news

విశాఖకు మరో మణిహారం రానుంది. గేమింగ్ ప్రపంచాన్ని శాసించేలా ‘డిజైన్ యూనివర్సిటీ’ నెలకొల్పేందుకు యునైటెడ్ నేషన్స్ ఎడ్యుకేషనల్, సైంటిఫిక్, కల్చరల్ ఆర్గనైజేషన్ (యునెస్కో) ముందుకొచ్చింది. ‘గేమింగ్-డిజిటల్ లెర్నింగ్ హబ్’ ఏర్పాటుకు సంబంధించి ఇప్పటికే ఆంధ్రప్రదేశ్ ఆర్ధికాభివృద్ధి బోర్డు(ఏపీఈడీబీ)తో ఒప్పందం కుదుర్చుకున్న యునెస్కో ప్రతినిధి బృందం బుధవారం ముఖ్యమంత్రి నారా చంద్రబాబు నాయుడుతో సమావేశమైంది. విశాఖను ఇంటర్నేషనల్ గేమింగ్, డిజిటల్ లెర్నింగ్ హబ్‌గా తీర్చిదిద్దేందుకు సిద్ధంగా వున్నామని, ఇందుకోసం వంద ఎకరాల భూమిని కేటాయించాలని యునెస్కో బృందం ముఖ్యమంత్రిని కోరింది.

భవిష్యత్‌లో గేమింగ్ టెక్నాలజీ ఉత్తమ ఆదాయ వనరుగా వుంటుందని, యుబీ సాఫ్ట్, శాంసంగ్, మైక్రోసాఫ్ట్ వంటి అత్యుత్తమ సంస్థలు సైతం తమ సెంటర్లు ఇక్కడ ఏర్పాటు చేసేందుకు సిద్ధంగా వున్నాయని యునెస్కో ప్రతినిధులు తెలిపారు. 10 ఏళ్లలో 50 వేల ఉద్యోగాల కల్పనే లక్ష్యంగా ఎడ్యుటెక్ గేమింగ్‌ను అభివృద్ధి చేస్తామని, మొత్తం భారతదేశంలోని గేమింగ్ మార్కెట్‌లో 25 శాతం ఏపీ నుంచే వుంటుందని ముఖ్యమంత్రికి యునెస్కో ప్రతినిధులు వివరించారు. లెర్నింగ్ డిజబిలిటీతో బాధపడే చిన్నారులకు ప్రత్యేక విద్యా బోధన, స్టార్టప్‌లకు వెంచర్ ఫండ్ అందివ్వడం, ఇంక్యుబేషన్ సెంటర్లు, గ్లోబల్ రీసెర్చ్ సెంటర్, డిజిటల్ ఎడ్యుకేషన్‌లో గ్లోబల్ సర్టిఫికేషన్ బ్యూరో, గేమింగ్-డిజిటల్ టీచర్ ట్రైనింగ్ అకాడమీ, గేమింగ్-డిజిటల్ స్కిల్ డెవలప్‌మెంట్ అకాడమీ ఈ హబ్‌లో భాగంగా వుంటాయని వెల్లడించారు.

ఆంధ్రప్రదేశ్‌ను నాలెడ్జ్ ఎకానమీ-ఇన్నోవేషన్ వ్యాలీగా అభివృద్ధి చేయాలని, గేమింగ్ టెక్నాలజీని అన్ని రంగాల్లోనూ వినియోగించేలా విస్తృత పరచాలని యునెస్కో బృందానికి ముఖ్యమంత్రి సూచించారు. గేమింగ్ టెక్నాలజీ ద్వారా నైపుణ్యాభివృద్ధిని పెంపొందించే ప్రయత్నం జరగాలని చెప్పారు. విద్యాప్రమాణాలు రూపొందించి ‘వైజాగ్ డిక్లరేషన్’గా ప్రాచుర్యం కల్పించాలన్నారు. సమావేశంలో ముఖ్యమంత్రి ముఖ్య కార్యదర్శి జి. సాయిప్రసాద్, ఏపీఈడీబీ సీఈవో జాస్తి కృష్ణ కిషోర్, యునెస్కో ఎంజీఐఈపీ ప్రతినిధులు అనంత దొరైయప్ప, నందిని చటర్జీ, అర్చనా చౌదరి, నాట్ మలుపిళ్లై, డాక్టర్ మనోజ్ సింగ్ పాల్గొన్నారు.

అబద్ధాలతో పెట్రేగి పోయే, బీజేపీ నేత జీవీఎల్ నరసింహారావు, మరో సారి తన అబద్ధాలతో, ప్రజలను మభ్యపెట్టే ప్రయత్నం చేసాడు. నిన్న జీవీఎల్ మాట్లాడుతూ, సీఎం చంద్రబాబు తన రాజకీయ ప్రయోజనాల కోసం రాష్ట్ర అభివృద్ధికి అడ్డుపడుతున్నారని, తనకు కమీషన్లు వచ్చే అభివృద్ధి పనులకు మాత్రమే అంగీకారం తెలుపుతున్నారని ఆరోపించారు. టీడీపీతో కలిసి ఉండడం వల్ల రాష్ట్రంలో తమ పార్టీ చాలా కోల్పోయిందని అన్నారు. రాజకీయ బ్రోకర్లు, కాంట్రాక్టర్‌ బ్రోకర్లను ఏదో ఒక పని పేరుతో తరచూ తన వద్దకు పంపవద్దంటూ ఒక కేంద్ర మంత్రి రాష్ట్ర ముఖ్యమంత్రికి, ఆయన కుమారుడు నారా లోకేశ్‌కు స్వయంగా చెప్పారంటే రాష్ట్రంలో అవినీతి విలయ తాండవాన్ని అర్థం చేసుకోవచ్చని వ్యాఖ్యానించారు. సొంత పనుల కోసం వచ్చే బ్రోకర్లను తన వద్దకు పంపవద్దని లోకేశ్‌కు కేంద్ర మంత్రి చెప్పారని గుర్తుచేశారు.

అయితే, జీవీఎల్ చెప్పిన అబద్ధాల పై, లోకేష్ ట్విట్టర్ లో స్పందించారు. జీవీఎల్ నరసింహారావుకు సవాల్ విసిరారు ఏపీ ఐటీ మంత్రి లోకేశ్. దమ్ముంటే తన ప్రశ్నలకు సమాధానాలివ్వాలని ట్విట్టర్ వేదికగా కోరారు. కేంద్రమంత్రి దగ్గరకు బ్రోకర్‌ను పంపానంటున్న జీవీఎల్... ఆ కేంద్రమంత్రి పేరు, బ్రోకర్‌ పేరును బయటపెట్టాలన్నారు. సహజంగా మనుషులు రెండు రకాలు ఉంటారని, ఒకటి నిజాలు చెప్పే వారు అయితే, అబద్ధాలను నిజమని నమ్మించే వారని అన్నారు. జీవీఎల్‌, అబద్ధాలను నిజమని నమ్మించే రకమని మండిపడ్డారు. . ఢిల్లీలో లాబీయింగ్ అంటూ మరో కట్టుకథ మొదలుపెట్టారని విమర్శించారు. అసత్యాలను ప్రచారం చేయడం బీజేపీ నేతలకు జబ్బుగా మారిందని లోకేశ్ ఎద్దేవా చేశారు.

మరో పక్క ఆంధ్రప్రదేశ్‌ రాష్ట్ర ప్రయోజనాల అంశంలో సుప్రీంకోర్టులో కేంద్ర ప్రభుత్వం దాఖలు చేసిన అఫిడవిట్‌పై రాష్ట్ర మంత్రులు మండిపడుతున్నారు. నారా లోకేశ్‌ ఈ విషయం పై కూడా ట్విట్టర్‌ లో స్పందించారు. సుప్రీంకోర్టులో కేంద్ర సర్కారు దాఖలు చేసిన అఫిడవిట్‌లో ఏపీకి ఏమీ ఇవ్వబోమని పేర్కొన్నారని, ఇది ద్రోహం, వంచనేనని అన్నారు. కాంగ్రెస్‌ ఏపీ ప్రజల నడ్డి విరిస్తే, బీజేపీ నమ్మకద్రోహం చేసిందని అన్నారు. ఆంధ్రప్రదేశ్‌ ప్రజలు బీజేపీకి మర్చిపోలేని గుణపాఠం చెబుతారని అన్నారు. బీజేపీ సిగ్గుపడాలని పేర్కొన్నారు.

మా అంత నీతిమంతులు, ఈ ప్రపంచలోనే లేరు, అసలు చరిత్రలో మా అంత విలువలు ఉన్న వారు లేరు అంటూ, రాష్ట్ర బీజేపీ నేతలు చెప్తూ ఉంటారు. మన రాష్ట్రంలో జగన్ టార్చర్ భరించలేక, తెలుగుదేశం పార్టీలో చేరిన వారి గురించి, ఎప్పుడూ ప్రశ్నిస్తూ ఉంటారు. అయితే, వారి ఆరాధ్య రాష్ట్రం, వారికి ఏంటో ఇష్టమైన గుజరాత్ లో జరిగిన సంఘటనకు, మరి ఏమి సమాధానం చెప్తారో. ఇది దేశ ప్రయోజనాల కోసం జరిగింది, ప్రజలే సర్దుకుపోవాలి అంటారేమో.. విషయానికి వస్తే, గుజరాత్‌లో సీనియర్‌ కాంగ్రెస్‌ నేత కున్‌వార్‌జీ బవలియా కాంగ్రెస్‌ పార్టీని వీడి భాజపాలో చేరారు. కాగా ఆయనకు గుజరాత్‌లోని భాజపా ప్రభుత్వం కొన్ని గంటల వ్యవధిలోనే క్యాబినెట్‌ మంత్రి పదవి కట్టబెట్టింది. అంతేకాకుండా ఆయనకు మూడు పోర్ట్‌ఫోలియోలు అప్పగించింది. నీటి సరఫరా, పశు సంరక్షణ, గ్రామీణ గృహ నిర్మాణం శాఖలను కున్‌వార్‌జీకి అప్పగించినట్లు చీఫ్‌ సెక్రటరీ జేఎన్‌ సింగ్‌ వెల్లడించారు. గాంధీనగర్‌లో ఈరోజు క్యాబినెట్‌ సమావేశం నిర్వహించిన అనంతరం ఈ నిర్ణయం తీసుకున్నట్లు తెలిపారు.

తనకు అప్పగించిన శాఖలన్నింటిపైనా తనకు ఆసక్తి ఉందని, అన్ని గ్రామీణ ప్రజలకు సంబంధించనవే అని, ఈ శాఖలకు తాను న్యాయం చేయగలననే నమ్మకం తనకు ఉందని బవలియా విలేకరులకు వెల్లడించారు. బవలియా రాజ్‌కోట్‌లోని జస్దాన్‌ స్థానం నుంచి కాంగ్రెస్‌ పార్టీ తరఫున అయిదు సార్లు ఎమ్మెల్యేగా ఎన్నికయ్యారు. కాగా నిన్న ఆయన కాంగ్రెస్‌ పార్టీకి రాజీనామా చేసి నేరుగా భాజపా కార్యాలయానికి వచ్చి భాజపాలో చేరారు. వెంటనే ఆయనను భాజపా ఆయనను క్యాబినెట్‌ మంత్రిగా నియమించి రాజ్‌భవన్‌కు తీసుకెళ్లి మంత్రిగా ప్రమాణం స్వీకారం చేయించింది. పరిణామాలన్నీ ఒకదాని తర్వాత ఒకటి చకచకా జరిగిపోయాయి.

కాంగ్రెస్‌ అధ్యక్షుడు రాహుల్‌ గాంధీ కుల రాజకీయాలు చేస్తున్నారని బవలియా ఆరోపించారు. సౌరాష్ట్ర ప్రాంతానికి చెందిన బవలియా కోలి వర్గానికి చెందిన వారు. ఆయన భాజపాలో చేరడంతో పార్టీకి ఆ ప్రాంతంలో ప్రభావం బాగా పెరిగే అవకాశం ఉంది. అక్కడ కోలి వర్గానికి చెందిన ప్రజలు ఎక్కువగా ఉంటారు. గత అసెంబ్లీ ఎన్నికల్లో సౌరాష్ట్రలో భాజపాకు ఆశించిన ఫలితాలు రాలేదు. గత ఎన్నికల్లో పటీదార్‌ కులానికి చెందిన వారు రిజర్వేషన్ల కోసం పోరాటం చేయడంతో భాజపాపై తీవ్ర ప్రభావం పడింది. సౌరాష్ట్రలోని 20 అసెంబ్లీ స్థానాల్లో కోలి వర్గానికి చెందిన వారు అధికంగా ఉన్నారు.