news

గత మూడు రోజుల నుంచి, అన్ని పార్టీలు, రాష్ట్ర ప్రజలు, విభజన హామీల పై, సుప్రీంలో కేంద్రం ఇచ్చిన అఫిడవిట్ పై రాగాలిపోతున్నారు. రెండు పార్టీలు తప్ప.. వారే, జగన్, పవన్... వైసీపీ అధ్యక్షుడు జగన్‌, జనసేన అధ్యక్షుడు పవన్‌ కల్యాణ్‌లకు చత్వారం వచ్చిందా? ఆంధ్రప్రదేశ్‌కు ప్రత్యేక హోదా ఇచ్చేది లేదని, ఇప్పటికే విభజన హామీలన్నింటినీ నెరవేర్చేశామంటూ ప్రధాని నరేంద్ర మోదీ నేతృత్వంలోని కేంద్రప్రభుత్వం అత్యున్నత న్యాయస్థానం సుప్రీంకోర్టులో అఫిడవిట్‌ దాఖలు చేసింది. దాన్ని చదివేందుకు వారిద్దరికీ ఇంకా పెద్ద భూతద్దాలేమైనా కావాలా? అసలు సమస్య ఎక్కడుందో? పరిష్కారం కోసం ఎక్కడ పోరాడాలో తెలియకుండా.. ముందుగా నేను ప్రస్తావించడం వల్లే హోదా అంశం సజీవంగా ఉందంటూ జగన్‌, పవన్‌ ఎక్కడపడితే అక్కడ మాట్లాడుతున్నారు.

ఇప్పుడు, హోదాను అటకెక్కిస్తూ కేంద్రం సుప్రీంకోర్టులోనే అఫిడవిట్‌ దాఖలు చేసింది. ఇంకా ఆ అంశం సజీవంగా ఎక్కడుంది? హోదా, విభజన హామీల అమలుపై మోదీపై పోరాడాల్సిన జగన్‌, పవన్‌ ఎందుకు నోరు మెదపడం లేదు? రాష్ట్ర ప్రయోజనాలను పణంగా పెడుతూ ఇప్పుడు మోదీకి భయపడితే.. భవిష్యత్తులో వారు ప్రజలకు ఇంక సేవ చేస్తారా? చేయగలరా? రాష్ట్ర ప్రజలు ప్రతిపక్షాల వైఖరిని గుర్తించాలి. మేము అన్నీ ఇచ్చేసాం అంటున్నారు. హోదా అవసరం లేదు అంటున్నారు. పోలవరం పై మడత పేచి పెట్టారు. రైల్వే జోన్ పై కనీసం ప్రస్తావించలేదు. సాక్షాత్తు సుప్రీం కోర్ట్ కే అబద్ధాలు చెప్తుంటే, రాష్ట్ర ప్రభుత్వం స్పందిస్తే, అన్ని పార్టీలు స్పందిస్తే, పవన్, జగన్ లకు ఏమి అయ్యింది ?

ఎంత అమిత్ షా, వీరి బాస్ అయితే మాత్రం, బీజేపీ నాయకులు లాగా, జగన్, పవన్ కూడా గుజరాతీ భజన చేస్తారా ? వీరికి ఆంధ్రప్రదేశ్ ప్రజల మనోభావాలు పట్టవా ? ఒకాయిన కేసుల కోసం లొంగిపోతే, ఇంకో ఆయన ఎందుకో లోంగాడో కాని, మొత్తానికి, అమిత్ షాకి బాగా లొంగిపోయారు. రాష్ట్రంలో ప్రజలందరూ కేంద్రం పై పోరాడుతుంటే, జగన, పవన్ మాత్రం, కేంద్రం పై పోరాడుతున్న, చంద్రబాబు పై విరుచుకుపడుతూ, వారి గుజరాతీ భక్తి ప్రదర్శిస్తున్నారు. ఇద్దరూ కలిసి, ఒకే ఎజెండా, ఒకే మాట, ఒకే స్క్రిప్ట్, ఒకే డైలాగ్ లు కొడుతున్నారు. ఒకడు కాల్చేస్తా అంటే, ఇంకొకడు చొక్కా పట్టుకుని లాగి, కాళ్ళు విరగ్గొడతా అంటాడు. అంతే కాని, మోడీని మాత్రం, అనే దమ్ము ఇద్దరికీ లేదు.

రాష్ట్ర ప్రభుత్వం ప్రతిష్ఠాత్మకంగా నిర్మిస్తున్న కనకదుర్గ ఫ్లై ఓవర్ పై, జగన్, పవన్, బీజేపీ నేతలు, రాష్ట్ర ప్రభుత్వ పని తీరుని, చంద్రబాబు అడ్మినిస్ట్రేటివ్ స్కిల్స్ ని హేళన చేస్తూ మాట్లాడతారు. నిజానికి, కేంద్రం కావాలని, ఈ ప్రాజెక్ట్ లేట్ చేస్తుంది. ఆరు పిల్లర్లకు డిజైన్ లు, నిన్నటికి ఆమోదం లభించింది అంటే, కేంద్రం మన పై ఎంత శ్రద్ధ చూపిస్తుందో అర్ధమవుతుంది. ఒక పక్క నిధులు ఇవ్వక, మరో పక్క డిజైన్ లు ఆమోదం లభించక, ఈ ప్రాజెక్ట్ ఇలా సాగుతుంటే, ప్రతిపక్షాలకు మోడీని అడిగే దమ్ము లేదు కాని, చంద్రబాబు మీద పడిపోతూ ఉంటారు. ఇది ఇలా ఉండగా, ఈ ఫ్లై ఓవర్ పై తాజా అప్డేట్ వచ్చింది. కనకదుర్గ ఫ్లై ఓవర్ డిజైన్ లను, ఎట్టకేలకు ఖరారు చేసింది. అంతర్జాతీయ ప్రమాణాలతో ముంబయికి చెందిన ఓ సంస్థ వీటిని రూపొందించింది.

ఫ్లై ఓవర్ నిర్మాణం వచ్చే ఏడాది జనవరి నాటికి పూర్తి చేయాలని లక్ష్యంగా పెట్టుకున్నారు. జనవరి 26న గణతంత్ర దినోత్సవం నాడు ప్రారంభోత్సవానికి సిద్ధం చేస్తామని సోమా కనస్ట్రక్షన్‌ సంస్థ ఎండీ హామీ ఇచ్చారు. వచ్చేఏడాది సంక్రాంతి నాటికి పూర్తి చేయాలని రాష్ట్ర ముఖ్యమంత్రి చంద్రబాబునాయుడు ఆదేశించారు. దీనికి జనవరి 26కు అవకాశం ఇవ్వాలని ఎండీ కోరినట్లు తెలిసింది. కనకదుర్గ ఫ్లై ఓవర్ నిర్మాణంపై గురువారం ముఖ్యమంత్రి చంద్రబాబునాయుడు అధికారులతో సమీక్షించారు. వచ్చే ఏడాది జనవరికి ఎట్టి పరిస్థితుల్లో అందుబాటులోకి తేవాలని ఆయన ఆదేశించారు. ప్రస్తుతం 70శాతం పనులు పూర్తయ్యాయి. 62 శాతం బిల్లులు చెల్లించారు. బిల్లుల చెల్లింపుల్లో కేంద్రం నుంచి కొంత సమస్య ఉందని అధికార వర్గాలు అంటున్నాయి.

ఫ్లై ఓవర్ మలుపు తిరిగే ప్రాంతంలో డయాగ్నల్‌గా నిర్మాణం చేయాల్సి ఉంది. అక్కడ సరిపడే స్థలం లేకపోవడంతో పియర్స్‌ ఒకవైపే నిర్మాణం చేయాల్సి ఉంది. దీనికి ఆకృతులను కేంద్రం మొదట తిరస్కరించింది. ఎట్టకేలకు ముంబయికి చెందిన సంస్థ రూపొందించి అంతర్జాతీయ సంస్థతో ధ్రువీకరణ పొందడంతో సీడీఓ ఆమోదం తెలిపింది. నగరపాలక సంస్థ పంపుహౌస్‌ దగ్గర రెండు పిల్లర్లు, నదిలో రెండు పిల్లర్లు, దర్గా ప్రాంతంలో రెండు పిల్లర్లను ఈ విధంగా నిర్మాణం చేయనున్నారు. సాధారణంగా పిల్లర్‌ మీద రెండు వైపులా పియర్స్‌ ఏర్పాటు చేసి వాటిపై స్పాన్‌లు ఏర్పాటు చేస్తారు. సాదారణంగా 16 మీటర్లకు రెండు పియర్స్‌ ఏర్పాటు చేయాల్సి ఉంటుంది. ప్రస్తుత డిజైన్ల ప్రకారం 16 మీటర్లకు ఒకవైపు ఒక పియర్‌ ఏర్పాటు చేస్తారు. అయితే ఎట్టకేలకు డిజైన్ ల ఆమోదం లభించటంతో, నిర్మాణం త్వరితగతిన పూర్తి చేయాలని రాష్ట్ర ప్రభుత్వం ఒత్తిడి పెంచుతోంది.

జనసేన అధినేత పవన్‌ కల్యాణ్‌ ఉత్తరాంధ్ర పర్యటనలో చేస్తున్న వ్యాఖ్యలు ఆయన అవగాహన రాహిత్యానికి నిదర్శనమని సబ్బం హరి పేర్కొన్నారు. వివాదాలు సృష్టించడానికే పవన్‌ మాట్లాడుతున్నారని మాజీ ఎంపీ సబ్బంహరి అన్నారు. టీటీడీలో పింక్‌ డైమండ్‌ లేదని మాజీ ఈవోలంతా నిర్ధారించారని గుర్తు చేశారు. అయినా పవన్‌ పదేపదే అదే విషయాన్ని ఎందుకు లేవనెత్తుతున్నారని ప్రశ్నించారు. ఎయిర్ పోర్ట్ ఎరైవల్ బ్లాక్ లో ఉంటే, డిపాచర్ అవుతున్న ఒక ఐఏఎస్ వచ్చి నాతో చెప్పారు అంటుంటేనే, పవన్ కధలు చెప్తున్నాడని అర్ధమవుతుందని, ప్రపంచంలో ఎంత అంతర్జాతీయ ఎయిర్ పోర్ట్ లో అయినా, చిన్న ఎయిర్ పోర్ట్ లో అయినా, ఎరైవల్ బ్లాక్, డిపాచర్ బ్లాక్ వేరు వేరుగా ఉంటాయని, ఆ మాత్రం కూడా తెలియకుండా, పవన్ కధ అల్లడని అన్నారు.

రాష్ట్రంలో పెట్టుబడులు పెట్టేందుకు పారిశ్రామికవేత్తలు భయపడుతున్నారన్న వ్యాఖ్యలు కూడా అవగాహన రాహిత్యంతో కూడుకున్నవేనన్నారు. తనవల్లే అశోక్‌ గజపతి రాజు గెలిచారని, తన వల్లే టీడీపీ అధికారం అనుభవిస్తోందన్న పవన్‌ వ్యాఖ్యలు హాస్యాస్పదమని తెలిపారు. ‘‘1983 నుంచి ఇప్పటిదాకా అశోక్‌ గజపతి రాజు ప్రతి ఎన్నికలో గెలుస్తున్నారు. 30 ఏళ్లుగా గజపతులు అనుభవించిన పదవులు ఎవరి దయతో వచ్చాయో చెప్పాలి. 1983లో ఆయన గెలిచినప్పుడు పవన్‌ స్కూల్‌లో ఉండి ఉంటారు. తనవల్లే అశోక్‌గజపతిరాజు పదవులను అనుభవిస్తున్నారన్న మాటలను ఉత్తరాంధ్ర ప్రజలు అసహ్యించుకుంటున్నారు. అక్కడ పవన్‌పై వ్యతిరేకత వచ్చింది’’ అని పేర్కొన్నారు.

‘జగన్‌, పవన్‌ బీజేపీ డైరెక్షన్‌లోనే పని చేస్తున్నారు. రాష్ట్రానికి అన్యాయం చేస్తున్నా బీజేపీని వారు నిలదీస్తారని ఆశించడం అనవసరం. కేంద్రంలో బీజేపీని అధికారంలోకి తీసుకురావడమే వారి లక్ష్యం. వచ్చే ఎన్నికల్లో వైసీపీ, జనసేన కలిసి పోటీ చేయవచ్చు’’ అని అన్నారు. ‘‘భవిష్యత్తు అవసరాల కోసం ఏపీలో బీజేపీ రాజకీయ క్రీడను ప్రారంభించింది. అందులో భాగంగానే పవన్‌, జగన్‌ ఆడుతున్నారు. వచ్చే ఎన్నికల్లో బీజేపీతో వైసీపీ కలవదు. పవన్‌, జగన్‌ కలిసి పోటీ చేసి... ఎన్నికల అనంతరం బీజేపీకి మద్దతు ఇస్తారు. అందుకు అనుగుణమైన వాతావరణాన్ని బీజేపీ సృష్టిస్తుంది’’ అని సబ్బం హరి పేర్కొన్నారు.