news

సొంత నియోజకవర్గమైన భీమిలి ప్రజల్లో తనపై అసంతృప్తి ఉందని వార్త రావడంతో గత మూడ్రోజులుగా ముభావంగా ఉంటూ.. ఎవరికీ అందుబాటులో లేకుండాపోయిన మంత్రి గంటా శ్రీనివాసరావును సీఎం చంద్రబాబు ఫోన్ చేసారు. "పత్రికల్లో రకరకాల సర్వేలు వేస్తుంటారు. వాటిని పట్టించుకోకూడదు. మన పని మనం చేసుకుంటూ వెళ్లాలి. నా పనితీరు కూడా బాగోలేదని వచ్చిందిగా. ఏదీ మనసులో పెట్టుకోవద్దు" అంటూ మంత్రి గంటా శ్రీనివాసరావును ముఖ్యమంత్రి చంద్రబాబు మాట్లాడారు. తన నియోజకవర్గమైన భీమిలిలో సక్రమంగా పనిచేయడం లేదని, ఆయన వెనుకబడిపోయారని ఇటీవల పత్రికల్లో వచ్చిన వార్తలతో తీవ్ర అసంతృప్తికి లోనైన గంటా శ్రీనివాసరావుకు సీఎం చంద్రబాబు ఫోన్ చేసి మాట్లాడారు.

‘శ్రీనూ! అన్నీ మనసులో పెట్టుకుంటే ఎలా? రాజకీయాల్లో ఉన్నప్పుడు అనేక విషయాలు మన చుట్టూ తిరుగుతుంటాయి. నా మీద కూడా రోజూ రకరకాల వార్తలు వస్తుంటాయి. ఏవేవో సర్వేలు వేస్తుంటారు. అవన్నీ పట్టించుకుంటే నేను పనిచేయలేను. ఇప్పుడు ఈ సర్వేలో కూడా నా పనితీరు బాగోలేదని కొన్ని నియోజకవర్గాల్లో అభిప్రాయపడినట్లు వేశారు. వాటిని ఫీడ్‌బ్యాక్‌గా తీసుకుని ముందుకు వెళ్తుండాలి. నన్ను దులిపేస్తూ అనేక వ్యాసాలు వచ్చిన రోజులున్నాయి. ప్రభుత్వ పనితీరుపై వ్యతిరేక కథనాలు వేస్తుంటారు. అధికారంలో ఉన్నప్పుడు ఇవన్నీ సహజం. టీం వర్క్‌తో పనిచేయాలి. అలా ముభావంగా ఉండొద్దు’ అని గంటాకు సూచించారు.

తనను లక్ష్యంగా చేసుకొని దాడులు జరుగుతున్నాయని, తన వ్యక్తిత్వాన్ని కించపరిచే ప్రయత్నం జరుగుతుంటే తట్టుకోలేకపోతున్నానని మంత్రి అన్నట్లు సమాచారం. ఇంత పెద్ద పార్టీలో అందరూ ఒకే మాదిరిగా ఉండరని సీఎం చెప్పారు. దీనికి ముందు గంటా వియ్యంకుడు, పురపాలక మంత్రి పి.నారాయణ కూడా ఆయనతో మాట్లాడినట్లు చెబుతున్నారు. చంద్రబాబు మాట్లాడాక గంటా వేదన కొంత తగ్గినట్లు కనిపిస్తోంద ని, గురువారం విశాఖలో జరిగే సీఎం కార్యక్రమానికి ఆయన హాజరవుతారని ఆశిస్తున్నామని టీడీపీ వర్గాలు తెలిపాయి.

ఏపీలో ఒక్క మెమోతో విద్యా శాఖకు చెందిన 21 వేల మంది ఉద్యోగులను తొలగించడం వింతగా ఉంది. ఉద్యోగుల తొలగింపు నిర్ణయాన్ని ఏపీ ప్రభుత్వం వెనక్కి తీసుకోవాలని’ అని బీజేపీ నేతలు విష్ణుకుమార్ రాజు, విష్ణువర్థన్ రెడ్డి నిన్న విమర్శించిన విషయం తెలిసిందే. ఈ విమర్శలకు ఏపీ ఎస్సీ కార్పొరేషన్ చైర్మన్ జూపూడి ప్రభాకర రావు కౌంటర్ ఇచ్చారు. సాక్షర భారత్ మిషన్ కార్యక్రమాన్ని నిలిపివేసింది కేంద్ర ప్రభుత్వమేన‌ని ఫ‌లితంగా 19,336 మంది గౌరవ వేతనం నష్టపోతారని ఎస్సీ కార్పోరేషన్ చైర్మన్ జూపూడి ప్రభాకరరావు తెలిపారు. వెల‌గ‌పూడిలోని సచివాలయంలో బుధవారం ఆయన మీడియాతో మాట్లాడారు. ఈ కార్యక్రమంలోని వాలంటీర్లను రాష్ట్ర ప్రభుత్వం తొలగించినట్లు మీడియాలో కథనాలు వచ్చాయని, అది నిజం కాదని ఆయన వివరణ ఇచ్చారు. సాక్షర భారత్ మిషన్ కార్యక్రమం కేంద్ర ప్రభుత్వ పథకమని, అది 2009లో ప్రారంభమైందని చెప్పారు. కేంద్ర రాష్ట్ర ప్రభుత్వాల నిధుల నిష్పత్తి 60:40 గా ఉంటుందని తెలిపారు.

కేంద్రం ఈ పథకాన్ని 2016లో, 17లో నిలిపివేస్తున్నట్లు చెబుతూ ఆ రెండేళ్లూ పొడిగిస్తూ వచ్చిందన్నారు. చివరకు ఈ ఏడాది మార్చిలో దీనిని నిలిపివేశారని చెప్పారు. ఈ పథకం కింద రాష్ట్రంలో 18,862 మంది గ్రామ కోఆర్డినేటర్లు, 494 మంది మండల కోఆర్డినేటర్లు పని చేస్తున్నారన్నారు. గ్రామ కోఆర్డినేటర్ కు నెలకు రూ.2,000, మండల కోఆర్డినేటర్ కు రూ.6,000 గౌరవవేతనం ఇచ్చినట్లు వివరించారు. ఈ కార్యక్రమం స్థానంలో పడో-పడావో కార్యక్రమం చేపట్టడానికి కేంద్రం రంగం సిద్ధం చేసిందన్నారు. ఈ కార్యక్రమాన్ని నిలిపివేసింది కేంద్ర ప్రభుత్వమని, అయితే బీజేపీ నేతలు విష్ణు కుమార్ రాజు, విష్ణువర్ధన రెడ్డిలు 21 వేల మందిని రాష్ట్ర ప్రభుత్వం తొలగించినట్లు ప్రచారం చేస్తున్నారని అన్నారు.

కేంద్రం ఈ కార్యక్రమాన్ని నిలిపివేయడం ద్వారా మధ్యప్రదేశ్ లో గత అక్టోబర్ లో 20వేల మందిని, గుజరాత్ లో 22వేల మందిని, రాజస్థానంలో 20వేల మందిని, చత్తీస్ గడ్ లో కూడా వేల మందిని తొలగించారని, దేశం మొత్తం మీద లక్ష మంది వరకు తొలగించారని వివరించారు. రాష్ట్ర అక్షరాశ్యత మిషన్ అథారిటీ వద్ద ఉన్న రూ.3.35 కోట్లు, రూ.54.92 లక్షలను తిరిగి ఇచ్చివేయాలని కేంద్ర ప్రభుత్వ ఆధ్వర్యంలోని జాతీయ అక్షరాశ్యత మిషన్ అథారిటీ ఆదేశించిందన్నారు. రాష్ట్రంలోని వాలంటీర్లను తొలగించకుండా కొనసాగించేందుకు ఒక కార్యాచరణ ప్రణాళిక రూపొందించాలని ముఖ్యమంత్రి చంద్రబాబు నాయుడు రెండు సార్లు కేంద్రానికి విజ్ఙప్తి చేస్తూ లేఖలు రాసినట్లు తెలిపారు. దీనిపై కేంద్రమే ఒక నిర్ణయం తీసుకోవలసి ఉందన్నారు. వారిని వాలంటీర్లుగా తొలగించకుండా రాష్ట్ర ప్రభుత్వం బాధ్యత తీసుకుందని, ముఖ్యమంత్రి ప్రత్యామ్నాయ ఆలోచన చేస్తున్నారని జూపూడి చెప్పారు.

ఉండవల్లిలోని ప్రజాదర్బార్‌లో బుధవారం అంగన్వాడీ కార్యకర్తలు, సాధికారమిత్రలతో జరిగిన సమావేశంలో ముఖ్యమంత్రి చంద్రబాబు పాల్గున్నారు. ఐదు కోట్ల మంది సంతృప్తిగా ఉండేందుకు, సమస్యల పరిష్కారం జరిగేందుకు సాధికార మిత్రలు సేవాభావంతో పనిచేస్తున్నారు. రాష్ట్రంలో మొత్తం 1.42 కోట్ల కుటుంబాలు ఉన్నాయి. ప్రతి 35 కుటుంబాలకు ఒక సాధికార మిత్రను నియమించాం. ప్రతి సాధికార మిత్ర తన పరిధిలోని కుటుంబాలకు ప్రభుత్వ పథకాలు అందుతున్నాయో లేదో చూసి అన్నీ అందేలా సాయం చేయాలి. ఎక్కడా, ఎవరికీ ఇబ్బంది లేకుండా చేయడం.. వారి పవిత్ర బాధ్యత’ అని తెలిపారు. రాష్ట్రంలో 90 శాతం ప్రజలు సంతృప్తిగా ఉండేలా చేయడమే తన లక్ష్యమని, అందుకోసం ఐదు లక్షల మంది సాధికార మిత్రల సైన్యం తనతో ఉందని తెలిపారు. ప్రతి కుటుంబం, ప్రతి గ్రామం ఆదర్శంగా తయారుకావాలన్నారు. ప్రతి కుటుంబం నెలకు రూ.10 వేల ఆదాయం ఆర్జించేలా.. ప్రభుత్వ సంక్షేమ పథకాలను కూడా అనుసంధానం చేసి అందేలా చూడాలని చెప్పారు. సమస్యలు, లోపాలుంటే ప్రభుత్వానికి చెప్పి పరిష్కరించాలన్నారు.

అయితే, ఈ సందర్భంలో, ఇద్దరు సాధికార మిత్రలు చేసిన ప్రసంగంతో, చంద్రబాబు ఫిదా అయ్యారు. కర్నూల్ జిల్లా నుంచి వచ్చిన, సావిత్రి అనే సాధికార మిత్ర మాట్లాడుతూ "‘సారూ! నేనిదే ఫస్ట్‌ మాట్లాడడం. నాకిచ్చిన 35 కుటుంబాలకు వెళ్లా. ఇద్దరికి ఇళ్లు మంజూరైనా బిల్లుల్లేవు. 8 మంది వృద్ధులకు పింఛన్లు లేవు. ఆ ఇద్దరికీ రూ.90వేలకు పైగా బిల్లులు మంజూరు చేయించా. ఆధార్‌ కార్డు ఆన్‌లైన్‌ కాకపోవడం వల్ల పింఛను రాలేదని తెలిసింది. ఇతర సాధికార మిత్రలతో కలిసి వెళ్లి ఆధార్‌ అనుసంధానం చేయించా. 15వ తేదీన దరఖాస్తు చేస్తే ఒకటో తేదీనే పింఛను వచ్చేసింది. అందరికీ వచ్చేసింది. నువ్వు, నీ కుటుంబం చల్లగా ఉండాలమ్మా అని తాతలు అన్నారు. ఈ దీవెనలు చంద్రన్నకు చెప్పాలి.. ఆయన పనే ఇది.. మళ్లీ వస్తాడని చెప్పా.’ అని అన్నారు.

అలాగే, కర్నూల్ జిల్లా నుంచి వచ్చిన, సుజాత అనే సాధికార మిత్ర మాట్లాడుతూ ‘నాకు కేటాయించిన ప్రతి ఇంటికీ తిరిగా. ఒక కుటుంబంలో భర్తకు రెండు కిడ్నీలు పోయాయి. డయాలసిస్‌ చేయిస్తున్నారు. చిన్న వయసే. భార్య నాతో చాలా బాధగా ఏడుస్తూ కష్టాలు చెప్పింది. ఆమె టీటీసీ చేసింది. ఆమె కష్టం చూసి ఏడుపొచ్చింది. ముఖ్యమంత్రి సదస్సుకు వెళ్తున్నా. నీ కష్టం చెప్తానని వచ్చా. మీరే ఏదైనా చేయాలి...’ దీని పై ముఖ్యమంత్రి వెంటనే స్పందించారు. కిడ్నీ బాధితుడికి రూ.2 లక్షలు తక్షణ సాయంగా ప్రకటించారు. సాధికార మిత్రలు తమ పరిధిలోని కుటుంబాలపై పూర్తి అవగాహన తెచ్చుకుంటే ఎలాంటి సేవ చేయగలరన్నదానికి ఈ ఇద్దరు సాధికార మిత్రలే ఉదాహరణని చెప్పారు.