news

ప్రతిపక్ష వైఎస్ఆర్ కాంగ్రెస్, భారతీయ జనతా పార్టీ, జనసేనపై తీవ్ర వ్యాఖ్యలు చేశారు ఏపీ మంత్రి దేవినేని ఉమామహేశ్వరరావు... బీజేపీ, వైసీపీ, జనసేన ఆ మూడు పార్టీలూ తోడు దొంగలేనని మండిపడ్డా ఆయన... ద్రోహులంతా ఒక్కటై రాష్ట్రానికి ద్రోహం చేస్తున్నారని ఆగ్రహం వ్యక్తం చేశారు. రాష్ట్రాన్ని విభజించిన వారే... రాష్ట్రం గురించి మాట్లాడటం హాస్యాస్పదంగా ఉందన్న దేవినేని... కాంగ్రెస్ నేతలే ఇప్పుడు వైసీపీ, బీజేపీ నేతలుగా రూపాంతరం చెందారని సెటైర్లు వేశారు. పదేళ్లు రాష్ట్రాన్ని భ్రష్టు పట్టించినవాళ్లే ఇప్పుడు నీతులు చెబుతున్నారంటూ కాంగ్రెస్ నేతలపై మండిపడ్డ దేవినేని... జగన్ అనవసరంగా ప్రభుత్వంపై నోరు పారేసుకుంటున్నారు... వచ్చే ఎన్నికల్లో ప్రజలే జగన్ కి గుండు కొడతారని వ్యాఖ్యానించారు.

బొత్స, కన్నా, ధర్మాన పదేళ్లు మంత్రులుగా ఉండి రాష్ట్రానికి ఏం చేశారని ప్రశ్నించారు దేవినేని... జగన్, పవన్... నరేంద్ర మోడీని ఎందుకు ప్రశ్నించరు..? ఎమ్మెల్యేలు అసెంబ్లీకి రారు... పార్లమెంట్ కి ఎంపీలు వెళ్లలేరు... వీళ్ళకి అసలు రాష్ట్ర ప్రయోజనాలే అవసరం లేదన్నారు. వైఎస్ జగన్... సీఎం పదవి పిచ్చిపట్టి రోడ్లపై తిరుగుతున్నాడంటూ మండిపడ్డ ఆయన... ప్రతిపక్ష నేతగా పోలవరం డ్యామ్ సైట్ పనులు చూడాల్సిన బాధ్యత లేదా..? అని ప్రశ్నించారు. ప్రతిపక్ష నేతగా జగన్ అనర్హుడు... తప్పుకోవాలని డిమాండ్ చేశారు దేవినేని ఉమ.

పట్టిసీమపై కాంగ్రెస్, వైసీపీ నేత‌లు అనవసర రాద్ధాంతం చేస్తున్నారని మంత్రి దేవినేని ఉమా మండిపడ్డారు.... ఆల్మట్టికి ఇప్పటి వ‌ర‌కూ నీరు రాలేదని, అయినా పట్టిసీమ ద్వారా కృష్ణా డెల్టాకు నీళ్లిస్తుంటే కుళ్లుకుంటున్నారని విమర్శించారు.... ఒక బేసిన్ నుండి మరో బేసిన్‌కు 105 టీఎంసీలు తరలించడం రికార్డు అని అన్నారు.... పట్టిసీమను అందరూ అభినందిస్తుంటే జ‌గ‌న్‌కు కనిపించడం లేదా? అని ప్రశ్నించారు.... పోల‌వ‌రం ప్రాజెక్టు చూడ‌కుండానే గోదావ‌రి జిల్లా దాటిన వ్యక్తి జ‌గ‌న్ అని విమర్శించారు.... రాజ్యసభలో ప్రశ్నలు వేస్తూ పక్కరాష్ట్రాలకు విజయసాయిరెడ్డి సమాచారం ఇస్తున్నారని మంత్రి దుయ్యబట్టారు.

నవ్యాంధ్ర రాజధాని అమరావతిలో త్వరలో ఆధునిక మిలటరీ స్టేషన్‌ ఏర్పాటు కానుంది. గురువారం సచివాలయంలో తెలంగాణ, ఏపి సబ్‌ ఏరియా జనరల్‌ కమాండింగ్‌ ఆఫీసర్‌ మేజర్‌ జనరల్‌ శ్రీనివాసరావు ఇన్‌ఛార్జి ప్రభుత్వ ప్రధాన కార్యదర్శి అనిల్‌ చంద్ర పునేఠతో భేటీ అయ్యారు. అమరావతిలో ఆధునిక మిలటరీ స్టేషన్‌ ఏర్పాటుకు సంబంధించి ఆరున్నర ఎకరాల భూమి కేటాయింపు ప్రక్రియను వేగవంతం చేయాలని ఆయన సిఎస్‌ను కోరారు. విజయవాడ, కర్నూలులో ఎక్స్‌ సర్వీస్‌మెన్‌ కాంప్రహెన్సివ్‌ హెల్త్‌ స్కీమ్‌ ( ఇసిహెచ్‌ఎస్‌ ) పోలీ క్లినిక్‌ల ఏర్పాటుకు స్థలాన్ని నామినల్‌ ధరకు ఇప్పించేందుకు చర్యలు తీసుకోవాలని కోరారు.

కోరుకొండ సైనిక్‌ పాఠశాలకు రాష్ట్ర ప్రభుత్వం నుంచి రావాల్సిన నిధులు సకాలంలో విడుదల చేసేందుకు చర్యలు తీసుకోవాలన్నారు. ఇసిహెచ్‌ఎస్‌ స్కీమ్‌ కోసం ప్రత్యేక యాప్‌ రూపొందించామని, రాష్ట్ర ప్రభుత్వం కూడా ఈ యాప్‌ను వినియోగించుకునేందుకు ప్రత్యేకంగా లింక్‌ ఇస్తామని, అందుకు అనుమతి ఇవ్వాలని కోరారు. మేజర్‌ జనరల్‌ శ్రీనివాసరావు ప్రతిపాదనల పై సిఎస్‌ సానుకూలంగా స్పందిస్తూ మిలటరీ స్టేషన్‌ ఏర్పాటుకు తగిన స్థలం కేటాయించేదుకు సిఆర్డీయే అధికారులతో మాట్లాడి వేగవంతం చేస్తామని హామీ ఇచ్చారు. ఇతర ప్రతిపాదనలకు సంబంధించి ఎప్పటికప్పుడు సమన్వయం చేసేందుకు వీలుగా ఒక లైజన్‌ అధికారిని ఏర్పాటు చేసుకోవాలని సూచించారు.

కోరుకొండ సైనిక్‌ స్కూల్‌కు విడుదల చేయాల్సిన నిధులపై విద్యా శాఖ అధికారులకు తగిన ఆదేశాలు జారీ చేస్తామని సిఎస్‌ స్పష్టం చేశారు. అలాగే విజయవాడ, కర్నూల్‌లో ఎక్స్‌ సర్వీ్‌సమెన్‌ కాంప్రహెన్సివ్‌ హెల్త్‌ స్కీమ్‌(ఈసీహెచ్‌ఎస్) పాలీ క్లినిక్‌ల ఏర్పాటుకు తగిన స్థలాన్ని నామమాత్రపు ధరకు ఇచ్చేందుకు చర్యలు తీసుకోవాలని మేజర్ కోరారు. గ్యాలంటరీ అవార్డులకు తెలంగాణ నుంచి ఎక్కువ ప్రతిపాదనలు వస్తున్నాయని, ఏపీ నుంచి కూడా వచ్చే విధంగా కృషి చేయాలన్నారు. తెలంగాణ కన్నా ఆంధ్రప్రదేశ్‌లోనే ఎక్స్‌సర్వీ్‌సమెన్లు ఎక్కువగా ఉన్నారని, మిలటరీలో పని చేయడానికి ఆసక్తి చూపే వారి సంఖ్య తెలంగాణతో పోల్చితే, ఏపీలోనే ఎక్కువగా ఉంటోందని చెప్పారు.

కేంద్రం ముందస్తు ఎన్నికలకు వెళ్లాలనే ఆలోచనలో ఉన్నట్లు కనిపిస్తోందని ముఖ్యమంత్రి, తెలుగుదేశం పార్టీ అధ్యక్షుడు చంద్రబాబు తెలిపారు. జమిలి ఎన్నికలకు వెళ్లాలనే ఆలోచన కూడా చేస్తోందని.. ఎన్నికలు ఎప్పుడు వచ్చినా పార్టీ యంత్రాంగం సిద్ధంగా ఉండాలని పిలుపిచ్చారు. గురువారం రాత్రి ఇక్కడ గుంటూరు జిల్లా పార్టీ నేతలతో ఆయన సమావేశమయ్యారు. లోక్‌సభకు కేంద్రం ముందస్తు ఎన్నికలు నిర్వహిస్తామంటే మనకు అభ్యంతరం లేదని, అసెంబ్లీకి కూడా ముందస్తు ఎన్నికలు జరుపుతామంటే అంగీకరించే ప్రసక్తే లేదని అన్నారు. 'షెడ్యూల్‌ ప్రకారమే మన శాసనసభకు ఎన్నికలు నిర్వహించాలి. జమిలి ఎన్నికల పేరుతో లోక్‌సభతోపాటే మన అసెంబ్లీకి కూడా అక్టోబరు, నవంబరుల్లో ఎన్నికలు పెట్టాలని కేంద్రం చూస్తోంది. అవసరమైతే న్యాయనిపుణులతో మాట్లాడి న్యాయపరమైన మార్గాలను అన్వేషిస్తాం’ అని స్పష్టం చేశారు

గుంటూరులో నిర్వహించనున్న ముస్లిం మైనారిటీల సభకు ముందే... రాష్ట్ర మంత్రివర్గంలో మైనార్టీలకు చోటు కల్పించాలని జిల్లా నాయకులు సూచించగా, ముఖ్యమంత్రి సానుకూలంగా స్పందించారు. గడచిన నాలుగున్నరేళ్లలో ఏం చేశామో గ్రామాలు, వార్డుల వారీగా వివరిస్తామని, రాబోయే ఐదేళ్లలో మనం చేసే అభివృద్ధి, సంక్షేమ ప్రణాళికలను ప్రజల ముందుంచి, అన్ని వర్గాల మద్దతు పొందుదామని ఆయన తెలిపారు. ఈ నెల 16 నుంచి ఆరు నెలల పాటు గ్రామదర్శిని, గ్రామ వికాసం కార్యక్రమాల్ని ఒక పండుగలా నిర్వహించాలన్నారు. ఆరు నెలల్లో 75 సభలు జరుపుతామని వాటిలో 25 రైతు సభలు, 25 మహిళా సభలు, 25 సంక్షేమ సభలు నిర్వహిస్తామన్నారు. నాలుగేళ్లలో మనం చేసిన పనులకు పుష్కలంగా ఓట్లు పడతాయన్న నమ్మకముందని, ఎక్కడైనా నాయకులు నష్టం చేస్తే తప్ప ఓట్లు తగ్గే ప్రసక్తి లేదన్నారు.

1100కి ఫోన్‌ చేసి విజ్ఞప్తి చేసినవారికి నేరుగా పింఛన్లు మంజూరు చేయడం వల్ల, విపక్ష పార్టీలకు చెందినవారికీ లబ్ధి చేకూరిందని కొందరు నాయకులు ముఖ్యమంత్రి దృష్టికి తెచ్చారు. దానిపై ముఖ్యమంత్రి స్పందిస్తూ... శాశ్వతంగా అధికారంలో ఉండాలంటే అందర్నీ సమానంగా చూడాలని, తాను 175 నియోజకవర్గాల్ని సమానంగా చూస్తున్నానని తెలిపారు. ‘కొన్ని నియోజకవర్గాల్లో అక్కడక్కడా కార్యకర్తల్లో అసంతృప్తి ఉంది. దానిని సరిదిద్దుకోవాలి. మీ పొరపాట్లకు పార్టీ నష్టపోకూడదు.నేను కార్యకర్తల మనిషిని’ అని అన్నారు. రాజధాని జిల్లా అయిన గుంటూరులో ప్రజల అంచనాలు కొంత అధికంగా ఉంటాయని, ఆ స్థాయికి నాయకులు ఎదగాలన్నారు.