news

జగన్ మోహన్ రెడ్డి బెయిల్ రద్దు చేయాలి అంటూ, గతంలో రఘురామకృష్ణం రాజు వేసిన పిటీషన్ పై, రెండు మూడు నెలలుగా వాదనలు జరిగి, చివరకు ఈ నెల 25వ తేదీకి కేసు తీర్పు ఇచ్చే విధంగా పిటీషన్ వాయిదా పడింది. ముఖ్యంగా సిబిఐ తీరు, ఇక్కడ అందరినీ ఆశ్చర్య పరిచింది. వాళ్ళు కౌంటర్ వేయకుండా, ఒకసారి వేస్తాం అని, ఒకసారి లేదని, మళ్ళీ వేస్తామని, చివరకు కోర్టు ఇష్టం అంటూ చెప్పిన విధానం పై చర్చ జరుగుతుంది. 25వ తేదిన ఏమి తీర్పు వస్తుందో కానీ, ఇప్పుడు మళ్ళీ విజయసాయి రెడ్డి బెయిల్ రద్దు చేయాలి అంటూ, రఘురామకృష్ణం రాజు, ఇప్పుడు మళ్ళీ కోర్టుకు వెళ్ళారు. ఈ రోజు విజయసాయి రెడ్డి బెయిల్ రద్దు పిటీషన్ పై, విచారణ జరిగింది. ఈ కేసులో పిటీషనర్ ప్రధానంగా నాలుగు అయిదు విషయాలు చెప్తూ, తన వాదన వినిపించారు. ముఖ్యంగా పిటీషన్ వేసిన తరువాత, తాము నోటీస్ పంపిస్తే, ఆ నోటీస్ ని విజయసాయి రెడ్డి తీసుకోలేదని, కోర్టు ఆర్డర్ ఇస్తే తప్ప తాము నోటీస్ తీసుకోమని చెప్పారు అంటూ, పిటీషనర్ తరుపు న్యాయవాది కోర్టుకు తెలిపారు. దీంతో కోర్టు స్పందిస్తూ, పిటీషనర్ రఘురామకృష్ణం రాజు ఇచ్చిన నోటీస్ కి మీరు ఎందుకు స్పందించటం లేదు అంటూ, విజయసాయి రెడ్డి తరుపు న్యాయవాదులను, సిబిఐ కోర్టు ప్రశ్నించింది.

ఒక పక్క వాళ్ళు ఇచ్చిన నోటీస్ కు సిబిఐ స్పందించింది కదా, మరి మీరు ఎందుకు స్పందించటం లేదు అంటూ, ప్రశ్నించారు. కోర్టు విజయసాయి రెడ్డి న్యాయవాదుల పై ఆగ్రహం వ్యక్తం చేసింది. ఇక ఇదే సమయంలో, సిబిఐ, విజయసాయి రెడ్డికి కూడా కౌంటర్ దాఖలు చేయాలి అంటూ, సిబిఐ ఆదేశాలు జారీ చేసింది. తదుపరి విచారణను సిబిఐ, ఈ నెల 13కు వాయిదా వేసింది. తదుపరి విచారణలో, వీళ్ళు వేసే కౌంటర్ ని బట్టి, దాన్ని ఆసరాగా తీసుకుని మరోసారి వాదనలు కొనసాగే అవకాసం ఉంది. ఇప్పటికే విజయసాయి రెడ్డి బెయిల్ కండీషన్లను ఉల్లంఘించారని, తరుచూ కేంద్ర మంత్రులను కలుస్తూ, ఢిల్లీలో ఆఫీస్ లు చుట్టూ తిరిగి, తనకు పెద్ద పెద్ద వాళ్ళతో సంబంధాలు ఉన్నాయనే విషయంతో, సాక్ష్యాలను ప్రభావితం చేస్తున్నారు అంటూ, ప్రధానంగా పిటీషనర్ ఆరోపించారు. మరి దీని పై విజయసాయి రెడ్డి ఎలాంటి కౌంటర్ ఇస్తారో చూడాలి. దీని పై విజయసాయి రెడ్డి, సిబిఐ ఇచ్చే కౌంటర్ ఆధారంగా, ఈ నెల 13న కోర్టు ఏమి ఆదేశాలు ఇస్తుందో చూడాలి.

విజయనగర మహారాజులు, త్యాగానికి పెట్టింది పేరు. వారు చేసిన త్యాగాలు ఇప్పటికీ చెప్పుకుంటూ, ఆ కుటుంబానికి గౌరవం ఇస్తూ ఉంటారు. ముఖ్యంగా మాన్సాస్ ట్రస్ట్ ఆధ్వర్యంలో నడిచే విద్యా సంస్థలకు మంచి పేరు ఇప్పటికీ ఉంది. రాజకీయంగా ప్రత్యర్ధులు ఉన్నా, మాన్సాస్ జోలికి మాత్రం, ఇప్పటి వరకు ఎవరూ వెళ్ళలేదు. రాజశేఖర్ రెడ్డి కూడా, రాజకీయంగా ఎదురుకున్నారే కానీ, ఏ రోజు అశోక్ గజపతి రాజుని ఎదుర్కోవటానికి, మాన్సాస్ ని అడ్డు పెట్టుకోలేదు. ఈ నేపధ్యంలోనే 2019లో వైసిపీ అధికారంలోకి వచ్చిన దగ్గర నుంచి, మాన్సాస్ ని టార్గెట్ చేస్తూ వచ్చారు. మన్సాస్ చైర్మెన్ గా ఉన్న అశోక్ గజపతి రాజుని టార్గెట్ చేయటం మొదలు పెట్టారు. ముఖ్యంగా గతంలో జగన్ మోహన్ రెడ్డి కేసులు విషయంలో, హైకోర్టుకు అశోక్ గజపతి రాజు ఫిర్యాదు చేసారు అనే కోపం కావచ్చు, ఆయన్ను టార్గెట్ చేసారు. మాన్సాస్ చైర్మెన్ గా అశోక్ గజపతి రాజుని రాత్రికి రాత్రి తొలగించి, ఆయన స్థానంలో, సంచయితను నియమించారు. అయితే దీని పై సుదీర్ఘంగా, ఏడాదికి పైగా జరిగిన న్యాయ పోరాటంలో, హైకోర్టు సంచయిత నియామకాన్ని రద్దు చేసింది. దీంతో మళ్ళీ అశోక్ గజపతి రాజు, మాన్సాస్ చైర్మెన్ గా నియామకం అయ్యారు. ఇక్కడ వరకు అంతా బాగానే ఉంది, కోర్టు ఆదేశాలు కాబట్టి ప్రభుత్వం ఏమి చేయలేక పోయింది.

ఇక తరువాత, ఈవో సహకరించటం లేదని, జీతాలు ఇవ్వటం లేదని, ఇలా అనేక వార్తలు వచ్చాయి. చివరకు ఇది కూడా కోర్టు ముందకు వెళ్ళటం, కోర్టు ఈవో ని చీవాట్లు పెట్టటం జరిగింది. ఇలా నడుస్తూ ఉండగానే, ఇప్పుడు మాన్సాస్ విషయంలో మరో ట్విస్ట్ నెలకొంది. మాన్సాస్ చైర్మెన్ గా తనని నియమించాలి అంటూ, ఆనందగజపతిరాజు కుమార్తె ఊర్మిళా గజపతి, హైకోర్టులో ఈ రోజు పిటీషన్ వేసారు. అశోక్ గజపతి రాజుని తొలగించి, తనను నియమించాలని పిటీషన్ వేసారు. ఈ కేసు రేపు హైకోర్టు ముందు విచారణకు రానుంది. అయితే ఇప్పటి వరకు సంచయిత తనని తీసేయటం పై అపీల్ చేయలేదు. ఈ నేపధ్యంలో ఉన్నట్టు ఉండి ఊర్మిళా గజపతి తెర పైకి రావటంతో అందరూ ఆశ్చర్య పోతున్నారు. సంచయితకు, ఊర్మిళకు పొసగదు. మరి ఊర్మిళ పిటీషన్ వెనుక ఎవరు ఉన్నారు, ఆమె ఉద్దేశాలు ఏమిటి ? ఇన్నాళ్ళు లేనిది , ఇప్పుడే ఆమె ఎందుకు పిటీషన్ వేసారు అనేది తెలియాల్సి ఉంది. అయితే ఈ పిటీషన్ పై రేపు హైకోర్టులో విచారణ జరగనుంది. మరి ఏమి జరుగుతుందో చూడాలి.

కేసులున్న ప్రజాప్రతినిధుల కేసులను ఏడాది లోగా విచారణ పూర్తి చేయాలి అంటూ గతంలో సుప్రీం కోర్టు ఆదేశాలు ఇచ్చిన సంగతి తెలిసిందే. అయితే ఈ ప్రక్రియలో కేంద్రం సహకారం లేకపోవటంతో, ఇది ముందుకు వెళ్ళ లేదు. దీంతో కేసులున్న ప్రజా ప్రతినిధులు ఊపిరి పీల్చుకున్నారు. ఇలాగే సాగదీయవచ్చు అని అనుకున్నారు. అయితే అనూహ్యంగా సుప్రీం కోర్టు ఈ రోజు వారికి షాక్ ఇచ్చేలా కీలక నిర్ణయం తీసుకుంది. ప్రజాప్రతినిధుల పై దాఖలైన సత్వర విచారణకు సంబందించిన పిటీషన్ ఈ రోజు సుప్రీం కోర్టులో విచారణ జరిగింది. దీనికి సంబంధించి గతంలో సుప్రీం కోర్టు నియమించిన అమికస్ క్యూరీ తన నివేదికను సుప్రీం కోర్టుకు అందచేసారు. అయితే సత్వర విచారణకు సంబంధించి, కేంద్ర ప్రభుత్వం తన వైఖరి వెల్లడించాలి అంటూ, గత ఏడాది నవంబర్ లో కేంద్రాన్ని సుప్రీం ఆదేశించింది. అయితే కేంద్రం ఇప్పటి వరకు కూడా ఎలాంటి కౌంటర్ వేయలేదు. దీంతో కేంద్ర ప్రభుత్వం పై చీఫ్ జస్టిస్ ఎన్వీ రమణ తీవ్ర ఆగ్రహం వ్యక్తం చేసారు. కేంద్ర ప్రభుత్వం జవాబు చెప్పక పొవటం, బాధ్యతారాహిత్యంగా పరిగణించాల్సి ఉంటుందని అన్నారు. కేంద్రం ఈ విషయం చాలా తేలికగా తీసుకుందని, ఈ కేసు విచారణ ఎంత త్వరగా పూర్తవ్వాలని అందరూ కోరుకుంటుంటే, కేంద్రం ఇప్పటి వరకు తమ వైఖరి చెప్పలేదని అన్నారు.

అయితే ఈ కేసులకు సంబంధించి, విచారణ తొందరగా అవ్వాలి అంటే, ప్రత్యేక ధర్మాసనం నియమించాలి అంటూ విజ్ఞప్తులు వస్తున్న నేపధ్యంలో, దీని పై కూడా తొందర్లోనే నిర్ణయం తీసుకుంటామని చెప్పారు. అలాగే మరో అంశం కూడా సుప్రీం కోర్టు స్పందిస్తూ, పలు రాష్ట్రాల్లో ప్రజాప్రతినిధుల పై దాఖలు అయిన కేసులను ఉపసంహరించుకుంటున్నాయని, అలా ఉపసంహరించుకోకుండా ఆదేశాలు జారీ చేయాలని కొంత మంది సుప్రీంని కోరటంతో, ఈ విధంగా హైకోర్టుల అనుమతి లేకుండా, ఈ విధంగా కేసులు ఉపసంహరణ చేయకూడదు అంటూ, సుప్రీం కోర్టు ఆదేశించింది. అలాగే మరో సంచలన ఆదేశం కూడా ఇస్తూ, ఈ కేసులు విచారణ చేస్తున్న న్యాయమూర్తులు కేసు అయ్యేంత వరకు రిటైర్డ్ అవ్వటం కానీ, బదిలీ అవ్వటం కానీ కుదరదు అనే అంశం కూడా తెలియ చేసారు. అయితే కేంద్రం పై సుప్రీం ఆగ్రహం వ్యక్తం చేస్తూ, పది రోజుల్లోగా కౌంటర్ వేయాలని, ఇదే చివరి అవకాసం అని హెచ్చరించారు. ఈ కేసుని 25వ తేదీకి వాయిదా వేసారు.