‌హారాల సంచాల‌కులు డాక్ట‌ర్ సాంబ‌శివ రాజు త‌దిత‌రులు పాల్గొన్నారు.