news

బెజవాడ నగరంలోకి ఈ-రిక్షాలు ప్రవేశిస్తున్నాయి. వీటికి కూడా ఇక రిజిస్ర్టేషన్‌ తప్పనిసరి చేయాలని రవాణా శాఖ నిర్ణయం తీసుకుంది. జిల్లా వ్యాప్తంగా వీటిని నిరభ్యంతరంగా కొనుగోలు చేసుకోవచ్చు. సాధారణ ఆటోల మాదిరిగానే వాటికి కూడా రిజిస్ర్టేషన్‌ ప్రక్రియను అధికారులు పూర్తి చేస్తారు. ఈ-రిక్షాలకు అనుమతులు ఇవ్వటంతో పాటు నగరంలో వీటిని తప్పనిసరి చేసే అంశాన్ని రవాణా శాఖ పరిశీలిస్తోంది. నగరంలో ఈ-రిక్షాలను తప్పనిచేసే ముందు ఆటో యూనియన్ల అభిప్రాయం కూడా తీసుకుని, వారి అంగీకారంతో ముందుకు వెళ్ళాలన్న ఆలోచనతో రవాణా శాఖ ఉంది. రవాణా రంగ రాజధానిగా ఉన్న విజయవాడ నగరంలో ఆటోల వ్యవస్థను సంస్కరించి, ఈ-రిక్షాలను ప్రవేశ పెట్టాలన్న ఆలోచనను జిల్లా రవాణా శాఖ చేస్తోంది.

ఈ-రిక్షాలకు ప్రాధాన్యత ఇవ్వాలని సీఎం చంద్రబాబు కూడా పదే పదే చెబుతున్న నేపథ్యంలో, రాజధాని ప్రాంతంలో కీలకమైన విజయవాడ నగరంలో కాలుష్య రహిత సరికొత్త ఆటో వ్యవస్థను తీసుకు రావటానికి ఈ-రిక్షాలను రవాణా శాఖ ప్రత్యామ్నాయంగా భావిస్తోంది. విజయవాడ నగరంలో తిరుగాడే ఆటోల స్థానంలో ఈ-రిక్షాలను ప్రవేశపెట్టడానికి అనుసరించాల్సిన విధి విధానాలపై అధ్యయనం చేస్తోంది. నగరంలో 30 వేల ఆటోలు ఉన్నాయి. వీటన్నింటినీ ఈ-రిక్షాలుగా మార్చమని ప్రభుత్వమేమీ నిర్దేశించలేదు. ఉత్తర్వులూ ఇవ్వలేదు. అలాగని రవాణా శాఖ ఉన్నతాధికారులు కూడా దీనికి సంబంధించి మార్గదర్శకాలను నిర్దేశించలేదు. అయినప్పటికీ నగరంలో కాలుష్య తీవ్రతను తగ్గించటానికి ఈ-రిక్షాలను తప్పనిసరి చేయాలన్న ఆలోచనతో జిల్లా రవాణా శాఖ ఉంది.

ఆటోవాలాల అభిప్రాయం తీసుకుని, వారి నుంచి వచ్చిన స్పందనను రవాణా శాఖ కమిషనర్‌ బాలసుబ్రహ్మణ్యం దృష్టికి తీసుకు వెళ్ళి, అమలుకు శ్రీకారం చుట్టాలని డీటీసీ మీరాప్రసాద్‌ భావిస్తున్నారు. నగరంలో 30 వేల ఆటోలున్నాయి. వీటిలో సీఎన్‌జీ ఆటోలు ఆరు వేలు ఉన్నాయి. 24 వేల ఆటోలు డీజిల్‌, పెట్రోల్‌తో నడిచేవే. విజయవాడకు అతి సమీపంలో ఉన్న గన్నవరం, పెనమలూరు, కంకిపాడు, ఇబ్రహీంపట్నం మండలాల పరిధిలో ఉన్న పాత ఆటోల స్థానంలో కొత్తగా సీఎన్‌జీ ఆటోలకు అనుమతులు ఇచ్చారు. వీటిని వెంటనే ఈ-రిక్షాలుగా మార్చడం భావ్యం కాదని రవాణా శాఖ అధికారులు భావిస్తున్నారు. సీఎన్‌జీ ఆటోలతో కాలుష్యం ఉండదు కాబట్టి వీటిని మినహాయించాలని భావిస్తున్నారు. 24 వేల పాత ఆటోలను ఈ-రిక్షాలుగా మార్చడం అవసరమని భావిస్తున్నారు.

రాష్ట్రం పై కేంద్రం డేగ కన్ను వేసిందని, మనం ఎక్కడ దొరుకుతామా అని చూస్తున్నారని, అందుకే ప్రతి పనిలో అధికారులు అప్రమత్తంగా ఉండాలని సీఎం చంద్రబాబు హెచ్చరించారు. ఎక్కడా చిన్న తప్పు కూడా జరగకూడదని, కేంద్రం మార్గదర్శకాలను తూచ తప్పకుండా పాటించాలని స్పష్టం చేశారు. రాబోయే మూడు నెలలు వ్యవసాయానికి కీలకమైనందున రైతులకు ఇబ్బందుల్లేకుండా చూడాలని ఆదేశించారు. గుంటూరు జిల్లా ఉండవల్లిలోని తన నివాసం నుంచి జిల్లా కలెక్టర్లు, పలు శాఖల ఉన్నతాధికారులతో సీఎం చంద్రబాబు టెలికాన్ఫరెన్స్ నిర్వహించారు. నకిలీ విత్తనాలు, పంటలకు తెగుళ్ల బెడద, ఎరువుల కొరత, విద్యుత్ కోతలు లేకుండా చర్యలు చేపడుతున్నట్లు తెలిపారు. ఖర్చులు తగ్గిస్తూ, దిగుబడులను పెంచేందుకు చర్యలు చేపట్టామని, మార్కెటింగ్ సమస్యలు కూడా లేకుండా చూస్తున్నట్లు తెలిపారు.

ఈ ఏడాది బిందు, తుంపర సేద్యాన్ని మరింత ప్రోత్సాహించాలని తెలిపారు. విత్తులు, నాట్లకు అనుకూలత పై ప్రచారం చేయాలన్నారు. చెరువుల్లోకి నీరు చేరిందని, రైతులు డిజిటల్ మహిళా అసిస్టెంట్ల సేవలను వినియోగించుకోవాలని కోరారు. వాతావరణ మార్పులపై ఎప్పటికపుడు రైతులకు సమాచారం అందుబాటులో ఉండేలా చర్యలు చేపట్టాలన్నారు. వ్యవసాయానికి సాంకేతికను అనుసంధానం చేయటం వల్ల మరింత ప్రయోజనం ఉంటుందని, పంటల సాగు నమోదుకు ఈ - పంట యాప్ ను వినియోగించాలని చెప్పారు. మూడు నెలలో రూ.2,500 కోట్ల ఉపాధి నిధులను ఖర్చు చేశామని, మరో రూ.1,600 కోట్లను సద్వినియోగం చేసుకోవాల్సి ఉందన్నారు. ఐదు వేల కిలో మీటర్ల సిమెంట్ రోడ్లు, మూడు వేల కిలో మీటర్ల అప్రోచ్ రోడ్ల నిర్మాణాలను వేగవంతం చేయాలన్నారు.

ఘన, ద్రవవ్యర్థాల నియంత్రణ వ్యవస్థ పై ప్రత్యేకంగా దృష్టి కేంద్రీకరించాలని సూచించారు. గ్రామీణాభివృద్ధిశాఖకు 11 అవార్డులు లభించినందుకు ఆ శాఖ అధికారులను సీఎం చంద్రబాబు అభినందించారు. మూడు నెలలో 1.05 లక్షల ఇళ్ల నిర్మాణాలను పూర్తి చేశామన్నారు. ఇదిలావుండగా, గృహ ప్రవేశాలను గిన్నిస్ బుక్ లో నమోదు చేసే అంశాన్ని పరిశీలించాలని అధికారులకు సూచించారు. టెలికాన్ఫరెన్స్లో మంత్రి కాల్వ శ్రీనివాసులు, జల వనరులశాఖ ముఖ్య కార్యదర్శి శశిభూషణకుమార్, వ్యవసాయశాఖ ప్రత్యేక ప్రధాన కార్యదర్శి బీ రాజశేఖర్, పంచాయతీరాజ్ శాఖ ముఖ్య కార్యదర్శి కెఎస్ జవహర్ రెడ్డి, డైరెక్టర్ రంజిత్ భాషా, ఆర్డబ్ల్యుఎస్ ముఖ్య కార్యదర్శి రామాంజనేయులు, గృహనిర్మాణశాఖ కార్యదర్శి కాంతిలాల్ దండే తదితరులు పాల్గొన్నారు.

ఎన్నికల ముందు సీఎం చంద్రబాబు ఏలేరు రైతులకు ఇచ్చిన మాట నెరవేరింది. దాదాపు నాలుగైదు నియోజకవర్గాల ఎమ్మెల్యేల కృషి ఫలించింది. ఏలేరు, విశాఖ నగరం పారిశ్రామిక అవసరాలకు నీటిని విడుదల చేసేందుకు రూ.1,698 కోట్లతో నిర్మించిన సీతానగరం మండలంలోని పురుషోత్తపట్నం ఎత్తిపోతల పథకం పూర్తి స్థాయిలో సిద్ధమైంది. ఈ రోజు ఉదయం 10.45 గంటలకు పురుషోత్తపట్నం ఎత్తిపోతల పథకం నుంచి నీటిని విడుదల చేసారు. ఒక్కో పంపు నుంచి 350 క్యూసెక్కుల నీటిని విడుదల చేసేలా 10 మోటార్లు, 10 పంపులు సిద్దం అయ్యాయి. ఖరీఫ్ సాగు సమయంలో ఏలేరు జలాశయానికి, విశాఖ పారిశ్రామిక అవసరాలకు మొత్తం 23. 44 టీఎంసీల నీటిని సరఫరా చెయ్యనున్నారు.

ఈ పథకానికి గత ఏడాది జనవరి 5న పిఠాపురంలో ముఖ్యమంత్రి చంద్రబాబు నాయడు శంకుస్థాపన చేయగా అదే ఏడాది ఆగస్టు 15న ముఖ్యమంత్రి చంద్రబాబు చేతుల మీదుగా ప్రారంభించినట్లు వివరించారు. మొదటి దశలో రెండు పంపుల ద్వారా ఏలేరుకు 15 టీఎంసీల నీటిని అందించారు. పూర్తి స్థాయిలో పనులు చేపట్టేందుకు సాంకేతిక ఇబ్బందులు తలెత్తడంతో పనులు ముందుకు సాగలేదు. ప్రస్తుతం పనులన్నీ పూర్తయ్యాయి. ఖరీఫ్లో ఏలేరు అయకట్టు పరిధిలోని 67,614 ఎకరాల పంట భూములను స్థిరీకరించేందుకు పురుషోత్తపట్నం ఎత్తిపోతల పథకం ఉపయోగపడుతుంది. పోలవరం ఎడమ ప్రధాన కాలువ పరిధిలోని పిఠాపురం బ్రాంచ్ కెనాల్ చివరి ఆయకట్టు భూములకు సాగునీరు చేరుతుంది. గోదావరి కనిష్ట నీటి మట్టం 14 మీటర్లకు చేరితే 10 మోటార్ల ద్వారా 3,500 క్యూసెక్కుల నీటిని సరఫరా చేసుకోవచ్చు.

జిల్లాలోని జగ్గంపేట, పెద్దాపురం, ప్రత్తిపాడు, పిఠాపురం నియోజకవర్గాల్లోని 63వేల ఎకరాల్లో రైతులు ఏలేరు నీటిని ఆధారంగా చేసుకుని సాగు చేస్తుంటారు. మరోపక్క ఏలేశ్వరం, ప్రత్తిపాడు, జగ్గం పేట, గండేపల్లి మండలాల్లోని గ్రామాలకు రక్షిత మంచినీటిని సైతం ఏలేరు నుంచి సరఫరా చేస్తున్నారు. ఏలేరు ప్రాజెక్టులోకి వర్షాకాలంలో మాత్రమే నీరు వచ్చి చేరుతుంది. గతంలో వర్షాలు అధికంగా పడడంతో ఏలేరు ప్రాజెక్టు ఎప్పుడూ నిండుకుండలా దర్శనమిచ్చేది. రానురాను వర్షాలు తగ్గు ముఖం పట్టడంతో 24 టీఎంసీల సామర్థ్యం కలిగిన ప్రాజెక్టు కేవలం రెండు టీఎంసీల దిగువస్థాయికి నీటి సామర్ధ్యం చేరుకుంటోంది. దీంతో ఇటు సాగుకు అటు తాగడానికి నీరు లేకుండాపోతోంది. మరోపక్క ప్రాజెక్ట్ లో ఉన్న ఆతిస్వల్ప నీటిని కొంతమేర వైజాగ్ స్టీల్ ప్లాంట్ కు కచ్చితంగా సరఫరా చేసేస్తున్నారు. దీనివల్ల ఇక్కడ సాగు చేసుకునే రైతులు తాగడానికి మంచినీరు లేని ప్రజలు తీవ్ర ఇబ్బందులు పడుతున్నారు.

ఈ విషయాలను గుర్తించిన చంద్రబాబు ఎన్నికల సమయంలో గోదావరి నీటిని ఏలేరుకు అనుసంధానం చేసి రైతులను ఆదుకుంటామని హామీ ఇచ్చారు. హామీలో భాగంగా పురుషోత్తపట్నం ప్రాజెక్టు నిర్మించి మెట్టసీమకు నీరందించడానికి సిద్ధమయ్యారు. దీంతో ఏలేరు రైతులు హర్షాతిరేకాలు వ్యక్తం చేస్తున్నారు. ఏలేరు ప్రాజెక్టులోకి సరిపోగా అదనంగా మిగిలి వచ్చే నీటిని కృష్ణవరం వద్ద ఏర్పాటు చేసిన చెక్ డ్యామ్ నుంచి ఏలేరు కాలువకు తరలించి శివారు ఆయకట్టు వరకు నీరందించడానికి ప్రణాళికలు తయారుచేశారు. ఇదే నీటిని విశాఖకు తరలించి అక్కడ ఏర్పాటు చేసిన సుజలస్రవంతి పథకం ద్వారా విజయనగరం, శ్రీకాకుళం, విశాఖపట్న జిల్లాలకు పూర్తిస్థాయిలో రక్షితనీరు అందించడానికి సిద్ధంగా ఉన్నారు.